DEDI 17

Na kàri tanda pa-njanjingu-ya

1Ba hiwa kambulu hiwa mbua ndau-naka na lurina i Àmbaràmu, i MIRI na-paitangu wikina lai nyuna, hi napanii-nya, “Nyungga Ala Mahupu-mbihaka. Karadaku-wa lai Nyungga, dàngu wa mànu-nyawa na pambuha-nggu. 2Napa Nyungga ku-jorutu-ya na pa-njanjingu-nggu dàngu nyumu, dàngu kuwua padanggau wàla wuamu,” wànanya. 3Hàla maràbaku-nanyaka i Àmbaràmu, tunaka nu hi napanii i Ala, 4-5“Yiana-yaka na pa-njanjingu na patura-nggu dàngu nyumu: Ku-panjanjingu Nyungga ba nyumuka napa boku la mangilu-na na banjaru dangu. Jia-duyaka nàhu na tamumu nda Àmbaràmu-ayapa tàka Ambarahàmu#Ambarahàmu; Na tamu yiana ba ronguya hamana na kareuku hilu Imbarani, “kawunga boku banjaru dangu,” wàna.-yaka. 6Napa Nyungga kuwua padanggau ana umbuku-mu, welingu la hongada nyuda napa dadangu da ma-hanganji. Da wàla wuamu napa ba kanjupu danguda hi lupa nadedi-ha banjaru dangu.

7Napa Nyungga ku-palundu-nya na panjanji-nggu lai nyumu dàngu la wàla wuamu, ha-ndindiku ha-ndalaru, dàngu na pa-njanjingu nuna na-padaingu lundu nu - nu. Napa Nyungga Ala-mungga dàngu Alada da wàla wua-mungga.

8Napa Nyungga kuwua-nggau nyumu dàngu da wàla wuamu na tana yiana, nàhu na ngia pa-ngiangu-mu ba tau tàkakau. Nggubulu-na na tana Kanaàngu napa manguda da ana umbuku-munyaka lundu nu - nu, dàngu Nyungga napa Ala-danggaka,” wàna.

9I Ala nahili paniinya i Ambarahàmu, “Nyumumbu màta kau tuturu-nya na pa-njanjingu yiana, nyumu hamanai da wàla wua-muka. 10Nyumu dàngu mbuu ndàbada da wàla wuamu da mini lupangu-ma ka dakàri. 11-12Piti welingu nàhu nyumu màta kau kàriha nimbihu-da da ana rara mini jàka walu mbua lodu-daka ngalada padedi, jia-mbuha da tau ata da madedi la umamu, jàka ndia da tau pakeimu. Na kàri nuna jia-yaka na tanda pa-njanjingu-nggu Nyungga dàngu nyumu. 13Nimbihu-na na tau màta ka kàriya, dàngu nuna na tanda, jia-yaka na tanda paita wàngu mata na ma-paloha-nya na pa-njanjingu-nggu dàngu nyumu ba ma-padaingu lundu nu - nuya. 14Nimbihu-na na mini na manda kàri nda pahilu diha-ayapa ba anggota banjaru-nggunya, nadu ba nda nakata undunya nuna na pa-njanjingu,” wàna.

15Tunaka nu i Ala napanii-nya i Ambarahàmu, “Nyumu i Harai àmbu hili wàmu-dunyapa na papaha-mu; piti welingu nàhu i Hara wàmunya na tamuna. 16Napa Nyungga ku-pakanyuru-nya tàka nyuna napa na-paanangu haàtu anakeda mini, na pawua-nggunggau nyumu napa. Langatàka napa Nyungga ku-pakanyuru-nya i Hara, tàka nyuna napa jia-yaka na àpu la ma-wungangu-da da banjaru dangu. Welingu la wàla wuana ngeru ningu napa hanganji - hanganji,” wànanya.

17Ka maràbaku-nanyaka i Ambarahàmu, na nyuna nariki ba na-payili na etina, “Nggiki peku-naka na haàtu na tau mini na mambàda hangahu ndau-naka na lurina hi na-ngalangu-biapa anana? Nggiki pekuna i Hara ba na-paana na mambàda hiwa kambulu mbua ndauna na lurina?” wàna pa-pangàda-na la eti. 18Hàla panii-nanyaka lai Ala, “Nahàmu-pa ka i Ihimailu bia na ma-kangeha-nja da pa-bànjalu-nggu,” wàna.

19Tàka nahema i Ala, “Ndia-a. I Hara na papaha-mu napa na-paanangu haàtu anakeda mini dàngu màta nyumu i Ihàku#Ihàku; Na tamu yiana la hilu Imbarani, “nariki,” wàna. ka wàmunya na tamuna. Nyungga duku ku-tuturu-ma napa la pa-njanjingu-nggu dàngu nuna na anakeda dàngu da wàla wuana lundu nu - nu. Na pa-njanjingu lundu nu - nuya. 20Ba tuna, Nyungga ku-kataku-mbuya na pakarai-mu na ngerana i Ihimailu. Jia-duya napa nyuna ku-pakanyuru-manya dàngu kuwua-nya wàla wuana madangu. Nyuna napa boku la mangilu-da da tau hakambulu madua ina ama kabihu, dàngu da wàla wuana napa ku-panjadi-ha banjaru bokulu. 21Na nyuna na pa-njanjingu-nggu napa ku-jorutu-ya dàngu i Ihàku, na anamu na pa-paana-na i Hara, la ndaungu na manàmu-nya, ràkangu jia-mayai la rehi hama tuna nàhu,” wàna. 22Ba nahàla-ka papanii tuna nu, i Ala dunjaku-nanyaka i Ambarahàmu.

23La lodu nunama, i Ambarahàmu ba na-karadaku-nya i Ala dàngu hi nakàri-ya i Ihimailu na anana, dàngu mbuu ndàbana na tau mini la kuru umana, jia-mbuha da tau ata da madedi la umana hamanai da pakeina. 24I Ambarahàmu mbàda hiwa kambulu hiwa mbua ndau-naka ba kàriya 25tàka i Ihimailu na anana, hakambulu tailu mbua ndau-naka na lurina. 26Nyuda pakàri parànja-manja la hau lodu, 27angu-mada dàngu mbuu ndàbada da atana i Ambarahàmu.

હાલમાં પસંદ કરેલ:

DEDI 17: KAM

Highlight

શેર કરો

નકલ કરો