Yowanane 14
14
Yezu udi njila wa kuyila kudi Tatu
1Yezu kuambila balongi bende ne:
— Kanupampakanyi. Itabayi#14.1 Itabayi, nansha: Nudi nuitaba. Mvidi Mukulu, nungitabe ne meme kabidi. 2Mu nzubu mua Tatu wanyi mudi miaba ya bungi ya kusomba. Ndi nya kunulongoluela muaba. Bu bualu ebu kabuyi bulelela, tshivua mua kumuambilabu nansha.#14.2 Bu bualu ebu…tshivua mua…: mu mikanda mikuabu mbafunde ne: Bu bualu ebu…mvua mua kunuambilabu anyi? 3Meme mumane kuya kunulongoluela muaba, nempingane bua kunuangata, bua nuikale nuenu kabidi muaba undi. 4Nudi bamanye njila wa kundi nya.
5Tomase kumuamba ne:
— Mfumu, katuena bamanye kuudi uya to. Mutudi mua kumanya njila mbishi?
6Yezu kumuandamuna ne:
— Ndi njila, ndi bulelela, ndi muoyi. Muntu nansha umue kena mua kuya kudi Tatu kayi mupitshile kundi. 7Panudi bammanye meme, nenumanye#14.7 Panudi bammanye, nenumanye kabidi…: mu mikanda mikuabu ya kale mbafunde ne: Bu nuenu bammanye, nuvua mua kumanya. kabidi Tatu wanyi. Mpindiewu nukadi bamumanye, kabidi nukadi bamumone.
8Filipe kumuamba ne:
— Mfumu, utuleje Tatu. Ke tshionsu tshitudi tujinga.
9Yezu kumuandamuna ne:
— Filipe, kudi matuku mulongulongu andi mushale nenu, kuena muanji kummanya anyi? Muntu mumane kummona, mmumane kumona Tatu. Muudi wamba ne: “Utuleje Tatu” mbishi? 10Kuena witaba ne: ndi munda mua Tatu, kabidi Tatu udi munda muanyi anyi? Miaku indi nnuambila buonsu buenu kayena ifuma kundi. Kadi Tatu udi ushala munda muanyi, ke udi ukumbaja midimu yende. 11Pandi nnuambila ne: ndi munda mua Tatu, kabidi Tatu udi munda muanyi, nungitabe. Nuitabile nansha bua malu aa andi ngenza. 12Ndi nnujadikila bulelela ne: muntu udi ungitaba neenze kabidi midimu indi ngenza. Neenze mikuabu mipite bunene, bualu ndi nya kudi Tatu. 13Nengenze bionsu binualomba mu dina dianyi, bua Muana amueneshe butumbi bua Tatu. 14Panudi nundomba#14.14 Panudi nundomba: mu mikanda mikuabu mbafunde amu ne: panudi nulomba. tshintu mu dina dianyi, nentshienze.
Yezu udi ulaya Mueyelu wa Tshijila
15— Panudi nunnanga, nenutumikile mikenji yanyi. 16Nendombe Tatu bua anupe udi mua kunuambuluisha, Mueyelu wa bulelela bua wikale nenu kashidi. 17Ba pa buloba kabena mua kuwakidila, bualu kabena mua kuumona nansha kuumanya. Kadi nuenu nudi baumanye. Bualu udi ushala nenu, udi kabidi munda muenu.#14.17 udi kabidi munda muenu: mu mikanda mikuabu ya kale mbafunde ne: neikale kabidi munda muenu.
18Tshiena mua kunushiya nkayenu to. Nempingane tshiakabidi kunudi. 19Kunyima kua katupa, ba panu kabakummona kabidi to. Kadi nuenu nenummone, bualu ndi ne muoyi, nuenu kabidi nenuikale ne muoyi. 20Dituku adi, nenujingulule ne: ndi munda mua Tatu wanyi, nuenu kabidi nudi munda muanyi, meme munda muenu.
21Muntu udi ulama mikenji yanyi, uyitumikila, ke udi munnange. Muntu udi munnange, Tatu wanyi neamunange. Meme kabidi nemmunange, nendileje kudiye.
22Yuda (ki nYudase Iskariyote to) kumukonka ne:
— Mfumu, mmunyi muudi mua kudileja kutudi, kuyi udileja kudi ba pa buloba?
23Yezu kumuandamuna ne:
— Muntu udi munnange, neakumbaje bindi ngamba. Tatu wanyi neamunange. Tatu wanyi ne meme netuye kudiye, netusombe munda muende. 24Muntu udi kayi munnange, kena utumikila miaku yanyi. Binudi nungumvua ngamba, ki mbianyi to. Kadi mbifumina kudi Tatu uvua muntume.
25Ndi munuambile malu aa pantshidi nenu. 26Udi ne bua kunuambuluisha, Mueyelu wa Tshijila watumabu kudi Tatu mu dina dianyi, neunulongeshe bionsu. Neunuvuluije bionsu bimvua munuambile.
27Ndi nnushila ditalala. Ndi nnupesha ditalala dianyi.#14.27 Fuanyikija ne Yesh 9.5. Tshiena nnupeshadi bu mudi ba pa buloba badipeshangana. Kanupampakanyi. Kanutshinyi. 28Nuvua bumvue nnuambila ne: “Nkadi ngumuka, kadi nempingane kunudi.” Panuikala bannange, nenusanke panudi numanya ne: ndi nya kudi Tatu. Bualu Tatu udi mumpite ku bunene. 29Ndi mumane kunuambilabi mpindiewu kabiyi bianji kuenzeka, bua padibi bienzeka, nuitabe. 30Tshiena mua kuyukila nenu kabidi bia bungi to. Bualu mfumu wa pa buloba ebu udi ulua. Kena mua kuntumina diyi to. 31Kadi bidi bimpe bua ba pa buloba bamanye ne: ndi munange Tatu, kabidi ndi ngenza mudi Tatu untumina diyi. Jukayi, tumukayi apa!
હાલમાં પસંદ કરેલ:
Yowanane 14: TSH96
Highlight
શેર કરો
નકલ કરો
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996
