Malu Menza 3
3
Bapostolu badi bajikija muntu disama dia tshibombu
1Dituku dikuabu Petro ne Yowanane bavua babuela mu nzubu wa Mvidi Mukulu diba dia kutendelela dia isatu wa dilolu. 2Ku tshiibi tshia nzubu tshivuabu binyika ne: “Tshilengele,” kuvua muntu mulela tshibombu. Dituku dionsu bavua baya kumuteka muaba awu, bua amone mua kulomba tshia pa luse kudi bantu bavua babuela mu nzubu. 3Muntu awu umona Petro ne Yowanane babuela mu nzubu wa Mvidi Mukulu amu, kulombaye tshia pa luse. 4Petro ne Yowanane kumutangila talalaa. Ke Petro kumuamba ne:
— Banduluka tumone, ututangile!
5Muntu awu kubatangila ne ntema yonsu, utekemena kupeta kantu kudibu. 6Ke Petro kumuamba ne:
— Tshiena ne lukanu lua tshiamu tshitoke tshia mushinga mukole, nansha lua tshiamu tshia mpawungi. Kadi tshindi natshi, ndi nkupeshatshi: mu dina dia Yezu Kristu wa mu Nazarete, ndi nkuamba ne: juka, enda!
7Pashishe Petro kumukuata ku tshianza tshia balume, kumujula. Diakamue makasa ende ne tupombu kukolabi. 8Muntu awu kutua makasa panshi, kuimana bimpe, kutuadija kuenda. Kubuelaye ne bapostolu pamue mu nzubu wa Mvidi Mukulu, wenda utupika, utumbisha Mvidi Mukulu. 9Bantu bonsu kumona muvuaye wenda, utumbisha Mvidi Mukulu. 10Bakuabu kumumanyabu ne: nyeye uvua musombe ku Tshiibi Tshilengele tshia nzubu wa Mvidi Mukulu, ulomba tshia pa luse. Nanku bavua ne bowa, bakatshila bivua bimuenzekela ebi.
Petro udi ulongesha bantu mu nzubu wa Mvidi Mukulu
11Bu muvua muntu awu kayi musue kushiya Petro ne Yowanane, bantu bonsu bavua bakema bikole, bunguila mu Lutanda luvuabu binyika ne “lua Shelomu,#3.11 Lutanda elu luvua lunyungulukila lubanza lua mu nzubu wa Mvidi Mukulu wa mu Yerushalayime, muaba uvua bantu benyi, bavua kabayi bena Yuda, mua kubuela kabidi. Fuanyikija ne Yow 10.23; MM 5.12.” muvua Petro ne Yowanane. 12Petro umona nanku, kuambilaye bantu ne:
— Nuenu bena Izrayele, nudi nukema padi muntu ewu wenda bimpe bua tshinyi? Tshinudi nututangidila ntshinyi? Bienza bu tuetu badi bendesha muntu ewu ku bukole buetu tuetu, nansha bualu tudi bantu badi bitaba Mvidi Mukulu! 13Kabiena nanku to! Mvidi Mukulu wa Abrahame, wa Izake, ne wa Yakobe, Mvidi Mukulu wa bankambua betu,#3.13 Tangila Tshim 3.15. mmuleje patoke butumbi budi muntu wende Yezu nabu. Nuenu kumufila kudi bamfumu, kumubenga kumpala kua Pilate. Kadi Pilate uvua musue kumulekela. 14Nuenu kubenga muntu wa tshijila, muitabi wa Mvidi Mukulu, kulomba Pilate, bua anulekele mushipianganyi.#3.14 Tangila Mat 27.15-23; Mar 15.6-14; Luk 23.13-23; Yow 18.38-40; 19.12-15. 15Nanku nuenu kushipesha mfumu wa muoyi. Kadi Mvidi Mukulu mmumubishe ku lufu. Tuetu tudi bajadiki ba bualu ebu. 16Muntu ewu unudi bamona, kabidi bamanye, udi wenda ku bukole bua dina#3.16 ku bukole bua dina dia Yezu: mu mukanda wa Mvidi Mukulu misangu mivule dina didi ne mushinga mene wa muntu udibu badinyike. Ke mudibi miaba mivule mu mukanda wa Malu Menza (tangila 4.10, a.n.). Misangu ya bungi didi dileja Yezu mubiike ku bafue. dia Yezu, ne bua ditaba divuaye nadi pa dina adi. Bu muvuaye muitabe Yezu, ke padiye wenda bimpe kashidi, bu munudi bamumona mujukilamu.
17Kadi, bana betu, ndi mumanye se: nuenu ne bamfumu benu, nudi benze bualu ebu, bualu kanuvua bamanye Yezu. 18Mvidi Mukulu mmukumbaje bivuaye mudianze kumanyisha ku kale kudi bambi bonsu ne: Kristu wende uvua ne bua kukenga.#3.18 Fuanyikija ne Luk 24.26-27. 19Nanku nudilengeje,#3.19 nudilengeje: nansha ne: nunyingalale bua mibi yenu. nupingane kudi Mvidi Mukulu, bua anujimijile mibi yenu. 20Diba adi Mvidi Mukulu neasemeje pabuipi matuku a lupandu. Neanutumine Kristu uvuaye mudianze kunusunguila, ke Yezu mene. 21Mpindiewu Yezu udi ne bua kushala mu diulu, too ne ku tshikondu tshidi Mvidi Mukulu ne bua kuakajilula bionsu, bu muvuaye muambe kale kudi bambi bende ba tshijila. 22Moshe uvua muambe ne: “Munkatshi mua bana benu, Maweja-Nangila Mvidi Mukulu wenu neanupatuile muambi bu meme.#3.22 neanupatuile muambi bu meme: badi mua kuandamuna kabidi ne: neanutumine muambi, bu muvuaye muntume meme. Nenumuteleje, nuitabe bionsu bianuambilaye. 23Muntu yonsu wabenga kuitaba muambi awu, nebamuipate mu tshisamba tshia bantu ba Mvidi Mukulu, bamushipe.#3.23 Tun. 22-23: tangila Diel 18.15, 18, 19.” 24Bituadija ku Samuwele, bambi bonsu ku muntu ku muntu bavua badianjile kumanyisha bantu malu adi menzeke matuku aa. 25Nuenu nudi bantu bavua Mvidi Mukulu mulaye kudi bambi. Nudi bantu bavua Mvidi Mukulu mutuile ndondu ne bankambua babu, pavuaye muambile Abrahame ne: “Bisamba bionsu bia pa buloba nebipetele diakalenga ku ndelanganyi yebe.#3.25 Tshib 22.18.” 26Mvidi Mukulu mmusungule muntu wende; mmudianze kumutuma kunudi, bua nulekele kulonda njila yenu mibi, nupete diakalenga.
હાલમાં પસંદ કરેલ:
Malu Menza 3: TSH96
Highlight
શેર કરો
નકલ કરો
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996
