Luka 15
15
Esonganya ea mpate ecwei
(Mt 18.12-14)
1Batakanyi ba mpuci bauma lʼantʼobe baolotutamela wae bokozʼende. 2Ko Bafalusi lʼakoci bʼenkanda baomemesana, baokela, Ayambe bantʼobe, ko ala toma lʼiyo.
3Nkako aocwelʼiyo esonganyʼene. 4Bontʼokinyo ale nko, ole la mpate bonkama, nga emoko eocwa, afaocika ntukʼibwa lʼibwa ndʼesobe, ko acwʼokimʼekʼecweki elaka nko atanʼeko? 5Ko anyangʼotanʼeko, afyʼeko ndʼasoko lʼosalangano, 6ko akitʼende ndʼola, eta balongʼakae lʼiyʼasingitai lʼende, ko akelʼiyo, Losalangana lʼemi, elʼemi njotana mpate ekami ecwaki. 7Njolosangela wete, nkʼelengʼeko, nda loola bosalangano ndʼeloko ea bontʼomoko owʼobe oututala bobeʼokae wifolekola boko ndʼeloko ea banto ba liongi ntuku ibwa lʼibwa bafa la wela wa eututaelo.
Drachme ecwei
8Ko ayakʼomoto omo ale la drachmes jom, ko acweya emoko, afoambolʼitswa nde, ko ayombʼilombe ko ayasʼeko la loncinji elaka nko atanʼeko? 9Ko aʼendʼotanʼeko, ifetʼalongʼakae, ko lʼasingitai lʼende, ko asangele, Losalangana lʼemi, elʼemi njotana drachme ekami ecwaki. 10Njolosangela wete, nkʼelengʼeko bosalangano bolʼeko nda joso ja bikima bia Nzakomba ndʼewelʼea bokeli owʼobe omoko oututala bobe limʼotema.
Bona ocwei
11Ko aokela, Bontʼomo aki lʼana bʼaende bafe. 12Ko owʼakuka aokelʼise ekae, Fafa onkaya liondo ja liaci liʼemʼoamba. Ko aolakafela eikelo ekae. 13Bembile nkʼouke ndʼafeka bokune aotakanya liaci liuma ko aocwa lokendo ndʼese eki ndʼesi, ko aofatanganya liaci likae eko lʼaoyi ba jengi mongo. 14Akiʼndʼosiza okenza liaci likae liuma, eto ea nzala mongo eoliela ndʼese eko, ko ende aangaki jelengana. 15Ko aocwʼokolʼosala elʼontʼomo owʼese eko, ko bontʼoko aolotoma nda bisobe okaya ngulu toma. 16Ko ndʼewelʼea elo ea nzala imezaki oyoza likunju likae la toma toki ngulu oleka, ko nkʼontʼondokaaki toma ta ndala. 17Lolo akiʼndʼokotolaka elengʼekiʼnde, aokela, Bouke wʼasalibʼise ekami bandambʼofuto bale la toma ta ndala la ta ndekola, lolo emi mbwe ane la nzala. 18Njifemala ko njifocwʼele fafa, ko njifosangelʼende, Fafa njokelʼende ole nda loola bobe, ko njokelʼobe ndʼaiso bake; 19mpeji lenkina otangema bonʼoke; onkole ngole bosali omo oke ndʼofuto. 20Aolemala, ko aoyʼelʼise ekae. Akiʼnde ndʼesi fele, ise aoloena, ko aolookʼisei; aolikumwa ko aolokwela nkingo, ko aolosambela la baiser. 21Lolo bona aokela, Fafa, njokelʼende ole nda loola bobe, ko njokelʼobe ndʼaiso bake, ko mpeji lenkina otangema bonʼoke. 22Lolonde ise aosangela bakwalʼakae, Loyela nkaola bonkoto boleki bolotsi, ko lolotsʼende, ko lila lofete nda likata likae, ko la bikoto nda bakaka, 23nkako loyela bonʼowa ngombo owʼauta, ko loomʼoko, kela tole ko tosalangane, 24ele bonʼone okami owa jende awaki ko autʼoika, aolunga ko aotanema. Ko baangaki losana isano yʼosalangano.
25Lolo bonʼokae owa nsomi aki nda bosala wa lisala. Ko akiʼndʼoyaka, ko atutamaki lʼilombe, aoloka musique lʼisano. 26Aoletʼomo owa basali, ko aolouola ncina ea baoyi bakelama eko. 27Ende aolosangela, Bokune oke aoya, ko ise aooma ngombʼeʼauta, la ncinʼekiʼndʼoambaka la jonge likema bolo. 28Lolonde ende aoloka nkele, ko ntalanga jotswa. Ise ekae aolola ko aoloonda. 29Lolo aolambʼise, Mbulʼine iuke njokosaela o ngʼokwala, ko ncifosekola bosise boke bomoko lʼekeke nko loswele, lolo otafonka emi o lʼintanta wae ndambʼelambo ko nsalangane lʼalongʼakami. 30Lolonde aki bona one okawe oyaka, nkʼende okosilezaki eikelo eke lʼamato ba linsamba, oloomelʼende ngombo eʼauta. 31Lolo aolokela, Bona, wʼole lʼemi bikeke biuma, ko biatelo bikami biuma bile o bike. 32Lolo ekeji wae tosanʼisano ko tosalangane; la ncina wete bokune one okawe mongo awaki, ko ayoike, aolunga, ko aotanema.
હાલમાં પસંદ કરેલ:
Luka 15: LOL87
Highlight
શેર કરો
નકલ કરો
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
