Luuka 24
24
Ovenyerera wa Yeesu
1Vanihukuni noopacera na esimana, oyaaka ni oxa, asithiyana yaakuxa itthu iye soowunkhelaxa yaareherenraaya ni yaarowa onihiyeni. 2Yaaphwanya nluku ntokotoko na nihiye nikakhiweene, 3mene evolowaka, khayaaphwannye muttembo wa Yeesu. 4Etikhinaka hiihaale, vano wootutuxereya asilopwana eeli ni ikuwo saanre ntoko nsuwa yaawaattamela yaawo. 5Awo yaahuuramiha nyurusaya ni woova, ni asilopwana yaaweerela: “Heeni mummwaasaasaanyu variyari wa akhwiiye Yoole ori ni okumi? 6Owo khamomo! Oovenyerera! Muupuwelele yeeyo ooleenlaaweni nlelo areene ni nyuwo oGalileiya. 7‘Ontthuneya weera Mwaana a mutthu avahereriwe mmatatani a anamattheka, akhomeliwe ni avenyerere nihuku nanaararu.’” 8Vano yaahuupuwelela maswaawe. 9Yaahokolowaaya onihiyeni, yaahaathalihera itthu sootheene seiye oohusera muloko nimmoha, nitho wa akina ootheene. 10Yaathalihenre itthu seiya arummwa yaari Mariya oMagadalene, Yohana, Mariya amayawe Yakobe, ni akina yaari ni yaawo. 11Awo khayaaroromenle asithiyana. Wa yaawo, maswaaya yaari ntoko masu a anepa. 12Wa soothesene, Pedru aaheemela, anatthimakela onihiyeni. Uuramaka, oonne esaanda paahi. Aapwaha ni aahokolowa ootikhineene ni yeeyo yaakhumelenle.
Mphironi ya wEmawusi
13Nihuku nenenenne, eeli a yaawo yeera erowaka wa muttetthe wiitthaniwa Emawusi, waarakamela ikilomeetru* muloko niimoha oYerusaleemu. 14Mphironi, yaanuuluma mwaha wa sootheene saakhumelenle. 15Yuulumaka ni etthekulaka hiihaale, Yeesu muneenaawe aawaattamela, anapacera weetta ni yaawo, 16mene maithwaaya yaahooceelihiwa omusuwela. 17Owo aahaakoha: “Muntthekulela eheeni mweettaka?” Awo yaaheemela ni ikhovesaya soothanana. 18Mmoha a yaawo, iitthaniwa Kleyopa, aamukoha: “Nyuwo muri namarwa mmoharu oYerusaleemu, ahisuwelaka itthu sikhumelenlewo wa mahuku yaala?” 19“Itthu heeni?” Owo aamukoha. Awo yaamwaakhula: “Seiye simukhumelenle Yeesu muNasarete. Aari Mprofeeti oowera ni masu ni miteko ohoolo wa Muluku ni muloko wa atthu wootheene. 20Ahooleli a asaserdoti* ni asitokweenaahu anlamula yaamvaherera weera athoriheliwe okhwa, ni yaamuthomeya. 21Hiyo naaweherera weera eera akhale Yoowo aneera aruuhe ovuluwa wa oYixrayeli. Olelo nri nihuku nanaararu okhuma sootheene seiye seereiye. 22Vano, asithiyana akina variyariwahu aanitutuxa olelo. Yaarowa onihiyeni oyaaka ni oxa, 23ni khaaphwannye erutthwaawe. Yaahokolowa yeeraka weera yaahiixooniherawo andyelo eweerelaka weera Yeesu ori ni okumi. 24Vanonto, asikhwiihu akina yaarowawo onihiyeni, ni yaaphwanya sootheene ntoko asithiyana yaahimalaaya, mene khaamoonne Yoowo.” 25Owo aaweerela: “Nyuwo onnoohaleelani wiiwexexa ni munnalekela ororomela sootheene seiyo yaalokolenlaaya maprofeeti. 26Khawaatthuneya weera Kristu ahaawe itthusene seiyo ni avolowe moovuwanimwawe?” 27Vano, okhuma Moisesi ni maprofeeti ootheene, aahaathalihera sootheene saalempwa sa Yooworu. 28Yaattamelaka muttetthe yaarowaayawo, Yeesu aakhala ntoko aatthuna opwaherera muhoolo. 29Vano awo yaamunyesereraxa yeeraka: “Mukhale ni hiyo va, niwoko oneera wiilaka, othana ohanle vakhaani omala.” Vano Owo aavolowa weera akhale ni yaawo. 30Areene vameesa ni yaawo, aakuxa ipaawu, anatthapela, anameyanyiha, anaavaha. 31Vano maithwaaya yaahuliwa ni yaamusuwela, ni Owo aalakaseya ohoolowaya. 32Awo yaakohana: “Mirimasahu khasivinghe olelo mphironi Owo uulumaka ni hiyo, anithaliheraka Yoolempwa*?” 33Yaavenya ni yaahokoleela woowaakuveya oYerusaleemu. Weiwo yaahaaphwanya muloko nimmoha, ni awo yaathukumanne ni yaawo, 34enaweerela: “Ekhaikhai! Apwiya aavenyerera ni ahiixoonihera wa Simeyoni!” 35Eeli ale yaahaathalihera seiyo seereiye mphironi, ni moota yaamusuwenlaaya Yeesu Owo ameyanyihaka ipaawu.
Yeesu oniixoonihera wa oohuseraawe
36Yuulumaka hiihaale, Yeesu muneenaawe aahiixoonihera wa yaawo ni aaweerela: “Murettele okhale ni nyuwo.” 37Awo yaatuthuwa ni yaahoova, yuupuwelaka weera yoona munepa. 38Owo aaweerela: “Heeni muntuthuwaanyu ni munghovelaanyu mmurimanimwanyu? 39Moone mmatatanimwaka ni inaawosaka. Ti Yoomi! Mukitave ni moone. Munepa khoonono erutthu, hata makhuva ntoko munoonaanyu Miyo kikhalannaaka.” 40Ahimakaru yeeyo, aawoonihera matata ni inaawo. 41Ehiroromelaka nlelo niwoko na ohakalala ni otikhina, aahaakoha: “Nyuwo mookhalano etthu yooca weera kice?” 42Yaamvaha mpatta mmoha wa ehopa yoowooxiwa, 43ni aakhuura awosa yoonaka. 44Vano aaweerela: “Ti yeeyo kooleenlaakani kireene nlelo ni nyuwo: ‘Waatthuneya weera sikwaniheriwe sootheene silempwe mwaha wa Miyo mmalamuloni a Moisesi, mmaprofeetini ni mulivuruni ya icipo.’” 45Vano Owo aahaahulela soowuupuwelasaya weera awo ewere wiiwexexa Yoolempwa*. 46Aaweerela: “Yoolempwa weera Kristu aarwa ohaawa ni ovenyerera mookhwaani nihuku nanaararu, 47nitho weera mwa Nsinanawe waatthuneya olaleiwa orukunxa murima wa miloko sootheene, okhuma oYerusaleemu, weera yaakhele elevelelo ya soottheka. 48Nyuwo muri anamoona a itthu seiya. 49Miyo kinimoorumihelani Yoowo yoororomelihiwa ya Atithaka, mene mukhale musidadeni mpaka muneeraanyu mwaakhele ikuru sa musulusulu.”
Owelihiwa wa Yeesu
50Aaronghiwaawe mpaka vakhiviru wa oBetaniya, Yeesu aaheemexa matata ni aahaareeliha. 51Aareelihaka hiihaale, aahaahiya ni aawelihiwa wiirimu. 52Vano awo yaamulapa ni yaahokoleela oYerusaleemu ni ohakalalaxa, 53ni yannakhala Mpaani mwa Muluku ehuhu yootheene emuttottopelaka Muluku.
હાલમાં પસંદ કરેલ:
Luuka 24: VMK2021
Highlight
શેર કરો
નકલ કરો
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
