Matyê 7
7
Koo pei tô məlǒʼ pye, koo pei mâʼ lǒŋ
(Lks 6.37-42)
1«Koo pei nyâŋ ntô məlǒʼ* pye, ə́ mbóghʼ Sê lə̂ nkə́ ntô méi məlǒʼ* lə́wó. 2Ə́ ghʉ̌ lěi pə́ lə̂ mbə̂u yi pei laghʼ ńtô məlǒʼ* pye, Sê poŋə́ tô méi lə́wó. Pei jí ńgó Sê ghʉ̌ kə́ cóghʼ paa zéi pə́ ghíʼ pei yaa ncôghʼ yi pəcó pye lə́wó. 3Ə́ lei gháʼá o pə̂ njwô môu məfəpə pʉ̌ʉ yi a wə́ ləjôghʼ fə̌r gho, lə́ kə̂u nkwə̂i pʉ̂ŋtə ləjôghʼ gho, lə́u o pə̂ njwô ghó po? 4Mboʼ o ghʉ̂ gháʼá, tə ndáʼ lə̂ fə̌r gho ngô: “Ə fə̌r, cʉ́ʼ n nkwarə́ fəpə pʉ̌ʉ zə̂ yi ə́ pə́ ləjôghʼ gho lə̂, ə́ měʼ,” lə́ ə́ ngǐ lǎʼ, kə̂u nkwə̂i pʉ̂ŋtə cər zô. 5Sap-ndwô-fʉ́ŋ, tsə̌mbi nkwárə́ kə̂u nkwə̂i yi a pə́ ləjôghʼ gho, tə mə́ ntsúŋú mə́ njwô yʉʼ, ə́ mboŋə́ kǔʼ lə̂ nkwárə́ fəpə pʉ̌ʉ ləjôghʼ fə̌r gho.»
6«Koo pei ŋə̂ zə̂u yi ə́ pə́ yi Sê, mbó ngwʉ̂. Koo pei mâʼ məzə̂u lətəi-ndwuŋ méi mbó pəkúnye, ə́ mbóghʼ no gháp wo nyʉŋtə́ lə̂ məku ə́ pǒu shərə́ lə́utə́ wéi.»
Ə́ poŋ lə̂ sáʼ təʉ ntsúŋú zə̂u
(Lks 11.9-13)
7Pei lóu, Sê wo ŋə́ mbó pei. Pei lôu, Sê wo ghʉ̌ pei jwó. Pei púʼtə́ ntsʉ ndə̂, a wo tsóʼ ńŋə́ lə́ pei. 8Ŋuu lə̌i ndóu zə̂u, mə́i pə́ wo ŋə́ lə́ zʉ́, ə́ ndǒu, mə́i a wo jwó, ə́ mbou mbúʼtə́ ntsʉ ndə̂, mə́i pə́ wo tsóʼ ńŋə́ lə́ zʉ́. 9Pei pətə́ ghəpə́, môu warə́ ŋuu lə́ pei lə̌i ndóu yé mbələ̂ghʼ, a ŋə̂ tuʼú ləghǒ lə́ zʉ́? 10Môu warə́ ŋuu póu ndóu yé shû, a ghôu nô ə́ ŋə́ lə́ zʉ́? 11Pei pi pei lâp məno gháʼate jí lə̂ ŋə́ məzə̂u shʉʼʉ mbó ghəpə́ zéi, tə mpfu sə́ʼə́ lə́ Tə́ wei yi a pə́ tʉ̌-lə́pû, wo títə́ ŋə́ məzə̂u shʉʼʉ mbó pye pi gháp lôu yé měi!
12Ə zə̂u yi pei pə̌ ntsâa ńgó pə ghʉ́ lə́ pei, pei kə́ ngʉ́ pə́ zěi lə́ pəcó pye lə́wó. Pei lə̌i ngʉ́ yə́rə́, mə́i ə́ wo pəutə́ lə̂ zə̂u yi ləpə̌ʉ* Mə̌usə̂i mbaa pəŋwaʼa pətsətə́-nkəʉ Sê* pə́ ntúŋú.
Məlaŋə́-ndə̂u mə́mbwô
(Lks 13.24)
13Pei lə̌i mə́ ndôu laŋə́-ndə̂u tʉ̌-lə́pû, pei lêi pə́ lə̂ ntsʉ yi ə́ kə́ʉ-kə́ʉ. Ə ntsʉ nkâʼ yi ə́ shaghʼə́, lər pə́ lə̂ lâʼ ləwʉ̂. Laŋə́-ndə̂u yi ə́ lər lə̂ lâʼ ləwʉ̂ ghúʼ gháʼate, lələʉ pye pou ndêi pə́ lə̂ zěi. 14Lə́ ə ntsʉ nkâʼ yi ə́ lər lə̂ lâʼ ləcwôr tə me kə̂ʉ-kə̌ʉ. Laŋə́-ndə̂u pou ntwóghə twoghʼə́, ə pye pi gháp pou nzâp mə́u kâa záa gháp.
Pə́ jî tʉ̌ lə̂ məntǎa méi
(Lks 6.43-44)
15Pei laghʼə́ tû zéi lə̂ pye pi gháp tâŋ məlaa ńgó gháp pətsətə́-nkəʉ Sê*. Gháp ghí tó lə́ mbəʉ pei, ə́ sǒ ngəp* ndənzʉ* lə́ kwaŋtə záp pə̂ pə́ yi nye-njwi. 16Pei wo jí gháp pə́ lə̂ ngʉ̌ məno gháp. Káa pə pə́ nkâp yé nyar lə̂ tʉ̌ nkaŋ nyêʼ, ə́ kə̂ mbə́ ndʉŋ-ndʉŋ yə́rə́ ghíʼ mboʼ pə́ kâp yé ngə̌m lə̂ tʉ̌ mbʉ̌ po. 17Tʉ̌ shʉʼʉ zə̂m pə̂ məntǎa shʉʼʉ, lə́ tʉ̌ tə́poŋ zə̂m pə̂ məntǎa tə́poŋ, 18mboʼ tʉ̌ shʉʼʉ zə̂m yé ntǎa tə́poŋ po, lə́u tʉ̌ tə́poŋ kə̂ nzə̂m yé ntǎa shʉʼʉ po. 19Tʉ̌ lə̌i ndə́iʼ pə́ zə̂m ntǎa shʉʼʉ po, pə́ khwôʼ ńtôu mǒghʼ. 20Ghíʼ ə́ mbə́ yə́rə́ lə̂, pei táa ghǐ jí pye pi gháp tâŋ məlaa ńgó gháp pətsətə́-nkəʉ Sê*, ə́ leitə́ pə́ lə̂ cǐ záp.
Ə ndâʼ no mbóu ngʉ̌
(Lks 13.25-27)
21«Ə́ wo lə́ pye pi gháp fûŋ ghâa ngô: “Ə Nde! Ə Nde!” gháp pə́tsəm lə́ ghʉ̌ kə̂u gháp cər Ləfou Sê* po. Ndaʼ pye pi gháp pə́ ngʉ zə̂u yi Tə́ ghâa yi a wə́ tʉ̌-lə́pû pə̌ nkǒŋ zěi lə́ ghʉ̌ kə́u. 22Ə́ táa pə́ leʼé yi Sê wo nzáʼ kôr təcər páp pə pye-mə́soŋ, pye tə nzáa lâʼ lə́ məŋ ngô: “Ə Nde! Ə Nde! Lə́u paghʼ lə laghʼ pə̂ ləjôghʼ zô ńdaʼ no Sê péh? Lə́u paghʼ lə laghʼ pə̂ ləjôghʼ zô ńzuŋ məzəghʼə tə́poŋ* péh? Lə́u paghʼ lə laghʼ pə́ ləjôghʼ zô ńgʉ məndǎa-jwô-mə́no péh?” 23N ncʉ́ʼ nkə́ ndáʼ lə́ páp ngô: “Káa m mə́ njî ghâa wéi, pêi pəghaŋə məfaa, pei fú mbəʉ məŋ ncʉ́ŋtə́!”»
Ə́ mbóu ndə̂ ə̂ mbə̂u pwô
24«Ŋuu lə̌i ntó ńcə́r ghâa, ə́ nzúʼ tsâr zâa, ə́ ngʉ̌ ghíʼ ə́ pə́ ntúŋú, mə́i ngaŋ pə́ ghíʼ cǒ njino#7.24 Ə̂ yi mboʼ pə́ kə́ ncí ndâʼ ńgó a pə́ ghíʼ cǒ ŋuu yi a pǒghʼ no. yi a lə cʉ́ʼ lə̂ nkə́r ndə̂ ye, ə́ ntúŋ yʉʼ tə njwó tə́koʼ ləghǒ, ə́ ntághʼ cû zěi ndəu wó. 25Mbʉŋ ghʉ̂ ndó, ə ngaa gháp kəfwor tô ńdwúŋ ndə̂ zei. Káa zěi wʉ̂ yé, ńté no pə́ lə tághʼ zěi lə̂ ləghǒ. 26Lə́ ŋuu póu nzúʼ tsâr zâa, ə́ ndə́iʼ ghʉ yé ghíʼ m mə̌ ndǎʼ po, mə́i ngaŋ wə́ ghíʼ ghəghəʉ ŋuu wə̂ yi a lə kə́r ndə̂ ye tə́ túŋ cû zěi. 27Mbʉŋ ghʉ̂ ndó, ngaa gháp fə̂m tô ńdwúŋ ndə̂ zei, ə kə́mə ńcwə́rə́ sê.»
Mbə̂u yi Yěso laghʼ ńjyêʼ pye zə̂u
(Mks 1.22; Lks 4.32)
28Yěso jyêʼ pye mwo məno tə nâʼ, ə lâʼ fû ndyár ye mbə̂u ləjyěʼ pye zə̂u; 29ńté no káa a lə pə́ ngʉ̂ yé ghíʼ pəkeʼtə́-lə́pə́ʉ* Mə̌usə̂i. A lə ghí pə́ jyêʼ, ə́ fú mə́ njî zə̂u yi a jyêʼ pye zěi.
હાલમાં પસંદ કરેલ:
Matyê 7: NLA
Highlight
શેર કરો
નકલ કરો
Want to have your highlights saved across all your devices? Sign up or sign in
