Bambata Pai 11
11
Pa gbanga bambu Babera
1Were pa aboro adu mbata kina sa rogo zegino dunduko na fugoyo a sa. 2Si ki ta du wa gere, wa i anaye uroyo, i abi kpasakpasa sende rogo gu ringara nga Sinara i ki zi ba kporo yo. 3I ki ya dagba yo, “Ani gúari ka meka biriki, ki zokodi he wenengaĩ.” Biriki adu be yo ku ba mbia, dada ki du be yo ku ba pere. 4I ki ya, “Ani gúari ka dua bakporo tipa rani, na gu gbanga bambu rihe ka da kina ku ngbangbaturũ yo, rimorani ki du ni taasitaasi he, i ka gbandaka rani yasika auru kpotosende dunduko.” 5Yekova ki zorõ ka bi gu bakporo re na gu gbanga bambu, nga gu awiri aboro adua ha. 6Yekova ki ya, “Oni ngere, i nga rika aboro kina sa, fugoyo du a sa; gere nga gu pai tona yo ka manga ha; were, agu apai i abérã pa manga ha a nga he ho sa nikarengba na za yo ti manga ha te. 7Ani guari ka zorã, ki unzugura fugoyo, ya ka i rúgu nga tiyo na fugo akura yo ya.” 8Si du Yekova agbandaka yo ti ni yasika ku auru kpotosende zegino dunduko, rogo gu ba i adu rogo ho. I ki mbu pa dua gu bakporo re. 9Si du i ayambu rimoho ti ni nga Babera, bambiko yo Yekova aunzugura gu fugo ni nga ga aboro zegino dunduko. Yekova ki gbandaka yo yo ku auru kpotosende dunduko.
Pa angbatunga Seme
(1 Peka 1:24-27)
10Agi yo re nangia angbatunga Seme. Seme araki tipa agarã 100, ko ki batika Arufakasada, ti gu garã nangia ue garã fuo ime akangbi. 11Seme ki raki fuo batika ko Arufakasada, agarã ki du 500, ki nibatika akumbagude na adegude.
12Arufakasada ki raki tipa agarã 35 ko ki batika Sera; 13Arufakasada ki raki fuo batika ko Sera, agarã ki du 403, ki nibatika akumbagude na adegude.
14Sera ki raki tipa agarã 30 ko ki batika Ebere; 15Sera ki raki fuo batika ko Ebere agarã ki du 403, ki nibatika akumbagude na adegude.
16Ebere ki raki tipa agarã 34, ko ki batika Perege; 17Ebere ki raki fuo batika ko Perege agarã ki du 430, ki nibatika akumbagude na adegude.
18Perege araki tipa agarã 30, ko ki batika Ru; 19Perege ki raki fuo batika ko Ru agarã ki du 209, ki nibatika akumbagude na adegude.
20Ru araki tipa agarã 32, ko ki batika Seruga; 21Ru araki fuo batika ko Seruga agarã ki du 207, ki nibatika akumbagude na adegude.
22Seruga araki tipa agarã 30, ko ki batika Naora; 23Seruga araki fuo batika ko Naora agarã ki du 200, ki nibatika akumbagude na adegude.
24Naora araki tipa agarã 29, ko ki batika Tera; 25Naora araki fuo batika ko Tera agarã ki du 119, ki nibatika akumbagude na adegude.
26Tera araki tipa agarã 70, ko ki batika Abarama, Naora, na Arana.
Pa angbatunga Tera
27Were agi yo re nangia angbatunga Tera; Tera abatika aAbarama, Naora, na Arana; Arana ki batika Roto. 28Arana akpi ku bangiri bako nangia Tera rogo gu ringara i abatika ko rogo, nga Ura nga ga aKasado. 29AAbarama na Naora ki rogo ade; rimo dia Abarama nangia Sarai, rimo dia Naora ki ngia Mireka, nangia wiri Arana, ko nangia ba Mireka na Yiseke. 30Ono Sarai adu ni irazangada; ri abatika nga te.
31Tera ki di Abarama nangia wiriko, na Roto wiri Arana nangia titako, na Sarai nangia dia wiriko, nga Abarama. I ki kuru wa sa Ura yo rogo ga aKasado ringara, ka ndu ku ringara Kanana yo. I ki da kina Arana yo, ki nisungu yo. 32Garã Tera adu dunduko nga 205. Tera ki kpi Arana yo.
હાલમાં પસંદ કરેલ:
Bambata Pai 11: ZB1978
Highlight
શેર કરો
નકલ કરો
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.