Yowanane 18
18
Badi bakuata Yezu
(Mat 26.47-56; Mar 14.43-50; Luk 22.47-53)
1Yezu mumane kulomba Mvidi Mukulu nanku, kumukaye ne balongi bende, kuyaye dishiya dia musulu wa Kedrone.#18.1 Tangila Mar 11.1 ne diumvuija. Muaba awu uvua lupangu, yeye kubuelamu ne balongi bende. 2Yudase mumutungidi wa tshitungu uvua mumanye kabidi muaba awu. Bualu Yezu ne balongi bende bavua bafikemu pamue misangu mivule.#18.2 Tangila Luk 21.37; 22.39. 3Yudase kuya mu lupangu alu ne tshisumbu tshia basolayi, kabidi ne tshia balami ba mu nzubu wa Mvidi Mukulu bavua bamfumu ba batuangaji ne Baparushe batume. Bantu abu bavua ne bia myita, bikale kabidi ne bimunyi bia kapia. 4Yezu uvua mumanye bionsu bivua ne bua kumuenzekela. Ke kusemenaye kuvuabu, kubebeja ne:
— Unudi nukeba nnganyi?
5Bobu kumuandamuna ne:
— Yezu wa mu Nazarete.
Yezu kubambila ne:
— Ke meme ewu.
Yudase mumutungidi wa tshitungu uvua muimane pamue nabu. 6Yezu ubambila ne: “Ke meme ewu,” kupinganabu tshianyima, kudishinda panshi. 7Ke Yezu kubakonka tshiakabidi ne:
— Unudi nukeba nnganyi?
Kuambabu ne:
— Yezu wa mu Nazarete.
8Yezu kubandamuna ne:
— Ndi mumane kunuambila ne: ke meme ewu. Nanku panuikala nunkeba meme, nulekele bantu bakuabu aba baye.
9Ke muvuaye ne bua kukumbaja miaku ivuaye mumane kuamba ne: “Tatu, tshiena mujimije muntu nansha umue wa ku bauvua mumpeshe.” 10Simone Petro uvua ne muele wa myita. Kuupatulaye, kutapaye muena mudimu wa mutuangaji munene, kumukosa ditshi dia lua balume. (Muena mudimu awu, dina diende mMalkuse.) 11Kadi Yezu kuambila Petro ne:
— Pingaja muele webe mu tshibuubu. Udi wela meji ne: ndi mbenga kunua dikopu dia dikenga didi Tatu mumpeshe anyi?#18.11 Fuanyikija ne Mat 26.39; Mar 14.36; Luk 22.42.
Badi baya ne Yezu kua Anase
12Diba adi tshisumbu tshia basolayi, mulombodi wabu, kabidi ne balami ba bena Yuda kukuatabu Yezu, kumusuika mionji. 13Kuyabu nende bangabanga kua Anase.#18.13 Anase: tangila Luk 3.2 ne diumvuija. Anase uvua tatuende muenu wa Kayifa, uvua mutuangaji munene tshidimu atshi. 14Kayifa awu ke uvua muambile bamfumu ba bena Yuda ne: “Mbimpe bua muntu umue afuile bantu bonsu.#18.14 Tangila 11.49-50.”
Petro udi uvila Yezu
(Mat 26.69-70; Mar 14.66-68; Luk 22.55-57)
15Simone Petro ne mulongi mukuabu bavua balonda Yezu. Mulongi awu bavua bamumanye kudi mutuangaji munene. Nanku kubuelaye diakamue pamue ne Yezu mu lubanza lua munda mua nzubu wa mutuangaji munene. 16Kadi Petro uvua mushadile pambelu pabuipi ne tshiibi. Ke mulongi awu uvuabu bamanye kudi mutuangaji munene, kupatuka bua kuyukila ne mukaji uvua ulama ku tshiibi. Pashishe kubuejaye Petro. 17Mukaji mulami wa tshiibi kukonka Petro ne:
— Wewe kabidi, kuena wa ku balongi ba muntu ewu anyi?
Petro kuandamuna ne:
— Tshiena wa ku balongi bende nansha.
18Kuvua mashika. Nanku bena mudimu ne balami bavua batemesha kapia, bela tshitangu bota. Petro kabidi uvua muimane pamue nabu, wota kapia.
Mutuangaji munene udi ulumbuluisha Yezu (Mat 26.59-66; Mar 14.55-64; Luk 22.66-71)
19Diba adi mutuangaji munene kulumbuluisha Yezu bua balongi bende ne bua dilongesha divuaye ulongesha. 20Yezu kumuandamuna ne:
— Mvua muambile bantu bonsu malu amu patoke. Mvua mulongeshe misangu mivule mu nzubu ya kutendelela ya bena Yuda, ne mu nzubu wa Mvidi Mukulu, muaba udi bena Yuda bonsu basangila. Tshivua muakule bualu nansha bumue mu musokoku. 21Udi ungela nkonku bua tshinyi? Ebeja bavua bumvue bimvua mubalongeshe. Bobu mbamanye bimpe bimvua mubambile.
22Yezu wamba nanku, umue wa ku balami, uvua muimane pabuipi nende, kumutapaye dipi, wamba ne:
— Ke muudi wandamuna mutuangaji munene anyi?
23Yezu kumuandamuna ne:
— Pangikala muambe bibi, utuleje mumvua muambe bibi. Kadi pangikala muambe bimpe, tshiudi untutshila ntshinyi?
24Ke Anase kumutuma amu musuika mionji kua Kayifa, mutuangaji munene.
Petro udi uvila Yezu tshiakabidi
(Mat 26.71-75; Mar 14.69-72; Luk 22.58-62)
25Diba adi Simone Petro utshivua wota amu kapia. Kumukonkabu ne:
— Wewe kabidi, kuena umue wa ku balongi ba muntu ewu anyi?
Kadi Petro kuyila, wamba ne:
— To, tshiena wa ku balongi bende nansha.
26Umue wa ku bena mudimu ba mutuangaji munene, muanabu ne muntu uvua Petro mukose ditshi, kumuamba ne:
— Tshivua mukumone nende mu lupangu anyi?
27Kadi Petro kuyila tshiakabidi. Diakamue tshitala kusama.
Yezu kua Pilate
(Mat 27.1-2,11-14; Mar 15.1-5; Luk 23.1-5)
28Pashishe kumukabu ne Yezu kua Kayifa, kuyabu nende ku nzubu wa bukalenga wa mulombodi wa ditunga. Bivua dinda dinda. Kadi bamfumu ba bena Yuda kabavua babuela mu nzubu wa bukalenga, bua kabapi mikiya, kadi bapange mua kudia didia dia tshibilu tshia Dipita dia Maweja-Nangila. 29Ke pavua Pilate, mulombodi wa ditunga mupatukile pa mbelu, muye kudibu. Kubakonkaye ne:
— Tshilumbu tshinudi nuasa muntu ewu ntshilumbu kaayi?
30Kumuandamunabu ne:
— Bu yeye kayi muenzayi, katuvua mu kumufila kuudi to.
31Pilate kubambila ne:
— Muangatayi amu nuenu, numulumbuluishe bilondeshile mikenji yenu.
Kuandamunabu ne:
— Tuetu katuena ne bumfumu bua kushipa muntu to.
32Ke muvua Yezu mukumbaje diyi divuaye muambe, divua dileja bantu mushindu uvuaye ne bua kufua.#18.32 Tangila 3.14; 12.32 ne diumvuija. 33Pilate kupingana mu nzubu wa bukalenga. Kubikilaye Yezu, umukonka ne:
— Udi mukalenga wa bena Yuda anyi?
34Yezu kumuandamuna ne:
— Udi ungela lukonku elu ku lungenyi luebe, peshi bantu bakuabu mbakuambile malu anyi?
35Pilate kuandamuna ne:
— Meme ndi muena Yuda anyi? Bena tshisamba tshienu ne bamfumu ba batuangaji mbakufile kundi. Tshiudi muenze ntshinyi?
36Yezu kuandamuna ne:
— Bukalenga buanyi ki mbua pa buloba to. Bu bukalenga buanyi buikale bua pa buloba, bantu banyi bavua mua kuluangana myita bua kabamfidi mu bianza bia bamfumu ba bena Yuda. Kadi bukalenga buanyi ki mbua pa buloba to.
37Ke Pilate kumukonka ne:
— Nanku udi mukalenga anyi?
Yezu kumuandamuna ne:
— Anu muudi muambe amu: Ndi mukalenga. Meme tshidibu bandelele, kabidi tshindi mufikile panu apa, mbua kujadika malu malelela. Muntu yonsu udi munangi wa bulelela udi uteleja bindi ngamba.
38Pilate kumukonka ne:
— Bulelela ntshinyi?
Badi bafundila Yezu tshibawu tshia lufu
(Mat 27.15-31; Mar 15.6-20; Luk 23.13-25)
Pilate mumane kuamba nanku, kupatukaye tshiakabidi pambelu. Kuyaye kudi bena Yuda, ubambila ne:
— Tshiena musangane bualu nansha bumue bundi mua kufundila muntu ewu tshibawu to. 39Kadi bilondeshile tshibidilu tshienu, ndi nnukopuela misangu yonsu muena lukanu umue bua tshibilu tshia Dipita dia Maweja-Nangila. Nudi basue nnukopuele mu nzubu wa lukanu mukalenga wa bena Yuda anyi?
40Kumuandamunabu, bela mbila ne:
— Awu to! Tudi basue amu Barabase! Kadi Barabase awu uvua mushipianganyi.#18.40 Fuanyikija ne MM 3.14.
હાલમાં પસંદ કરેલ:
Yowanane 18: TSH96
Highlight
શેર કરો
નકલ કરો
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996
