Ko-Dabirɛnu Kuma-Kunyɛ
Kuma-Kunyɛ
Alla ya duninya-dan dabira nya min, wo le wara-koe sɛbɛnɛ buku kɛ rɔ. Ma benba Hadama dan koe wo, hakɛ anubɛ tɔrɔyɛ dabira koe wo, anubɛ Alla ya hadama dan fɛ-bira nya min, wo le bɛɛ ye buku kɛ rɔ.
Donu si buku kɛ kele, “Yɛnɛsisi.” Allala kitabu sɛbɛra kan minnu fɔlɔn tɔ, wo kelen de Kiriki kan la. Anu denu ya buku wo kele ko, “Yɛnɛsisi.” Kurankɔ kan rɔ, wo kɔrɛ le, “Ko Dabirɛ.”
1. Ka a dabira sura 1 ha ka ke sura 11 ma, duninya dabira nya wo, duninya-mɔgɔ fɔlɔfɔlɛnuna kɛ-nyanu wo, ma benba Hadama anubɛ Hawa wo, Ken anubɛ Ebɛli wo, Nowa anubɛ yi-keri-koe duninya kun na wo, anubɛ san-bon-nayan-bɛ wara-koe Babilɔn nyamanɛ rɔ, wo le sɛbɛnɛ yan bɛrɛni!
2. Ka a dabira sura 12 ha ka ke sura 50 ma, Isirɛla mɔgɛnu benba fɔlɔfɔlɛ denu denu bara-koe sɛbɛnɛ yan. A fɔlɔtɛ le Iburayima la. Mɔgɛ le wo la minna dɛnkɛninyɛ anubɛ ala tɔn-birɛ Alla ye ya a ma mɔgɔ malɔnnɛ la. A tatugunnɛ mara Isiyaka la anubɛ wola den Yakoba anubɛ Yakobala den mɔgɔ tan-ni-filɛ minnu tɔgɛ sara Isirɛla bɔnsɔn tan-ni-filɛ kuma, kɔni. Yusufu wara-koe anubɛ Yakobala dan tomɛnu yirindi koe Iyipiti nyamanɛ rɔ fanan bi buku kɛ rɔ.
Buku kɛ ye mɔgɛ kɛnu bara-koe anubɛ Allala kɛwɔlɛ denu denu yira tinɛ. A fɔlɔtɛ ko Alla le ya duninya dan. A ya lanyiri min kiri ale anubɛ ata mɔgɛnu tɛma, a ya a kundon wo ma. Alla min bi mɔgɛ kiti tɛgɛla ka ko-yogoma-kɛlɛnu kolo, wo le wara-koe sɛbɛra buku kɛ rɔ. A ye sɔla ala mɔgɛnu yarɔ ka anuna koenu tabɛn a kilɛ fɛ. Kuma kɔrɛ kɛnu sɛbɛra alako ka mɔgɔ kɔrɛnuna dɛnkɛninyɛ wara-koe sɛbɛ anubɛ ka anuna dɛnkɛninyɛ wo lasabati tolon!
Buku Kɛ Fara Nya
Duninya anubɛ Mɔgɛnu Dan Koe 1.1–2.25
Hakɛ anubɛ Tɔrɔyɛ Dabira Koe 3.1-24
Hadamata Wati ma ha Nowata Wati Ma 4.1–5.32
Nowa Wara-Koe 6.1–10.32
Yabasanya San-Bon-Nayan-Bɛ Wara-Koe 11.1-9
Sɛmata Wati ma ha Buramata Wati Ma 11.10-32
Iburayima, Isiyaka, anubɛ Yakoba Wara-Koe 12.1–35.29
Isɔ anubɛ A Kegeyɛnu Bara Koe 36.1-43
Yusufu anubɛ A Na Kelen Nyɔgɛnu Bara Koe 37.1–45.28
Isirɛla Mɔgɛnu Bi Iyipiti Wati min, Wonu Bara Koe 46.1–50.26
હાલમાં પસંદ કરેલ:
Ko-Dabirɛnu Kuma-Kunyɛ: KCLB
Highlight
શેર કરો
નકલ કરો
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.