Махьтвеест 28
28
Кохт‐логь кавцат алгтэс.
1А маӈӈа суввет мэнмест, кось нетлест вус‐пейв чувван, пудій Марь Магдалина и нумп Марь кичстед яммій хавт.
2И кич, шэндэй шур манд‐пуштмуш; тэн‐дет што Юммель Ангель луштлэдэй эльмест, пудій и іортій кеткь хавт увс‐няльмест, и арэй су эльн.
3Сусьт ляй уйнем‐наль махт термес‐каск, и су ассэгь лейиш вилкэд кохт мут.
4Вартьій суркниш су и торьесташкуттиш, и чунчлиш махт яммій.
5А ангель поньлій сань незэній гарра, цилькій: еллед пэл: тедам, што тій оцветте поаннашам Исус.
6Сон елляк тасьт: сон пайиній, махт цилькій. Мэннэд, кичстекке сай, косьт Юммель вэннэй.
7И мэннед тодяп, целькед су вопнадэит, што сон пайиній ямміин, и эвд‐бельт цялк тійит Галилеест: томб су уйнветте. Киччед, цильким мон тійит.
8И товда вэйтиш яммій‐кодест и пэлмужэн и шур раммэнь урчестиш целькед су вопнаддэит.
9И кось сій ваньциш целькед су вопнаддэит, кич, Исус пудій сійит воста, и цилькій: рамшэтте! И сій путтиш, таввэтэттиш су юльгит и коммердиш сунне.
10Танна сарн сійит Исус: еллед пэл; мэннэд, целькед му вильлижин, штобы ваньцетиш Галилее: и томбе сій уйнелет му.
11А кось сій ваньциш; танна моттам вартэин мэнниш венна и сарнатыш шорьмус папэть пук ми ли ляманч.
12И таляк чоӈкдэттиш паррасамужэ‐вуйм, и туйиш сарндатмуж, и еннэгь эньтиш теӈкит вуччіит.
13И цилькиш: целькед, су вохпнаттій путтиш ехка, и солдиш су, кось мій уддим.
14И ленчи сак тан баяс ман ольтій райя, мій сар?-?натеп су, и тійит веккетеп кяхнвудест.
15Сій вальтиш тиӈкит, туйиш, махт вопестам лейиш; и кундэчэдій тат сак Іудей кэскэст тан пейв райя.
16А Эхтаплогь вопнадэит ваньцлиш Галилее, терм эл, коз пакэй сійит Исус.
17И уйнестиш су, и коммердиш сунне; а моттам юрьтластиш.
18И алтній Исус, и цилькій сійит: мунне ли антманч пук валт эльмест и мандэсьт.
19И нуть, мэннэд, вопестеккед пукэть олмэть и ристэдь сійит Едж, и эльгь, и Пэсь Вуйӈ нэмме,
20И вопестекке сійит нуть еллед, махт мон тійит паккум; и нуть мун лям тійи‐вуйм пук пейвид ег кедж райя. Аминь.
હાલમાં પસંદ કરેલ:
Махьтвеест 28: Akkala
Highlight
શેર કરો
નકલ કરો
Want to have your highlights saved across all your devices? Sign up or sign in
Евангеліе отъ Матеен, изданное Обществомъ Распространеиія Библін въ Велико‐Британін и въ другихъ странахъ (British and Foreign Bible Society) 1878.
