ମାତିସ୍ 11
11
ଯୀଶୁସ୍ ଆରୁ ଆସ୍ନାନ୍ ଚିଉ ଯୋହାନ୍ସ୍
(ଲୁକାସ୍ ୭:୧୮-୩୫)
1ଯୀଶୁସ୍ ତାଙ୍ଘା ବାର ଲୋକ୍ ଚେଲାରିନ୍ ଏନ୍ନେ ହୁକୁମ୍ ଚିଚ୍ଚକା ପାଛ୍ଲି, ଆସ୍ତି ବୁଙ୍ଗିୟାସ୍ ଆରୁ ଗାଲିଲୀ ପ୍ରଦେଶ୍ତା ସହର୍ନୁ ସୁସାମାଚାର୍ ପ୍ରଚାର୍ କାମ୍ତେ କେରାସ୍।
2ଜେହେଲ୍ନୁ ରାଇକିରି ଯୋହାନ୍ସ୍ ଯେତ୍କବାକେନ୍ ଖ୍ରୀସ୍ତ୍ସ୍କି ନାଲ୍ଖୁଘି ବାରେନୁ ମେନ୍ଚାସ୍, ଆରୁ ତାଙ୍ଘା ଚେଲାରିନ୍ ଯୀଶୁସ୍କି ଚାହାଗେ ଇବନ୍ ମେନାଗେ ତାଇୟାସ୍, 3“ଏକାସ୍ ବାର୍ନାବାଲା ରାଦାସ୍, ନିମ୍ ଆ ଆଲାର୍ କାଁଏ କା ଏମ୍ ଆରୁ ନାନ୍ନାର୍ଘି ପାବୁ ଏରମ୍?” 4ଯୀଶୁସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାସ୍, “କାଲା ନିମ୍ ଏକାନ୍ ଏର୍କାର୍ ଆରୁ ମେନ୍ଚ୍କାର୍, ଆବ୍ଡ଼ା ଜାମାନ୍ ଯୋହାନ୍ସିନ୍ ତେଙ୍କେ। 5କାଁଣାର୍ ଏର୍ନାଏ, ଲେଙ୍ଗ୍ଡ଼ାର୍ ଏକ୍ନାଏ, କୋଢ଼୍ ବେହ୍ମରିୟାର୍ ଶୁଦ୍ଧ୍ ମାନ୍ନାଏ, ଭାଇଁରାର୍ ମେନ୍ନାଏ, କେଚ୍ଚ୍କା ଆଲାର୍ ଉଜ୍ଜନାଏ, ଆରୁ ଗରୀବ୍ ଆଲାରିନ୍ ସୁସାମାଚାର୍ ମେନ୍ତାକାଇ। 6ଆରୁ ଧଏନ୍ ରାଦାସ୍ ଆସ୍, ଏକାସ୍ ଏଙ୍ଗାନ୍ ଗ୍ରହନ୍ କାମା ଅଙ୍ଗ୍ଦାସ୍ ଆରୁ ଏଙ୍ଘା ମିଆଁ ବିଶ୍ୱାସ୍ କାମ୍ତେ ରାଦାସ୍।”
7ଯୋହାନ୍ସ୍କି ତାଏକା ଚେଲାର୍ଘି ବୁଙ୍କା ପାଛ୍ଲି, ଯୀଶୁସ୍ ଯୋହାନ୍ସ୍କି ବାରେନୁ ଆଲାରିନ୍ ତେଙ୍ଗା ଲାଗ୍ଗିୟାସ୍, “ନିମ୍ ଜଙ୍ଗଲ୍ନୁ ଏନ୍ଦେନ୍ ଏରା କେର୍କାଚ୍କାର୍? ନିମ୍ ଧୁକାତି ନୁକର୍ନା ମୋଟା ମାସୁଁବନ୍ ଏରା କେର୍କାଚ୍କାର୍ କାଁଏ? ମାଲ୍ଲା! 8ତା ନିମ୍ ଏନ୍ଦେନ୍ ଏରା କେର୍କାଚ୍କାର୍? ଦାମିକାଚିଢ଼ା ଆତ୍ତୁ ଆଲାସିନ୍ କାଁଏ? ଏରା, ନେଦ୍ ମୁରୁକ୍ ଦାମ୍ଘି ଚିଢ଼ା ଆତ୍ତନାଏ, ଆବ୍ଡ଼ାର୍ ରାଜ୍ମହଲ୍ନୁ ରାନାଏ। 9ହାଲେ ନିମ୍ ଏନ୍ଦେନ୍ ଏରା କେର୍କାଚ୍କାର୍? ଏନ୍ଦେର୍ ଅଣ୍ଟା ନାବୀସିନ୍ ଏରାଗେ, ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ନାବୀସ୍ତିହି ବାଡ଼୍କା ଆଲାସିନ୍। 10ଇସ୍ ଆସିନ୍ ନେଖା ବାରେନୁ କା ଲେଖ୍ଚ୍କା ରାଇ:
‘ଏରା, ପାର୍ମେଶ୍ୱାର୍ସ୍ ତେଙ୍ଗାଲ୍ଦାସ୍ ଏନ୍ ଏଙ୍ଘାଏ ଦୂଁତ୍ବନ୍ ନିଙ୍ଘାସ୍ତି ଆଘ୍ଲି ତାଇୟାଲ୍ଦାନ୍
ଏକାସ୍ କା ନିଙ୍ଘା ଆଘ୍ଲି ନିଙ୍ଘାଏ ପାବୁ ତିୟାର୍ କାମସ୍।’
11ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ଏକାର୍ ମାଏକିନିଆଁର୍ସ୍ତି ଜନମ୍ ମାନ୍ଚ୍କା ଆଲାର୍ଘି ଭିତର୍ତି, ଆସ୍ନାନ୍ ଚିଉ ଯୋହାନ୍ସ୍ତି ବାଡ଼୍କା ନେଦ୍ହି ମାଲ୍କାରିନ୍, ଲେକିନ୍ ସରଗ୍ ରାଜୀନୁ ଏକାସ୍ ଜାମାର୍ଘିନ୍ତି ଛୋଟେ ରାଦାସ୍, ଆସ୍ ଯୋହାନ୍ସ୍ତି ବାଡ଼୍କାସ୍। 12ଆସ୍ନାନ୍ ଚିଉ ଯୋହାନ୍ସ୍କି ସାମାୟନ୍ତି ଇନ୍ନାତକ୍ ଆଲାର୍ ସରଗ୍ ରାଜୀଘି ଲାଗାନ୍ ବହୁତ୍ କୋଶିଷ୍ କାମାନାଏ ଆରୁ ଏକାର୍ଘିନୁ ଇଚ୍ଛା ରାଇ, ଆବ୍ଡ଼ାର୍ ଆଦ୍ଘି ମିଆଁ ଅଧିକାର୍ କାମ୍ନାଏ। 13ଯୋହାନ୍ସ୍କି ବାର୍ନାତକ୍ ନାବୀଜାମାର୍ ସରଗ୍ ରାଜୀଘି ବାରେ ଭବିଷତ୍ କାତ୍ଥା ତେଙ୍କାଚାର୍ ଆରୁ ମୁଶାସ୍କି ନିୟମ୍ନୁହି ସରଗ୍ ରାଜୀଘି ବାରେନୁ ଲେଖ୍ଚ୍କାରାଚା 14ଯଦି ନିମ୍ ମୁଶାସ୍କି ନିୟମ୍ ଆରୁ ନାବୀଜାମାର୍ ଏକାନ୍ ତେଙ୍କାନାଏ ଆବନ୍ ଗ୍ରହନ୍ କାମାଗେ ତିଆର୍ ରାଦାର୍ ତା ନେଖାଏ ବାର୍ନାଘି ଭବିଷତ୍ କାତ୍ଥା ତେଙ୍ଗାକେର୍କିଚା ଇ ଯୋହାନ୍ସ୍ ଆ ନାବୀ ଏଲିୟାସ୍ସିନ୍। 15ନେଖାଏ ମେନ୍ନାଘି ମନ୍ ରାଇ ଆବ୍ଡ଼ାର୍ ମେନା।”
16“ଆକ୍କୁନ୍ ତା ଆଲାରିନ୍ ଏନ୍ ନେଖାଗାନେ ତୁଲ୍ନା କାମନ୍? ଆବ୍ଡ଼ାର୍ ହାଟ୍ଟେନୁ ଅକ୍କା ହାଦ୍ଦୁର୍ ଲେଖା ଏକାର୍ କା ଅଣ୍ଟାସ୍ ଆରୁ ଅଣ୍ଟାସିନ୍ ଚିର୍ରା ରାଇକିରି ତେଙ୍ଗ୍ଦାସ୍:
17‘ଏମ୍ ନିହ୍ମା ଲାଗାନ୍ ବାଇଁସିରି ଉର୍କାମ୍,’
‘ଆରୁ ନିମ୍ ମା ନାଡ୍କାର୍,’
‘ଏମ୍ ଗାତ୍ରାରା-ଗାତ୍ରାରା ଅହ୍ଲକାମ୍,’
‘ଆରୁ ନିମ୍ ମା ଅହ୍ଲକାର୍।’”
18“ଏନ୍ଦେର୍ଗେକା ଆସ୍ନାନ୍ ଚିଉ ଯୋହାନ୍ସ୍ ବାର୍ଚାସ୍ ଆରୁ ଏକାସ୍ ନା ହାପ୍ପଦାସ୍ ନା ଅନ୍ଦାସ୍, ଆରୁ ଆବ୍ଡ଼ାର୍ ତେଙ୍ଗ୍ନାଏ, ‘ଆସ୍କେ ଭୁତ୍ତୁ ଲାକ୍କିଚି।’ 19ମୁନୁଷ୍ ହାଦ୍ଦୁସ୍ ବାର୍ଚାସ୍, ଏକାସ୍ କା ହାପ୍ପଦାସ୍-ଅନ୍ଦାସ୍ ଆରୁ ଆବ୍ଡ଼ାର୍ ତେଙ୍ଗ୍ନାଏ ଏରା, ଇ ଆଲାସ୍ ପେଟୁ ଆରୁ ମାତ୍ୱାଡ଼୍ସ୍, ମାଲ୍ଗୁଜାରୀ ଉକ୍ରୁସ୍ ଆରୁ ପାପୀର୍ଘି ସାଙ୍ଗେସ୍। ଲେକିନ୍ ପାର୍ମେଶ୍ୱାର୍ସ୍କି ବୁଝ୍ର୍ନାଦ୍ ସତ୍ତୁଦ୍ବୁଲି ତେଙ୍ଗିକିରି ଆସ୍କି ତାର୍ତି ସାବୁତ୍ ମାନ୍ଚ୍କିଚି।”
ବିଶ୍ୱାସ୍ ମା କାମୁର୍ଗେ ଯୀଶୁସ୍କି ଚେତାବାନୀ
(ଲୁକାସ୍ ୧୦:୧୩-୧୫)
20ଆନ୍ତିନ୍ ଯୀଶୁସ୍ ଆବ୍ଡ଼ା ସହର୍ଗୁଠିନ୍ ଧିକ୍କାର୍ କାମା ଲାଗ୍ଗିୟାସ୍, ଏକାସାନ୍ କା ଆସ୍ ଢେର୍ ଶକ୍ତିଘି ନାଲ୍ଖୁ କାମ୍ଚ୍କାଚାସ୍, ଏନ୍ଦେର୍ଗେକା ଆସ୍ତା ଆଲାର୍ ପାପ୍ବନ୍ ଆମ୍ବିକିରି ପାର୍ମେଶ୍ୱାର୍ସ୍କି ଚାହାଗେ ମା ବାର୍ଚାର୍। 21“ହାଏରେ, କୋରାଜୀନ୍! ହାଏରେ, ବେତ୍ସାଇଦା! ଏକା ଶକ୍ତିଘି ନାଲ୍ଖୁ ନିଙ୍ଘାସାନ୍ କାମାକେର୍କିଚା, ଯଦି ଆବ୍ଡ଼ାନ୍ ସୋର୍ ଆରୁ ସିଦୋନ୍ନୁ କାମାକେର୍କିରଦ୍ନେ, ହାଲେ ଆସ୍ତା ଆଲାର୍ ପାପ୍ ଆମ୍ବିକିରି ପାର୍ମେଶ୍ୱାର୍ସ୍କି ଚାହାଗେ ବାର୍ଚ୍କା ରନ୍ନେ। 22ଲେକିନ୍ ଏନ୍ ନିମାନ୍ ତେଙ୍ଗାଲ୍ଦାନ୍ ପାର୍ମେଶ୍ୱାର୍ସ୍ ଆଲାର୍ଘି, ନ୍ୟାୟ କାମ୍ନାଘି ଉଲ୍ଲାନୁ ସୋର୍ ଆରୁ ସିଦୋନ୍ ତା ଆଲାର୍ସ୍ତି ବାଗ୍ଗେ ଦଣ୍ଡ୍ ପାର୍ମେଶ୍ୱାର୍ସ୍ ନିମାଗେ ଚସ୍। 23ଆରୁ କାଫାର୍ନାହୁମ୍ ସହର୍ତା ଆଲାରୋ ନିମ୍ ଏନ୍ଦେର୍ ସୋଚାଲ୍ଦାର୍ କା ପାର୍ମେଶ୍ୱାର୍ସ୍ ନିମାନ୍ ସରଗ୍ତକ୍ ମିଆଁ ଉଠାବସ୍? ମାଲ୍ଲା, ପାର୍ମେଶ୍ୱାର୍ସ୍ ନିମାନ୍ କିୟାଁ ପାତାଲ୍ତକ୍ ଏତ୍ତଚସ୍, ଯଦି ଏନ୍ ନିହ୍ମା ସହର୍ନୁ ଏକା ଅଦ୍ଭୁତ୍ ନାଲ୍ଖୁ କାମ୍ଚ୍କାନ୍ ଆ ଅଦ୍ଭୁତ୍ ନାଲ୍ଖୁ ସଦୋମ୍ନୁ କାମାକେର୍କିରଦ୍ନେ ତା ଆ ସହର୍ତା ଆଲାର୍ ଇନ୍ନାତକ୍ ଉଜ୍ଜର୍ନେ। 24ଲେକିନ୍ ଏନ୍ ନିମାନ୍ ତେଙ୍ଗାଲ୍ଦାନ୍ କା ପାର୍ମେଶ୍ୱାର୍ସ୍ ଆଲାର୍ଘି ନ୍ୟାୟ କାମ୍ନାଘି ଉଲ୍ଲାନୁ ନିହ୍ମା ସହର୍ତା ଆଲାର୍ଗେ ସଦୋମ୍ ତା ଆଲାର୍ସ୍ତିହି ବାଗ୍ଗେ ଦଣ୍ଡ୍ ହାଖ୍ଖର।”
ଅତ୍ଥାତି କାଜ୍ର୍କା ଆଲାର୍ଘି ଲାଗାନ୍ ଆରାମ୍
(ଲୁକାସ୍ ୧୦:୨୧,୨୨)
25ହୁ ସାମାୟନୁ ଯୀଶୁସ୍ ତେଙ୍ଗିୟାସ୍, “ହେ ବାଙ୍ଗ୍, ସରଗ୍ ଆରୁ ଦୁନିଆଁନ୍ତା ପ୍ରାଭୁ, ଏନ୍ ନିମାନ୍ ଧାନ୍ୟାବାଦ୍ ଚିଆଲ୍ଦାନ୍ କା ନିମ୍ ଇବ୍ଡ଼ା ଜାମା କାତ୍ଥାଗୁଠିନ୍ ବୁଝ୍ର୍ନା ଆରୁ ବୁଦ୍ଧିୟାର୍ ଆଲାର୍ସ୍ତି ନୁଡ଼ିକିରି ଛୋଟେ ହାଦ୍ଦୁର୍ ଲେଖା ଆଲାର୍ସାନ୍ ପ୍ରକଟ୍ କାମ୍ଚ୍କାଦାର୍। 26ହଁ, ବାଙ୍ଗ୍ ଇଦିନ୍ ନିମାଗେ ବାନେ ଲାଗ୍ଗିୟାଦ୍।”
27“ଏଙ୍ଘା ବାଙ୍ଗ୍ସ୍ ଏଙ୍ଗାଗେ ଜାମାନ୍ ସୋଁପ୍ଚେଇ ଚିଚ୍କାଦାସ୍; ଆରୁ ପାର୍ମେଶ୍ଵାର୍ସ୍କି ହାଦ୍ଦୁସିନ୍ ନେଦ୍ହି ବାଲ୍ନାଇନ୍, ଖାଲି ବାଙ୍ଗ୍ ପାର୍ମେଶ୍ଵାର୍ସ୍ ଆହ୍ଦାସ୍; ଆରୁ ବାଙ୍ଗ୍ ପାର୍ମେଶ୍ଵାର୍ସିନ୍ ନେଦ୍ହି ବାଲ୍ନାଇନ୍, ଖାଲି ପାର୍ମେଶ୍ଵାର୍ସ୍କି ହାଦ୍ଦୁସ୍ ଆହ୍ଦାସ୍ ଆରୁ ଖାଲି ଆସ୍ ଆହ୍ଦାସ୍ ଏକାସ୍କି ମିଆଁ ପାର୍ମେଶ୍ଵାର୍ସ୍କି ହାଦ୍ଦୁସ୍ ଆହାଗେ କ୍ରିପା କାମ୍ଦାସ୍।”
28“ହେ ଥାକ୍ର୍କା ଆରୁ ଅତ୍ଥାତି କାଜ୍ର୍କା ଆଲାରୋ, ଏଙ୍ଘା ଚାହାଗେ ବାରା; ଏନ୍ ନିମାଗେ ଆରାମ୍ ଚିୟନ୍। 29ଏଙ୍ଘା ଭାର୍ ନିହ୍ମା ମିଆଁ ଉଠାବା ଆରୁ ଏଙ୍ଘାସ୍ତି ଶିଖ୍ରା; ଏନ୍ ମନ୍ତି ନରମ୍ ଆରୁ ସାଫା ରାଦାନ୍: ଇଦ୍ଘି ଲେଖା ନିମ୍ ନିଜର୍ ଆତ୍ମାଘି ଲାଗାନ୍ ଶାନ୍ତି ହାଖ୍ଖର୍। 30ଏନ୍ଦେର୍ଗେକା ଏଙ୍ଘା ପାକ୍ସି ସହଜ୍ ଆରୁ ଏଙ୍ଘା ଭାର୍ ହାଲ୍କା ରାଇ।”
હાલમાં પસંદ કરેલ:
ମାତିସ୍ 11: xis
Highlight
શેર કરો
નકલ કરો
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
