Juan 8
8
Ngwnaa kwaan nchaal stub xaabyi
1Per lee Jesús nya naz yek yi Olib. 2Nu stub mbizh, gorna mkaxni yizhyo mbare xaa naz roo yidoo stub welt. Lee re myet mbii gax lo xaa nu lee xaa mzob nu mzelo mseed xaa re xaa.
3Zee lee re maestr, xaa nlu xtizh Dios, nu re fariseo nzhano tub ngwnaa, me nguga kachaal kwaan stub xaabyi, nu mzo xaa me xsaww lo re xaa nzhi baa, 4zee nzhé xaa lo Jesús:
—Maestr, lee ngwnaa ne nguga kachaal kwaan stub xaabyi. 5Lee lo xley be kwaan mzaa Ches lo re xey be, xaa yilo, nzhé nzhaal zaake be tub ngwnaa snee nle axta yilo gut be me. ¿Lee luya, cho kwaan né lu?
6Mnabdizh re xaa kwaane, zee kiil xaa Jesús, nu snee yizhal xaa tub kwaan gaazh xaa tich xaa. Per lee Jesús mkichyek nu mzelo mkee kwaan kwen yaa lo yo. 7Nu lee re xaa seetaka kanabdizh, zee mzoli Jesús nu nzhé xaa lo re xaa:
—Rese gu, xaa zer le nik tub kwaan nawent, kee ke yilotlaka yenn me.
8Nu mkichyek xaa nu mzelo xaa mkee xaa lo yo stub welt. 9Gorna mbin re xaa kwaane, tubga xaa tubga xaa mzelo nya, nu yilotlaka re xaa gol mroo. Gorna ngulo nya re xaa nebse Jesús rop ngwnaa zee mlake, 10nguxso xaa nu mnabdizh xaa lo me:
—¿Ma re me? ¿Che nik tub me nangunaabt kwent lo lu?
11Lee ngwnaa mkeb lo xaa, nzhé:
—Nik tub meya, Me Nabeyy.
Jesús nzhé lo me:
—Nixa na, nanaabt kwent lo lu; nal zyaa nu naletra lu kwaan nawent.
Jesús nak xni yizhyo
12Stub welt Jesús ngunii lo re myet nu nzhé xaa:
—Lee na nak kwenta xni yizhyo; loka xaa kwaan reke tich na, nkano xaa xni kwaan nzaa yalnaban, nu nazet xaa naz lo yalnakaw.
13Lee re fariseo nzhé lo xaa:
—Leeka kwent cheen lu kazaa lu; nanont kwent ba.
14Lee Jesús mkeb nzhé:
—Non kwent cheen na, nixa leeka na nzaya. Nel ne na pa naz nzhal na nu pa naz nya na; per lee re gu nanet pa naza. 15Lee re gu naab kwent mod mbezh re myet. Lee na nanaabt kwent lo re xaa; 16per chelee na naab na kwent, zee naka tub kwaan nali, nel nanaabt techo na kwent, sinka noka Xuz na, xaa mxaal na, naab kwent kwaan na. 17Lee lo ley cheen be nzhé, chelee chop testig nii tubka kwaan, non kwaan nii xaa. 18Wena, leeka na nak tub testig kwent cheen na, nu lee Xuz na, xaa mxaal na, nak stub testig.
19Zee mnabdizh re xaa:
—¿Ma xuz lu?
Jesús mkeb nzhé:
—Lee re gu nanlabeyyt na nixa Xuz na, chol nlabeyy gu na, noka nlabeyy gu Xuz na.
20Jesús nzhé re kwaane leezha kaseed xaa re xaa lo lach roo yidoo, paro nzhib alkansi, pa ngo xaa gon leen. Per nik tub xaa namzent xaa, nel zer zhin gor cheen xaa.
“Pa nya na, nyent mod ya re gu”
21Jesús mbare nzhé lo re xaa:
—Lee na nya, nu kwaan re gu na, per yet re gu lo jwalt cheen gu. Lee pa nya na nyent mod ya re gu.
22Kwaanzee lee re xaa nzhé:
—¿Che kale xaa xgab gut xaa xaa, zee né xaa nyent mod ya be pa nya xaa?
23Jesús nzhé lo re xaa:
—Re gu nak xaa yizhyo ne, per nanakt na tub xaa yizhyo ne, lee na nzhal naz yiba. 24Kwaanzee nii na lo gu, yet gu lo re jwalt cheen gu, nel chelee gu nanzakt gu lee na nak Xaa Mxaal Dios Nabeyy, yet gu lo re jwalt cheen gu.
25Zee mnabdizh re xaa lo xaa:
—¿Cho nak lu?
Jesús mkeb nzhé:
—Axta yilo nii na cho nak na. 26Nu nzho zyen doo kwaan nzho mod naab na kwent lo gu; per lee xaa mxaal na nii kwaan wli, nu nebse re kwaan nguné xaa lo na, yé na lo re myet yizhyo.
27Per lee re xaa namzeent kazaa xaa kwent cheen Xuz xaa. 28Kwaanzee nzhé xaa lo re xaa:
—Gorna kee re gu na lo krus, Xaa Mzhin Ngok Myet, gorzee ne re gu cho nak na, nu nanlet na kwaan nzhekla na; nebse nii na kwaan mseed Xuz na na. 29Nel lee xaa kwaan mxaal na nzo kwaan na; lee xaa namlat techo na, nel tubka nle na kwaan nyula xaa.
30Gorna nzhé Jesús kwaane lo re xaa, zyen doo xaa mzelo ngwii lo xaa mod Xaa Mxaal Dios Nabeyy.
Xaa wlipa nak dii cheen Abraham
31Lee Jesús nzhé lo re myet, xaa mwii lo xaa:
—Chelee re gu zob gu xtizh na, wlipa nak gu tub xaa nseed lo na; 32labeyy gu re kwaan wli, nu re kwaan wli le zee gak gu mod tub xaa mla.
33Lee re xaa mkeb nzhé:
—Lee re nu nak dii cheen Abraham, nu nik tub welt zer gak nu mos cheen tub xaa; ¿chozhiin né lu lo nu, gak nu mod tub xaa mla?
34Jesús nzhé:
—Wlipa na nii na lo re gu, xaa nle jwalt nak mos cheen re kwaan nawent. 35Lee tub mos nambazt tira garli xaa nabeyy lo xaa, per lee xgann xaa tira nzho garli xaa. 36Kwaanzee chelee xgann Dios le zee gak gu mod tub xaa mla, zeesi wlipa nak gu xaa mla. 37Nela na lee gu nak dii cheen Abraham; per nzhekla gu gut gu na, nel nanzheklat gu zob gu xtizh na. 38Na nii kwaan mlu lo na leezha mzo na kwaan Xuz na, nu sbaaka lee re gu nle re kwaan nguné xuz gu lo gu.
39Lee re xaa nzhé:
—¡Lee nu nak dii cheen Abraham!
Per lee Jesús mkeb lo re xaa nzhé:
—Chol nak gu dii cheen Abraham, zle gu kwaan mle xaa. 40Per lee re gu nixa nii na lo gu kwaan wli, kwaan mseed Dios na, nzhekla gu gut gu na. ¡Tub kwaan snee nik tub welt namlet Abraham! 41Lee re gu nle kwaan nle xuz gu.
Lee re xaa nzhé:
—¡Lee re nu nanakt xinn xto xaa; nkano nu tubka xuz nu, xaa nak Dios!
42Jesús mkeb nzhé:
—Chol wli Dios nak xuz gu, telisa nkela gu na, nel na nzhal naz lo Dios, lee na nanzhalt nel nzhekla na, lee na nzhal nel Dios mxaal na. 43¿Chozhiin nyent mod la yek gu kwaan nzhekla na nii na? Nel nanzheklat gu gon gu kwaan nii na. 44Lee Maxuu nak mod xuz re gu; nu lee re gu nak xaa xaa, nu nle gu kwaan nzhekla xaa. Lee Maxuu nak tub xaa nzhut myet axta yilo. Nangwiit xaa lo kwaan wli nel nik tub kwaan wli nyent lextoo xaa. Leezha nii xaa kwaan nawlit, nii xaaya mod nak xaa; nel lee xaa nak xaa nkade, nu lee xaa nak xuz re kwaan nawlit. 45Per nel na nii kwaan wli zee nanlet gu krer xtizh na. 46¿Cho tub gu nzho mod né lee na mle tub kwaan nawent? Nu cheleeya nii na kwaan wli, ¿chozhiin nanlet gu krer xtizh na? 47Xaa nak xaa Dios nkenzha xtizh Dios; per lee re gu namkayaat wdizh lo Dios, naka nel nanakt gu xaa xaa.
Crist, xaa mxaal Dios, nzhola yilo ke Abraham
48Zee lee re xaa nzhé:
—Wen nii nu, leezha nii nu lee lu nak tub xaa Samaria nu nzho mbi mal lextoo lu.
49Jesús mkeb nzhé:
—Nankanot na nik tub mbi mal lextoo na. Lee kwaan nle na nak ngwii na respet lo Xuz na; per lee re gu nangwiit gu respet lo na. 50Nu na nankwaant zee wii gu respet lo na, per nzho tub xaa nzhekla wii re xaa respet lo na, nu xaa ba nak xaa naab kwent. 51Wlipa na nii na, loka xaa kwaan nzhon kwaan nii na, nayeta xaa.
52Lee re xaa mkeb nzhé:
—Nalsi, ne nu wlipa nzho mbi mal lextoo lu. Abraham nu rese xaa mzaa kwent kwaan nzhé Dios lo lee xaa yilo ngut, nu lee lu né: “Loka xaa kwaan gon xtizh na nayeta xaa”. 53¿O che nonra lu ke xey be Abraham, xaa yilo? Lee xaa ngut nu noka re xaa mzaa kwent kwaan nzhé Dios lo lee xaa yilo ngut. ¿Cho nzak lu nak lu?
54Jesús mkeb nzhé:
—Cheleeya leeka na le zee wii xaa respet lo na, nanonta. Per lee xaa kwaan nle zee wii xaa respet lo na nak Xuz na, leeka xaa kwaan mbezh re gu nak Xdios gu. 55Per nanlabeyyt re gu xaa, per na nlabeyy xaa. Nu chol nii na nanlabeyyt na xaa, nak na mod tub xaa nkade, mod re gu. Per wli nlabeyy na xaa, nu nzhon na xtizh xaa. 56Lee Abraham, xey re be, nyakdoola xaa ne xaa na re mbizh nal; nu ngune xaa lo na, nu nyakdoola xaa.
57Lee re xaa nzhé lo Jesús:
—¡Zeeraka yo lu choobchii liin, nu né lu ngune lu lo Abraham!
58Jesús mkeb nzhé:
—¡Wlipa na nii na, lee na nzhoola leezha zeeraka yo Abraham!
59Zee lee re xaa mzen ke kee yenn xaa, per Jesús mkaxlaan nu mroo lach roo yidoo.
હાલમાં પસંદ કરેલ:
Juan 8: zpo
Highlight
શેર કરો
નકલ કરો
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
