Juan 12

Tub ngwnaa nchub anseyt kwaan chul nzebech yek Jesús

(Mt. 26:6-13; Mr. 14:3-9)

1Xop mbizh nzho jwalt la yalni cheen Paskwa, leezha mbid Jesús yezh Betania pa nzho Lach, xaa mseban xaa. 2Nu baa mle xaa tub yalni cheen Jesús; Mart ngo kwaan leen yann, nu lee Lach kayaw kwaan lee xaa. 3Mari mbidno rol litr perfum kwaan chul nzebech cheen tub yeey kwaan le nardo, kwaan non doo, nu mchub meya nii Jesús nu msekwizh meya kwaan yich yek me. Nu dubse leen yoo mzebech chul doo. 4Zee lee Judas Iscariote, tub xaa lo re nu, xaa mseed lo Jesús, ngulola mle xaa xgab zaa xaa Jesús lo re xaa nayii ne Jesús. Nu nzhé xaa:

5—¿Chozhiin namtot me kwaane tub lal demi kwaan nle tub xaa gan kee xaa zhiin tub liin, zee zaa beya lo re xaa prob?

6Per nixa snee nzhé Judas per nanakta nel nkela xaa re xaa prob, nzhé xaaya nel nak xaa tub xaa nlewann, nu nel lee xaa nkanap bools cheen re xdemi nu, xaa Jesús, nu nlewann xaa rese demi kwaan nla. 7Nu Jesús nzhé:

—Laa le meya, nel cho na mlochaw meya, zee chul nzebech cho na gorna kaach xaa na. 8Lee re xaa prob tubka nzo lo re gu, per na nazot tubka lo re gu.

9Zyen xaa lazh nu mbin lee Jesús nzo yezh Betania, nu ngwa xaa baa, zee ne xaa lo Jesús nu lo Lach, xaa mroban. 10Zee lee re ngwleyy non myaan noka Lach gut xaa, 11nel kwent cheen Lach, zyen xaa lazh nu mlaa re ngwleyy nu mzelo xaa ngwii lo Jesús.

Jesús nzeeb Jerusalén

(Mt. 21:1-11; Mr. 11:1-11; Lc. 19:28-40)

12Lee stub mbizh mbin re xaa lee Jesús zhin yezh Jerusalén. Zyen doo xaa ngwa Jerusalén, kwent cheen yalni cheen Paskwa, 13zee mchoog re xaa lag yagyin nu mroo re xaa leen yezh zee kayaa xaa Jesús, zee nzhé re xaa dublegan:

—¡Chul doo! ¡Goll be lo xaa nze kwaan yalnabeyy cheen Xaa Nabeyy! ¡Goll be lo xaa nak Rey cheen be, xaa Israel!

14Jesús ngune lo tub burr yeen nu mzob xaa tich ma; zee gaka modxa nkee lo Xkyech Dios:

15Nazhebt gu xaa yezh Sión.

Wii, lee Rey cheen gu nze

nzob tich tub burr yeen. [Zac. 9:9]

16Gorzee lee re nu, xaa mseed lo xaa, namzeent re kwaan kaded; per gwluzh gorna ngulo mbare Jesús naz yiba, zee mselazh nu re kwaane, kwaan nzaa Xkyech Dios kwent cheen xaa.

17Lee re xaa mzo kwaan Jesús leezha mrezh xaa Lach leen baa, nu mseban xaa xaa, re xaa ne mzaa kwent re kwaan ngune xaa ngok. 18Kwaanzee, lee re myet mroo mzhaal kwaan Jesús, nel mbin re xaa re kwaan gro kwaan mle xaa. 19Per lee re fariseo mbezh lo wechxinn:

—¿Che ngwii gu? ¿Cho gan le re be? ¡Rese myet nzhake tich xaa ba!

Lak xaa nanakta xaa Israel nkwaan Jesús

20Lo re myet, xaa ngwayoll lo Dios Jerusalén, ngu lak xaa nanakt xaa Israel. 21Lee re xaa ne mbii lo Lip, xaa nak yezh Betsaida, tub yezh cheen Galilea, nu mnabdizh xaa lo xaa, nzhé xaa:

—Nzhekla nu ne nu lo Jesús.

22Lip ngwa nzhéya lo Ndres, zee rop xaa ngwayéya lo Jesús.

23Zee nzhé Jesús lo xaa:

—Mzhinla gor lee Dios luu lee Xgann xaa non doo nak. 24Wlipa na nii na lo gu, chelee tub nzhobxtil nalat lo yo nu nayebt xaba, nazaata xle; per cheleeya laya lo yo nu yeb xaba, zeesi zaaya zyen doo nzhobxtil. 25Lee xaa nkela yalnaban cheen lux xaa yalnaban cheen xaa; per lee xaa nankelat yalnaban cheen xaa lo yizhyo ne, le xaa gan yalnaban cheen xaa kwaan tira naluxt. 26Chelee tub xaa nzhekla kee zhiin lo na, reke xaa tich na; nu loka pa zo na, baa zo xaa kwaan nkee zhiin lo na. Chelee tub xaa kee zhiin lo na, lee Xuz na le non xaa.

Jesús nzaa kwent lee xaa yet

27’¡Nales doo nzhak lextoo na nal gorne! Nu nanet na cho kwaan nii na. Nzho mod nii na: “Xuz, nalat lu deed na bid ne”. ¡Per kwaane deed na, zee nzhal na! 28“Xuz na, ble non le lu”.

Zee ngu tub bos naz yiba kwaan nzhé:

—Mle nonla naya, nu le non naya stub welt.

29Nu mkenzha re myet nzhi baa kwaane, zee lak xaa nzhé:

—Ngwzi ngoch.

Per zlak xaa nzhé:

—Tub mandad cheen Dios ngunii lo xaa.

30Jesús nzhé lo re xaa:

—Nanakta kwent cheen na zee ngunii xaaya, sinka ngunii xaaya kwent cheen re gu. 31Nal nak gor naab xaa kwent lo re myet yizhyo ne, nal nak gor koo xaa xaa nabeyy yizhyo ne. 32Per gorna kee xaa na lo krus, leeka na le zee rese myet yiid lo na.

33Snee mzaa xaa kwent xomod yet xaa. 34Lee re myet mkeb lo xaa nzhé:

—Lo ley cheen Dios nlu lee Xaa Xaal Dios Nabeyy tubka nzo. ¿Xomod nak kwaan nii lu, lee Xaa Mzhin Ngok Myet nkin kee lo krus? ¿Cho nak Xaa Mzhin Ngok Myet, xaa nzaa lu kwent?

35Jesús nzhé:

—Nzoka xni lo gu nal, per naxchetra zoya. Bze gu nalsi nkee xni, zee nalat yalnakaw lo gu mod tub kwaan nankambazt gu; nel lee xaa nze lo yalnakaw nanet xaa pa naz nzha xaa. 36Bwii gu lo xni nal, nel nzokaya lo gu, zee gak gu xinn xaa nak xni.

Gorna ngulo nzhé Jesús re kwaane, nya xaa nu mkaxlaan xaa lo re myet.

Namkayaat re xaa Israel Jesús

37Nu nixa mle Jesús zyen doo kwaan gro doo delant lo re xaa, per nangwiit re xaa lo xaa; 38nel snee zee mbarlo kwaan mkee Chay, xaa mzaa kwent kwaan nzhé Dios lo lee xaa yilo, leezha mkee xaa:

Xaa Nabeyy, namkayaat xaa re wdizh kwaan nzaa nu kwent,

nixa nle lu re kwaan gro doo lo xaa. [Is. 53:1]

39Kwaanzee namwiit xaa lo xaa, nel noka mkee Chay:

40Nu mod xaa nanyenit lo nzhak xaa,

zee nyent mod gon xaaya,

zee nyent mod wii xaa loya,

zee nyent mod laya lextoo xaa,

kwaane nle zee nambaret xaa lo na

zee nasekwent na xaa. [Is. 6:10]

41Chay nzhé re kwaane, nel ngune xaa lo yalnabeyy cheen Jesús, zee mzaa xaa kwent cheen Jesús.

42Per nixa sneeya, zyen xaa lazh nu, xaa non, mzelo ngwii lo Jesús, per nzheb xaa yé xaaya, nel nzheb xaa ne xaa re fariseo, napaka goo xaa xaa pa nseed re nu xtizh Dios. 43Nel mas nyula re xaa kwi wen xaa kwaan myet ke kwaan Dios.

Jesús nii xtizh Dios

44Jesús ngunii dublegan nzhé:

—Loka xaa nzhon kwaan nii na, nanzhont xaa nebse kwaan nii na sinka noka nzhon xaa kwaan nii Xuz na, xaa mxaal na. 45Nu loka xaa nlu na lo, noka nlu xaa mxaal na lo xaa. 46Na nak kwenta xni, nu myal na yizhyo ne zee wii re xaa lo na, zee nalaket xaa lo yalnakaw. 47Per lee xaa kwaan mbin xtizh na, nu nanlet kwaan nii na, nanaabt na kwent lo xaa; nel lee na namyalt naab kwent lo re myet, sinka lee na myal koo re myet lo yalgut. 48Lee xaa nankayaat na nu nanlet re kwaan nii na, leeka re kwaan ngunii na naab kwent lo xaa mbizh gwluzhtlaka. 49Nel nanguniit na kwaan nzhekla na; sinka lee na ngunii kwaan kwaan mnabeyy Xuz na na, xaa mxaal na. 50Nu ne na lee kwaan mnabeyy Xuz na nak, zee le re xaa gan yalnaban kwaan tira. Kwaanzee lee kwaan nii na, nii naya mod nguné Xuz na lo na.

હાલમાં પસંદ કરેલ:

Juan 12: zpo

Highlight

શેર કરો

નકલ કરો