Genesis 3
3
Ja winiki, mi sk'u'an ja jas alji yab' yuj ja Dyosi
1B'a spetsanil ja chante jumasa sb'a yoj k'ul sk'u'lan ja Dyosi, mey pilan chan ma' jel wa sna'a yuj ja men b'its'il chani. Jun k'ak'u ja b'its'il chan jawi, ti yal yab' ja ixuki:
—¿Ta jachuki yujni ye'n yala wabyex ja Dyos ja moka lo'ex ja sat ja te' jumasa b'a yaljil tek'uli?
2Ti yala ja ixuki:
—Oj b'ob' jlo'tikon chikan jas tek'ulil b'a yaljili— 3Ja jas yal kab'tikon ja Dyosi, jach' jastal iti: —Ja b'a snalan ja yaljil tek'uli ay jun ib'e te' mi oj b'ob' a tul ex cho mi oj ja lo'ex ja sati, yuj k'a a lo'owex ojni chamanika, —xchi ja Dyosi.
Jaxa men b'its'il chani, ti cho yala'a:
4—Ja jawi, le'uj ab'al. Mi oj chamanik. 5Ja Dyosi, wa sna'a lek, ja yajnixa lo'owex ja sat ja te' jawi, oj laj'ex jastal ja Dyosi, oj cho a na'ex ja b'a lek sok b'a mi lekuki.
6Jaxa ixuki, tojxta och sk'el ja sat ja te'i, oj ma b'ob' lo'xuk ma miyuk, b'a'ya kechan yuj ja sk'ela jel ok' sk'ujol, yuj ja jel ja jas wa sk'ana oj sna'i, ja'yuj ti stulu june ja sat ja te'i, slo'o. Tsa'an cho ya'yi ja statami, jaxa ye'n cho slo'oni'a. 7Ja juts'in jawi, jak sk'ujole ja jas sk'u'lane yuj ja b'asan xa aye'i. Ti yi'aje chab' oxe spowil ch'upak chej sts'isawe ja smusu sb'aje sok.
8Sok ja ik' b'a och k'ak'u, ja winik sok ja ixuki ti yabye wan ek'el ek' ja Dyosi, wax waji sok wax jak ja b'a yoj yaljil tek'uli, ja'yuj ajnel waj snak'a sb'aje b'a niwak te' jumasa, b'a yoj yaljil tek'uli. 9Jaxa Dyosi, ti spaya ja winiki, sjob'o yi:
—¿B'a aya a?
10Ti yala ja winiki:
—Kab' wa k'umal b'a yoj yaljil tek'uli jel xiwyon yuj ja lom b'asan ayoni. Ja'yuj ajnel waj jnak' jb'aj.
11—¿Jastal waxa na'a ja b'asan aya b'a? —xchi ja Dyosi. ¿Ma yuj a lo'o ja sat ja te' it kala wab' mok a lo'i?
12Ti yala ja winiki:
—Ja ixuk it a wa'ki b'a oj smojtayoni, ye'n ya'ki ja sat ja te' jawi, ja'yuj jlo'o, —xchi ja winiki.
13Jaxa Dyosi, ti cho waj ja b'a'y ja ixuki, ti yala yab'a:
—¿Jasunk'a a k'u'lani?
Ti yala ja ixuki:
—Ye'n slo'layon ja men b'its'il chani. Ja'yuj jlo'o ja sat te' jawi, —xchi ja ixuki.
14Ja'yuj ja Dyosi, ti yal yab' ja men b'its'il chani:
jaxa we'n yuj ja jasa k'ulani
kechan we'n jel tsats oj ja wi' ja wokoli,
ja b'a spetsanil ja chante'i jumasa—
Ja janek' oj ajyuk a sak'anili,
ti oj ja kich b'a lu'um wa lukumi,
sok ja oj ja wa'eluk ja ts'ub'il ja lu'umi.
15—Ke'n mi oj ka a wil
a b'aj sok lek ja ixuki;
mi lek oj ka yil sb'aj,
ja yintil jumasa ye'n, sok ja we'n.
June ja yintil ye'n oj pach' yi ja s'olomi,
jaxa we'n oj ja k'ux yi ja stop yoki.
16Jaxa ixuki, ti yala yab'a:
—Yajni oj ja man ja yala walatsi,
—Jel oj ja wi' ja syajal wa b'ak'teli—
a'nima jachukuk jastal jawi,
oj ni cho a k'an oj ja wil awuntikil sok wa tatami,
jaxa we'n yib k'ab'al oj ajyan sok.
17Jaxa winiki, ti yal yab'a:
—Ja yuj ja yan yuj ja jasa k'ulani,
mixa lek oj ajyuk ja lu'umi,
ja'yuj ja lom a k'u'an ja jas yala wa che'umi
cho a lo'o ja sat ja te' it
kala wab' mi oj ja lo'i.
Ja'yuj, ja janek' oj ajyuk wa sak'anili
jel oj ja wi' ja a'tel b'a
oj ja ta' ja jas oj ja wab'i.
18Ja b'a lu'umi oj ajyuk k'i'ix b'a oj syajb'esa,
oj cho ajyuk itaj jumasa b'a oj ja wab'i.
19—Jel tsats oj a'tijanan b'a
oj ja ta' ja jas oj ja wab'i.
Jach' oj ja k'u'luk man oj chaman,
ts'ub' lu'umni oj cho paxana,
ts'ub' lu'umni tojb'iya soka,
ja we'n toj ts'ub' lu'umani'a
cho ts'ub' lu'umni oj cho paxana, —xchi ja Dyosi.
20Jaxa winiki, ya sb'i'iluk Eva#3:20 Eva: Ja b'i'ilal Eva wa sk'ana yale sak'anil. ja sche'umi, yuj ja ye'n nanal b'a spetsanil ja ma'tik oj ajyuk b'a lu'umi.
21Tsa'an ja Dyosi, ya'yi sk'u' ja winik sok ja sche'umi, ts'ujmil chante ya slape, 22ti yala'a:
—Ja'yuj ja winik sok ja ixuki, lajane sok jastal ke'ntik yuj ja wa sna'awe b'a lek sok b'a mi lekuki. Yuj k'a waj slo'e ja sat te' it wax ya'a sak'anili, ojni ajyuk sak'anile spetsanil k'ak'u'a—.
23Ja'yuj ja Dyosi, snutsu'el ja b'a yoj yaljil tek'ul b'a Edeni, ya ya'telta ja lu'um b'a it ja k'ulji soki. 24Tsa'an yajni snutsuta el ja winik sok ja sche'umi, ti ya'kan chab' oxe anjel querubin#3:24 anjel querubin: Ja querubini jach splanta jastal chante sok winik, jel tsatse sok wax talnaniye. b'a stojol wax jak ja k'ak'u yuj ja yaljil tek'ul b'a Edeni, ti cho ya'a jun punyal wan ajlel ti wa'n sututuk b'a sjoyanal ja yaljil tek'uli, ja b'a mi ma oj b'ob' ya och mojan ja b'ay ja te' it wax ya'a sak'anili.
હાલમાં પસંદ કરેલ:
Genesis 3: YABD
Highlight
શેર કરો
નકલ કરો
Want to have your highlights saved across all your devices? Sign up or sign in
© Sociedad Bíblica de México 2021