Mateu 4

Yesu navamweseka kuli liyavolo

(Mako 1:12-13; Luka 4:1-13)

1 Kaha Yesu vamutwaminyine kuli Shipilitu nakumutwala mupambo nakumweseka kuli liyavolo.

2Kaha omu azenekele kulya makumbi makumi awana (40) namusana naufuku, evwile zala.

3Jino muka-kweseka ejile nakumwamba ngwenyi, Nge uMwanaKalunga, amba malolwa awa apwenga jimbolo.

4Oloze Yesu amukumbulwile ngwenyi, Vasoneka ngwavo,

Mutu keshi kuyoyela hambolo kahako,

Shina halizu hilizu lyakufuma mukanwa kaKalunga.

5Kaha liyavolo amutwalile kunganda yajila yakembwe nakumwimika hakasongwa kaTembele,

6nakumwamba ngwenyi, Nge uMwanaKalunga, limbile hamavu, mwomwo vasoneka ngwavo,

Kalunga mwatuma vangelo jenyi vakulame,

kaha,

Navakwakwila namavoko avo kuchina nauhukana kulilolwa.

7Yesu amukumbulwile ngwenyi, Vasoneka nawa ngwavo,

Kanda ukeseka MWATA Kalunga koveko.

8Cheka nawa liyavolo amukandwishile hapili yakunyunga chikuma, nakumumwenesa mawangana ahakaye osena namaupahu awo.

9Kaha amwambile ngwenyi, Nangukuhana vyosena evi nge naulimbila hamavu nakulifukula kuli ami.

10Haze vene Yesu amwambile ngwenyi, Fuma kuno ove Satana, mwomwo vasoneka ngwavo,

Lifukulenga kuli MWATA Kalunga kove,

Zachilanga Ikiye kaha.

11Kufuma haze, liyavolo amusezele, kaha kukasumuka, kuneza vangelo nakumuzachila.

Yesu mwaputuka milimo yenyi

(Mako 1:14-15; Luka 4:14-15)

12Jino omu Yesu evwile ngwavo Yowano vanamukwate, afumine kuze nakuya kuNgalileya.

13Kaha omu afumine kuNazaleta, ayile nakutwama muKapelenau, hakamwihi nachijiva mungalila yaZevulune naNafwatale,

14mangana mazu ahanjikile kapolofweto Isaya atesemo ngwenyi,

15 Mungalila yaZevulune namungalila yaNafwatale,

Mukwakwa wachikulo chakalungalwiji#4:15 Mukwakwa wachikulo chakalungalwiji, wapwile mukwakwa wavaLoma, wakufuma kuEjipitu nakuheta kulifuchi lyavaSulya., musali yaYotau,

MuNgalileya yavaka-mafuchi,

16Vatu vatwaminenga mumilima

Vanamono musana waunene,

Navaze vatwama mungalila namumuvwimbimbi wakufwa

Musana unavatutukila.

17 Kufuma haze, Yesu aputukile kwambulula mazu ngwenyi, Kunyukenu hashili nakwalumuka mumichima, mwomwo wangana wamwilu uli hakamwihi.

Yesu mwasanyika tumbaji vakavanga

(Mako 1:16-20; Luka 5:1-11)

18Omu Yesu apwile nakutambuka kuchijiva chaNgalileya, amwene malunga vavali muundumbwavo, umwe Shimona (vavuluka ngwavo Petulu), mukwavo Andelei. Vapwile nakufuta muchijiva, mwomwo vapwile vaka-kuta ishi.

19Kaha avambile ngwenyi, Ngukavangizenu, kaha nangumilingisa kupwa muvaka-kuta#4:19 Nge ngwavo, Yesu mwavalingisa kupwa vaka-kwambulula mujimbu wamwaza. vatu.

20Hahaze vene vasezele moji avo mbwa nakumukavangiza.

21Hakuswenya kulutwe, amwene nawa veka vavali muundumbwavo, Yakova mwanaZevete, nandumbwenyi Yowano, vali muwato nasevo Zevete nakuhongela moji avo, kaha avasanyikile.

22Hahaze vene vasezele wato nasevo, nakumukavangiza.

Yesu mwahindula vatu

(Luka 6:17-19)

23 Yesu ahitanganyinenga muNgalileya mwosena nakunangula mujisunangonga#4:23 Sunangonga chikiko chikungulwilo chakutangila vaYuleya. javo, ambulwilenga mujimbu wamwaza wawangana, nakuhindula vatu kumusongo himusongo nakuuveji hiuveji.

24Shikaho puho yenyi yatanjile muSulya mwosena, kaha vamunehelele vaveji vosena, vaze vayanjilenga namisongo yeka nayeka navikola vyeka navyeka, navaka-ndemone navaka-chikonya navaka-kalepa, kaha avahindwile.

25Kaha mazavu avatu amavulu amukavangijile kufuma kuNgalileya nakuNdekapole#4:25 Ndekapole lijina vavulukile ngalila yimwe yapwile namembo amanene likumi, nakuYelusalema nakuYuleya, namusali yaYotau.

હાલમાં પસંદ કરેલ:

Mateu 4: LUE

Highlight

શેર કરો

નકલ કરો