Luka 23
23
Yesu nda joso ja Pilato
(Mt 27.1-2, 11-14; Mk 15.1-5; Yoa 18.28-38)
1Nkako bantʼauma bʼoloi bokiyo baolemala, ko baolotomba ele Pilato. 2Ko iyo baangʼoakʼende baoyi, baokela, Totanaki bontʼone ayungusanya bantʼakiso, ko afekʼanto wae bafofute Kaisala mpuci, ko asanga wae ende mongo ale Masiya, roi. 3Ko Pilato aolouola, We ole Roi ea Ba-Yuda nde? Ko aoloamba, We otefelaki joi liko. 4Ko Pilato aosangela nkanga ya joso lʼanto bʼetukuluku, Mpotane joi jʼekwa ea likambo elʼontʼone. 5Lolo iyo baokemya eakelo, baokela, Ayofukya banto, wete aolaka nda Yudea euma; aangaki nda Ngalilaya, ko aokita nkʼane.
Yesu la Elode
6Aki Pilato okaka ngoko, aoluola nkina bontʼone ale bosi Ngalilaya. 7Akiʼndʼeaka wete aki lima bokili bondesanya Elode, aolotoma ele Elode, oki nkʼende mongo nda Yelusalema ndʼembilʼeko. 8Aki Elode enaka Yesu aolokʼesaza mongo, la ncina wete lʼejingi aolanga loena, ekiʼndʼokaka baoyi ndʼeloko ekae, ko aolendeza wae ene lotaza lomo lokelama lʼende. 9Ko aolouola biuo beuke, lolo Yesu ntoamba la joi limoko nye. 10Ko nkanga ya joso lʼakoci bʼenkanda baolemalʼeko, baoloaka bakambo lʼeakelo ea bolo mongo. 11Ko Elode la soldats bakae baolosotsa ko baololengola; nkako baololotsa benkoto bia jilangi, ko aolouteya ele Pilato. 12Ko Elode la Pilato baamanaki ndʼoseka nda mbilʼeko mongo, la ncina wae nda joso baki baini.
Pilato ayase lotungola Yesu
(Mt 27.15-26; Mk 15.6-15; Yoa 18.39–19.16)
13Ko Pilato aoleta etakano ea nkanga ya joso la ba mpifo, ko lʼantʼauma, 14ko aolakela, Lonjelaki bontʼone ngolʼonto ondungusanyʼanto, ko akiʼmʼoengelaka nda joso likinyo, ncitanʼelʼontʼone ekwa ea bakambo bako bandoakʼinyo nye. 15Elode ngoko, nta-tanʼende la likambo, elʼende aolouteya elʼiso. Ko bala, joi lindeji lʼiwa litafoke-lama lʼende. 16La ngoko njifolokunda njiji, mpanga ndotungole. [ 17Pilato aolekela wae atungwelakʼiyo loanga lomoko ndʼekeke ea elambo.]
18Lolo iyʼauma baobeleza bolongo, Boma bontʼone, ko ototungoele Balaba. 19Bontʼoko Balaba aokandema loanga la ncinʼea etumba loswele, ekiʼndʼounaka ndʼonanga, ko la nci-nʼekiʼndʼoomakʼonto. 20Pilato aolatefeela lenkina la ncina wete alangaki otungola Yesu. 21Lolo iyo baobeleza, Woake ndʼekulusu! Woake ndʼekulusu! 22Ko aolakela bokela wʼesato, Joi jʼobe liki bontʼone okelaka na? Ncifotana likambo jʼiwa elʼende nye. Ngoko njifolokunda njiji, mpanga njolotungole. 23Lolo baolokama la lofoso ja mbeleza mongo, baokongʼouola wae aomame ndʼekulusu. Ko ndaka ikiyo yolonga. 24Ko Pilato aoleza wae joi linduolʼiyo likelame. 25Ko aotungolʼontʼoko okotungi nda njanga la ncinʼeʼetumba lʼeomelo eʼonto, nkʼontoʼoko okiʼyʼuolaka, lolo aolekya Yesu nkʼele wango bokiyo.
Yesu ndʼekulusu
(Mt 27.32-44; Mk 15.21-32; Yoa 19.17-27)
26Akiʼyʼotombakʼende limʼeko, ba-kandaki Simona, bosi Kulene, oyaki lima esanga, ko baoloafeza ekulusu, wae atombʼeko ndʼafeka ba Yesu. 27Ko linyenga mongo jʼanto baolokima, iyo lʼamato bandolelaki ko bandulelakʼende nkimo. 28Lolo Yesu aokengwana elʼiyo, ko aolakela, Bana bʼamato ba Yelusalema, talolelake ndʼeloko ekami, lolo lokongʼolela ndʼelokʼekinyo mongo ko ndʼelokʼea banʼakinyo, 29la ncina wae bembile beyoya beʼiyʼokela, Bikomba ko la bakunju bataotaki, ko la baele batalomyaki bale bʼesaza! 30Nkako bifoanga lotefeela ngongo, Lotokwele! ko bekonji, Lotokuke! 31Nga bakela baoyiʼane ndʼotamba wʼouku, bifokela ndʼoko wʼeonga na?
32Banto bamʼafe, bakeli bʼobe, baolekyama wae baomame lʼende. 33Ko akiʼyʼokitaka ndʼitenela itangema Loe-lenge, baoloakʼeko ndʼekulusu, ende lʼakeli bʼobe bakʼafe bolongo, omo nda wiji wa lo jʼelome, ko onkina wiji wa lo jʼeso. 34Yesu aokela, Fafa, watungole, elʼiyo bafea joi likelʼiyo. Ko baokafa benkoto bekae la ntata ea mbesi. 35Ko banto baolemala, bayolenda o ndalenda; lolo ba mpifo baolociyola, baokela, Ende aikyakʼankina, kela aikyʼende mongo; nkinʼontʼone ale Masiya ea Nzakomba, lʼosonami okande! 36Ko soldats baolociyola o ngoko, baoyʼelʼende, ko baololekeza vinaigre, 37ko baokela, Ayaka wʼole Roi ea Ba-Yuda, bikyaka we mongo! 38Ekotelo ene eki ndʼaliko bakande, BONTʼONE ALE ROI EA BA-YUDA.
39Omoko owa bakeli bʼobe oakemaki eko aolosaola isaola wete, We ofa Masiya nde? Bikya we mongo ko lʼiso. 40Lolo onkina aolofela, Kamba we ofoange Nzakomba nde? Ele we ole ndʼumbelo nkʼelengʼeko: 41ko iso telame lʼeko elʼiso tamba nsisoza endeji lʼeketo bekiso, lolo bontʼone ntakela joi limoko jʼoseketano nye. 42Nkako aokela, Yesu, ondofwʼemi ae wʼoya nda likulaka like. 43Ko ende aolamba, Nsosolo nkosangela we, mbilʼene wifoyala lʼemi nda Paladiso.
Wilima lʼiwa ya Yesu
(Mt 27.45-56; Mk 15.33-41; Yoa 19.28-30)
44Jefa jokita midi, ko wilima bokwela bokili boko bouma elaka nko jefʼasato, 45ele jefa jolambyʼongenga. Ko eto ea Tempelo eolatsa kwa! 46Yesu aobeleza la lofoso jʼonene, nkako atefelaki, Fafa, ndekya bolimo bokami ndʼakata bakawe. Akiʼndʼotefelaka ngoko, aowa. 47Aki capitaine enaka joi likelamaki, aokumya Nzakomba, aokela, Bontʼone aki owa liongi, nkʼekoji. 48Ko banto bʼetukuluku eko batakanaki wae benʼetalo eko akiʼyʼenaka baoyi bandielaki, baoluta, bayokundele ntolo ikiyo. 49Ko bantʼauma bandoeaki, ko lʼamato bandokimaki lima Ngalilaya, baolemala ndʼesi, baolenda baoyiʼane.
Yosefa akunda Yesu
(Mt 27.57-61; Mk 15.42-47; Yoa 19.38-42)
50Ko bontʼomoko aki eko, lina likae Yosefa, bontʼowʼolotsi lʼowa liongi. Ende aki elimo emo ea nteke ekiyo, 51lolo ntaamana lʼiyo nda wango ko lʼoketʼokiyo. Ende bosi Alimatayo, bonanga wa Ba-Yuda, ko ende alendezaki likulaka ja Nzakomba. 52Bontʼone aocwʼele Pilato, ko aolouola ilaka ya Yesu. 53Ko aokitezʼiko, ko aoombʼiko Veto ea mbenza, ko aolambyʼende ndʼekundelo ecimamaki ndʼekenje, etafʼonto ambyema joso nye. 54Mbilʼeko eki ea njeeza, ko Sabata eotutama. 55Ko bamato bako bayaki la Yesu lima Ngalilaya baolokimʼeko, ko benaki ekundelo, ko lʼelenge ekiʼndʼambyaka jonge likae. 56Nkako iyo baoluta ko baoleza baimi lʼalasi. Ko nda Sabata baoloma jomo nkʼelengʼele Esekyelo.
હાલમાં પસંદ કરેલ:
Luka 23: LOL87
Highlight
શેર કરો
નકલ કરો
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
