NITRITI 13
13
Abram Lot nya ikwas yamti
1Lene Abram jo leu minu Mesir ba, nitnem yoni ingkwei hanyen ug ei minu Kanaan de hanjop ei nite bei mpia nibiho. Noni mbut tut nide mun di nyeng tut nya hagom ba, Lot cem bit. 2Abram nyeng bibor binyeng tut domba nya kin kambir nya kin sapi nya hagom mang bibor bitut perak kin mas. 3Noni bong-bong nyen kak puig sinon ndam minu ndig Betel bingkwei hanyen ug ei nide igkumti ei Betel kin Ai ikieti ba, 4tau kep nimbar hum dok po bon pima lene kuk no bak tuhan hanyen bu ei sirima.
5Mpe dima lene Lot cem nyeng tut domba nya kin kambir nya kin sapi nya hagom mang bibor ba, bon nide ig bei nsi nya kin nide awak nya. 6Apino bit bon hanjop nsi dima bon nibresti bitut mintu-minta nok gi dem mem yo cin dini kin ide mindhe-ndhe nya ibong eisi kan bi. 7Apino yo di ighyen kep Abram de mindhe-ndhe nya kin yo di ighyen kep Lot de mindhe-ndhe nya igbroi yam. (Mpe dima lene mben Kanaan kin mben Feris igya bidem minu dima hagom.)
8Lene Abram pai bak Lot “Sani ne adig-ajoi rin ba, dem mem ade awak nya kin ditde awak nya igbroi yam bi. 9Gima rino ma sikwas yam hak ug. Ando igbit hanjop nsi di angon ngakei. Gino aug ei gimu lene da duug ei guhu.”
10 #
Kej. 2:10
Lene Lot cap ser minu dima bingat mbang briep ndig ei Yordan nyai bingat lo, bon minyei nimangti kikau ug bipek minu ndig Zoar ba, noyam kin tuhan de miai#13:10: Nipas kep tuhan de miai ndo tut miai Eden. kin minu Mesir cem. (Minu dima hagom nok gima nipou tirigi tuhan cok tut Sodom kin Gomora bigyo.) 11Gima rino Lot ndo mbang briep ndig ei Yordan nyai nok nide hanjop nsi leu api ikwas yam ba, Lot ug ei nite bei mpia nipriti. 12Abram gwam bibong hak ei minu Kanaan lo, Lot ba nide prak meng bohok ig jibei ei minu ndig ngot ei mbang briep ndig Yordan kikau ba, ug ei dideu Sodom. 13Mpe dima lene timiei minu ndig Sodom nya imbuk bibor ba, ibon sisar tut tuhan.
Abram ug bong ei Hebron
14Niabiati Lot mbut tu lene tuhan pai bak Abram “Ma aya ayati leu api acap ser minu dini hagom ei nite bei mpia nipriti kikau ug ei nite bei mpia nicutti ei nite bei mpia nijjai kikau ug ei nite bei mpia nibiho. 15#Kis. 7:5 Leu mporo midipek hanjop nsi di acap ser dima yok hagom bina kin ade nintun him yamti di bram yam nya cem bijo ninno bijo kikau. 16Midibindei ba, ade nintun him yamti di bram yam nya mporo midigek kep mpia. Ningat ne bit bon tungwatu nya ikwop dihyei ndung nimangti kan bi. Bit bon ikwop yo di intun nani him imangti kan bi. 17Nogindini ma ambut bidem minu dini nisurti-nipekti hagom leu mporo midiyai hagom bina yo.” 18Gima rino Abram llet nide prak meng yati bimbut tut bohok hanyen ei biei pigig nghousi di ninyeng Mamre di tungwatu nya ipigig ser mem ide kwar di ikuk yok bak nya dideu Hebron. Lene noni dingug tig nindig bijo-jo yam dip nok nimbar hum dok mem binggei sut tuhan.
હાલમાં પસંદ કરેલ:
NITRITI 13: HAD
Highlight
શેર કરો
નકલ કરો
Want to have your highlights saved across all your devices? Sign up or sign in