Ijɔ̍ɔn 2

Iji̍sɔ̄ɔsi ga wɔga yī ɔnyā la Ike̍na

1Ɔ̄chī ɔmɛta̍ wɔga yī ɔnyā ɔha̍ kū abɔ̍ɔ la ipwo̍gra yī Ike̍na yī ajɛ yī Iga̍līli. Ɛ̍nɛ̍ yī Iji̍sɔ̄ɔsi hɔ̄ abɔ̍ɔ la ɔngrɛ̄ba̍ ɔla̍ā. 2Iji̍sɔ̄ɔsi ba̍la a̍chi̍kpo̍ yī nū titi, e̍ hī wā ɛra̍ ga ɔngrɛ̄ba̍ ɔla̍ā. 3Ɛ̍mwɔ̄ de kwɛ̍ɛjī wa̍a̍ ma̍, ɛ̍nɛ̍ yī Iji̍sɔ̄ɔsi gāa ge̍ ka de Iji̍sɔ̄ɔsi hīka, ɛ̍lɛ i̍ lɛ ɛ̍mwɔ̄ gɛ ni̍/.

4Iji̍sɔ̄ɔsi hīya anu̍ ɔkɔ hīka, “Ɛ̍nɛ̍, oji̍ - ohu̍ nīi a ē koko̍o ē de u ma̍? Yɛ̄grāa yī u i̍ gbajɛ we̍ ni̍.”

5Ɛ̍nɛ̍ yī iji̍sɔ̄ɔsi koko̍o de a̍chɛ̍ nīi gblāa abɔ̍ɔ ma̍ hīka ɛ̍lɛ ge̍ ya̍ ɛlāha̍-ɛlāha̍ nīi Iji̍sɔ̄ɔsi ɔ̍lɔ ge̍ē chabɔ̄ ma̍.

6Wu̍chē lɔkɔ nīi Iju̍u wa̍a̍ ē yɛ̍ɛ̄lā yī ɔchɔ̍ɔwɔ yī wā nīi re̍ka lɛbi̍ ɔgwɔ̄gwā ma̍, ɔkwɔ̄ yī yenyi lɛ erīiyī gblāa abɔ̍ɔ la ɛbɛ ɔla̍ā. Ɔkwɔ̄ ūkpo̍he ē tū iga̍lɔn ohu kɛ̄ɛ ohu che igwo̍ ē mɛ̍. 7Iji̍sɔ̄ɔsi ka de a̍chɛ̍ nīi gblāa abɔ̍ɔ ma̍ hīka ɛ̍lɛ ge̍ dɛ̄ yenyi mu ɔkwɔ̄ ɛla̍ā wa̍a̍. E̍ dɛ̄ yenyi mu wa̍ cha̍cha̍. 8Iji̍sɔ̄ɔsi koko̍o de wa̍ hīka ɛ̍lɛ ge̍ kɔ̄tū gɛ nīi ɛ̍lɛ ge̍ nāa ge̍ de ɔ̄chɛ nīi - ɔ̍lɔ ē deyīrɛ lɛlā yī ɔngrɛ̄ba̍ ɔla̍ā wa̍a̍ ma̍. E̍ de kɔ̄tū bī ge̍ de ɔ̍ bɛ̍ɛ̄nɛ̄. 9Yenyi ɔla̍ā nīi de pīya ɛ̍mwɔ̄ ma̍, o̍ ya̍ ɔ̄ ma̍ la oko̍o. O̍ i̍ chī je̍ ɛbɛ nīi ɛ̍mwɔ̄ ɔla̍ā bū ma̍ ni̍! Āchɛ nīi dɛ̄ yenyi ɔla̍ā ma̍ lōri̍īwā jo̍ōkū a̍nɛ. Wu̍chē yī ɔla̍ā, o̍ de ɔbɔ̍ɔ̄ngrɛ̄ba̍ hɛ̄ra̍. 10O̍ da ɔ̍ hīka, “Āchɛ ē de ɛ̍mwɔ̄ nīi hwɔhi gɔ̄ga ma̍ ē de āchɔga yɔbɔ̄ɔbū. E̍ ge̍ de gwa̍ jɛ̄ wā o̍bū mɛ̍ nīi e̍ ē bī ɛ̍mwɔ̄ ɛha̍lɛha̍ nīi i̍ hwɔhi yɛ̍yɛ̍ ni̍ ma̍ ge̍ē de wa̍ bɛ̍ɛ̄nɛ̄ a̍nɛ. Iyī wɔ ma̍, a chōo̍chē nāa ɛ̍mwɔ̄ ɔnɛ̄ɛhɛhi nūma̍ rɛ abɔ̍ɔ kpɛɛ gbo̍ yɛ̄grāa nūma̍!”

11Iji̍sɔ̄ɔsi yɛ̍ɛ̄lā ɔlɛbɛ̍bi̍ ɔrāarāa nūma̍ la Ike̍na yī ajɛ yī Iga̍līli. Abɔ̍ɔ nīi o̍ de rīgā ɔnɔ̄kɔ̄kū yī nū chabɔ̄ a̍nɛ. Bū la ɛbɛ ɔla̍ā, a̍chi̍kpo̍ yī nū chɛ̄ku ɔ̍.

12La okwi̍ihi yī ɔla̍ā, anu̍ ba̍la aɛ̍nɛ̍ yī nū ba̍la ɛ̍nɛ̍ yī nū ba̍la a̍chi̍kpo̍ yī nū pīya ga Ikapa̍num ge̍ hɔ̄ abɔ̍ɔ ɔ̄chī ɛmɛ̍ɛmla̍a o̍bū.

Iji̍sɔ̄ɔsi ga U̍nu̍ yī Ɔwɔ

(Ima̍tiyu 21:12-13; Ima̍aki 11:15-17; Ilu̍uku 19:45-46)

13Yɛ̄grāa yī ɔwɔ̄wīyā yī Iju̍u wa̍a̍ nīi re̍ka Ɔwɔ̄wīyā yī Owu̍lā ma̍ yɛ ē gbajɛ ma̍, Iji̍sɔ̄ɔsi ga Ijɛru̍sālɛm. 14O̍ ma̍ āchɛ nīi gblāa abɔ̍ɔ ē bī egedebi̍ya̍ ba̍la anyīyɛrɔ̄ ba̍la odugbɔnyɛ yɛ ē ra̍ la u̍nu̍ yī Ɔwɔ. O̍ ma̍ āchɛ ohīyokpo nīi gblāa abɔ̍ɔ la okpōkōlō yī wā i̍ngi̍ngɔ̍ɔ. 15Iji̍sɔ̄ɔsi ya̍ ɔjā obī gwō lijē ɔha̍ la orī, bī ɔjā ɔla̍ā nū ɛbɛ̍ ɛla̍ā cha̍cha̍ hī u̍nu̍ yī Ɔwɔ. Anyīyɛrɔ̄ tūla egedebi̍ya̍ ɛla̍ā wa̍a̍, o̍ kpo̍ wā nū. O̍ miya okpōkōlō yī āchɛ ohīyokpo chīyenū, kpo̍ okpo yī wā mīyanya. 16Āchɛ nīi ē bī odugbɔnyɛ ē ra̍ abɔ̍ɔ ma̍, o̍ ka tāa aa̍ hīka, “Ala̍ kpo̍ ɛjā ɛla̍ā pīya hī ɛbɛ nūma̍! Ala̍ e̍e de u̍nu̍ yī A̍dā yī u pīya o̍gra yī lihī ni̍!” 17Bū la ɛbɛ ɔla̍ā, a̍chi̍kpo̍ yī nū bla lɛlā nīi Īpū yī Ɔwɔ ka ma̍: “Ɔwɔ, Ɔhɔtū ɔnɔ̄kɔ̄kū nīi n lɛ de u̍nu̍ yī wɔ ma̍ ge̍ē chɔ̄chɛ̄ lipu̍ ūkpɔ̄tū yī u.”

18Alajɛ yī Iju̍u wā lɛlā la Iji̍sɔ̄ɔsi bɛ̍ɛ̄nɛ̄ hīka lɛlā ɔlɛbɛ̍bi̍ ɔna̍ nīi ɔ̍lɔ ge̍ē ya̍ ē chabɔ̄ hu̍ aa̍ hīka ɔ̍lɔ lwɔhu̍ ge̍ē ya̍ i̍ngɛ̍ɛ̄nɛ̄ mɛ ma̍?

19Iji̍sɔ̄ɔsi koko̍o de wa̍ hīka, “Ala̍ ā de Ipu̍nu̍ yī Ɔwɔ nūma̍ gbo tū ajɛ gɛ; n ge̍ē gbla̍a anu̍ ē gwo̍ lipu̍ yī ɔ̄chī ɛta̍!”

20Āchɛ ɛla̍ā da ɔ̍ hīka, “U̍nu̍ yī Ɔwɔ nūma̍ nīi alɔ gwo̍ lipu̍ yī lɛ̍yi̍ ohu ɛpa che erīiyī ma̍, anu̍ nīi a ka aɔ̍lɔ ge̍ē de ɔ̍lɔ ē gwo̍ lipu̍ yī ɔ̄chī ɛta̍ ē mɛ a̍nɛ?”

21U̍nu̍ nīi Iji̍sɔ̄ɔsi yɛ ē ka ma̍ - ibi̍īyē yī anu̍ ɔlɔjā nɛ. 22O̍ hye̍ēyī la okū ma̍, a̍chi̍kpo̍ yī nū bla lɛlā nūma̍ nīi o̍ ka ma̍. Bū la ɛbɛ ɔla̍ā, e̍ chɛ̄ku Īpū yī Ɔwɔ ba̍la lɛlā nīi Iji̍sɔ̄ɔsi ɔlɔjā ka ma̍.

Iji̍sɔ̄ɔsi je̍ ūkpɔ̄tū yī āchɛ wa̍a̍

23Iji̍sɔ̄ɔsi hɔ̄ abɔ̍ɔ la Ijɛru̍sālɛm la yɛ̄grāa yī Ɔwɔ̄wīyā yī Owu̍lā ɔla̍ā ma̍, āchɛ yɛ̄mɛ̄mɛ̄ chɛ̄ku ɔ̍, wu̍chē yī lɛlā ɔlɛbɛ̍bi̍ nīi o̍ ya̍ nīi e̍ ma̍ ma̍. 24Iji̍sɔ̄ɔsi je̍ ūkpɔ̄tū yī āchɛ wa̍a̍ ma̍, o̍ i̍ chɛ̄ tu̍ hī iyī nū lā de wa̍ ni̍. 25Ɔ̄chɔ̄chɛ i̍ ge̍ē gba̍a ē kɛlā yī āchɛ de ɔ̍ o̍bū gɛ ni̍; wu̍chē oji̍ nɛ, o̍ jyɛ̍ɛ̄lā yī ūkpɔ̄tū yī wā cha̍cha̍.

હાલમાં પસંદ કરેલ:

Ijɔ̍ɔn 2: YBASR

Highlight

શેર કરો

નકલ કરો