Matio 7

Tà pi tú melɔ̌’ pʉ̀a, tà pi gwá’a lÿɔ́g

(Lukase 6.37-42)

1Tà pi ńnéŋe ńtúu *melɔ̌’ pʉ̀a, ḿbɔ́g Ssé létúu gí *lɔ̌’. 2Á ge fó pɔ́ nà ntí gie pi lɔgɔ ńtúu *lɔ̌’ petsɔ́ pʉ̀a, tá Ssé túu *lɔ̌’ɔ gí gí. Pi zsé ngie: E Ssé ge táa ńnéŋe pɔ̀ɔn gí pɔ́ pá’ pi zɔɔn ńnéŋe yé petsɔ́ pʉ̀a 3Á piŋ ńgÿo lêkɔ́ ɔ̀ ne ńgyá mùɔ méfùbe pǐŋ gie e gwě lejÿɔ́g fɛ́ gù, tá kúme núŋe lejÿɔ́g gù, ɔ̀ piŋ ńké tè ne ńgyà wɔ́? 4Ńgwɔ́ ɔ̀ gÿo lêkɔ́, tá ńgɔɔn né fɛ́ gù ngie: Àfɛ́, cʉ́’ mèŋ n kẅile fùbe pǐŋ yɛ̂ gie ee lejÿɔ́g gù lɛ̂, ńgwáa gɔɔn, éfó le ne ńgyá kúmo gẅie á nuŋe tsɛ̀ɛ shú wɔ́? 5Ànkwoŋ menÿɔ́g! Vɔg ńkẅile kúmo gẅie aa lejÿɔ́g gù, tà ne ńcwoŋo ńgyá jʉ’ tá ńku’u lékẅile fùbe pǐŋ á tsɛ̀ɛ lejÿɔ́g fɛ́ gù. 6Tà pi náa mmó gie aa yé Ssé, á mbwó ngwé. Tà pi ma’a tɔgɔ́ tsye gí á mvfò mekúnɔ́ɔn. Pɔ́ ge neŋte nê mekwó é piŋ sele nnɛ́ lúmte gẅí.

Á poŋo lékag tʉ̀ ńgÿo mmó

(Lukase 11.9-13)

7Pi lúɔ, e Ssé ge náa mbwó pi. Pi fa’, e Ssé ge gÿo pi gyá. Pi kwá’te ncwò ndá, à ge tsɔ́’ ńná né pi. 8Nyìŋ lúɔ mmó, mbà mé ge náa mbwó yé, éfa’, mbà à ge gyá, ḿbiŋ ńkwá’te ncwò ndá, mbà mé ge tsɔ́’ e ná né yé. 9Pi pɛ̀ ńgwɔ́ metá penkʉ́, míŋ wɔ̌ tsetsɛ̀ɛ pi lɔɔn ńdúɔ mbelég, mbà à ge náa tóon né yé? 10Míŋ wɔ̌ lúɔ mbab ssó, mbà à ge gwoon nnú ńnáa mbwó yé? 11Pi pie pi fʉ̀’ nò tɛ’ zsé léna shúm mbòŋo á mbwó gubé gí, tà ngʉ̀a shÿɔ́’ɔ ná Tá gẅi gẅie aa tÿǒ lepwó? À ge ná shúm mbòŋo mbwó pʉ̀a pie pɔ́ lǔɔ mbwó yé.

12Àmmó gie pi ne ńtsɔɔn ngie mé gÿo ná pi la, pi gÿo kwà’ yɛ̌ gí ná petsɔ́ pʉ̀a. Pi lɔɔn ńgÿo pú’u, mbà á ge gwɔ́ mmó gie *lepʉ̌ Mǒsê mbɔɔ meŋwà’ne pà *ntsẅì nkʉ̀ Ssé zɛ́te

Memánzsè mépʉ́a

(Lukase 13.24)

13Pi cʉ́’ʉ léfa’a mánzsè tÿǒ lepwó, ḿpfó pɔ́ nà ncwò nká’ gẅie é kʉ́mte kʉmtě. Ncwò nká’ gẅie é gú’ tɛ’, é gee pɔ́ né lá’ legwé. Mánzsè gẅie à gee lá’ legwé gú’ tɛ’, lelÿò pʉ̀a né ḿpfó pɔ́ wɛ̌. 14Tá ncwò nká’ gẅie é gee lá’ letsẅɛ́ temi, kʉ́mte kʉmtě. Mánzsè piŋ ńtege tege, pà pfó wɛ̌ té gyɔ́ɔn.

Mé zsé tÿǒ nà mentɔ̌ɔn mé

(Lukase 6.43-44)

15Pi laga twó gí nà pʉ̀a pie é cÿɔɔ nò ngie pɔ́ ee pà *ntsẅì nkʉ̀ Ssé. Pɔ́ gwaa tóo lejʉ́ŋ pi ḿma’ *ngùb *njʉ̀njÿò tá nkwaŋá wɔ́b gwɔ́ pɔ́ we menɔ́ɔn ngẅi. 16Pi ge zsé wɔ́b nà ngÿǒ menò mɔ́b. Mé e ntě ńkába shʉ́shÿó na tÿǒ shʉ́shÿó nè wɔ́, ndʉŋ ndʉŋ pá’ à lɔɔn ńgwɔ́ mé le káb lepfo á nà tÿǒ lengɔ́ɔn wɔ́. 17Tÿǒ mbòŋo zém pɔ́ ntɔ̌ɔn mbòŋo, tá tÿǒ tepòŋ zém pɔ́ ntɔ̌ɔn tepòŋ, 18ńgwɔ́ tÿǒ mbòŋo le zém ntɔ̌ɔn tepòŋ wɔ́, àtÿǒ tepòŋ ké le zém ntɔ̌ɔn mbòŋo wɔ́. 19Àtÿǒ gie á té zém ntɔ̌ɔn mbòŋo wɔ́, mé kɔ́’ ńtuɔ mmɔ̌g. 20Pú’u, pi ge gÿo gwaa zsé pʉ̀a pie é cÿɔɔ nò ngie pɔ̀ ee pà *ntsẅì nkʉ̀ Ssé, é cʉa pɔ́ ná mà wɔ́b

Legɔ́ɔn ḿbiŋ ńgÿo

(Lukase 13.25-27)

21Á gʉa ná pʉ̀a pie é tóŋo wɔ̀ɔn lê Cʉ̀apʉ̀a, pɔ́ metsèm zɔ̌ té lá’ jÿó pì *lefùɔ Ssé wɔ́. Ndà’ pʉ̀a pie é gÿo mmó gie Tá wɔ̀ɔn gẅie aa tÿǒ lepwó ne ńkwoŋo ngie mé gÿo. 22Á ge lá’ gwɔ́ lyɛ̌’ gie mèŋ n ge ńtsɔ́’te mentsaŋ, pʉ̀a tà ńgyɔ́ɔn gɔɔn ngie: Cʉ̀apʉ̀a! Cʉ̀apʉ̀a! Peg lɔ̌ɔn ntě ńdɔgɔ pɔ́ lezíŋ shú éshwóŋó nò Ssé gwaa? Peg lɔ̌ɔn ntě ńdɔgɔ pɔ́ lezíŋ shú ńjwoŋo *messé tepòŋ gwaa? Peg lɔ̌ɔn ntě ńdɔgɔ pɔ́ lezíŋ shú ńgÿo ndaa gyá nò gwaa? 23Mèŋ n deen ńké ńgɔɔn né pɔ́b ngie: Mèŋ tè gẅi zsé, pi ee pàfʉate menò, pi fó lejʉ́ŋ mèŋ ńtsíŋte nnɛ́

Lepwǒon ndá aa ntí pʉ́a

24Nyìŋ lɔɔn ńtó ńtsɛ́ɛ wɔ̀ɔn, ńzẅí’te shwóŋò yɔ́ɔn, ńgÿo pá’ á ne ńzɛ́te, mbà ngàŋ gwá’a tsɔ̌ nzsè nò#7.24Ńgwɔ́ mê gíŋ ngie: gwá’a tsɔ̌ nyìŋ gẅie à pɔ́gɔ nò. wá gẅie, à la cʉ́’ʉ lékwɛ́ ndá yé, ńtúŋo jʉ’ tà ńgyá máa tóon, ńtÿɔ́g ndá ndùm wɔ́. 25Mbʉ̀ŋ gÿo ńdú, ngʉa ntse tó, fefà cʉ’ʉ, ńtéme nà ndá. Ndá tè gwe, mélà’mie mé la tÿɔ́g ndá ná tóon. 26Tá nyìŋ gẅie à ju’ú shwóŋò yɔ́ɔn, à tè gÿo pá’ n gɔ̌ɔn wɔ́, mbà ngàŋ gwá’a gʉ̀gʉ̀ nyìŋ gẅie à la kwɛ́ ndá yé té túŋo cÿó. 27Mbʉ̀ŋ gÿo ńdú, tsìtsyɛ̀ tó, fefà cʉ’ʉ ńtéme nà ndá ayɛ̌, é keme ḿbʉle ssé.

Ntí gie Yěsô lɔg ńzí’i pʉ̀a mmó

(Malékuse 1.22; Lukase 4.32)

28Yěsô zí’i pʉ̀a mɔ̀ɔn menò tà ńtsẅé jʉ’, àlá’ pú mɔ̂ɔn ye ntí lézí’i pʉ̀a mmó, 29mélà’mie à lɔ̌ɔn ntě ńgÿo pá’ *pàkyagte lepʉ̌ Mǒsê wɔ́. À lɔ̌ɔn ńzí’i tà ńzsé mmó gie à gÿo yɛ̌.

હાલમાં પસંદ કરેલ:

Matio 7: NGBM

Highlight

શેર કરો

નકલ કરો