Matiye 2
2
Njenegərəje d-aw mə ɓe gə Bɛdəlɛhɛm
1Jeju le d-uji-e mə ɓe gə Bɛdəlɛhɛm dɔ nangə gə Jude, ɓal ko̰ ɓe gə lə mbay Erɔdə. Njenegərəje d-ḭ bəər ꞌɗe mə ɓe gə Jerujalɛm. 2Ɗaa ꞌdəji na: Mbay lə Jiibije gə d-uji-e nee le to lo gə ɗa gə wa? Mba j-o ndɛ̰ndərɛ̰ndɛ̰ lə-a ce bəər, ɓa j-a ɗe mba pol-e. 3Gə go tar gə nee le ɗaa kəji lə mbay Erɔdə turu buguju, ngaɓa dəw mə ɓeje gə Jerujalɛm kara to gə be tɔ. 4Mbay Erɔdə mbo̰ buba njekapoloje gə njekɔr gəl toronduje dəji-je lo gə ɗa ɓa d-a kuji Kirisi kəne. 5ꞌPa d-ar-ɛ na: D-a kuj-e mə ɓe gə Bɛdəlɛhɛm dɔ nangə gə Jude, to gə pajambərə ɗa mə mbede gə na:
6 ꞋI, Bɛdəlɛhɛm, dɔ nangə gə Juda
ꞋI le ꞌnjɛ̰ baa
Horo ɓeboje gə dɔ nangə gə Juda;
Mba ngon mbay a ce gəl kuji-i gə,
Gə a to njekɔr no Ijirayɛlje, gə to dəwje Lə-m. # 2.6
Mis 5.1
7Be ɓa Erɔdə ɓar njenegərəje dəji-je gə go ngə̰y na se, kar gə ban ɓa ndɛ̰ndərɛ̰ndɛ̰ le ce ne wa? 8Cibi ɓa n-təl n-ula-je mə ɓe gə Bɛdəlɛhɛm, na: Aw-je, aw oje tar gə ɔji dɔ ngon gə njɛ̰ le; logə oje gə maj-ɛ nama, ꞌɗe ꞌpaje ar-mje, mba kar ꞌma kara m-a kaw pol-e tɔ.
9Logə njenegərəje d-o tar ta mbay gə tɔ̰y ɗaa, d-ɔdə d-aw. Ɗaa ndɛ̰ndərɛ̰ndɛ̰ gə d-o-eje bəər le ɔr no-je saar ce lo gə ngon tay le to kəne ɗaa, ar nangə. 10Logə d-o ndɛ̰ndərɛ̰ndɛ̰ gə ar nangə le ɗaa rɔləl lə-je al dɔ lo. 11D-andə kəy, ɗaa d-ingaje ngon tay le je gə ko̰-ɛje Məri, d-undaje ꞌburamba no-ɛ gə ngaɓa ꞌpolo-eje, cibi d-ɔrəje ta ɓɔl lə-je d-ar-ɛ nenuji, maa gə ubu gə əndə sululu gə no kagə gə ꞌɓar-ɛ mir. 12Be ɓa Luba pa ar-je gə ni na d-əw rɔ-je təl gə ɗəw gə ɓe lə mbay Erɔdə, ɗaa ꞌjeje kara ꞌtəl gə ɗəw gə ɗangə ja d-aw ɓe lə-je tɔ.
13Logə njenegərəje d-ɔdə d-aw ɗaa, Anji lə Mbayɓe ɗe ce dɔ Jəjəb gə gə ni, ngaɓa pa ar-ɛ na: Ḭ taar, ɓo un ngon tay le je gə ko̰-ɛje, a̰y aw gə je mə ɓe gə Ejipətə ɓo isije kəne saar ndɔ gə ꞌma ja m-pa na ꞌtəlje ɓa a təlje ɗeje ɓi, mba mbay Erɔdə aw sangə ngon tay nee le gə mba tɔl-ɛ. 14Be ɓa mə cil gə ja Jəjəb ḭ un ngon tay le je gə ko̰-ɛje aw gə je mə ɓe gə Ejipətə. 15#2.15 Oje 11.1Jəjəb isi gə je Ejipətə saar ndɔ gə mbay Erɔdə uy, to gə be ɓa gə mba kar tar gə Mbayɓe pa gə ndu pajambərə le aw ne lo-e gə yɛrɛrɛ na:
ꞌMa m-ɓar ngon-m gə ɗaga mə ɓe gə Ejipətə.
16Logə mbay Erɔdə o to gə njenegərəje d-ər-e ɗaa, wungu ḭ sə-a ar-ɛ n-un ndu n-ar tɔl nganje gə jingaw gə ɓal-je joo gə nangə mə ɓe gə Bɛdəlɛhɛm ngaɓa mə ɓeje gə mbɔr-ɛ gə nəm, gə go ɓal nganje gə njenegərəje d-ɔji d-ar-ɛ le. 17To gə be ɓa tar gə Pajambərə Jurumi pa le aw lo-e gə ja, na:
18 Ndu no ɓar mə ɓe gə Rama,
Dəwje d-unda karəje ngaɓa ꞌno ɓolong-ɓolong:
To jene gə ri-a na Lasɛn ɓa no ngan-ɛ;
N-mbadə kar ꞌbɔrə man no kəm-e gə,
Mba ꞌtɔl ngan-ɛ tɔ̰y.
19Logə mbay Erɔdə uy ɗaa, anji lə Mbayɓe kara uru dɔ Jəjəb gə gə ni mə ɓe gə Ejipətə, 20pa ar-ɛ na: Ḭ taar, un ngon tay le je gə ko̰-ɛje, ɓo təl aw gə je dɔ nangə gə lə Ijirayɛlje gugu, mba dəwje gə ꞌnjigi tuji təbə lə-a le d-uy tɔ̰y ngaa. 21Be ɓa Jəjəb uba nangə ḭ, un ngon le gə ko̰-ɛje təl aw gə je dɔ nangə gə lə Ijirayɛlje ja tɔ. 22Ngaa logə Jəjəb o to gə Arəkelayus ɓa ta toro bɔ-ɛje Erɔdə o̰ ɓe gə Jude ɗaa ɓəəl mba kaw kəne, cibi ɓa Luba pa gə ni ar-ɛ ɗaa n-təl n-aw dɔ nangə gə Galile, 23ɗaa ɓe gə ɓar-ɛ Najarɛd ɓa n-aw n-isi kəne, bənəng ɓa gə mba kar tar gə pajambərəje lə Luba ꞌpa le aw ne lo-e gə na: D-a ɓar-ɛ dəw gə Najarɛd.
હાલમાં પસંદ કરેલ:
Matiye 2: lap
Highlight
શેર કરો
નકલ કરો
Want to have your highlights saved across all your devices? Sign up or sign in
© 2020, ATALTRAB. All rights reserved
