Juan 9
9
Jesús msekwen zaalo tub syeg
1Gorna nzhaded Jesús tub pa, ngune xaa lo tub syeg, xaa sbaa ngol. 2Lee re nu, xaa mseed lo xaa mnabdizh:
—Maestr, ¿chozhiin syeg xaabyi ne ngol? ¿Che naka nel xuz xaa rop xnaa xaa mle jwalt o che naka nel leeka lee xaa mle jwalt?
3Jesús mkeb né:
—Nangolt xaa sbaa nel xuz xaa rop xnaa xaa mle jwalt, nixa nanakta nel lee xaa mle jwalt; sbaa nak xaa, zee lo lee xaa luu Dios cho kwaan nzho mod le Dios. 4Gorna nak zhe nkin kee be xchiin xaa kwaan mxaal na; gorna la yaal nik stub xaa nyent mod kee zhiin. 5Leezha nzoka na lo yizhyo ne, nak na xni lo yizhyo ne.
6Gorna ngulo ngunii xaa kwaane, nu mchuk xaa lo yo, nu mdexkwaa xaa ban nu mteeb xaaya zaalo syeg. 7Zee nzhé xaa lo xaa:
—Gwa, bdeeb garlo lu leen tank kwaan le Siloé. (Wdizh ne nii: “Xaa mxaal”.)
Lee syeg ngwa nu mdeeb garlo, zee nguni zaalo xaa, zee mbare xaa. 8Lee re xaa nzho gax garli xaa, nu re xaa ngune lee xaa ngunaab karda, mnabdizh xaa lo wechxinn xaa:
—¿Che nalet xaa ne nzob naab karda yizasa mbizh?
9Lak xaa mbezh:
—Lee xaaya.
Zlak xaa mbezh:
—Nalet xaaya, nixa kwenta lee xaa nzhak xaa.
Per leeka lee xaa mbezh:
—Naya.
10Zee mnabdizh re xaa lo xaa:
—¿Xomod nzho ngwii lo lu?
11Lee xaa mkeb nzhé:
—Xaa le Jesús mdexkwaa ban, nu mteeb xaaya zaalo na, nu né xaa lo na: “Gwa roo Tank Siloé nu bdeeb garlo lu”, né xaa lo na. Gorzee ngwa na, nu mteeb na garlo na nu gorzee nguni zaalo na.
12Zee mnabdizh re xaa:
—¿Ma xaa zee nal?
Nu lee xaa mkeb nzhé:
—Nanet na.
Lee re xaa fariseo nabdizh lo xaa ngok syeg
13-14Nu zhe kwaan mdexkwaa Jesús ban nu msekwen xaa zaalo syeg ngok zhe sab, mbizh kwaan nzholl re nu lo Dios. Kwaanzee mbe re xaa xaa ngokwen lo re fariseo. 15Zee lee re fariseo mnabdizh lo xaa:
—¿Xomod nzho mod nyani zaalo lu nal?
Nu lee xaa mkeb nzhé:
—Lee xaa mteeb ban zaalo na, nu mzet na garlo na kwaanzee nal nzho mod ngwii na.
16Lak xaa fariseo nzhé:
—Pa gak xaa ne tub xaa mxaal Dios, nel nangozhawt xaa zhe sab, mbizh kwaan nzholl re be lo Dios.
Per zlak xaa mbezh:
—¿Xomod nzho mod le xaa re kwaan gro ne, chelee xaa nak xaa tub xaa nzeb jwalt?
Zee snee ngok re xaa chop tant. 17Nu mbare xaa ngunabdizh xaa lo xaa ngok syeg yilo:
—¿Per cho nzak lu nak xaa msekwen zaalo lu? ¿Cho kwaan né lu?
Lee xaa mkeb nzhé:
—Na nii lee xaa nak tub xaa nzaa kwent kwaan nzhé Dios lo lee xaa.
18Per lee re xaa non namlet krer lee xaa ngok syeg yilo, axta gorna nguchezh xaa xuz xaa rop xnaa xaa, 19zee mnabdizh xaa lo xaa:
—¿Chelee xinn gu nak xaa ne? ¿Che nzho mod né gu lo nu, nen che syeg xaa ngol xaa? ¿Xomod nal, nzhola mod ngwii xaa?
20Lee xuz xaa rop xnaa xaa mkeb nzhé:
—Xgann nu nak xaa ne, nu sbaa ngol xaa; 21per nanet nu xomod nzho mod ngwii xaa nal, nixa nanet nu cho msekwen zaalo xaa. Leeka lo xaa bnabdizh gu nel grola xaa, nzho mod né xaaya lo gu.
22Sbaa nzhé xuz xaa rop xnaa xaa nel nzheb xaa ne xaa re xaa non lo re xaa Israel, nel myaan re xaa koo xaa xaa lo re xaa nkasa nseed xtizh Dios, xaa kwaan yé lee Jesús nak Xaa Mxaal Dios Nabeyy. 23Kwaanzee nzhé xuz xaa rop xnaa xaa: “Bnabdizh gu lo xaa, grola xaa”.
24Lee re xaa non mbare mrezh xaa kwaan nak syeg yilo, nu nzhé xaa lo xaa:
—Né lo nu kwaan wli delant lo Dios. Nel ne re nu lee xaa zee nak tub xaa nzeb jwalt.
25Lee xaa mkeb nzhé:
—Nanet na che nak xaa tub xaa nzeb jwalt, o nanakt xaa tub xaa nzeb jwalt. Per kwaan ne na nak, nanyanit zaalo na yilo, per nal nyanilaya.
26Zee mbare re xaa ngunabdizh lo xaa:
—¿Cho kwaan mle xaa lu? ¿Xomod mle xaa zee nguni zaalo lu nal?
27Lee xaa mkeb nzhé:
—Nguniila naya lo gu, per lee gu nanlet krera. ¿Chozhiin nzheklara gu zere naya stub welt? ¿O che noka re gu nzhekla reke tich xaa?
28Zee lee re xaa mzelo myech lo xaa, nu nzhé xaa lo xaa:
—Lu nreke tich xaabyi ba, per lee re nu nreke tich Ches, 29nel ne re nu lee Dios ngunii lo Ches; per lee xaa ba nixa nanet nu pa naz nze xaa.
30Lee xaa mkeb nzhé:
—¿Xomod nak kwaane? ¿Chozhiin nanet re gu pa naz nze xaa, nel lee xaa msekwen garlo na? 31Nel ne re be nanzhont Dios xtizh xaa kwaan nzeb jwalt; nebse nzhon Dios xtizh re xaa kwaan ngwii lo xaa nu nle kwaan nzhekla xaa. 32Nik tub welt zer zaa xaa kwent cheen tub syeg ngol nu nyanila zaalo xaa. 33Nu chelee xaa ne nanzet kwent cheen Dios, nyent mod le xaa tub kwaan gro.
34Zee nzhé re xaa lo xaa:
—¡Lu nak tub xinn xto xaa! ¿Chozhiin nzhekla lu luu lu xana kwent wen lo nu?
Nu mloo xaa xaa pa nseed re xaa xtizh Dios.
Xaa nak syeg lo re xcheen Dios
35Jesús mbin lee re fariseo mloo xaa ngok syeg pa nseed re nu xtizh Dios; nu gorna mzhaal xaa xaa mnabdizh xaa lo xaa:
—¿Che ngwii lu lo Xaa Mzhin Ngok Myet?
36Lee xaa nzhé:
—Né lo na, xana xaa zee, zee wii na lo xaa.
37Jesús mkeb nzhé:
—Ngunela lu lo xaa, nel na nak xaa, xaa kawdizh kwaan lu.
38Zee lee xaabyi zee mkichxub lo Jesús, nu nzhé lo xaa:
—Xaa Nabeyy, ngwii na lo lu.
39Zee nzhé Jesús lo xaa:
—Na nyal yizhyo ne zee naab na kwent; lee re syeg yani garlo nu lee re xaa nyani garlo gak syeg.
40Lak fariseo nzo kwaan lee xaa, nu gorna mbin xaa kwaane mnabdizh xaa:
—¿Napa noka nu nak syeg?
41Jesús mkeb nzhé:
—Chol nak gu syeg, nankanot gu kulp cheen re jwalt cheen gu. Per nel né gu nyani garlo gu, nzhap gu kulp cheen re jwalt cheen gu.
હાલમાં પસંદ કરેલ:
Juan 9: zpo
Highlight
શેર કરો
નકલ કરો
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
