Ijɔ̍ɔn 8
8
Ɔnyā nīi e̍ ku̍ ɔ̄ la ɔ̍bɔ̍ɔ̄nyā ma̍
1[Ɔ̄chaha̍ ɔ̄chaha̍ wa̍a̍ wā ge̍ pīya ga wɔlɛ̍ bɛ̍ɛ̄nɛ̄ ma̍, Iji̍sɔ̄ɔsi pīya ga Yɛwu yī O̍līifu. 2Ɔ̄chī ɔ̍mɛpa la ɔ̄chɔ̄chī, o̍ ku̍chē gāa ga u̍nu̍ yī Ɔwɔ. Āchɛ lyɛ̄mɛ̄ kpɛ̍ɛji nīi grēeyī ta̍kakatū ɔ̄ ma̍. O̍ pīya hyāhɔ̄ yɛ ē ngū wā lɛlā bɛ̍ɛ̄nɛ̄. 3Āchɛ ongū Lihɔ yī Iju̍u ba̍la Āchɛ yī Ifa̍rasīi bī ɔnyā ɔha̍ chɛ̄ wā abɔ̍ɔ. E̍ ku̍ ɔnyā ɔla̍ā la ɔ̍bɔ̍ɔ̄nyā. E̍ bī ɔ̄ ge̍ yarɛ abɔ̍ɔ la iyɔ̄bū yī āchɛ wa̍a̍. 4E̍ ka de Iji̍sɔ̄ɔsi bɛ̍ɛ̄nɛ̄ hīka, “Ɔngūlɛ̄lā be̍e! Ɔnyā nūma̍, e̍ ma̍ ɔ̄ ku̍ ɔ̄ la abɔ̄ ba̍la ɔngrɔ̄ɔ. 5Lipu̍ yī īpū Lihɔ yī alɔ, Imo̍sīisi ka hīka ɛ̍lɛ ge̍ ngmo̍ ɔ̄chɛ oli̍ngɔ̍ɔ lɛchɛ̄chɔ̄. Awɔ ma̍ a ka kana̍?” 6E̍ yɛ ē kɛlā nūma̍ hɛ̄ɛbɛ ge̍ē trɛ̍ɛda ē gwō Iji̍sɔ̄ɔsi la ikpo̍ yī lɛlā ochōche. Hɛ̄ɛbɛ ge̍ē jɔ̍ɔkɔ ē kɛlā abi̍ ku̍ ɔ̄. Iji̍sɔ̄ɔsi pu̍ kpɛ̍ɛ̍ du̍mɔ̍ ga ajɛ, bī ayi̍kābɔ̄ yɛ ē tɔ̍ɔ̄jā gblāa la ajɛ. 7E̍ gblāa abɔ̍ɔ ē che ɔ̍ ikpo̍ i̍ngi̍ngɔ̍ɔ ma̍, o̍ hu lɛhu̍ hwa̍a̍, da wa̍ bɛ̍ɛ̄nɛ̄ hīka, “Ala̍ ma̍ ko̍ō! Ɔ̄chɛ nīi hɔ̄ abɔ̍ɔ lipu̍ yī ala̍ nīi i̍ yɛ̍ɛ̄lā ɔdwɔ̄bi̍ ni̍ ma̍ ɔlɔjā ge̍ yɔbɔ̄ɔbū ta̍ ɔnyā nūma̍ lɛchɔ̄ gɛ e̍ē!” 8O̍ ka i̍ngɔ̍ɔ ma̍, o̍ gba̍a pu̍ kpɛ̍ɛ̍ kū abɔ̍ɔ ē tɔ̍ɔ̄jā la ajɛ la ayi̍kābɔ̄. 9Aa̍ wa̍a̍ plɛ̍ɛ̄lā ɔla̍ā nīi o̍ ka ma̍, e̍ bīyɛchɛ i̍ngɔ̍ɔ lūkpō-lūkpō cha̍cha̍. Anyāku̍ yɔbɔ̄ɔbū a̍nɛ. O̍ de hī Iji̍sɔ̄ɔsi lōri̍īnū ba̍la ɔnyā ɔla̍ā nīi - e̍e yarɛ abɔ̍ɔ ma̍. 10Iji̍sɔ̄ɔsi hu lɛhu̍ hwa̍a̍, da ɔnyā ɔla̍ā hīka, “Āchɛ nūma̍ wa̍a̍ kɔ̍ɔ̄ gɛ? Ɔ̄chɔ̄chɛ i̍ hōhī rɛ amu ge̍ē hɛ̍ wɔ ɔpīyaku̍ gɛ ni̍?”
11Ɔnyā ɔla̍ā ka de ɔ̍ ka anɔ̍lɔ i̍ ma̍ ɔ̄chɔ̄chɛ gɛ ni̍, ādā!
Iji̍sɔ̄ɔsi ka de ɔ̍ bɛ̍ɛ̄nɛ̄ hīka, “Ɔ̍lɔma̍, ami titi i̍ ge̍ē hɛ̍ wɔ ɔpīyaku̍ ni̍. Pīya gɛ! A ā chī yɛ̍ɛ̄lā ɔdwɔ̄bi̍ ge̍ gbo̍ gɛ ni̍!”]
Iji̍sɔ̄ɔsi re̍ka ɔla̍ ɔmyɛ̍ma̍ yī yɛchɛ a̍nɛ
12Iji̍sɔ̄ɔsi gba̍a ka de wa̍ hīka, “Ala̍ ma̍ ko̍ō! Ami - ɔla̍ ɔmyɛ̍ma̍ yī yɛchɛ a̍nɛ. Ɔ̄chɛ nīi ge̍ ku u la u̍tu, ɔlɔjā ge̍ē tū la ɛbɛ ɔlɛgēdēgēdē nīi ē de ɔhɔ̄leyī ma̍. Ɔlɔjā i̍ ge̍ē yɛ la ɛbɛ odobū ge̍ē gbo̍ ni̍.”
13Āchɛ yī Ifa̍rasīi da ɔ̍ bɛ̍ɛ̄nɛ̄ hīka, “Ma̍ gɛ! Lɛlā yī awɔ ɔlɔjā nīi a chī yɛ aa̍ ē tū itɛ̍ɛhi̍yɛ̍ yī nū a̍nɛ. Bū la ɛbɛ ɔla̍ā, lɛlā nīi a yɛ ē ka ma̍ - a̍ji nɛ.”
14Iji̍sɔ̄ɔsi hīya aa̍ ɔkɔ hīka, “Ala̍ ma̍ ko̍ō! O̍ ge̍ ro̍ōre̍ka n yɛ ē koko̍o yī lɛlā yī ami ɔlɔjā, lɛlā nīi n ē ka ma̍ - ichɛ̄ɛhi nɛ. Wu̍chē oji̍ nɛ, n je̍ ɛbɛ nīi n bū ma̍. N chī je̍ ɛbɛ nīi n yɛ gāa ma̍. Ala̍ ma̍ i̍ je̍ ɛbɛ nīi n bū ma̍ ni̍; ala̍ i̍ chī je̍ ɛbɛ nīi n yɛ gāa ma̍ ni̍. 15Ala̍ ē hlɛ̍ɛ̄pɔ̄ la ɔpɔ̄pū nīi āchɛ̄ɛchɛ chikpo̍ ke̍e̍ ma̍. Ami ma̍, n i̍ ē hɛ̍ ɔ̄chɔ̄chɛ lɛpɔ̄ ni̍. 16N ge̍ yɛ ge̍ē hlɛ̍ɛ̄pɔ̄ nɛ, lɛpɔ̄ ɔhɔ̍ɔ̄hɛ̍ yī u ge̍ē re̍ka olēchi̍ lēchi̍. Wu̍chē oji̍ nɛ, n i̍ hɔ̄ lōru̍u la anu̍ ni̍. A̍dā yī u nīi de u tɛ̄rɔ̄ ma̍ hɔ̄ amu ba̍la ami. 17E̍ ta̍ tū la īpū yī Lihɔ yī ala̍ hīka, ‘Lɛlā nīi oko̍o yī itɛ̍ɛhi̍yɛ̍ āchɛ ɛpa ge̍ grāa la anu̍ mɛ̍, ɔ̍lɔma̍ lɛlā ɔla̍ā - ichɛ̄ɛhi nɛ’ 18N ē koko̍o yī lɛlā yī ami ɔlɔjā. A̍dā yī u nīi chī de u tɛ̄rɔ̄ ma̍ ē koko̍o yī lɛlā yī u i̍ngi̍ngɔ̍ɔ.”
19E̍ che Iji̍sɔ̄ɔsi ikpo̍ bɛ̍ɛ̄nɛ̄ hīka a̍dā yī ɔ̍lɔ kɔ̍ɔ̄?
Iji̍sɔ̄ɔsi hīya aa̍ ɔkɔ hīka, “Ala̍ i̍ je̍ u ni̍ ma̍ ala̍ i̍ je̍ A̍dā yī u ni̍. O̍ ge̍ re̍ka ala̍ je̍ u nɛ, ala̍ ge̍ē je̍ A̍dā yī u i̍ngi̍ngɔ̍ɔ.”
20Iji̍sɔ̄ɔsi kɛlā nūma̍ wa̍a̍ abɔ̍ɔ la u̍nu̍ yī Ɔwɔ nīi o̍ yɛ ē ngū āchɛ lɛlā ma̍, abɔ̍ɔ la wāā yī ɛbɛ nīi e̍ de yakpa che nīi e̍ de ɔjā tū de Ɔwɔ ma̍. Ɔ̄chɔ̄chɛ i̍ chī ku̍ Iji̍sɔ̄ɔsi abɔ̍ɔ ni̍, wu̍chē lɔkɔ nīi yɛ̄grāa yī nū i̍ gbajɛ we̍ ni̍ ma̍.
Ala̍ i̍ ge̍ē gāa ɛbɛ nīi n pīya yɛ gāa ma̍ mɛ ni̍
21Iji̍sɔ̄ɔsi gba̍a ka de wa̍ hīka, “Ala̍ ma̍ gɛ ko̍ō! N ge̍ē pīya ma̍, ala̍ ge̍ē gāla̍ u. Ala̍ chī ge̍ē ku̍ lɛlā ɔdwɔ̄bi̍ yī ala̍ la iyē. Ala̍ i̍ chī ge̍ē gāa ɛbɛ nīi n yɛ gāa ma̍ mɛ ni̍.”
22Alɛhu̍ yī Iju̍u ɛla̍ā ka bɛ̍ɛ̄nɛ̄ hīka, “Ala̍ ā po̍ ɔjā nīi o̍ ē ka gɛ! Aɛ̍lɛ i̍ ge̍ē gāa ɛbɛ nīi anɔ̍lɔ yɛ gāa ma̍ mɛ ni̍. Ɔla̍ā re̍ka o̍ ge̍ē de iyī nū ngmo̍ kɛ̄ɛ oji̍?”
23Iji̍sɔ̄ɔsi hīya aa̍ ɔkɔ bɛ̍ɛ̄nɛ̄ hīka, “Ala̍ ma̍ bū amu la ajɛyɛ̄ɛchɛ nūma̍. Ami bū la ichō; ala̍ bū la yɛchɛ nūma̍. Ami i̍ bū la yɛchɛ nūma̍ ni̍. 24Ɔla̍ā - ohu̍ nīi n ka hīka ala̍ ge̍ē pīyaku̍ la lɛlā ɔdwɔ̄bi̍ yī ala̍ la iyē a̍nɛ. Ɔ̍chi̍kpa̍kpa̍ ala̍ chɛ̄ hīka, ‘ami - anu̍ a̍nɛ’, nɛ̄ni̍ ala̍ chī ge̍ē pīyaku̍ la lɛlā ɔdwɔ̄bi̍ yī ala̍ la iyē ichɛ̄ɛhi.”
25E̍ che ɔ̍ ikpo̍ hīka ɔ̍lɔ - ɔ̄nyɛ nɛ?
Iji̍sɔ̄ɔsi hīya aa̍ ɔkɔ hīka, “Ami - ɔjā nīi n koko̍o de ala̍ wa̍a̍ bū la owu̍tu ma̍ nɛ. 26Lɛlā lyɛ̄mɛ̄mɛ̄ nīi n ge̍ē ka, gba̍a ē hlɛ̍ɛ̄pɔ̄ yī nū lɛhu̍ yī ala̍ ma̍. Ɔ̄chɛ nīi de u tɛ̄rɔ̄ ma̍ - ɔ̄chɛ olēchi̍ lēchi̍ nɛ. Lɛlā nīi n po̍ bū la oko̍o yī nū ke̍e̍ ma̍ nīi n ē ka ē de yɛchɛ a̍nɛ.”
27Āchɛ ɛla̍ā i̍ jo̍ōkū hīka lɛlā yī Ɔwɔ A̍dā nīi Iji̍sɔ̄ɔsi ɔ̍lɔ yɛ ē ka ē de aa̍ a̍ni̍. 28Wu̍chē yī ɔla̍ā, Iji̍sɔ̄ɔsi gba̍a ka de wa̍ hīka, “Ala̍ ma̍ gɛ ko̍ō! Yɛ̄grāa nīi e̍ ge̍ē hu Ɔyi̍ yī Ɔngrɔ̄ɔ hwa̍a̍ ē pla la ɔchi̍ ma̍ o̍bū nīi ala̍ ge̍ē jo̍ōkū hīka, ‘Ami - Anu̍’ a̍nɛ. Bɛ̍ɛ̄nɛ̄ ma̍, ala̍ ge̍ē jo̍ōkū hīka amɔ̍lɔ i̍ ē ya̍ lɛlɛ̄lā wɔ̄bɔ̄bɔ̄ yī amɔ̍lɔ ni̍. Ala̍ ge̍ē jo̍ōkū hīka lɛlā nīi Ɔwɔ A̍dā ɔ̍lɔ ngū amɔ̍lɔ ke̍e̍ ma̍ nīi amɔ̍lɔ ē ka a̍nɛ. 29Ɔ̄chɛ nīi de u tɛ̄rɔ̄ ma̍ hɔ̄ amu ba̍la ami. O̍ i̍ pīya hī u nīi hɔ̄ lōri̍īnū je̍ ni̍. Wu̍chē oji̍ nɛ, lɛlā nīi ē lɛ ɔ̍ wɔnyɛ ma̍ nīi n ē ya̍ myɛ̄grāa-myɛ̄grāa a̍nɛ.”
30Āchɛ yɛ̄mɛ̄mɛ̄ nīi plɛ̍ɛ̄lā nūma̍ wa̍a̍ nīi Iji̍sɔ̄ɔsi yɛ ē ka ma̍, chɛ̄ku ɔ̍.
Lɛlā yī aywɔ̍lɛ̍ ba̍la afiyɛ
31Bɛ̍ɛ̄nɛ̄ Iji̍sɔ̄ɔsi koko̍o de Iju̍u nīi chɛ̄ku ɔ̍ ma̍ hīka, “Ala̍ ge̍ de ūkpɔ̄tū rɛ lɛlā yī u nīi n yɛ ē ngū ma̍, ɔ̍lɔma̍ ala̍ - a̍chi̍kpo̍ yī u lēchi̍ lēchi̍ nɛ. 32Bū la ɛbɛ ɔla̍ā, ala̍ ge̍ē jyɛ̍ɛ̄lā olēchi̍ lēchi̍. Lɛlā olēchi̍ lēchi̍ ɔla̍ā chī ge̍ē de ala̍ ē hɛ̍ ē ta̍.”
33Āchɛ ɛla̍ā hīya Iji̍sɔ̄ɔsi ɔkɔ bɛ̍ɛ̄nɛ̄ hīka, “Je̍ka aa̍ alɔ - wɔma yī A̍brahāam nɛ. Alɔ wɛ ɔfiyɛ yī ɔ̄nyɛ je̍? Kɛ̄ɛ oji̍ - ochi̍chi̍ yī ɔhɛ̍ta̍ ɔ̍lɔma̍ nīi a ka ma̍?”
34Iji̍sɔ̄ɔsi koko̍o de wa̍ hīka, “Lēchi̍-lēchi̍, n ā koko̍o de ala̍! Ɔ̄chɛmɔ̄chɛ nīi ge̍ yɛ̍ɛ̄lā ɔdwɔ̄bi̍, o̍ re̍ka ɔlɔjā tū lɛfiyɛ yī lɛlā ɔdwɔ̄bi̍. 35Ɔ̄chɛ nīi - ɔfiyɛ ma̍, e̍ ē ka ɔ̍ tū la wɔma yī u̍kpu̍fi̍ye̍ ɔla̍ā ni̍. Ɔ̄chɛ nīi - aywɔ̍lɛ̍ ma̍, anu̍ - ɔlwɔma yī u̍kpu̍fi̍ye̍ ɔla̍ā kpɛɛ ku yɛ̄grāa ɔha̍lɔha̍ a̍nɛ. 36Ɔyi̍ yī Ɔngrɔ̄ɔ ɔlɔjā ge̍ chī de wɔ hɛ̍ta̍ mɛ̍, o̍ re̍ka awɔ - ɔywɔ̍lɛ̍ lēchi̍ lēchi̍ bɛ̍ɛ̄nɛ̄ nɛ. 37N jo̍ōkū hīka ala̍ bū la wɔma yī A̍brahāam. Ala̍ chī yɛ ē chikpo̍ ge̍ē de u ē ngmo̍. Wu̍chē oji̍ nɛ, lɛlā nīi n ka wa̍a̍ ma̍ i̍ gwa̍ chɛ̄ ala̍ ūkpɔ̄tū ni̍. 38Ami ma̍, lɛlā nīi A̍dā yī u de chabɔ̄ hu̍ u ma̍ nīi n ē ka a̍nɛ. Ala̍ ma̍, ɔjā nīi a̍dā yī ala̍ ka de ala̍ ma̍ nīi ala̍ ē ya̍ a̍nɛ!”
39E̍ hīya Iji̍sɔ̄ɔsi ɔkɔ hīka A̍brahāam ɔ̍lɔ - a̍dā yī aa̍ a̍nɛ/.
Iji̍sɔ̄ɔsi de wa̍ bɛ̍ɛ̄nɛ̄ hīka, “Ala̍ ma̍ ko̍ō! Ala̍ ge̍ - ayi̍ yī A̍brahāam lēchi̍ lēchi̍ nɛ, ala̍ ge̍ē ya̍ ita yī u̍ku̍rɔ̍ nīi o̍ ē ya̍ ma̍. 40Lɛlā nīi n ya̍ ke̍e̍ ma̍ re̍ka, lɛlā olēchi̍ lēchi̍ ode kɔ̄ka de ala̍ lɔkɔ nīi n po̍ bū la oko̍o yī Ɔwɔ ma̍. Ala̍ chī yɛ amu ē chikpo̍ ge̍ē de u ē ngmo̍. A̍brahāam ma̍ ya̍ ita yī lɛlā ɔha̍ i̍ngɔ̍ɔ? 41Ɔjā nīi a̍dā yī ala̍ ē ya̍ ma̍ nīi ala̍ yɛ ē ya̍ a̍nɛ!”
E̍ hīya Iji̍sɔ̄ɔsi ɔkɔ bɛ̍ɛ̄nɛ̄ hīka, “Ɔwɔ ɔlɔjā re̍ka A̍dā yī alɔ lōri̍īnū a̍nɛ. Alɔ - ayi̍ yī nū lēchi̍ lēchi̍ nɛ.”
42Iji̍sɔ̄ɔsi da wa̍ bɛ̍ɛ̄nɛ̄ hīka, “O̍ ge̍ re̍ka Ɔwɔ - A̍dā yī ala̍ nɛ, ala̍ ge̍ē ywɔ̍ɔnyɛ yī u. Wu̍chē oji̍ nɛ, n bū la abɔ̄ yī Ɔwɔ ɔlɔjā. U̍ma̍ama n chī hɔ̄ amu u̍ma̍. Anu̍ ɔlɔjā de u tɛ̄rɔ̄ wā a̍nɛ. N i̍ wā wɔ̄bɔ̄bɔ̄ yī u ni̍. 43Ala̍ je̍ ɔjā nīi hu̍ nīi ala̍ ē po̍ ochi̍chi̍ yī lɛlā yī u ē mɛ ni̍ ma̍? Ɔjā nīi ohu̍ ma̍, ala̍ bɔ̍ɔ̄tū yɛ abɔ̍ɔ ge̍ē darɔ̄ku lɛlā yī u nīi n ē ka ma̍ ē mɛ ni̍. 44Ɔngūwɛ̄gā re̍ka a̍dā yī ala̍ a̍nɛ. Ɔjā nīi a̍dā yī ala̍ chikpo̍ ma̍, anu̍ hɛ̍ ala̍ kpɛ̍ɛ la ɔyɔ̍ɔ̄ya̍ a̍nɛ. Bū la owu̍tu, anu̍ - ɔ̄chɛ ɔngmɔ̍ɔ̄chɛ nɛ. O̍ i̍ chɛ̄ku lɛlā olēchi̍ lēchi̍ je̍ ni̍ lachi̍lachi̍. Olēchi̍ lēchi̍ yī lɛlɛ̄lā i̍ hɔ̄ la ibi̍īyē yī nū ni̍. O̍ ge̍ yɛ ē warīmɛ̄ mɛ̍. A jo̍ōkū gɛ hīka ɔjā nīi o̍ ē ya̍ la ɔchɔ̍ɔwɔ yī nū ma̍ bī aa̍ a̍nɛ. Wu̍chē oji̍ nɛ, ɔlarīmɛ̄ gba̍a̍ nɛ. Anu̍ - a̍dā yī arīmɛ̄ wa̍a̍ a̍nɛ. 45Ami ma̍, n ē kɛlā olēchi̍ lēchi̍ ē de ala̍. Anu̍ - ohu̍ nīi ala̍ i̍ chɛ̄ku u ni̍ a̍nɛ. 46Ɔ̄nyɛ lipu̍ yī ala̍ ge̍ē ya̍ ochi̍chi̍ hīka amɔ̍lɔ yɛ̍ɛ̄lā ɔdwɔ̄bi̍ ɔha̍ je̍ ma̍? N ge̍ chī yɛ ē kɛlā olēchi̍ lēchi̍, oji̍ - ohu̍ nīi ala̍ i̍ chɛ̄ku u ni̍ ma̍? 47Ɔ̄chɛ nīi - ɔyi̍ yī Ɔwɔ ma̍ ē darɔ̄ku lɛlā yī Ɔwɔ ē po̍ ɔ̄ yɛ̍yɛ̍. Ala̍ ma̍, i̍ ayi̍ Ɔwɔ ni̍, anu̍ - ohu̍ nīi ala̍ i̍ chɛ̄ darɔ̄ku po̍ ɔ̄ yɛ̍yɛ̍ ni̍ a̍nɛ.”
Iji̍sɔ̄ɔsi ba̍la A̍brahāam
48Iju̍u ɛla̍ā de Iji̍sɔ̄ɔsi bɛ̍ɛ̄nɛ̄ hīka, “Onīi alɔ hīka awɔ - Olisame̍riya nɛ, a ē ku̍ yapri̍ija ɔngūwɛ̄gā ma̍ pa - ichɛ̄ɛhi nɛ?”
49Iji̍sɔ̄ɔsi hīya aa̍ ɔkɔ hīka, “Īchāha̍-īchāha̍, n i̍ ku̍ yapri̍ija ɔdwɔ̄bi̍ ni̍. Otūlichō yī A̍dā yī u nīi n yɛ ē ya̍ a̍nɛ. Ala̍ i̍ chī chɛ̄ pɔ̍ɔkɔ yī u ni̍. 50N i̍ yɛ ē gāla̍ otūlichō de iyī ami ɔlɔjā ni̍. Ɔ̄chɛ ɔha̍ hɔ̄ abɔ̍ɔ nīi ē deyīrɛ yī lɛlā oli̍ngɔ̍ɔ ɔla̍ā ma̍. Anu̍ ē hlɛ̍ɛ̄pɔ̄ ba̍ de u a̍nɛ. 51Lēchi̍-lēchi̍, n ā koko̍o de ala̍! Ɔ̄chɛ nīi ge̍ po̍ ɔkɔlɛ̄lā yī u, ɔlɔjā i̍ ge̍ē ko̍ōku̍ ge̍ē gbo̍ ni̍.”
52Iju̍u ɛla̍ā da ɔ̍ bɛ̍ɛ̄nɛ̄ hīka, “U̍ma̍ama, alɔ de jo̍ōkū mɛ̍ hīka a ē ku̍ yapri̍ija ɔdwɔ̄bi̍ lēchi̍ lēchi̍. A̍brahāam i̍ ko̍ōku̍ ni̍? Kɛ̄ɛ āchɛ ɔkɛrɔ̄ yī Ɔwɔ i̍ ko̍ōku̍ ni̍? Kɛ̄ɛ oji̍ - ohu̍ nīi a ka hīka ɔ̄chɛ nīi - ɔ̍lɔ ge̍ po̍ ɔkɔlɛ̄lā yī aɔ̍lɔ, ɔlɔjā ɔ̍lɔ i̍ ge̍ē ko̍ōku̍ ni̍ ma̍? 53A̍brahāam nīi - a̍dā yī alɔ ma̍ chī pīyaku̍! A gbɛri̍ya̍ ka aɔ̍lɔ ga A̍brahāam ɔgɔ̄ga kɛ̄ɛ? Āchɛ ɔkɛrɔ̄ yī Ɔwɔ chī pīyaku̍ i̍ngi̍ngɔ̍ɔ! A u̍tu gbɛri̍ya̍ ka aɔ̍lɔ - ɔ̄nyɛ nɛ ma̍/?”
54Iji̍sɔ̄ɔsi hīya aa̍ ɔkɔ bɛ̍ɛ̄nɛ̄ hīka, “Ala̍ ma̍ gɛ ko̍ō! O̍ ge̍ re̍ka n yɛ ē de otūlichō de iyī ami ɔlɔjā nɛ, otūlichō yī u i̍ ge̍ re̍ka ɔjɔ̄jā ni̍. Ɔ̄chɛ nīi ē de otūlichō de u ma̍, A̍dā yī u nɛ. Anu̍ pi̍i̍ nīi ala̍ chī ka hīka ɔ̍lɔ - Ɔwɔ yī ala̍ nɛ a̍nɛ. 55Ala̍ ma̍ i̍ je̍ ɔ̄ je̍ ni̍. Ami ma̍, n je̍ ɔ̄. O̍ ge̍ re̍ka n ka hīka n i̍ je̍ ɔ̄ ni̍ nɛ, n ge̍ē de ē pīya ɔlarīmɛ̄ bāa ala̍ ma̍. Ami ma̍, n je̍ ɔ̄. N ē po̍ ɔkɔlɛ̄lā yī nū. 56A̍brahāam ɔlɔjā nīi - a̍dā yī ala̍ ma̍ lɛ ɔwɔ̄wīyā nīi o̍ yɛ ge̍ē ma̍ ɔ̄chī yī ɔwɔ̄wā yī u ma̍. O̍ ma̍ ɔ̄ ma̍, o̍ lɛ ɔwɔ̄wīyā kpɛ̍ɛji!”
57Āchɛ yī Iju̍u ɛla̍ā ka ɔ̍lɔ ge̍ o̍ō! Ɔ̍lɔ i̍ gbajɛ lɛ̍yi̍ ohu ɛpa che igwo̍ we̍ ni̍, re̍ka ɔ̍lɔ ma̍ A̍brahāam?
58Iji̍sɔ̄ɔsi hīya aa̍ ɔkɔ hīka, “Lēchi̍-lēchi̍, n ā koko̍o de ala̍! Ami nūma̍ ngma̍ o̍bo̍o̍bū nīi e̍ ma A̍brahāam a̍nɛ!”
59Bū la ɛbɛ ɔla̍ā, aa̍ wa̍a̍ kpo̍ achɔ̄ yɛ ge̍ē ta̍ ngmo̍ ɔ̄. Iji̍sɔ̄ɔsi pīya trɛ̍ba hī wā. O̍ wā ge̍ pīya hī u̍nu̍ yī Ɔwɔ bɛ̍ɛ̄nɛ̄.
હાલમાં પસંદ કરેલ:
Ijɔ̍ɔn 8: YBASR
Highlight
શેર કરો
નકલ કરો
Want to have your highlights saved across all your devices? Sign up or sign in
© 2020 Bible Society of Nigeria (second edition)
