Yoane 3
3
Yesu la Nikodemo
1Bontʼomo owa Bafalusi aki eko, otangema Nikodemo, engambi ea Ba-Yuda. 2Bontʼone ayaki ele Yesu lʼotso, ko aolokela, Labi, tea wae ole bolaki oyei limʼele Nzakomba; la ncina wae nkʼontʼomo okeleya ntazʼine ikela we, imola nko Nzakomba ale lʼende. 3Yesu aolamba, aolokela, Nsosolo, nsosolo, nkosangela we, ayaka bon to ntaotswaka lima loola afokuseya jena likulaka ja Nzakomba. 4Nikodemo aolokela, Akitʼonto mpaka, aotsweya ngamo? akuseya jotswa lenkina nda likunju ja nyango ekande, ko aotswa nde? 5Yesu aolamba, Nsosolo, nsosolo, nkosangela we, ayakʼonto ntaotswaka lʼasi lʼolimo, afaokuseya jotswa nda likulaka ja Nzakomba. 6Osʼootswa limʼele jonge wae jonge, ko osʼootswa limʼele Bolimo wae bolimo. 7Tokamwake ekiʼmʼokotefeelaka, Siki lootswaka lima loola. 8Impempe ilekaka wiji bolangʼiko, ko oloka lofoso jʼiko, lolo ofea limʼeki iko oyaka, ko lʼecwʼiko; ele nkʼelengʼeko la wengiʼonto ootswa lʼolimo. 9Nikodemo aolamba, ko aolokela, Baoyiʼane bakela-ma ngamo? 10Yesu aolamba, aolokela, Kamba we bolaki mongo owa Yisalaele, ko ofea baoyiʼane? 11Nsosolo, nsosolo, nkosangela, toyotefela baoyi bandea iso, ko toyosange nkʼako bakiʼsʼenaka; ko inyo lofambe nsango ekiso. 12Nga nsangelʼinyo baoyi bʼokili ko lofimeza, a emʼosangelʼinyo baoyi ba loola, lifimeza ngamo? 13Nkʼonto ondulelaki nda loola, imola nkʼende okitelaki lima loola, wae Bona owʼonto. 14Ngoki Mose osangyaka njwa ndʼetekeleke, o ngoko Bona owʼonto ifosangyema, 15la ncina wete wengiʼonto ondoimeza aate loiko ja seko.
16Ndʼewelʼeki Nzakomba okaka banto bʼokili bouma eefe elengʼene, wae akaaki Bona okande owa likinda, wete wengiʼonto ondoimeza afaofitana, lolo aate loiko ja seko. 17Eki Nzakomba ntatomaki Bona okae ndʼokili wae umbe Ba-bokili, lolo Ba-bokili baike lʼende. 18Ondimezʼende afumbame; lolo ofimeza aosilʼumbama, efʼendʼimeza nda lina ja Bona owa Nzakomba owa likinda. 19Ene wae elenge ea etenelo eʼakambo wae fole eoya ndʼokili, la wilima la fole, banto balangaki wilima, ndʼewelʼeki beketo bekiyo beki bobe. 20Wengiʼonto okelaka bobe atonaka fole, ko atayaka nda fole, nyango beketo bekae befiswa. 21Lolo bontʼokelaka nsosolo ayaka nda fole, wete belemo bekande bienya wae beokelama ele Nzakomba.
Yesu la Yoane-Wini
22Ndʼafeka, Yesu lʼakimiʼakande baoya ndʼokili wa Yudea: ko aotemʼeko lʼiyo ko aolinʼanto. 23Yoane ngoko aolinʼanto nda Ainona ntutama la Salima, eki basi bauke eko; ko banto baoya ko baolinama. 24Ndʼekekʼeko Yoane atafusama fele nda bonyolo.
25Koko bikoji bioliela ndatsa bakimi ba Yoane la bosi Yuda la ncina ea elenge ea efetswelo. 26Ko baoyʼele Yoane, baolokela, Labi, endʼoki la we wijʼa Yoladane, ko oki wʼosangaka nsango ndʼeloko ekande, bala, ayinʼanto, ko bantʼauma baoyʼelʼende. 27Yoane aolamba, akela, Bonto ntambaka yomba imola nko yokaemʼelʼende lima loola. 28Inyo mongo lolimeza wae nsangaki, Emi mpa Masiya, lolo ntomama nda joso likae. 29Ole la waji wae wengi, lilongo ja wengi ondemi ko ondokozʼende okʼesaza andokʼende lolaka ja wengi. Ndʼewelʼeko esaza ekami eokoka. 30Siki ende acwʼofula mpafula lolo emi nkokwane.
31Ende oya lima loola, alekola bauma o ndekola mongo; lolo ende ole owʼokili, ale wae owʼokili, ko atefelaka baoyi bʼokili; endʼoya lima loola, alekola bauma o ndekola. 32Bakiʼndʼenaka ko la bakiʼndʼokaka ayosange nsango ea bako; lolo nkʼonto ondamba nsango ekae. 33Endʼondambaki nsango ekae, aokemya joi wae Nzakomba ale nsosolo. 34Elʼendʼoki Nzakomba otomaka atefelaka baoyi ba Nzakomba, ele Nzakomba ntakaaka Bolimo la njeeza ea jeza. 35Ise oka Bona eefe, ko aolokaya baoyiʼauma nda likata likae. 36Endʼondimeza Bona aata loiko ja seko, lolo endʼotandola Bona afaena loiko, lolo nkele ea Nzakomba eosekwʼelʼende seko.
હાલમાં પસંદ કરેલ:
Yoane 3: LOL87
Highlight
શેર કરો
નકલ કરો
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
