ZĨRINƆ 5
5
Anania kũ Safirao
1Gɔ̃gbɛ̃ kũ òdi pinɛ Anania kun dɔ kũ a nanɔ Safirao. A zĩtɛ yìa 2à a ɔgɔ fĩnti bò kũ a nanɔ dɔ̃naao, akũ à gɛ̀ɛ à a kpara kpà zĩ̀rinɔa. 3Akũ Pita pìnɛ: Anania, bɔ́yãi n tò Setan dònnɛ arɛ lɛ sɛ́ɛ? N n zĩtɛ ɔgɔ fĩnti bò, akũ n ɛ́kɛ tò Luda Nininɛ. 4Gɔrɔ kũ ńdi zĩtɛ pì yíaro, n pɔ́nloo? Kũ n yìa sɔ̃, lákũ ń yei nà ĩni kɛ kũ a ɔgɔoroo? À kɛ̀ dera n yã bire kɛna laasun lɛ̀ɛ? Adi kɛ bisãsirin n ɛ́kɛ tònɛro, Ludan n tònɛ. 5Kũ Anania yã pìi mà, à lɛ̀tɛ à gà. Akũ vĩna gbɛ̃ kũ ò yã pìi mànɔ kũ̀ manamana. 6Kɛfɛnnanɔ gɛ̃̀ ò biza dàala, akũ ò a sɛ̀ ò gɛ̀ɛ ò a vĩ̀.
7Kũ à kà lán awa aakɔ̃ bà, yãke manaa sari a nanɔ sù à gɛ̃̀. 8Akũ Pita a là à pì: Ǹ omɛnɛ, a zĩtɛ pìi yìa lán dí bàn yá? À wèa à pì: Ee, lɛmɛ. 9Akũ Pita pìnɛ: Bɔ́ yã mɛ́ à tò a Luda Nini lɛ̀ a gwàa? Gbɛ̃ kũ ò n zã vĩ̀nɔn kú kpɛ́lɛlɛa, oni n sɛ́ ò bo kũnwo se. 10Gwe gɔ̃̀nɔ à lɛ̀tɛ a arɛ à gà. Kũ kɛfɛnnanɔ gɛ̃̀, ò è à gà, akũ ò a sɛ̀ ò gɛ̀ɛ ò a vĩ̀ a zã sarɛ. 11Akũ vĩna sɔsi gbɛ̃nɔ kũ̀ manamana ń pínki kũ gbɛ̃ kũ ò yã pìi mànɔ ń pínki.
Daboyãnɔ kũ yãbonsarɛnɔ
12Luda zĩ̀rinɔ tɛn daboyã kũ yãbonsarɛnɔ kɛ dasi gbɛ̃nɔ tɛ́. Yesu náanikɛrinɔ dì kɔ̃kakarana kɛ lɛɛlɛ Sulemanu èdan ń pínki. 13Gbɛ̃ pãndenɔ dì we ò nàḿmaro, ama gbɛ̃ sĩnda pínki dì ń tɔ́ nna sí, 14ama gbɛ̃ dasi kũ òtɛn Dikiri Yesu náani kɛnɔ, gɔ̃gbɛ̃nɔ kũ nɔgbɛ̃nɔ ń pínki, òdigɔ̃ kara ń tɛ́. 15Akũ ò gyãrenɔ sɛ̀tɛ kũ wútɛbɔnɔ kũ gyãresɛbɔnɔ ò ń kátɛ zɛ́n, de tó Pita tɛn gɛ̃tɛ, a nini le à da ń gbɛ̃kenɔla yãi. 16Pari bò wɛ̃tɛ kũ ò kú Yurusalɛmu sarɛnɔn ò sù kũ gyãrenɔ kũ gbɛ̃ kũ tãnanɔ tɛn wari dɔḿmanɔ, akũ ò wèrekɔ̃a ń pínki.
Wɛ́tãmma mɔna zĩ̀rinɔnɛ
17Akũ sa'oriki kũ Sadusi gã̀ gbɛ̃ kũ ò de a gbɛ̃ ũnɔ fùtɛ ò nɛ̀sɛgɔ̃baa kpà kũńwo. 18Ò zĩ̀rinɔ kũ̀kũ ò ń ká kpɛ́siran, 19akũ Dikiri malaika sù à kpɛ́ pì zɛ́ wɛ̃̀ńnɛ gwãani à ń bɔ́tɛ à pì: 20À gɛ́ àgɔ̃ kú Luda ɔnn, à wɛ̃̀ndi dufu pì yã o baadi pínkinɛ. 21Zĩ̀rinɔ yã pìi mà, akũ ò gɛ̀ɛ Luda ɔnn kɔnkɔkɔnkɔ òtɛn yã dańnɛ.
Kũ sa'oriki kũ a gbɛ̃nɔ fùtɛ, ò Isaraila gbãnadenɔ kũ ń gbɛ̃ zɔ̃kɔ̃nɔ kàkara, akũ ò dogarinɔ zĩ̀ ò gɛ́ zĩ̀rinɔ bɔtɛ kpɛ́siran ò su kũńwo. 22Kũ dogari pìnɔ kà gwe, odi ń le kpɛ́nlo. Akũ ò ɛ̀ra ò tà ò pìńnɛ: 23Kũ o ka kpɛ́ pì kĩnaa, o lè gbànɔn tatana gíngin a dãkpãrinɔn kú kpɛ́lɛlɛa, ama kũ o wɛ̃̀, ódi gbɛ̃ke lenlo. 24Kũ Luda ɔn dãkpãrinɔ gbɛ̃ zɔ̃kɔ̃ kũ sa'orikinɔ yã pìi mà, ò bídi kɛ̀ lán yã pì de nà. 25Akũ gbɛ̃ke sù à pìńnɛ: À ma! Gbɛ̃ kũ a ń ká kpɛ́sira gũnnɔn kú Luda ɔnn òtɛn yã dańnɛ. 26Akũ Luda ɔn dãkpãrinɔ kũ ń gbɛ̃ zɔ̃kɔ̃ɔo gɛ̀ɛ ò ń kũkũ ò sù kũńwo yãkete sari, zaakũ òtɛn vĩna kɛ gbɛ̃nɔnɛ, de òsun ń pápa kũ gbɛ̀ɛoro yãi.
27Kũ ò sù kũńwo, ò ń zɛ́ gbãnadenɔ arɛ, akũ sa'oriki ń lala yãi à pì: 28O giárɛ sãnsãn à yã dańnɛ kũ tɔ́ pìio, akũ a tò yã pì kpɛ́ àtɛn da Yurusalɛmula pínki, akũsɔ̃ á ye à gbɛ̃ pì ga yã diwa yá? 29Akũ Pita kũ zĩ̀ri kparanɔ wèḿma ò pì: Luda yã mɛ́ à kũ̀ ò ma de bisãsiri pɔ́la. 30Ó dizinɔ Luda mɛ́ à Yesu kũ a a lòko lía a dɛ̀ pìi vù. 31Luda a sɛ̀ à vùtɛ a ɔplai Kínanɛ Surabari ũ, de à Isarailanɔ gba zɛ́ ò nɛ̀sɛ litɛ à ń durunnanɔ kɛ̃ḿma. 32Yã pìnɔ sèedadenɔn ó ũ, ókɔ̃nɔ kũ Luda Nini kũ Luda dì kpá gbɛ̃ kũ òdi a yã manɔaao.
33Kũ ò yã pìi mà, ń pɔ fɛ̃̀ manamana, akũ ò ye ò ń dɛdɛ. 34Farisi kũ òdi pinɛ Gamaliɛli kú ń tɛ́. Ludayãdannɛriimɛ, gbɛ̃ sĩnda pínki dì a tɔ́ nna sí. À fùtɛ à zɛ̀ à pì ò bo kũ gbɛ̃ pìnɔo gĩa. 35Akũ à pìńnɛ: Isarailanɔ, à laakari kɛ yã kũ á ye à kɛ gbɛ̃ pìnɔnɛɛa. 36Adi gì kɛro kũ Tuda fùtɛ àtɛni a zĩda ditɛ a ka. Ò tɛ̀i lán gbɛ̃nɔn wàa pla bà. Kũ ò a dɛ̀, akũ a ìbanɔ fã̀kɔ̃a, akũ yã làka. 37A gbɛra Galili gbɛ̃ Yudasi fùtɛ gbɛ̃nɔ narogɔrɔa à gbɛ̃nɔ gàtɛ à nàawa dasi. À gà se, akũ a ìbanɔ fã̀kɔ̃a ń pínki. 38Matɛn oárɛ tera, àsun gbɛ̃ pìnɔ yã daro, à ń tó. Tó ń pɔyeina kũ ń yãkɛnanɔ bò bisãsiri kĩnaamɛ, ani mì dɛ. 39Tó à bò Luda kĩnaamɛ sɔ̃, áni fɔ̃ à kpáńnɛro. À laakari kɛ zĩ̀kana kũ Ludaoi. 40Ò a yã mà, akũ ò zĩ̀rinɔ sìsi ò ń gbɛ̃. Ò gìńnɛ ò yã o kũ Yesu tɔ́o, akũ ò ń gbárɛ.
41Zĩ̀rinɔ bò gbãnadenɔ kĩnaa kũ pɔnnao, zaakũ ò è ò kà kũ ò wé'i daḿma Yesu tɔ́ yãi. 42Lákũ gu dìgɔ̃ dɔ nà òdigɔ̃ yã dańnɛ Luda ɔnn kũ ń bɛnɔo, òdigɔ̃ Yesu baaru nna kpáńnɛ kámmabonaa sari, òdi pi àkũmɛ Arumasihu ũ.
હાલમાં પસંદ કરેલ:
ZĨRINƆ 5: BB2005
Highlight
શેર કરો
નકલ કરો

Want to have your highlights saved across all your devices? Sign up or sign in
Bisã Bible © SIM International, 2005.