Luka 7
7
Eikyelo ea bosali owa Capitaine
(Mt 8.5-13)
1Akiʼndʼosizaka bitefeelo bikae biuma ndʼatoi bʼanto aokenda, aolotswa nda Kapalanauma. 2Capitaine emo aki lʼokwala owa nkonde; ko bokwalʼoko aoloka nkangi, akotutsi lʼiwa. 3Aki capitaine okaka nsango ea Yesu, aolotomela bingambi biʼa-Yuda wae baondʼende aye oikya bokwalʼokae. 4Akiʼyʼokite ele Yesu baoloonda o mbaonda mongo, baokela, Ende eji wae wokambya ngone, 5elʼende alanga lioci likiso, ko aototongela sunangonga ekiso. 6Ko Yesu aokenda lʼiyo. Akiʼndʼotutamaka lʼilombe, capitaine aolotomela balongʼamo, baolokela, Wambʼocikale, Nkolo, elʼemi mpeji wae wotswa ndʼilombe ikami. 7Ko la ncinʼeko, emi ncitanga emi mongo wae ndeji loyʼele we. Lolo tefela joi kika, ko bosali okami ifoika. 8Eremiʼngoko, nde nda lotomo jʼontʼomo ole la mpifo elekola ekami, ko nde la soldats nda lotomo lokami, ko nsangelʼone, Kenda, ko ayokende, ko onkina, Yaka, ko aye, ko ele bokwala okami, Kela ngone, ko akela. 9Aki Yesu okaka, aokamwa, ko aokengwana ele linyenga jʼanto bandokimaki, aolakela, Nsangelʼinyo, o la nda Yisalaele ncifena imeezo ngone nye. 10Iyʼatomamaki baoluta ndʼilombe, ko baotanʼokwala oko ayokeme bolo.
Yesu aetola bosekota bosi Naina
11Nkʼelingi ndʼafeka aokenda ndʼonanga botangema Naina, bakimiʼakae baokenda lʼende, iyo lʼetukuluku eʼonene. 12Akiʼndʼotutama lʼolelo eʼonanga, bala jende owei, bonʼowa likinda owa nyango ekae, bomoto owʼetuka, aotombama, ko linyenga jʼanto bʼonangʼoko baki la nyango. 13Aki Nkolo oenaka, aolookʼisei, ko aolokela, Tolelake. 14Ko aoyʼofomwa boombo wʼilaka, ko batombi baosilama. Ko aokela, Bosekota, nkokela, betswaka! 15Ko owei aosongongala, ko aangʼotefela. Ko Yesu aololekya ele nyango ekae. 16Ko booma bolakwelʼiyʼauma, ko baokumya Nzakomba, baokela, Boteli owʼonene aolenyʼelʼiso, ko Nzakomba aoyʼekʼantoʼakande. 17Ko joi line jolongwana nda Yudea euma, la nda bise biuma bikotutsi.
Mbuto ea Yesu nda wuo wa Yoane-Wini
(Mt 11.2-6)
18Bakimi ba Yoane baolosangela baoyiʼane bauma. 19Ko Yoane aoletʼakimi bakae bafe, aolatoma ele Nkolo, baokela. We olʼende oyoya, nkina tolendeza onkina? 20Akiʼyʼokitʼelʼende, baokela, Yoane-Wini aototomʼele we, akokela, We olʼende oyoya, nkina tolendeza onkina? 21Nda jefa liko aoikya bantʼauke lima nkangi la bieto la belimo biʼobe, ko aokayʼenelo ele baweiʼaiso bauke. 22Nkako aolambʼantʼako wete, Lokenda, losangele Yoane baoyi bandenʼinyo la bandokʼinyo; baweiʼaiso bena, betengu bakenda, ba baeka bafetswa, bakinzʼatoi boka, bawei bakunjwa, ko nsangʼeʼolotsi esangemʼele beola, 23ko bontʼofokunumwela lʼemi ale lʼosalangano.
Losimo ioki Yesu osimaka Yoane-Wini
(Mt 11.7-19)
24Aki bikima bia Yoane okendaka, aangaki otefeela etukuluku nda ncina ea Yoane: Inyo locwaki otala ndʼetekeleke na? La bokombe bofukyama lʼompompo? 25Lolo locwaki otala na? La bontʼolota bito biʼesengo? Bala iyʼalota belotswaka bia jilangi, ko baleka toma ta wiko bale nda tolombe ta rois. 26Lolo locwaki otala na? La boteli? O nde njolosangela, ko la olekola boteli. 27One wetʼende oki joi okotamaka,
Bala ntoma ekima ekami nda joso
jʼelongi eke,
Ende ifokeleza mboka eke nda joso
like.
28Nsangelʼinyo, ele banto baotswa lʼamato, nkʼontoʼolekola Yoane. Lolo owʼafeka mongo nda likulaka ja Nzakomba olekolʼende. 29Aki bantʼauma la batakanyi ba mpuci okaka ngoe baolongya Nzakomba, ekiʼyʼinamaka lʼinamelo ea Yoane. 30Lolo Bafalusi la balaki ba Esekyelo baotendola wango wa Nzakomba elʼiyo mongo, ekʼiyo ntabinama la Yoane.
31La ngoso mpanga nsonganya banto bʼeotswelo ene la na? Iyo basongi la na? 32Bale ngole banoju bakitase ndʼesombe ea ndomba, ko betana, bakela, Tulelakʼinyo mponge, lolo ntaloinaka, ko tulaki nkimo, lolo inyo ntalolela lilelo. 33Ele Yoane-Wini ayaki, ntala mampa ko ntamela vina, ko losangaki, Endʼale la demona! 34Bonʼowʼonto aoya, ayole toma ko ayomele, ko losanga wete, Bala bonto oleki bolei, ko bomeli mongo owa vina, boseka owa batakanyi ba mpuci lʼantʼobe! 35Ko wanya bolongʼelonga lʼanʼakae bauma.
Bomoto oisaka bakaka ba Yesu ndʼilombe ya Simona, ko iʼesonganya eʼantʼafe baki lʼembale
36Bofalusi omo aoloeta wae ale toma ekaʼnde. Ko aolotswa ndʼilombe yʼofalusi, ko aokitase nda mesa ea ndala. 37Ko bala, bomotʼomo owʼobe aki ndʼonanga boko, ko akiʼndʼeaka wae aki a mesa ndʼilombe yʼofalusi oko, aoyela bolangi wa alabasitolo wʼalasi, 38aolemala ndʼafeka, ndʼakakʼakae, ayolele, ko aanga lotangeza bakakʼakae la mpisali, ko aoluola bako lʼabwo bʼotsʼokande, ko aofomwʼakakʼakae la baisers, ko aoisʼakaka lʼalasi. 39Aki Bofalusi ondetakʼende nda toma, enaka joi liko, aokela ndʼotema bokae, Ngʼontʼone aki boteli, siki aokotola elenge eʼomotʼone ondofomwa wae ale bontʼobe. 40Lolo Yesu aolokela, Simona, nda la joi lilangʼemi okosangela. Aolamba, Bolaki, wambʼosange. 41Aokela, Bosombyi omo aki lʼantʼafe baki lʼembale lʼende; one aki lʼombale wa denalio benkamʼetano, oi lʼombale wa denalio ntuku itano. 42Ekiʼyo ntabakuseya ofutʼembale, aolafofeza bembale bekiyo. Lʼiyʼakʼafe, bonto ondookʼende eefe elekola na? 43Simona aolamba, Nkanela wetʼende okiʼndʼofofezaka bombale bokoleki. Yesu aoloamba, Okaola o ci. 44Nkako aokengwanʼele bomoto, ko aokela Simona, Olena bomotʼone? Njotswaki ndʼilombe ike, ko we ntonkaya basi ba nsasolʼea bakaka. Lolo ende aotangeza bakaka bakami la mpisali ikande, ko aoluolʼako lʼabwoʼakae. 45We ntonsambela la baiser, lolo limʼekiʼmʼotswaka ende afambya ofomwa bakakʼakami la mbebu ikae. 46We ntombisʼotsa lʼauta, lolo ende aoisa o bakakʼakami lʼalasi mongo. 47Ndʼewelʼeko nkosangela wae mpeka la baoyiʼobe bakae balʼauke, aotungwa limʼako, ekiʼndʼokaka eefe euke. Lolo osʼotungwa lima bobe nkʼisisi, okʼeefe nkʼisisi. 48Ko aokelʼomoto oko, Otungwa lima baoyiʼobe bake. 49Ko bantʼakokitase lʼende nda mesa baotefelana, Bontʼone na? wae ayotungolʼanto limʼaoyiʼobe? 50Ko aokelʼomoto oko, Imeezo eke eokoikya; kenda la kuci.
હાલમાં પસંદ કરેલ:
Luka 7: LOL87
Highlight
શેર કરો
નકલ કરો
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
