Sélimɛ 3
3
Nǎnw ní céw nɛnɛ-mí-yirigele Edɛn nángwɔɔw ni
1 #
Tɛ̀ɛn 12:9; 20:2 Sìnbirigi yaweere Yawe Kolocɔlɔɔ da sámaga lè, dee bee myɛ ni, wàbigi ki da gbána n sɔ̀lɔ. Koro ki baa céw yíbe níì jo: «Kányɛʔɛ gi lé Kolocɔlɔɔ n jo: ‹Yele a kɔ́ ra nángwɔɔw tiire myɛ yasanra líi í?› » 2A céw wàbigi yari: «Wolo i nángwɔɔw tíire yasanra líi. 3Kàjáa tíigee gi nyɛ lè nángwɔɔw nínge ni, gee gi koro yasanri kéele kwɔ́ɔ lè, Kolocɔlɔɔ n jo: ‹Yele a kɔ́ gi kàa lìi í. Yele a caa kɔ́ tánga gi kàa na í, kapye koro ban í, yele a kùu.› » 4Lǎli bee ni a wàbigi céw yari: «Yele a kùu nyáana í. 5Ncan Kolocɔlɔɔ n gi cán ncan yele ga tíigi bee yasangaa lìi cángee na lè, yele nyapiigèle a múgu. Yele a pye àmɛɛ Kolocɔlɔɔ nyɛ lè bi kacǎngèle ní kapeegèle cán.»
6A céw gi nyaa tiisangi bee a pye lìijànna, á gi wɔ́ɔ̀ wélemɛ dɛ́nɛ, ní wɔ́ɔ i nyɛ bi gbǎn kérigèle sɛʔɛwelele sícilimɛ kaan syɔɔn ma, a wi fala n ki yasangaa cɔɔ n lìi, níì kàa kaan wi nǎnw ma wi pye yaà ní wi ní lè, a woro wɔ́ɔ̀ gi lìi. 7Lǎli bee ni a pe myɛ siinw nyapiigéle fala n múgu, a be gi cán poro i nyɛ níboribéle, a be fala n děsyaan-wára jɔli tiyɛɛ na n pye fànnanya, n lúgo.
8A ki ga pye cângwɔɔgi nyɔ́ɔ káfalala làrivununɔ ni, a be Yawe Kolocɔlɔɔ yákpoli lóʔo woro wee wi nyaari nángwɔɔw fúngo ni lè. A nǎnw ní wi céw sáà làra Yawe Kolocɔlɔɔ na nángwɔɔw tíire nínge ni. 9A Yawe Kolocɔlɔɔ si nǎnw yeri, níì wi yíbe níì jo: «Sán mɔ nyɛ?» 10A nǎnw wi yari: «Mii n mɔ yákpoli lóʔo nángwɔɔw ni, a mii fyáa. Níì cán mii i nyɛ níbori, a mii si baa làra.» 11A Yawe Kolocɔlɔɔ si wi yíbe níì jo: «Wìí wi gi joo mɔ ma níì mɔ pye mɔ i nyɛ níbori? Tíigee yasanra mii da jo lè mɔ a kɔ́ lìi í, a mɔ tɔ̀ʔɔ̂ gi kàa lìi lé?» 12A nǎnw jo: «Céwee mɔ kaan mii ma wi pye mii pínɛnyɛnnɛ lè, woro wi tíigi bee yasangaa kaan mii ma a mii lìi.»
13 #
2Kor 11:3; 1Tim 2:14 Lǎli bee ni a Yawe Kolocɔlɔɔ gi joo céw ma níì jo: «Nyàʔá na mɔ gee bee kpéʔele?» A céw jo: «Wàbigi gi mii fáana n pùuni a mii gi kàa lìi.»
14Lǎli bee ni a Yawe Kolocɔlɔɔ gi joo wàbigi ma níì jo:
«Amɛɛ mɔ gee naa kpéʔele lè,
koro na mii n mɔ dánga n sɔ̀lɔ
kěgi yaweere myɛ ní sìnbirigi yaweere myɛ na.
Mɔ a ra fulolo mɔ fícɛnni na,
sáā támiigi líi
mɔ sìíw canya myɛ ni.
15 #
Tɛ̀ɛn 12:17
Mii a nigooro lége mɔ ní céw nínge ni,
si wɔ́ɔ di lége céw yòdaʔaga ní mɔ wógi nínge ni.
Céw yòdaʔaga a mɔ nyúngi tɔ́nʔɔnɔ,
Mɔ si a wi nɔn yédeleeli na.»
16 #
Heb 6:8
A wi gi joo céw ma níì jo:
«Mii a ceseegi wɔʔɔgɔ gbàn mɔ na gbanʔama.
Mɔ a ra wɔʔɔ fícɛnni yáala báriga ni.
Mɔ sɔnguri a ra mɔ kíle mɔ nanw kàbaan na,
woro si pye mɔ nyúngi na.»
17A wi gi joo nǎnw ma níì jo: «Tíigee kéele mii da joo lè níì jo mɔ a kɔ́ gi yasangaa lìi í, àmɛɛ mɔ baa mɔ céw syɛ́ɛnrɛ lóʔo lè níì gi kàa lìi.
Koro na tári n dánga mɔ kapeeli kéele na.
Mɔ a ra wɔʔɔ gbanʔama si náa ra yaliire taagi di ni
mɔ siiw canya myɛ ni.
18Wúuro ní solovinge a wɔ́ɔ ra fíin di na mɔ ma.
Séyi yafálara ti a pye mɔ yaliiri.
19Mɔ yɛ́ɛcɔɔli kakpege na mɔ a ra líi
fwɔɔ bi taa mɔ í ba lúru jée tári ni,
beè mɔ yirige lè.
Níì cán mɔ i nyɛ támiige,
támiigi si ni mɔ a lúru jée.»
20A nǎnw wi céw mɛ́ʔɛ le ni wi yiri Ɛvi, níì cán woro wi pye niweebèle myɛ nɔ́ɔ. 21A Yawe Kolocɔlɔɔ saliga búroyo sámaga nǎnw ní wi céw ma n le be na. 22#Tɛ̀ɛn 22:14 A Yawe Kolocɔlɔɔ jo: «Wéle, tɔ́ɔliw ni syɔɔn n kàri n pye àmɛɛ wolo wàa nyɛ lè n kacǎngèle ní kapeegèle cán. Ki si n yɛlɛ wo wi yérige wi a kɔ́ wi kɔ́gi sánʔa bi wɔ́ɔ sìíw tíige yasangaa cɔɔ bi lìi si kòro beè sìi na làla o làla í.» 23Koro na Yawe Kolocɔlɔɔ syɔɔn nɛnɛ n yirige Edɛn nángwɔɔw ni, koro ga pye táree ni wi yirige lè, wi sa ra dee bee fála. 24A wi ga syɔɔn nɛnɛ n yirige n kwɔ́ɔ Edɛn nángwɔɔw ni, a wi syerubɛnbèle télege yaà nángwɔɔw ni canʔafolomɔ ma, n fàra naanyìnge ŋɔsée na, a woro i nyaari kàbanyi myɛ na ni sìíw tiige kpáa wéle.
હાલમાં પસંદ કરેલ:
Sélimɛ 3: CB10
Highlight
શેર કરો
નકલ કરો
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.