Yohaane 6
6
Yeesu onaaciha atthu macira miloko mithanu
1Eviraka ehuhu ekina Yeesu aarowa okhopela okina wa ephareiya ya oGalileiya (eyo tiiyo ephareiya ya oTiberiyade). 2Atthu ancipalexa yaamutthara niwoko yaahoona ineneero sootikhiniheya Owo aapakenlaawe aretta. 3Vano Yeesu aawela vamwaakoni ni aakilaathi ni oohuseraawe. 4Aakhuveela mPaska*, efesta ya aYuda. 5Awelihaka maitho ni awoonaka atthu ancipalexa ekhuveelaka, Yeesu aamukoha Filipe: “Nnithumele woowi ipaawu muloko ola?” 6Aakoha yeeyo paahi weera amuyese, niwoko aasuwela nnene yeeyo eeraawe apake. 7Filipe aamwaakhula: “Idinaariyu* macira meeli khasinaathumela ipaawu soowaatta weera khula mutthu aakhele yoomeyanyiwa!” 8Andreiya, oohusera mmoha mukina, munneiye Simeyoni Pedru, aamweerela Yeesu: 9“Ookhala va mmiravo orino ipaawu ithanu sa esevada* ni ihopa piili sikhaanene, mene eheeni iya wa atthu ancipale ala?” 10Yeesu aaweerela: “Mweerele muloko wa atthu okilaathi.” Waakhala munyepu mwincipale nipuro nenne ni ootheene yaakilaathi. Asilopwanaru yaari wookwanaka macira miloko mithanu. 11Yeesu aakuxa ipaawu, anatthapela, anaakawela yaawo yaakilaanthe mpaka yaatthunaaya. Aaheerihatho hiiho ihopa. 12Ootheene evonaka, Yeesu aaweerela oohuseraawe: “Muthukumanye mivithe weera sihiriheye.” 13Vanonto, yaathukumanya ni yaasariha mipapara muloko ni miili sa mivithe sa ipaawu sa esevada* saahiiwe ni yaale yaaciiye. 14Woonaka eneneero yootikhiniheya Yeesu aapankaawe, muloko wa atthu waapacera weera: “Vekhaikhai, Ola ti Mprofeeti eera awe mweelaponi ya vathi.” 15Yeesu asuwelaka weera awo yaatthuna omunyesereriha omvara omwene, aavenyatho arowaka omwaako meekhaawe.
Yeesu oneetta vasulu wa maahi
16Wiilaka, oohuseraawe yaarowa ophareiya 17weiwo yaavolongwaaya munikulani ni yaalapuwela oKafarnawu. Waahiila ni Yeesu eera ahinaaye orowa mpaka weiwo yaaraayawo. 18Yaanoopa epheyo etokotoko ni ephareiya yaakhala ni mitekuteku. 19Yeettihalaaya nikula ikilomeetru* ithanu, hoye hoye ithannamosa, yaamoona Yeesu akhuveelaka nikula eettaka vasulu vaphareiyani ni yaahoova vancipale. 20Vano Owo aaweerela: “Ti Yoomi, muhoove!” 21Vano yaatthuna omwaakhelela munikulani ni woowaakuveya yaaphiya okhopela weiwo yaarowaaya. 22Oxaawaya, atthu ancipale yaari okhopela okina yaahoona weera naakhalawo nikula nimoha paahi nitho weera Yeesu khaavolongwe mwemmo vamoha ni oohuseraawe, mene weera awo yaarongwe yaaworu. 23Vano, makula makina ekhumaka oTiberiyade yaakhuveela nipuro weiwo atthu ancipale yaaciiyaaya ipaawu Apwiya emalingheene omtthapela Muluku. 24Esuwelaka atthu ancipale weera, hata Yeesu, naari oohuseraawe, khayaakhanle weiwo, yaavolowa mmakulani enarowa oKafaranawu emwaasaka Yeesu.
Yeesu ti yooca ya okumi
25Emphwanyaka Yeesu okhopela, yaamukoha: “Muhusiha, muphiyale yaakhani nno?” 26Yeesu aawaakhula: “Vekhaikhai, nyuwo munkaasaasa khoohiyono niwoko moonnaanyu ineneero sootikhiniheya, mene niwoko mwaahooca ipaawu ni mwaavona. 27Muhivarele muteko yooca emmala, mene yooca enkhala mpaka mookumini woohimala, mwa yeeyo Mwaana a mutthu anoovaheeni. Muluku Atiithi aamvaha Yoowo eneneero ya waakhuleleya.” 28Vano yaamukoha: “Ontthuneya opaka eheeni weera nivare miteko seiyo Muluku ontthunaawe?” 29Yeesu aawaakhula: “Muteko wa Muluku ti ola: omuroromela Yoole Muluku omurumihalaawe.” 30Vanonto yaamukoha: “Eneneero heeni yootikhiniheya muneeraanyu moonihere weera noone ni noororomeleni? Mmwipake eheeni? 31Makholowaahu yaahooca emana* munikareni, ntoko elempwalaaya: ‘Owo aahaavaha oca sooca sa wiirimu.’” 32Yeesu aaweerela: “Miyo kinooleelani ekhaikhai: Khaahiyono Moisesi oovangheni sooca sa wiirimu, mene ti Atithaka anoovahani sooca sa ekhaikhai sa wiirimu. 33Vano, Yooca ya Muluku ti Yoowo okhurungwe wiirimu ni omvaha okumi wa elapo ya vathi.” 34Awo yaaweerela: “Apwiya, munivahe yooceene yeeyo mahuku ootheene.” 35Vano Yeesu aahima: “Miyo ti Yooca ya okumi. Yoole ongwa wa Miyo khawa avoliwa etala ni yoole onkiroromela Miyo khawa avoliwa ntthona.” 36Ntokotho kooleenlaakani: nyuwo mookoona nlelotho khamunroromela.” 37Ootheene Atiithi ankivahaaya, eniiwe wa Miyo. Ni yoole anaawe wa Miyo, nkiwa kimoomola. 38Vano, kookhuruwa wiirimu khoohiyono opaka otthunawaka, mene otthuna wa Yaawo akiruminghe. 39Ni wu ti otthuna wa Yaale akirumihale: weera Miyo nkiwa kimuyeleela hata mmoha a yaawo Atiithi yaakivanghaaya, mene weera kaavenyererihe nihuku noomaliha. 40Otthuna wa Atithaka ti weera ootheene aningweha Mwaana a mutthu ni animuroromela Yoowo, ekhalane okumi woohimala. Ni Miyo nkimvenyererihe nihuku noomaliha.” 41Wa yeeyo aYuda yaapacera omuttaandawula Yeesu niwoko Owo aaheera: “Miyo ti Yooca ekhurungwe wiirimu.” 42Vano yaaheera: “Ola khahiyono Yeesu mwaana a Yoseefe, mwa Yoowo atithawe ni amayawe hiyo naasuwenlaahu? Ongwereya hai weera: ‘Kikhurungwe wiirimu’?” 43Yeesu aawaakhula: “Mmaale ni ottaandawulawanyu. 44Khaawo ongwera owa wa Miyo, ehikhanle Atiithi akirumihale ampurunle mmunepani, ni Miyo nkimvenyererihe nihuku noomaliha. 45Elempwale mmaprofeetini: Ootheene eniixuttihiwe ni Muluku.” Ootheene angwiiwa Atiithi ni anxuttihiwa ni Yaawo angwa wa Miyo. 46Khaawo owoonne Atiithi, ahikhanle Yoole ongwa wa Muluku. Yoole paahi aawoona Atiithi. 47Kinoororomelihani weera yoole onroromela, ookhalano okumi woohimala. 48Miyo ti Yooca ya okumi. 49Makholowaanyu yaahooca emana* munikareni ni ahookhwa. 50Wa sootheene, va eri Yooca enkhuruwa wiirimu weera ahikhwe yoowo aneera ace. 51Miyo ti Yooca ya okumi yaakhurungwe wiirimu. Mukina aneera ace Yooca ela, anaakhale ni okumi mahuku ootheene. Yooca ela ti erutthwaaka kineeraaka kivahe weera elapo ya vathi ekhale ni okumi.” 52Vano aYuda yaapacera waakhulanaxa yaaworu: “Ongwereya hai Mulopwana Ola onivaha erutthwaawe weera nikhuure?” 53Yeesu aaweerela: “Miyo kinooleelani ekhaikhai: Nyuwo mwaahikhuura erutthu ya Mwaana a mutthu, naari mwaahiwura ephomaawe, khamunkhalano okumi mwa nyuwo asineenaanyu. 54Ootheene ankhuura erutthwaaka ni angwura ephomaaka, akhalano okumi woohimala ni nkaavenyererihe nihuku noomaliha. 55Vano, erutthwaaka ti yooca ya ekhaikhai ni ephomaaka ti yoowura ya ekhaikhai. 56Ootheene ankhuura erutthwaaka ni angwura ephomaaka, ankhala mwa Miyo ni Miyotho mwa yaawo. 57Mooteene yoowo Atiithi ankhalaaya ni okumi akirumihalaaya ni Miyo kinkhala niwoko na Atiithi, hiihotho yoole onca erutthwaaka anaakhale niwoko na Miyo. 58Ela ti Yooca yaakhuruwale wiirimu. Makholowaanyu yaahooca emana* ni yaahookhwa, yooletho onca Yooca ela, anaakhale ni okumi mahuku ootheene.” 59Aahima yeeyo axuttihaka muSinagogani* oKafaranawu.
Oohusera ancipale animuhiya Yeesu
60Yiiwalaaya yeeyo, ancipale a oohuseraawe yaaheera: “Masu ala ti oorika. Taani ongwera wiiwa yaawo?” 61Asuwelaka nnene weera oohuseraawe yeera ettaandawulaka mwaha wa yeeyo, Yeesu aaweerela: “Maswaaka animookwattulani? 62Eniyeereiye eheeni nyuwo mwamoona Mwaana a mutthu awelaka arowaka weiwo aaraawe khalayi? 63Munepa omvaha okumi; erutthu khemphwanela etthu. Masu kooleenlaakani ti munepa ni okumi. 64Wa soothesene, aakhala akina a nyuwo ahinroromela.” Vano, Yeesu aasuwela okhuma ompacereroni taani a yaawo yaahaaroromela nitho taani eera amvarihe. 65Owo aapwaherera eeraka: “Tivawo Miyo kooleenlaakani weera khaawo ongwera owa wa Miyo, ohikhanle weera eyo ovahiwe ni Atiithi.” 66Okhuma ehuhuweene yeele mpaka ohoolo, ancipale a oohuseraawe yaahokolowa ni yaahiya omutthara. 67Yeesu aahaakoha oohuseraawe muloko neeli: “Nyuwotho khamuntthuna orowa?” 68Simeyoni Pedru aamwaakhula: “Apwiya, wa taani nneeraahu nirowe? Nyuwo murino masu a okumi woohimala. 69Hiyo ninroromela ni noosuwela weera Nyuwo muri Ootteela a Muluku.” 70Vano Yeesu aawaakhula: “Nkihiyono Miyo koothanlaleni nyuwo muloko neeli? Mmohatho a nyuwo ti a Diyabu*.” 71Owo aamuhima Yudasi, mwaana a Simeyoni Iskariyote, mwa yoowo aari mweeraru areene mmoha a oohusera muloko neeli, vahoolowaya eera amvarihe Yeesu.
હાલમાં પસંદ કરેલ:
Yohaane 6: VMK2021
Highlight
શેર કરો
નકલ કરો
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
