Mateo 21
21
Jesús edꞌa wãna Jerusalénne
(Marcos 11:1-11; Lucas 19:28-40; Juan 12:12-19)
1Jerusalén kꞌaita babʉdadꞌe, Betfagé pʉwʉrʉedꞌa zebʉdata Olivo kꞌatumaẽna zebʉdadꞌera Jesúsbara izha jʉrʉkuadꞌata ũme zokꞌabʉrʉta, 2mawũãsia: Pʉwʉrʉ zakeidꞌu wãũdua jari mazhi kĩrãbita tabꞌʉidꞌu. Marãbara ũdudꞌaya burra jʉ̃ nʉmʉta, burro kũrãsidꞌa izhi ũme ũdudꞌaya, burra ẽnape ũmewedꞌa mʉma weudua. 3Iabꞌaʉba widꞌira mawũãũdua: Nokꞌoba nesidꞌakuabʉrʉa, nane diabꞌarikuaya.
4Aramaʉ̃ne arimaẽ berabꞌarisia Daizezeba bedꞌeata jarabibariba mawũãnata:
5Jerusalénne bꞌea mawũãũdua: Marã Reyra marãma urua, Ibiadꞌe bꞌʉta burrodꞌe ʉ̃rʉ̃ jewedꞌa urua, burro kũrãne ʉ̃rʉ̃ urua nendʉwʉrʉ ne zʉgʉa ataubari waudꞌe. (Zacarías 9:9)
6Izha jʉrʉkuadꞌara wãnape osidꞌa Jesúsba jaradꞌa kĩrãkꞌa. 7Mawũẽ wesidꞌa burrata burro kũrãta, mobe ʉ̃rʉ̃ bꞌʉsidꞌa ãzhidꞌe wua ãnebꞌari panʉta, mobebʉrʉ Jesús jewedꞌasia ʉ̃rʉ̃. 8Kꞌabanabara bia edabʉdata ãzhidꞌe wua ãnebꞌari bꞌeta odꞌe ewarazoasidꞌa. Waya dewaraurãbara pãrãrã kiduata tʉdꞌape odꞌe tadꞌazoasidꞌa. 9Zhãrãbara na wãba tẽã uruba nemi jĩgua mawũãsidꞌa:
¡Bʉra ibia jaradꞌaya rey Davidꞌeba urura!
¡Ibia jaradꞌaya Daizezedꞌeba zebʉrʉra!
¡Daizezera ibia jaraudua ʉ̃trera! (Salmos 118:25-26)
10Aramaʉ̃ne Jesús Jerusalénne edꞌa wãbʉrʉdꞌera pʉwʉrʉdꞌebema jõma bꞌʉgadrʉ mawũãsidꞌa: ¿Naʉ̃ kꞌaipe?
11Maʉ̃nerã zhãrãbara mawũãsidꞌa: Naʉ̃ Jesústa Daizezeba bedꞌeata jarabibaria, Nazaret pʉwʉrʉdꞌebema, Galilea druadꞌebema.
Jesúsba miti ẽã odꞌa Daizeze deta
(Marcos 11:15-19; Lucas 19:45-48; Juan 2:13-22)
12Jesús edꞌa wãsia Daizeze dedꞌa ewara maẽ, mobe jõma ãĩ jʉrekuasia mama ne nendo bꞌeta, ne eda bꞌeta, mesara burekuasia plata kꞌãbiabadadꞌera, buguera burekuasia pusirã nendobadadꞌera. 13Mobe mawũãsia: Naʉ̃ẽnabemata zhi bꞌʉmata mawũã bꞌʉa: Mʉ dera zhiwidꞌibadata nʉmʉã adꞌaya. Mawũã bꞌʉdꞌera marãbara nezrʉgamiãrã de babi nʉmʉkꞌãrĩna.
14Daizeze dedꞌa ewara maẽ Jesús orrasidꞌa daʉbꞌerrea bꞌeba, wã bꞌe ẽã bꞌeba, mawũẽ bꞌebikuasia. 15Sacerdoterã nokꞌorãba, ũrãgꞌa Moisédꞌe jarabadaba mawũã biata obꞌʉta ũdubʉdadꞌera warrarãbara Daizeze dedꞌa ewara maẽ nemi jĩgua mawũãsidꞌa: ¡Ibia jaradꞌaya rey Davidꞌeba urura! Mawũãnaĩ kĩrũbʉdaba, 16mawũãsidꞌa: ¿Bʉara ũrĩ kꞌobꞌʉka naʉ̃rãba jara kꞌopanʉrã?
Mawũãnaĩ Jesúsbara mawũãsia: Ããjã, ¿maʉ̃ẽnabemata marãbara ledꞌakꞌa kĩrãkꞌa bꞌeta mawũã bꞌʉ ẽka:
Warrarã kedꞌea, ju do kedꞌea bʉzhita ibia jarabigaya abꞌʉ ẽka? (Salmos 8:2)
17Mawũãpe ãmaẽkuabʉrʉta Jerusalénnebara ãĩ wãsia Betania pʉwʉrʉedꞌa, mobe mama ʉ̃nadrʉsia.
Ikꞌazhirua jaradꞌa higuera zhi ta ne ẽãta
(Marcos 11:12-14, 20-26)
18Diapedꞌa wakusa Jerusalén pʉwʉrʉedꞌa zebʉrʉdꞌera jarrasia Jesús. 19Maʉ̃ne bakuru higuera o kꞌaita nʉmʉta ũdui maĩnu wãbʉrʉdꞌera maʉ̃nerã kꞌãrẽ ũdu ẽbasia, awuarabʉrʉ ũdusia zhi kiduatrʉ, mawũẽ mawũãsia: Bʉra wueta zau ẽbaya.
Audre ẽãne higuera bagusia.
20Izha jʉrʉkuadꞌaba maʉ̃ta ũdudꞌai bia akʉdrua mawũãsidꞌa: ¿Sãwũã kꞌãwũã aramaʉ̃ta bagu dogꞌo bakuru higuera?
21Mawũãnaĩ Jesúsbara panaʉ̃ mawũãsia: Mʉã wãrĩnu marãã jaraya, marãta soidꞌu bꞌebʉrʉ, marãma kꞌãrẽta bꞌe ẽãne duanu ẽbʉrʉ bari kꞌãwũã bakuru higuera kĩrãkꞌa odꞌa ẽã, awuarabʉrʉ kꞌatuma za nʉmʉã jarabʉdata: Ãĩ wãrũã, pusadꞌe doidꞌu wãrũã abʉdadꞌera aribꞌae nʉmaẽdaya. 22Jõma marãba widꞌibʉdara zhiwidꞌi soidꞌu kꞌobꞌebʉrʉ jidadꞌaya.
Zareata Jesúsdꞌe
(Marcos 11:27-33; Lucas 20:1-8)
23Daizeze dedꞌa ewara maẽ Jesús zebʉrʉdꞌera, sacerdoterã nokꞌorãbara, pʉwʉrʉ nokꞌorãbara izhira orrasidꞌa miã ũrãgꞌa nʉmʉne, mobe mawũãsidꞌa: ¿Kꞌaiba obi bꞌʉ bʉa obꞌʉra? ¿Kꞌaiba diasi kꞌãwũã zarea nʉmaĩrã?
24Mawũãnaĩ Jesúsbara panaʉ̃ mawũãsia: Mʉãbidꞌa marãã widꞌiya, marãba panaʉ̃narã mʉãbidꞌa marãã jaraya kꞌaiba obi bꞌʉta mʉã obꞌʉra. 25Zhãrã buru kꞌoemarẽã Juan, ¿kꞌaiba zokꞌasi? ¿Ʉ̃trebemaba o zhãrãba?
Mawũãĩ ãzhirãĩnu mawũãsidꞌa: Dazhirãba Ʉ̃trebemaba zokꞌasia adꞌara, ¿mobera kꞌãrẽã ĩjãna ẽbasi aya? 26Dazhirãba zhãrãba zokꞌasia adꞌaisidꞌa, dazhirãbara zhãrãta wawia bꞌea jõmaʉ̃ma Juan Daizezeba bedꞌeata jarabibarita bꞌʉ baera.
27Mobebʉrʉ panaʉ̃bʉdata Jesúa mawũãsidꞌa: Daibara kꞌawuadꞌa ẽã.
Mawũãnaĩ izhara mawũãsia: Mʉãbidꞌa marãã jara ẽã kꞌaiba obi bꞌʉra mʉã obꞌʉra.
Ne jaradꞌa warra ũmeneba
28¿Mawũãmina marãma sãwũãpe? Ũmakĩrãba erubꞌasia warrarãta ũme, mawũẽ zhi nabemata orrape mawũãsia: Warra, idꞌira trajadꞌe wãrũã mʉ uvadꞌe. 29Mawũãĩ izhara panaʉ̃ mawũãsia: Mʉrã wã krĩña ẽã. Mawũãnata tẽã wãĩta krĩchape wãsia. 30Zhi zezebara dewarabemata orrape abꞌarika jarasia. Mawũẽ maʉ̃bara mawũãsia: Ãjã nokꞌó, mʉrã wãña. Mawũãpe wã ẽbasia. 31¿Ũmebara sãʉ̃ba osi zhi zezeba krĩñarã?
Mawũãĩ ãzhara mawũãsidꞌa: Osia nabemaba.
Mawũãnaĩ Jesúsbara mawũãsia: Mʉã wãrĩnu marãã jaraya, rey Romanebemaĩta plata widꞌibadata, wũẽrãrã jõmaʉ̃ne bꞌeta marã kꞌãñabara wãnaña Daizezeta Nokꞌota bꞌʉma. 32Maʉ̃ẽnabema Juan marãma zesia sãwũã bꞌeaidꞌebemata jaradꞌe, maʉ̃ marãbara ĩjãna ẽbasia. Mawũãmina rey Romanebemaĩta plata widꞌibadabara, wũẽrãrã jõmaʉ̃neta bꞌebara ĩjãsidꞌa. Mawũãmina marãbara maʉ̃ ũdusidꞌaidꞌu kꞌazhiruara ãmape Daizezeta pẽwãna ẽbasia izhidꞌebemata ĩjãnaĩta.
Uvadꞌe trajabadata bia ẽãta bꞌeadꞌa
(Marcos 12:1-12; Lucas 20:9-19)
33Ũrĩũdua, mʉã dewara ne jarakꞌaya: Ũmakĩrãta bꞌasia drua zhibarita, maʉ̃bara uvata upe serrape osia uva bꞌata piabarita. Mobe uva akʉita pãrãsia deta ʉ̃tʉ drasoa, mobe uvadꞌe trajabadaa arrendape wãsia wawara. 34Uva bꞌʉabada ewade nezokꞌarã izhidꞌeta zokꞌasia uvadꞌe trajabadama, jidadꞌamarẽã uva izhaa diabʉdata. 35Mawũãmina uvadꞌe trajabadabara nezokꞌarã jirtoposia, mobe ʉ̃kʉrʉ jirachi jidasidꞌa, ʉ̃kʉrʉ beasidꞌa, ʉ̃kʉrʉ mongꞌaraba tabꞌarisidꞌa. 36Wakusa nezokꞌarã dewaraurãta audre zokꞌasia nabemarã kꞌãñabara, maʉ̃rã abꞌarika osidꞌa. 37Mobebʉrʉ zhi warrata ãzhima zokꞌabʉrʉta mawũãsia: Wawiadꞌaya mʉ warrara. 38Mawũãmina uvadꞌe trajabadabara zhi warrata ũdudꞌai ãzhirãĩnu mawũãsidꞌa: Ne zhi zezedꞌera naʉ̃ba jidaya, mawũẽ beadꞌaya, aramaʉ̃ne dazhirãba jidadꞌaya izha jidaita bꞌʉra. 39Aramaʉ̃ne jirtopota uvadꞌebara ãĩ jʉretadꞌape beasidꞌa.
40Aramaʉ̃nerã uva zhibarita zebʉrʉdꞌera ¿uvadꞌe trajabadara marãma sãwũã oipe?
41Mawũãĩ mawũãsidꞌa: Bia ẽãta bꞌera sozuburia ẽã makenaña, mobe uva izhidꞌera awʉrʉrã uvadꞌe trajabadaa arrendaya. Aramaʉ̃ne izhaa diadꞌaira diadꞌamarẽã uva bꞌʉabada ewade.
42Mawũãnaĩ Jesúsbara mawũãsia: ¿Marãbara ledꞌakꞌa kĩrãkꞌa duanu ẽka aramaʉ̃ kĩrãkꞌa mʉ seribidꞌa ẽãnebemata zhi bꞌʉmarã?:
¿Jara bꞌʉ ẽka de obadaba mongꞌara seri ẽãne bꞌʉdꞌapeadꞌara wagꞌauta bꞌesita. Daizezeba mawũã osi baera dazhirãma ne bia abꞌʉ ẽka? (Salmos 118:22-23)
43Maʉ̃neba mʉã marãã jaraya, marã Daizezebara izhita Nokꞌodꞌebemane duanabi ẽã, awuarabʉrʉ maʉ̃ne bꞌeabiya izha jara bꞌʉta obꞌeta. 44Iabꞌa maʉ̃ mongꞌara ʉ̃rʉ̃ bꞌaera bꞌʉgꞌʉzoaya, maʉ̃ mongꞌarata iabꞌaʉ ʉ̃rʉ̃ bꞌaera naʉ̃sãña.
45Maʉ̃ jarabʉrʉta ũrĩnaĩ sacerdoterã nokꞌorãbara fariseorãbara kꞌawuasidꞌa ãzhita jarabʉrʉta. 46Mawũẽ sãwũã jidadꞌaita krĩcha jʉrʉsidꞌamina, zhãrãta wawiasidꞌa zhãrãma Jesús Daizezeba bedꞌeata jarabibarita bꞌʉ baera.
હાલમાં પસંદ કરેલ:
Mateo 21: cto
Highlight
શેર કરો
નકલ કરો
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
