Махьтвеест 27
27
Кохт‐логь киджат алгтэс.
1Кось же пудій идес‐пейв; пук шорьмус папэ и паррасамужэ олмэнь сарндэттэш Исус баяс, эньтед су сэрма.
2И корриш су, виккиш и эньтиш су Поньтій Пилате ольтіе.
3Танна Іуда, су эньтій, кось уйній, сон ли судманч, кайдадэшкудій, и эньдій мазать колм логь силп‐пильпіит шорьмус папэть и паррасамужэть.
4И сарн: мон ряхкадэм, кось эньтем верете?-?мес вэр. А сій цилькиш сунне: ми мійит ли туй тэн райя? кич ич.
5И суппій сон силп‐пильпіит церква и вэйдэй; мэнэй, и кахксэдэй.
6Шорьмус папэ вальтиш силп‐пильпіит и цилькиш: елля пакманч пійид сійит церков кашнь сиз; тэн‐дет што тат ли вэр арв.
7А пійиш сарндэтмуш, и усьтиш сист кеткь‐асьтій чепсест манд, верес олмуй руккэдем варас.
8Тэн‐дет тэт мант и нэмэдат вэр мандэнь, тан пейв райя.
9Танна шэндэй сарнтамаш пэйель пророкь Іеремій, кобэнч сарн: и вальтиш колм логь силп‐пильпіит арвэдам арв, кон Израиль эльгь арвэдэшь,
10И эньтиш сійит кеткь‐асьтій‐чеп мандэст, махт цилькій мунне Юммель.
11Исус же чунчлэттій ольтій эвте, и кэчьлій сусьт ольтій: Тонна ляк Іудей цар? Исус цилькій сунне: тон сарнак.
12И кось шорьмус папэ и парсамузэ веретиш су, сон ій сарнманч ни мэн.
13Танна сарн сунне Пилат: ика кул, момет свидетельвут сарнэть ту воста?
14И сон ій нэмэдаманч сунне ни эвт сань вусьте, нуть што ольтій чотта дивьюжэй.
15А Едже‐пейв пэсь‐пейв ольтіест ляй маттэям?-?наль луштлед олмэть эвт арьстант, кон сій таттуш.
16Ляй танна сист тетманч арьстант, нэм мельт Варавва.
17И нуть, кось сій чоӈкдэттиш, Пилат цилькій сійит: кон татветте, штоб мун лоштэчим тійит, Варавва, или Исус, кобэнч нэмдат Христэн?
18Тэн‐дет што сон тидій, сій эньтиш су зави?-?дутмуж‐дет.
19Кэскэль тэн, кось сон арій суддам саест, су кав вулгэтій сунне целькед: ель туйед ни мэйт тэн вуйк‐олмже; тэн‐дет што мунне ань нахкрест чотта ляй лоссэд су баяс.
20А шорьмус папэ и парсомузэ пайидиш олмэть кэччед Варавва, а майкэд Исус.
21Танна ольтій кэчьлій сист: кон котест татветте штоб мун лоштачим тійит? Сій цилькиш: Варавва.
22Пилат сарн сійит: мэн шэт мун туйям Исусе, ку нэмдат Христэн? Сарнеть сунне пук: ань ленч поаннашаманч.
23Ольтій цилькій: мэньтем кяхнвуд сон туйій? А сій вял чотяп чурвуш: ань ленч поаннашаманч.
24Пилат, кось уйній, што ій веккет ни ми, а сягатамуш ласнат, вальдій чадзь, и пэзэй кидэть олмэ пут, и цилькій: им мон лякку верь тан вуйк‐олму вэрест: киччед тій.
25И сарнуш пук олму воста, и цилькиш: су вэр мій эл и мій парнэ эл.
26Танна луштій сійит Варавва, а Исус сон та?-?гей, и эньдій поаннашемме.
27Танна ольтій вуччій вальтиш Исус преторій сиз, и чуӈкиш су эл пук полк.
28И яксиш су, и цаккиш су эл рупсес ассэгь.
29И парькедиш венц цоккэй разест, пійиш сунне ойв эл, и эньтиш сунне воллес китте трост‐разь; и чунчлэттиш су воста пулвэ эл, лоньдэттиш су эльн, сарнэть: рамшэд Іудей цар.
30И чолкуш су эл, и вальтиш трост, и таккуш су ойв вусьте.
31И конь лоньдэттиш су эльн, яхсиш су эльн рупсес ассэгит, и тевванаттиш су су ассэге, и лайть?-?ешкуттиш су поаннашемме.
32Кось вэйтэш, воста пудій эхт Кирине‐олмэш, нэм мельт Семман; су паккэстэш куньтед су рист.
33И кось путтиш пайка, нэм мельт Голгофа, ми ли: Кал‐сай,
34Эньтиш сунне юккэдь уксуз, сягэтаманч сеппэнь, и кось куттэлэй, ій татмэнч юккэдь.
35А су поаннашэттэй іоккиш су ассэгит, и соппуш вурьбит;
36И арруш, вартьиш су томбе;
37И пійиш су ойв эл кирь, косьт ляй су верь кирьтаманч: Тат ли Исус, Іудей цар.
38Танна поаннэшиш суйн кохт олму‐коньтіит: эвт воллес‐бельт, а нумп чиндж‐бельт.
39И рай‐мэннэй хавкиш су, кейвиш иджес уйви‐вуйм,
40И сарнуш: церков муртлэттэй и колмэнь пейвест туйелаттій! Веккет ич ичсант. Ленджак Юммель эльк, луштлад ристэст.
41Нуть шэт и шорьмус папэ кйрь‐киди‐вуйм парсамужэ‐вуйм и фарьсей‐вуйм лоньдэттиш и сарнуш
42Нумбит веккитій, а ич ичсес ій вай веккетед. Ленчи сон Израил цар, ань ань лоштлат ристэсьт, и аскэшкоттеп сунне.
43Пійидэдэй Юммель эл; ань ань пяст су, ленчи сон шиттель сунне. Тэн‐дет што сон цилькій, мон лям Юммель эльк.
44Нуть‐же и олму‐коньтій поаннашамэж суйн, лайтуш су.
45А кудат цассэст ляй севнь пук мандэ эльн авцат цас райя.
46А авцат цас баль лэӈкій Исус шор иӈӈэнь: Или́, Или́! лама́ савахфани́? тэт ли: му Юммель, му Юммель, мэн‐дет тон му куддик?
47Моттам сист, кок томб чуньчуш, кось кул?-?лиш тан, сарнуш: Иль коч сон.
48И товда урчэстій эхт сист, вальдій мер?-?сопт, тивдэтій уксусэн, пиій трост кечча, и эньтлій сунне юккэдь.
49А моттам сарнуш: арест; кичстеп, пот, ій Иль су пястед.
50Исус же чурьній дас шур иӈӈэнь и лусьтій вуйӈ.
51И кич, завес церквест кешкдэдэй кувтен, пайлест и вол райя, и мант пуштладэй, и кеткь лунт?-?ниш;
52И яммій коть авниш; и еннэгь пэсь ямміи лишкит пайнэш;
53И вэйтиш яммій кодин маӈӈа су пайнамэсьт, и мэнниш пэсь венна, и чойетэттиш еннэгит.
54А чотьник и тэк, кок суйн вартэиш Исус, кось уйниш мандэ‐пуштмуж и пук шэндачамуж, суркниш чотта, и сарнуш: вуйкист сон ляй Юммель элькь.
55Томб лейиш нуть‐же, и киччиш олгэ‐гарьн еннэгь ніезанэт, кок ваньдзетиш Исус мельт Галилеест, и лужжиш сунне.
56Сій кэскэст лейиш Марь Магдалина и Марь, Якку и Іосія ень, и Зеведей эльгій ень.
57А кось пудій еккис‐пейв, пудій бохтес олмэш Аримафеест, нэм мельт Оськь, кобэнч нуть‐же во?-?пестадэй Исус лунь.
58Сон пудій Пилат гарра, и аннэй Исус лешкь. Танна Пилат пакэй эньтед лешкь.
59И вальдій Оськь лешкь, и кизэй су путтес лійнэнь.
60И пиій су иджес од яммій кодь сиз, ку сусьт ляй чупманч каллій сист, и іоррэтій шур кеткь яммій?-?кодь ухсе, и уйдій.
61Ляй же томбе Марь Магдалина и нумп Марь, кок арруш яммій кодь воста.
62Нумб пейв, ку ли маӈӈа пятницест, чоӈкдэттиш шорьмус папэ и фарисей Рилат луз,
63И сарнуш: хер! мій муштьим, тэт келес, кось вял ляй иллій, цилькій: мяӈӈа колмэн пейвест пайинам.
64Тэн‐дет, пак руккэдед яммій‐хавт колмат пейв райя, тэн‐дет што су вопнаттій ет лейиш поттед, и соллэдед су, и сарнэд олмэнь: сон пайинэй ямміи кэскест. И лянч маӈьмус мантамуш кяхнап вусмуз.
65Пилат цилькій сійит: тист ли вартьям‐наль; мэннед, вартьеккед махт тетветте.
66Сій вулькиш, и пійиш кальм луз вартэит, и пійиш кятка печат.
હાલમાં પસંદ કરેલ:
Махьтвеест 27: Akkala
Highlight
શેર કરો
નકલ કરો
Want to have your highlights saved across all your devices? Sign up or sign in
Евангеліе отъ Матеен, изданное Обществомъ Распространеиія Библін въ Велико‐Британін и въ другихъ странахъ (British and Foreign Bible Society) 1878.
