Luuka 22
22
Yoovaanelela
1Yeera ekhuveelaka efesta ya ipaawu soohikhalano eferementu, yiitthaniwa mPaska*. 2Ahooleli a asaserdoti* ni anamawera a nlamulo* yeera yaasaasaka mukhalelo woomwiiva Yeesu, yoovatho muloko wa atthu. 3Vano, Satana aavolowa mwa Yudasi, iitthaniwa Iskariyoti, mmoha a oohusera muloko neeli. 4Yudasi aarowa wa ahooleli a asaserdoti* ni asitokweene a anakhotto a Empa ya Muluku, ni aavaanelela vamoha ni yaawo moota heeni eeraawe amvarihe Yeesu. 5Awo yaahakalalaxa ni yaahiiwanana omvaha musurukhu. 6Owo aahaakhulela, ni aaweherera ehuhu entthuneya owinnyerera Yeesu, muloko wa atthu ohikhanlewo.
Yooca yoomalihera ya Apwiya
7Ommaleloni naaphiya nihuku na ipaawu soohikhalano eferementu, mwa nenno waamutthuneya wiiva eputtiputthi ya mPaska*. 8Yeesu aamurumiha Pedru ni Yohaane, aweerelaka: “Murowe ni mwareherere yooca ya mPaska*.” 9Awo yaamukoha: “Muntthuna woowi weera hiyo nareherere?” 10Owo aawaakhula: “Mwaavolowaka musidadeni, munoomphwanya mulopwana mmoha iireyaka mwaapu wa maahi. Mwamutthare mpaka empa aneeraawe avolowe, 11ni mwamuleele muneene a vaate vawo: ‘Muhusiha onookoha: eri woowi ekwartu ya aletto mwa yeeyo Miyo kineeraaka kimuce mPaska* vamoha ni oohuseraaka?’ 12Owo anaawoonihereni ekwartu etokotoko ya musulu ereeneno meesa ni ihice, sootheene soolikana. Mwareherere sootheene weiwo.” 13Awo yaavenya ni yaaphwanya sootheene ntoko Yeesu aaleenlaawe. Vano yaamureherera mPaska*. 14Ephiyaka ehuhu, Yeesu ni arummwaawe yaakilaathi vameesa 15ni aaweerela: “Koohaawelaxa ni murima wootheene omuca mPaska* ola vamoha ni nyuwo kihinaaye ohaawa. 16Vano Miyo kinooleelani: nkinrowa omucatho mPaska* mpaka aneeraawe akwaniheriwe moomweneni wa Muluku.” 17Aakuxalaawe ekoomixi, aatthapela ni aaheera: “Mukuxeke eyo ni mukawaneke. 18Vano, Miyo kinooleelani weera nkinrowa owuratho wa soowiima sa ematta ya iwuuva* mpaka oneeraaya orwe omwene wa Muluku.” 19Akuxaka epaawu, aatthapela, aameyanya ni aahaavaha oohusera eeraka: “Ela ti erutthwaaka, yoovahereriwa wa nyuwo. Mpakeke yeeyo mukuupuwelelaka Miyo.” 20Mooteene yoowo, emalihaka oca, aakuxa ekoomixi eeraka: “Ekoomixi ela ti wiiraana onyowani mwa ephomaaka, evuuvihiwe wa nyuwo. 21Moonetho, ntata na yoole anaakivarihe nri ni Ntatanaka vameesa. 22Mwaana a mutthu onoorowa ntoko olamuliwaawe, mene Ii! Onoohaawa yoole anaamvarihe.” 23Awo yaapacera okohana taani a yaawo aneera apake yeeyo. 24Waakhumatho onyakulihana variyariwaya mwaha wa taani a yaawo oophwanela okhala mutokweene. 25Yeesu aaweerela: “Mamwene a ilapo annaalamula amalapo, ni yaawo anaalamula, aniixiitthana atthu ampaka sooreera. 26Nyuwotho muhikhale hiiho. Ohiyanawaya, ontthuneya weera mutokweene a variyariwanyu akhale ntoko mukhaaneene, ni yoole onlamula, ntoko murumeiyi. 27Vano, taani mutokweene: yoole ori vameesa, hoye hoye yoole onrumeela? Khahiyono yoole ori vameesa? Miyotho kiri variyariwanyu ntoko yoole onrumeela. 28Nyuwo muri yaale avilenle vamoha ni Miyo mwa sooweereriwasaka. 29Miyo kinoovahererani omwene, ntoko Atithaka akivaherenraaya omwene, 30weera muceeke ni muwureke vameesaniwaka mureene moomwenenimwaka ni weera mukilaathi muhiceni, muthorihaka ipuumba* muloko ni piili sa aYixrayeli. 31Simeyoni, Simeyoni, Satana onnavekelaxa weera ooveereni ntoko etrigu, 32mene Miyo kohoovekelelani weera nroromelonanyu nihooceeleye. Vano nyuwo mwaarukunxaka murima, mwaalipihe axunninyu.” 33Vaheera Pedru aamwaakhula: “Apwiya, koolikana weera koohooleni okaliposo, nitho mpaka mookhwaani.” 34Yeesu aamwaakhula: “Kinooleelani, Pedru, weera ohinaaye wiipa nthupi olelo, nyuwo munookiruna imaara tthaaru, mweeraka khamukisuwenle.” 35Yeesu aahaakoha: “Miyo koorumihalaakani woohikhalano nihottha, nrupa, hoye hoye ikwakwaatta, yaahoohaleelani etthu?” Awo yaamwaakhula: “Hoye!” 36Owo aaweerela: “Vaanaano vaavatho, mwakhalano nihottha, mukuxe, hiihotho nrupa. Vanonto, mwaahikhalano ekatana, muthumiheke mukaandyowaanyu ni muthume ekatana. 37Yoolempwa: ‘Aahaalikeleliwa vamoha ni atakhali.’ Miyo kinooleelani weera eyo entthuneya okwaniheriwa mwa Miyo. Aani, yeeyo elempwale mwaha wa Miyo ehanle vakhaani okhwaniheriwa.” 38Oohusera yaamweerela: Ngwehe, Muhusiha, sookhala va ikatana piili.” Owo aawaakhula: “Sookwana.”
Yeesu omvekela vamwaakoni wa Sooliveira
39Yeesu aarowa vamwaakoni wa Sooliveira ntoko aakhovelelaawe, ni oohuseraawe yaamutthara. 40Aphiyaka vanipuroni, Owo aaweerela: “Muvekele weera muheereriwe.” 41Owo aasusa vakhaani, anakokhora, anapacera ovekela eeraka: 42“Tiithi, mwatthuna, mususihe wa Miyo ekoomixi ela, wa soothesene, ohipakiwe otthunawaka, mene otthunawanyu.” 43Vano aahiixoonihera wa Yoowo ndyelo a wiirimu aamulipihenre. 44Areene ni othananaxa, aatepaxa ovekela ni orettheelawawe waari ntoko mattonyo a ephome yaamorenle vatthayani. 45Avenyaka moovekelani ni ahokoleelaka wa oohuseraawe, aahaaphwanya ekonaka, ekhulumungweene ni othananaxa. 46Owo aahaakoha: “Heeni munkonaanyu? Mvenye ni muvekele weera muheereriwe.”
Otthukiwa wa Yeesu
47Yeesu nlelo alokololaka, yaahoowa atthu ancipale yaahooliwa ni Yudasi, mmoha a muloko neeli. Owo aamwaattamela Yeesu weera amuulumihe ni ebeecu. 48Yeesutho aamukoha: “Yudasi, onoomvariha Mwaana a mutthu ni ebeecu?” 49Yoonaka yeeyo yeera yeereiye, awo yaari ni Yeesu yaamukoha: “Apwiya, niwaneke ni ikatana?” 50Mmoha a yaawo aamvulaliha murumeiyi a mutokweenexa a asaserdoti*, amukwasaka naarunawe na moono mulopwana. 51Yeesutho aawaakhula: “Wookwana!” Atavaka naaru na murumeiyi ole, aamulamiha. 52Vano Yeesu aaweerela ahooleli a asaserdoti*, asitokweene a anakhotto a Empa ya Muluku ni asitokweene a muloko yaangweenle omwaasaasa: “Weeraka Miyo kinaalamula atthu weera ewane ni ebooma, nyuwo mungwaanyu ni ikatana ni ikopo? 53Mahuku ootheene Miyo kaari ni nyuwo Mpaani mwa Muluku, ni khamwaakitthunke. Mene ehuhuweene yeela ti yawinyu – elamulaka epiphi.”
Pedru onimuruna Yeesu
54Vano, emutthukaka, yaamurongha wa empa ya mutokweenexa a asaserdoti*. Pedru aahaatthara ottaiwene. 55Yiiseelakatho mooro eriyari ya nipuwa, ni ekilaantheene mukhwipi, Pedru aakilaathi ni yaawo. 56Murumeiyi muthiyana mmoha aamoona akilaantheene vale ngwaarani wa mooro. Aangweha nnenesene ni aaheera: “Mulopwana ola aari ni Yoowo.” 57Aarunatho eeraka: “Muthiyana, nkimusuwenle.” 58Vahoolo vakhaani, mutthu mukina aamoona ni aamweerela: “Nyuwotho muri mmoha a yaawo.” Pedru aamwaakhula: “Mulopwana, nkihiyono!” 59Yaaviralaaya ewoora emoha, mukina aahaakhulela eeraka: “Vekhaikhai, mulopwana ola aari vamoha ni Yoowo, niwoko ori muGalileiya.” 60Pedru aamwaakhula: “Mulopwana, nkisuwenle yeeyo munuulumaanyu!” Uulumaka hiihaale, nthupi waahiipa. 61Apwiya yaarukunuwa ni yaangweha nnenesene Pedru. Vano Pedru aahuupuwelela yeeyo Apwiya yaamuleenlaaya: “Ohinaaye wiipa nthupi olelo, munookiruna imaara tthaaru.” 62Avenyaka vaavaale, aahiinla aripiweene murima.
Anakhotto animutheiya Yeesu
63Alopwana yaamutthunke Yeesu yaapacera omutheiya ni ommana. 64Yaamukhuneela maitho ni yaamukoha: “Otthome, taani yoomanne?” 65Ni yannamuruwana ni masu makina mancipale.
Yeesu ohoolo wa Pilatu ni Herodi
66Niwelaka nsuwa, eSineedriyu* yaathukumana – ahooleli a asaserdoti* nitho anamawera a nlamulo*, ni Yeesu aaronghiwa ohoolowaya. 67Awo yaamweerela: “Nyuwo mwaari Kristu, munileele.” Yeesu aawaakhula: “Miyo kooleelani, nyuwo khamunrowa okiroromela, 68ni Miyo kookohani, nyuwo khamunrowa okaakhula. 69Okhumatho vaanaano vaava mpaka muhoolo Mwaana a mutthu anaakilaathi moono mulopwana wa Muluku a ikuru sootheene.” 70Ootheene yaamukoha: “Vano, Nyuwo muri Mwaana a Muluku?” Owo aawaakhula: “Ti hiiho weera Miyo ti Mwaana a Muluku.” 71Awo yaaheera: “Khaninaatthuna anamoona akina! Noohiiwa nnene ni eyanowaawe muneenaawe.”
હાલમાં પસંદ કરેલ:
Luuka 22: VMK2021
Highlight
શેર કરો
નકલ કરો
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
