Genesi 21
21
Guvelegwa gwa Isaki
1 Pfhumu Nungungulu a di ta holela Sara, kha nga a nga ganelago, gambe a mu girede esi a nga mu tumbisago. 2#Wona gambe: Hebh 11:11. Sara a di khura mimba a velega gyanana nya gikhwathana ga Abrahama a nga bani a gumbide, matshiguni yale Nungungulu a nga bani na ma vegiside. 3Abrahama a di riya lina nya gupwani khu Isaki, gyanana gegi a nga velegedwago khu Sara. 4#Wona gambe: Gen 17:12; Mith 7:8. Abrahama a di hanisa wugwera gyanana gyaye Isaki, gikhati gi nga tshanganisago livbandre na mararu matshigu, kha nga idzo a nga leletedwago khidzo khu Pfhumu Nungungulu. 5Abrahama a diri ni lizana (100) myaga gikhati gi velegidwego gyanana gyaye, Isaki.
6Sara a di khuye: “Nungungulu a nyi ningide mahego#21:6 Lina nya gupwani Isaki la gu tshamusela gupwani mahego., vatshavbo va na dzitigo va na hegelela gumogo ni eni.”
7A di ganela gambe, khuye: “Khu mani alakanya gukhuye Abrahama a na tshuka a embedwa gupwani Sara a na mamisa sanana! Kholu nyi mu velegede gyanana muwukhosaneni gwaye.”
Agari mugiwulani
8Gyanana gi di dandra gi lumudwa. Abrahama a di gira buzo nya wukhongolo ngudzu litshigu a nga lumudwago Isaki. 9Avbo Sara a nga wona nya gukhuye gyanana gya Abrahama a nga velegedwago khu Agari, nyamayi nya Mugipiti, gi ngu hagana gumogo ni Isaki, 10#Wona gambe: Gal 4:29-30. A di embela Abrahama, khuye: “Tutumisa githumi gegi ni gyanana gyaye, kholu gyanana gya githumi kha gi na nga khala muhodzi nya thomba gumogo ni gyanana gyangu Isaki.”
11Magana yaya ma di swihadza ngudzu Abrahama kholu Ismayeli nuye a diri gyanana gyaye. 12#Wona gambe: Rom 9:7; Hebh 11:18. Aholu Nungungulu a di mu embela, khuye: “U nga garadzegi khu kotani nya gyanana ni githumi gyago. Gira satshavbo esi Sara a gu embelago; kholu livelego li na gu wusago lina lago kala gupindruga khu Isaki 13Aholu khavbo ga gyanana gya khumbi, nyi na wusa gambe litigo nya likhongolo, kholu khwa livelego lago.”
14Abrahama a di wuga ni dzimindru ngudzu a dzega gibaba ni kanvu nya mati a ninga Agari; a di mu velegisa gyanana hwamboni a mu vbangana a hongola. Agari a di duga a legalega giwulani gya Bherisebha. 15Gikhati ma vbedego mati gikanvwanani, Agari a di dzega gyanana a gi vega mutsani nya simbo, 16uye aya khala phuvbo, pfhuka nya guningane uwo nya giholoma gya gu khwandrwa khu wulaho. A di gu ganela khu monyoni gwaye, khuye: “Kha nyi vbweti gu wona gyanana gyangu na gi gufa.” Na khade mbeli gwaye, gyanana gi di khusa lito gi lila. #21:16 Vambe valovi vari, khavo: Agari a diya khala khu phuvbo a phela gu lila.
17Nungungulu a di pwa khu ndzadzini gulila nya gyanana, ngilozi ya Nungungulu yi di rana Agari, khiyo: “Ginani u gu nagyo, Agari? U nga thavi, kholu Nungungulu pwide lito nya gyanana wulangani gi guromo avbo. 18Khusa gyanana, gi wugarele gwadi, kholu khu igyo, nyi na wusa litigo nya likhongolo.”
19Nungungulu a di tula maho Agari, uye a di wona nambo. A diya tadza kanvu khu mati a ninga gyanana gi sela.
20Nungungulu a diri gumogo ni gyanana. Igyo gi di dandra gi ya vbaha giwulani ga Parani, a khala mwama nya gugire ni guthumisa wulaho. 21Uye a diya vbaha giwulani ga Parani, mayi waye a diya mu dzegela nyamayi nya Mugipiti.#21:21 Vambe, khavo: A diya mu dzegela nyamayi tigoni ga Egipito.
Abrahama a ngu gira gidzumeledzwano ni Abhimeleki
22 # Wona gambe: Gen 26:26. Matshigu yale, Abhimeleki a dita ni Fikoli, muthangeli nya dzinyimbi, ata embela Abrahama, khuye: “Nungungulu a ngu gu kategisa ga satshavbo u girago. 23Olu nyi sambanyele avba khu Nungungulu gukhuwe gima khu na nga nyi pfhadza eni, sanana sangu, ambari ni valongo vangu, ni gukhuwe u na gola litigo leli u dzudego umo kha nga muwuyi, kha nga idzo eni nyi gu hakhidego nyi gu gola khidzo.” 24Abrahama a di hakha, khuye: “Ina eni nyi ngu sambanya!”
25Abrahama a di kawuka Abhimeleki khu kotani nya nambo wu nga wandrwago khu tshivba khu sithumi sa Abhimeleki. 26Khavbo avbo, Abhimeleki a di hakha, khuye: “Eni kha nyi muti khu mani a giridego isoso. Uwe gima khwa nga nyi tivisa mahungu yoyo; nya gu phela muhuno olu gu gupwa nu gu ganela isoso.” 27Abrahama a di dzega dzinvuta ni dzimombe a ninga Abhimeleki, va vavili va di gira gidzumeledzwano. 28Aholu Abrahama a di kasa livbandre na dzimbili dzinvuta nya tshambi. 29Abhimeleki a di mu wudzisa, khuye: “Sa gu tshamusela ginani dzinvuta dzodzo nya livbandre na dzimbili u dzi kasidego phuvbo?”
30Uye a di hakha, khuye: “Gu vbweta gukheni u hakhe khu mandzani gwangu edzi nya livbandre na dzimbili dzinvuta gasi dzi khala wufakazi nya gukheni, kheni nyi nga polago nambo yoyu.” 31Khu kota nya isoso, wulanga wule wu di ranwa gupwani Bherisebha#21:31 Bherisebha khu Gihebheru guranwa gupwani nambo nya gisambanyo., kholu vbale, va vavili va di girelana gisambanyo. 32Va di hunga kharati gidzumeledzwano gya Bherisebha. Khu vbale, Abhimeleki ni Fikoli va di phara ndzila va bwelela tigoni ga Vafilisitiya. 33Abrahama a di yala ngindru Bherisebha, a rana avbo Pfhumu Nungungulu nya Gupindruge. 34Abrahama a di luvela matshigu nya gulaphe ngudzu tigoni ga Vafilisitiya.
હાલમાં પસંદ કરેલ:
Genesi 21: BGE2014
Highlight
શેર કરો
નકલ કરો
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.