Juan 17
17
Jechu judi jäja pio ju̧i̧ nö̧ta ni̧bämȩrȩ goë cjo̧dërëremȩde pumȩ pio ji̧ri̧ chjiari
1Ado Jechu judi jibëa̧ jadü pio ji̧ri̧ ni̧bä chjaoa̧ duri oa, a̧dëräpȩmo̧ cjaruchë darëremȩde. Ado taruparëremȩde jibëa̧ Ama̧i̧ pio ju̧i̧ ni̧bäpea̧ ji̧:
—Ca̧ Ama̧i̧, ütara̧ do üdë ma̧na̧dique yaba̧ —yo̧a̧dejȩ—. Ado na̧ Ja pio judirequede. Ado goë cjo̧dërequedemȩ Ama̧i̧, pio coaiä na̧rȩtä ca̧ chjacjiamȩrea̧ üdë. Aja̧ Ama̧i̧, ca̧ chjacjiamȩrea̧ üdë chjadëri̧ na̧rȩa̧ oa cjiapea̧ oa japavä, na̧ chjacjiamȩrea̧ pio judi peaja̧di chjadëri̧ na̧rȩa̧ oa cjiapea̧ oa pio coaiä. 2Aja̧ Ama̧i̧, pio mȩnȩ yürüa̧ oa, chiriräpȩti̧ oa cjo̧ro̧ji̧ri̧ judiro̧ ütëbodärärë ca̧ chja̧oerämo̧ cjo̧ro̧dirȩ —yo̧a̧dejȩ—. Ado mȩnȩ coa yürüa̧ pumȩ pio ji̧ri̧ bucho ana̧ cjo̧ro̧rea̧ yürüa̧requedejȩrȩ. 3Jabechji̧ pio mȩa dabadiro̧mȩ Ama̧i̧. Ado pio mȩa daba̧ üdë bucho ana̧ cjo̧ro̧rea̧de. Aja̧ Ama̧i̧, pio judimo̧rȩnȩ, ado judiri decjiade. Tjamo̧ri̧ cjiamȩ Ütë pio judimo̧renȩ. Ado pio mȩnȩrenȩ coa chjadürëremȩ judi pio yoa chiriräpȩmo̧ ma̧na̧pea̧ ji̧. Aja̧ Ama̧i̧, Jechu Quiricho pio judirequede. Ado pio coa chjadürëremȩrenȩque. Ado ca̧ jadü judiro̧ peaja̧di dabadiro̧coe. Jabechji̧ pio coa daba̧ üdë, peaja̧di bucho ana̧ cjo̧ro̧rea̧de —yo̧mȩrȩ ni̧bärëremȩdejȩ Jechu judi jibëa̧ Ama̧i̧ ju̧i̧iäpȩmo̧.
4—Aja̧ Ama̧i̧, cüdë dai chirirä cjo̧ro̧a̧ nö̧ta, chjadëri̧ na̧rȩa̧requede na̧ chjacjiamȩrea̧ pio ju̧i̧ —yo̧a̧dejȩ—. Ado mȩnȩ coa yürüa̧ ja̧beparea̧ pio ju̧i̧ japadäräa̧reconȩ. 5Ado yaba̧ Ama̧i̧, japamitë boi̧chji̧ chjätä ëte, ado baäparequede pio mȩaiäpȩ. Ado cüdë pio ju̧ri̧pȩ go̧düdäräa̧rä, jabechji̧ Ama̧i̧, ca̧ chjacjiamȩrea̧ üdë ado chjereno̧ ana̧ri̧ na̧rȩa̧ oa cjiapea̧ oa japavä. Aja̧, ca̧ chjacjiamȩrea̧ üdë pearä na̧rȩa̧ oa cjiarërea̧mi̧, na̧rȩa̧ oa cjiatä eareconȩ Ama̧i̧, dabu üdë jabë pareapea̧ oa cjiadëa̧rä cjiarërea̧mi̧ —yo̧mȩrȩ yo̧a̧dejȩ Jechu judi jibëa̧ Ama̧i̧ ju̧i̧.
6—Aja̧ Ama̧i̧, ca̧ jadü pio ji̧ri̧, dai chirirä cjo̧ro̧ji̧ri̧ pumȩ pio ji̧ri̧ china̧chjari̧ tutia̧renȩjȩrȩ pio coaiäpȩmo̧ yürüpea̧ oa —yo̧a̧dejȩ—. Ado mȩnȩ pio coaiäpȩmo̧ yürüa̧ pumȩ pio ji̧ri̧ chjadëri̧ daba tänȩa̧requedejȩrȩ pio mȩa chjiari urëdi tjamo̧ oa jo̧rȩtarea̧ oa. Aja̧, na̧ea̧ maeadirȩ Ama̧i̧, jabo pio coaiäpȩmo̧ yürüa̧renȩque pio ji̧ri̧ chjadëri̧ jidapea̧ oa. Ado na̧ ma̧ȩ pio ju̧i̧ ji̧dë ma ta̧rëdiädiro̧jo̧ȩ —yo̧a̧dejȩ—. 7Ado peaja̧di na̧e chiapea̧dirȩ pio coa chjiari. ‘Aja̧, jibëa̧ Ama̧i̧ pio ju̧i̧iämo̧i̧ cjo̧ro̧rea̧ dadida, pio judimo̧rȩ yürüa̧ oa japarea̧ dadida’ quëna̧ dabaji̧ri̧pea̧dirȩ Ama̧i̧ pio coa chjiari. 8Aja̧ Ama̧i̧, mȩnȩ coa yürüa̧ ma̧ȩ pio ju̧i̧ yürüa̧requedejȩrȩ pio ji̧ri̧iäpȩmo̧. Ado jiadadëa̧diro̧coe. Chjadëri̧ ta̧rë ja̧boa̧diro̧coe na̧ ma̧ȩ oa. Ado tjamo̧ri̧ dabadirȩ Ama̧i̧ pio coa chjiari. 'Aja̧, pio judiri ma̧na̧diibëda, pio judi chjadüa̧ oa ma̧na̧diibëda’ quëna̧ dabaji̧ri̧pea̧dirȩ pio coa chjiari —yoa̧dejȩ Jechu judi.
9—Aja̧ Ama̧i̧, ca̧ jadü pio ji̧ri̧ chjiari goë cjo̧dërequede. Dai chirirä ja̧ jo̧rȩtarea̧ra̧ jo̧rȩtaji̧ri̧ pio ji̧ri̧ chjiari goë cjo̧dëdërequede, jabo mȩnȩ coa yürüa̧ pio ji̧ri̧ chjiari jo̧rȩtamȩrȩ goë cjo̧dërequedemȩ —yo̧a̧dejȩ—. Jabechji̧ na̧ea̧dirȩ Ama̧i̧. 10Ca̧ea̧ pio judiro̧ peaja̧di na̧ea̧dirȩ. Peaja̧di na̧ mu̧i̧tjoi̧dirȩ. Jabechji̧ ji̧mo̧ goa marea̧rȩ. Ado pio ju̧i̧iä na̧ea̧ pio judiro̧ peaja̧di ca̧ea̧dirȩ. Ado ca̧ jadü pio ji̧ri̧iä ca̧ chjacjiamȩrea̧ üdë chjadëri̧ na̧rȩa̧ oa cjiapade —yo̧mȩrȩ ni̧bäa̧dejȩ Jechu judi jibëa̧ Ama̧i̧ ju̧i̧.
11—Ado yaba̧ Ama̧i̧, cüdë pio mȩaiäpȩ baäpea̧ ji̧ querediä tjamo̧requede —yo̧a̧dejȩ—. Jabechji̧ pio yoa chiri oa a̧dë baäpareconȩ. Jabo ca̧ jadü pio yodëro̧je cjiadiäpadirȩ. Jabechji̧ dai chirirä cjiadiäpadirȩ Ama̧i̧. Pio ju̧i̧iä goë cjo̧dërequede pio ji̧ri̧ chjiari. Danȩ Ama̧i̧, chjai̧dë oa miredëmȩ pio ju̧i̧iä goë cjo̧dërequedemȩ, mȩnȩ coa yürüa̧ pumȩ pio ji̧ri̧ chjadëri̧ jidatä —yo̧a̧dejȩ—. Aja̧, menȩ coa yürüa̧ jauëchjara̧ pio ju̧ri̧ra̧ chjadëri̧ jidatä eamȩrȩ goë cjo̧dërequedemȩ. Jabechji̧ judiro̧ cja̧rȩmȩ chji̧ chiami̧ dari̧ jo̧rȩtapea̧ oa, cja̧rȩmȩ icjarami̧ dari̧ cjo̧ro̧pea̧ oa, ji̧mo̧ maearë cjiami̧ dari̧ cjo̧ro̧pea̧ oa goë cjo̧dërequedemȩ Ama̧i̧, judiro̧ pio a̧ro̧rȩmi̧ dari̧ cjiapea̧ oa. 12Danȩ, cüdë pio yoa chirirä pio ji̧ri̧di ëba cjia̧ nö̧ta, jabechji̧ chjadëri̧ jida̧requedejȩrȩ, mȩnȩ coa yürüa̧ jauëchjarea̧ra̧. Ado pio ju̧i̧iä jabechji̧, judiro̧ cja̧rȩmȩrȩ dabadëpea̧ oa cjiadëade. Jabo dëdë Ama̧i̧, pio judimo̧rȩ dabadëpea̧de dabadëpapamȩ üdë. Jabechji̧ na̧ maȩ üdë, no̧mȩ tjamo̧ri ja̧ go̧ȩpea̧ oa cjiarërea̧ ma̧ȩ üdë tjamo̧i̧ cjiari̧ cjiadiäpea̧ oa, jabechji̧ dabadëpea̧ oa cjiapade —yo̧a̧dejȩ Jechu judi jibëa̧ Ama̧i̧ ju̧i̧.
13Ado ji̧dë u̧i̧ yo̧mȩrȩ a̧de yo̧a̧dejȩ Jechu judi:
—Aja̧ Ama̧i̧, japamitë boi̧chji̧ chjätä ëte, pio mȩaiäpȩ baäparequede —yo̧a̧dejȩ—. Jabo cüdë pio yoa chirirä jabë cjo̧ro̧a̧ nö̧ta, ma̧ȩ ji̧ra̧ oa ni̧bäa̧requedejȩrȩ ca̧ jadü ji̧ri̧, judiro̧ a̧dë chjäte ma̧ chiadëri̧ cjiari̧ cjo̧ro̧pea̧ oa, judiro̧ ca̧ chji̧ goaera̧ jo̧rȩtapea̧ oa, judiro̧ ca̧ea̧ri ma̧na̧mȩ ma̧ chiadëri̧ cjiarea̧ra̧ cjo̧ro̧pea̧ oa. 14Jabechji̧ Ama̧i̧, na̧ ma̧ȩ pio ju̧i̧ ji̧dë ma yürüa̧requedejȩrȩ. Jabo dai chirirä ja̧ jo̧rȩtarea̧ra̧ jo̧rȩtaji̧ri̧ pio judiro̧ goëdëri̧ cjia dadiro̧jȩrȩ. Jabechji̧ judiro̧ dai chirirä ja̧dëpe baga̧ oaiä goëdëri̧ cjia dadiro̧jȩrȩ yaba̧. Jabechji̧ dai chiriri ja̧dëdirȩ. Pio cüdëmi̧ dari̧ cjiadirȩ —yo̧a̧dejȩ—. 15Jabo danȩ, dai chiriri pio judiri go̧dütä eamȩrȩ goë cjo̧dëdërequedemȩ Ama̧i̧. Jabo jabechji̧ dai chirirä cjo̧ro̧ji̧ri̧ oa chjadëri̧ jidatä earequedemȩ. Jabechji̧ Ichiae judi pio ji̧ri̧iäpȩmo̧ eami̧ oa japachea oa, jidatä eamȩrȩ ni̧bärequedemȩ Ama̧i̧. 16Aja̧, dai chiriri ja̧dëmȩrequede cüdë. Ado peaja̧di dari̧ cjia mapea̧dirȩ ca̧ jadü judiro̧. Dai chiriri ja̧ji̧ri̧rërea̧ ji̧, dai chiriri ja̧dëjii̧rpea̧dirȩ. A̧dë tjaoëpea̧dirȩ —yo̧a̧dejȩ—. 17Ado pio ju̧i̧iä yo̧requedemȩ Ama̧i̧. Na̧ ma̧ȩ pio ju̧i̧, tjamo̧i̧ cjiari̧ baämȩ ma̧ȩ pio ju̧i̧ chjadëri̧ dabapa tänȩjȩrȩ judiro̧ china̧chjari̧ tutia̧ oa cjiami̧ dari̧ cjo̧ro̧pea̧ oa, chjai̧dë oa miredëa̧ oa cjiami̧ dari̧ cjo̧ro̧pea̧ oa. 18Jabechji̧ chjadüa̧requedejȩrȩ Ama̧i̧ —yo̧a̧dejȩ—. Dai chirirä ja̧ jo̧rȩtarea̧ra̧ jo̧rȩtaji̧ri̧ pio ji̧ri̧ ja̧ chjareräpȩ cjo̧ro̧pea̧ oa chjadüa̧requedejȩrȩ. Mȩnȩ coa pio yoa chiriräpȩmo̧ chjadürërea̧mi̧ peaja̧di chjadüa̧requedejȩrȩ. 19Jabechji̧ pio ji̧ri̧ chjiari china̧chjari̧ tutia̧ oa cjiarequede Ama̧i̧, pio judiro̧ na̧ea̧ maearë cjo̧ro̧pea̧ oa. Aja̧, jadi̧ dari̧ japarequede Ama̧i̧, pio judiro̧borë na̧ea̧ maearë cjo̧ro̧pea̧ oa —yo̧a̧dejȩ.
20Ado Jechu judi ji̧dë u̧i̧ jo̧rȩtamȩrȩ ja̧di ta̧rëri̧ a̧de ni̧bärëremȩdejȩ jibëa̧ Ama̧i̧ ju̧i̧:
—Ama̧i̧, ca̧ jadü pio ji̧ri̧ chjiari goë cjo̧dërequedemȩ jabo pio ji̧ri̧mo̧i̧ oa jo̧rȩtadërequede. Jabechji̧ pio ji̧ri̧iä ta̧rë ëte quëna̧paji̧ri̧ pio ji̧ri̧bo jo̧rȩtamȩrȩ goë cjo̧dërequede. Aja̧, ca̧ jadü pio ji̧ri̧iä ta̧rë ëte quëna̧paji̧ri̧ pio ji̧ri̧ chjiaribo goë cjo̧dërequedemȩ Ama̧i̧. 21Jabechji̧ pio a̧ro̧rȩmi̧ dari̧ cjiapea̧ oa, chjadëri̧ a̧dojȩrȩ pio judiro̧ cja̧rȩmȩrȩ cjiami̧ dari̧ cjiapea̧ oa. Danȩ Ama̧i̧, cja̧rȩmȩrea̧rȩ. Ji̧mo̧ cjiarea̧rȩ. Mȩnȩ ca̧ tjoro cjiarenȩ, ado cüdë na̧ tjoro cjiarequede. Ado peaja̧dimi̧ dari̧ cjiatädirȩ Ama̧i̧, pio ibë nö̧ta. Jabechji̧ pio ibë nö̧ta cja̧rȩmȩpe bagami̧ dari̧ cjiatä earequedejȩrȩ. Ado judiro̧ cja̧rȩmȩrȩ cjiami̧ dari̧ cjo̧ro̧a̧ oaiä, judiro̧ coa chjiari chjadëri̧ na̧rȩji̧ri̧rȩ cjo̧ro̧a̧ oaiä, jabechji̧ na̧ȩ chiape bagatädirȩ dai chirirä ja̧ jo̧rȩtarea̧ra̧ jo̧rȩtaji̧ri̧ pio judiro̧ pio coa chjiari. ‘Aja̧, Ütë tjamo̧ pio judi chjadüa̧ oa birë ma̧na̧diibëda’ quëna̧ jo̧rȩtatädirȩ Ama̧i̧, pio coa chjiari. 22Jabechji̧ Ama̧i̧, mȩnȩ coa yürüa̧ chjacjiamȩrea̧ pio ju̧i̧ yürüa̧requedejȩrȩ peaja̧di. Jabechji̧ judiro̧ cja̧rȩmȩrȩ cjiami̧ dari̧ cjiapea̧ oa, pio a̧ro̧rȩmi̧ dari̧ cjiapea̧ oa yürüa̧requedejȩrȩ peaja̧di. 23Jabechji̧ pio ji̧ri̧ ja̧ tjoro cjiarequede cüdë. Ado mȩnȩ ca̧ tjoro cjiarenȩ Ama̧i̧. Jabechji̧ judiro̧ cja̧rȩmȩrȩ cjiami̧ dari̧ cjiapea̧ oa goë cjo̧dërequedemȩ Ama̧i̧, dai chirirä ja̧ jo̧rȩtaji̧ri̧ pio judiro̧ na̧e chiape bagapea̧ oa. ‘Aja̧, Jechu judi Ütërë chjadüa̧ oa ma̧na̧dida, ado Ütë tjamo̧ judi quëna̧ji̧ri̧ pio ji̧ri̧ eadiji̧ri̧da, Joja pio ju̧i̧ eami̧ eadiji̧ri̧da’ quëna̧ dabapea̧ oa, cja̧rȩmȩrȩ cjiami̧ dari̧ cjo̧ro̧tä eamȩrȩ goë cjo̧dërequedemȩ Ama̧i̧ —yo̧a̧dejȩ Jechu judi jibëa̧ Ama̧i̧ ju̧i̧.
24—Ado danȩ Ama̧i̧, mȩnȩ coa yürüa̧ pumȩ pio judiro̧ pio coadi cjiatä earequedejȩrȩ cüdë cjiapea̧räpȩ ju̧ri̧, ca̧ chjacjiamȩrea̧ pio ju̧i̧ chjadëri̧ dapea̧ oa —yoa̧dejȩ—. Jabechji̧ dabu oa jabë pareapea̧ oa cjiadëa̧rä, coa ea tjamo̧mȩrȩ yürürëremȩrenȩque na̧ chjacjiamȩrea̧ pio ju̧i̧. Ado pio ju̧i̧ chjadëri̧ datä earequedejȩrȩ ca̧ pumȩ ji̧ri̧. 25Danȩ Ama̧i̧, chjai̧dë oa miredëmȩ Ama̧i̧renȩ. Ado dai chirirä ja̧ jo̧rȩtaji̧ri̧ pio judiro̧ dabadëdiro̧mȩ. Jabo dabarequedemȩ cüdë. Ado pio jiro pumȩ judiro̧, mȩnȩ coa chjadüa̧ pume pio judiro̧ peaja̧di chjadëri̧ dabadiro̧mȩ. 26Jabechji̧ pio mȩa dabadërërea̧ ji̧, chjadëri̧ daba tänȩa̧requedejȩrȩ. Ado mȩa ji̧dë u̧i̧ dabapea̧ oa, ji̧dë u̧i̧ daba tänȩparequedejȩrȩ. Jabechji̧ mȩnȩ coa ea̧ra̧ pio ju̧ri̧ra̧ eariä cjo̧ro̧pea̧ oa, cüdë pio ji̧ri̧ nö̧ta cja̧rȩmȩpe bagami̧ dari̧ cjiapea̧ oa, goë cjo̧dërequedemȩ Ama̧i̧. Ja̧ditäde.
Aja̧, ja̧di ta̧rëri̧ yo̧mȩrȩ goë cjo̧dërëremȩdejȩ Jechu judi jibëa̧ Ama̧i̧ pio ju̧i̧iä jibëa̧ jadü pio ji̧ri̧ chjiari, jibëa̧ jadü pio ji̧ri̧iä ta̧rë ëte quëna̧paji̧ri̧ pio ji̧ri̧ chjiaribo.
હાલમાં પસંદ કરેલ:
Juan 17: Pume
Highlight
શેર કરો
નકલ કરો
Want to have your highlights saved across all your devices? Sign up or sign in
©2021 Global Partners, All Rights Reserved
