KĨAMBĨRĨRIA 7
7
1Nake Jehova akĩĩra Nuhu atĩrĩ, Tonya wee mwene, na nyũmba yaku yothe, thabina thĩinĩ; nĩ ũndũ wee nĩwe nyonete wĩ mũthingu harĩ niĩ rũciaro-inĩ rũrũ. 2Na rĩrĩ, nyamũ o yothe ya mũthemba ũtarĩ mũgiro-rĩ, wĩoere mũgwanja mũgwanja, o njamba na nga yayo; nacio nyamũ cia mĩthemba ĩrĩa ĩĩ mũgiro-rĩ, wĩoere o mũthemba igĩrĩ, njamba na nga yayo; 3naho ha ũhoro wa mĩthemba ya nyamũ iria ii njoya cia rĩera inĩ wĩoere mũgwanja mũgwanja, o njamba na nga yayo; wĩke ũguo nĩ getha mbeũ ciacio itũũrio muoyo gũkũ thĩ guothe. 4Nĩ gũkorũo rĩu nĩhatigaire matukũ mũgwanja, itanoiria mbura thĩ yothe ihinda rĩa matukũ mĩrongo ina, mũthenya o na ũtukũ; na rĩrĩ, kĩndũ o gĩothe kĩĩ na muoyo kĩrĩa ndombire, nĩngakĩnina gĩthire biũ gũkũ thĩ guothe. 5Namo maũndũ marĩa mothe Nuhu aathirũo nĩ Jehova eke, noguo ekire.
6Na Nuhu aarĩ wa mĩaka magana matandatũ rĩrĩa mũiyũro ũcio wa maĩ wokire thĩ. 7#Mat 24.38,39; Luk 17.27.Na rĩrĩ, Nuhu agĩtonya thabina, me hamwe na ariũ ake, na mũka, na aka a ariũ ake, nĩ ũndũ wa maĩ macio ma mũiyũro. 8Nacio nyamũ cia magũrũ mana cia mĩthemba ĩrĩa ĩtarĩ mũgiro, o na iria cia mĩthemba ĩrĩa ĩĩ mũgiro, na nyamũ iria ii njoya, o na nyamũ o yothe ĩrĩa ĩtambaga thĩ, 9igĩgĩtonya thabina thĩinĩ kwĩ Nuhu, o igĩrĩ igĩrĩ, njamba na nga, o ta ũrĩa Ngai aathire Nuhu. 10Na gũgĩkinya atĩrĩ, atĩ matukũ macio mũgwanja maathira, maĩ ma mũiyũro ũcio mũnene makĩgwata kũhumba thĩ. 11#2 Pet 3.6.Na rĩrĩ, hĩndĩ ĩrĩa Nuhu aakinyĩtie mĩaka magana matandatũ, o mũthenya wa ikũmi na mũgwanja wa mweri wa kerĩ wa mwaka ũcio, mũthenya o ro ũcio-rĩ, nĩguo matherũkĩro mothe ma maĩ ma kũrĩa kũriku mũno maatothokire, nayo mĩanya ya kũrĩa igũrũ ĩkĩhingũrũo.
12Nayo mbura ĩgĩkiura thĩ matukũ mĩrongo ĩna, mũthenya o na ũtukũ.
13Mũthenya o ro ũcio noguo Nuhu aatonyire thabina thĩinĩ, me hamwe na ariũ ake, nao nĩo Shemu, na Hamu, na Jafethu, na me na mũka, o na aka arĩa atatũ a ariũ acio ake; 14andũ acio magĩgĩtonya me hamwe na ndaara-gĩthaka, o ndaara-gĩthaka kĩruka kĩayo, o namo mahiũ mothe, iruka ciamo, na tũnyamũ tuothe tũtambi tũrĩa tũtambaga thĩ, o kanyamũ kĩruka gĩako, na nyamũ iria irĩ njoya, o nyamũ kĩruka kĩayo, o nyamũ ya ruoya o na rũrĩkũ. 15Icio ciothe igĩtonya thabina thĩinĩ kwĩ Nuhu, o igĩrĩ igĩrĩ, irĩ cia mwĩrĩ o na ũrĩkũ wa nyama ũrĩa wĩ na mĩhũmũ ya muoyo thĩinĩ waguo. 16Nacio iria ciatonyire thabina, ciatonyire njamba na nga, irĩ cia mwĩrĩ o na ũrĩkũ wa nyama, o ta ũrĩa Ngai aamwathire, nake Jehova akĩmũhingĩra kũu thĩinĩ. 17Naguo mũiyũro ũcio mũnene wa maĩ ũgĩikara ũhumbĩte thĩ matukũ mĩrongo ĩna, namo maĩ macio makĩongerereka, makĩoya thabina na igũrũ, o nginya ĩkĩrera maĩ igũrũ yambatĩtio ĩgatigana na thĩ. 18Maĩ magĩkĩhũhita, makĩongerereka mũno gũkũ thĩ; nayo thabina ĩgĩikara ĩrerete maĩ igũrũ. 19Maĩ macio magĩgĩkĩrĩrĩria kũhũhita gũkũ thĩ, nacio irĩma ciothe iria ndaya ciarĩ gũkũ thĩ mũhuro wa igũrũ rĩothe o harĩa rĩakinya igĩthikwo nĩmo. 20Maĩ macio magĩkĩhũhita, makĩambaambata na igũrũ handũ ha mĩkono ikũmi na ĩtano, nacio irĩma igĩikara ithikĩtwo nĩmo. 21Na rĩrĩ, gũgĩkua kĩndũ o gĩothe kĩa mwĩrĩ wa nyama kĩrĩa gĩathiangaga gũkũ thĩ, gwata iria ii njoya, na mahiũ, na ndaara-gĩthaka, o na kĩndũ gĩothe gĩthiangi rũitũ kĩrĩa kĩahunjaga gũkũ thĩ, o na andũ othe; 22gũgĩgĩkua kĩndũ o gĩothe kĩrĩa gĩakoretwo gũkũ thĩ kũrĩa kũniaru, o kĩrĩa gĩothe kĩarĩ na mĩhũmũ ya roho wa muoyo marima-inĩ ma iniũrũ rĩakĩo. 23Kĩndũ o gĩothe kĩarĩ na muoyo kĩrĩa kĩarĩ gũkũ thĩ gĩkĩninwo, o gwata andũ, na nyamũ cia magũrũ mana, na tũnyamũ tũrĩa tũtambaga, o na nyamũ iria ii njoya cia kũrĩa igũrũ; ciothe-rĩ, ikĩninwo biũ, igĩthira gũkũ thĩ. No Nuhu wiki watigirio, na gĩkundi kĩrĩa kĩarĩ hamwe nake thabina thĩinĩ. 24Namo maĩ macio magĩikara mahũhitĩte gũkũ thĩ ihinda rĩa matukũ igana rĩa mĩrongo ĩtano.
હાલમાં પસંદ કરેલ:
KĨAMBĨRĨRIA 7: OGKBIBLE
Highlight
શેર કરો
નકલ કરો
Want to have your highlights saved across all your devices? Sign up or sign in
©Bible Society of Kenya, 2019