Genesi 18
18
Nungungulu gumogo ni dzingilozi dzimbili va ngu dzi wonegisa ga Abrahama
1 Pfhumu Nungungulu a di dzi wonegisa avbo ga Abrahama vbafuvbi ni miguhu ya Mambre, na khade mwanyani nya tshatsha waye, ni vbakari nya mihani. 2#Wona gambe: Hebh 13:2. Na khuside maho a di wona madhota mararu na ma emide vbafuvbi gwaye. Avbo a nga ma wona, a di khuga vbamwanyatunu nya tshatsha waye a tutuma a va khinga aya khidzima vbavbatshi, 3a ganela, khuye: “Pfhumu yangu, nya gu bani nyi mane wuhigo mahoni gwago, nyi ngu gu lomba, U nga vbindri nyamba bela ga githumi gyago. 4Nyi na rumela gu reswe mati madugwana mu ta hambani mawundru, mu hefemula mutsani nya simbo yoyu. 5Nyi naya dzega gibaba gidugwana, gasi mu kodze gu mana tshivba nya gugimbile ndzila yanu nya gulaphe, kholu mu vbindride khu ga githumi gyanu.”
Madhota ma di hakha, khayo: “Gira kha nga idzo u ganedego.”
6Abrahama a di vbiredza gu bela tshatshani gwaye aya ganela ni Sara, a mu embela, khuye: “Vbiredza u baga sipimo siraru nya wuguvbi u suga u gira sibaba.”
7Abrahama a di tutuma a hongola phandroni aya hatha gimombyana nya gyadi nya guene a ninga githumi a gi dongisela khu guvbiredza. 8Abrahama a di ya dzega matega ni mahwe, a resa gambe gimombyana gi nga dongisedwago. A di vega satshavbo mbeli ga madhota; uye a gu ema vbafuvbi gwawe, vbavbatshi nya simbo. Avo va di hodza.
9Va di mu wudzisa, khavo: “Womo evbini, mwangadzi wago Sara?” Uye a di hakha, khuye: “Womo tshatshani.”
10 # Wona gambe: Rom 9:9. Moyo nya avo a di engedza, khuye: “Mwakani, nyi na wuya gambe ndrangani gwago, mwangadzi wago Sara a na bani nari ni gyanana.” Sara a di yingisela satshavbo, khu hwane nya lidimba nya tshatsha. 11Wonani, Abrahama ni Sara va di gumbide ngudzu, Sara a di hegiside gu wona migima yi wonwago khu vanyamayi. 12#Wona gambe: 1 Ped 3:6. Sara a di hega khu monyoni gwaye, a ganela, khuye: “Olu nyi gumbidego eni, ni pfhumu yangu niyo yi gumbide, ina nyi nga na gupwa gambe gunengela, gani?”
13Aholu Pfhumu Nungungulu a di embela Abrahama, khuye: Khu ginani Sara a hegago, a ganela, khuye: “Ina lisine, nyi na dzi kodza kamwe gu velega gyanana, olu nyi gumbidego, gani?” 14#Wona gambe: Luk 1:37.Ina gyomo gilo a gi tandregago Pfhumu Nungungulu, gani? Khu matshigu nya nga aya, mwaga wutago, nyi na wuya gambe khavba, Sara a na bani nari ni gyanana nya gikhwathana.
15Sara a di ganedza, khuye: “Eni kha nya hega.” A di ganela kharato kholu a di tade khu hwanga; aholu uye a di mu hakha, khuye: “Khidzo, u hegide.”
Nungungulu a ngu tivisa gumbembiswa ga Sodhoma ni Ghomora
16Madhota ma di khuga ma bela ndzilani nya guhongole Sodhoma. Abrahama a di gimbila navo a va bangaladza. 17Pfhumu Nungungulu a di ganela khu monyoni gwaye, khuye: “Nyi na sihela Abrahama esi nyi vbwetago guya gira, gani? 18Olu Abrahama a na khalago nyapandre nya lihundzu nya likhongolo nya tshivba, khavbo gwaye ma na kategiswago mahundzu yatshavbo nya vathu va mafuni, gani? 19Kholu nyi mu hathide gasi a laye sanana saye ni linyumba laye gu landrisa ndzila ya Pfhumu Nungungulu, khu gu gira gululama ni lisine; khu magirelo yoyo, Pfhumu Nungungulu a na tadzisa gitumbiso gyaye ga Abrahama.”
20Khavbo avbo, Pfhumu Nungungulu a di ganela, khuye: “Huwa nya guthuledze Sodhoma ni Ghomora yikhongolo ngudzu! Gighoho gyawe gi lemede ngudzu! 21Nyi na tshiga nyi yati lisine, mwendro huwa yi vbohidego dzindzeveni khiyo kamwe va giridego. Nyi na ya liti lisine.”
22Madhota yale ma di pfhurara ma bela ndzilani ma gu hongola Sodhoma. Pfhumu Nungungulu a di nga emide vbafuvbi ga Abrahama. 23Abrahama a di hidzimela ga Pfhumu aya mu wudzisa, khuye: “Ina u na mbembisa idzosaye, va nya gululama gumogo ni sighohi, gani? 24A gu dzina saye vomo livbandre magumi vathu nya gululame dhoropani. U na va mbembisa kamwe, gani? Kha wu na tsetselela litigo lolo khu kotani nya avo nya livbandre magumi vathu nya gululame va vbanyago umo, gani? 25Ahihi, u nga alakanyi gu gira silo nya nga isoso; gu songa u mbembisa va nya gululama gumogo ni sighohi, muthu nya gululame ni gighohi u va gira idzosaye! Ni vbadugwana, u nga giri kharato! Ina mulamuli nya litigo latshavbo a na sindrwa khu gu lamula, gani?”
26 Pfhumu Nungungulu a di mu hakha, khuye: “Nya guya mana vathu nya livbandre magumi nya gululame dhoropani ga Sodhoma, nyi na tsetselela litigo latshavbo khu kotani yawe.”
27Aholu, Abrahama a di engedza gambe gu lomba, khuye: “Nyi na tiya gu ganela ni Pfhumu yangu, eni nyi gu si wa gilo, nyi gu kudzudzwane ni nguma basi. 28Ahati va gu kenelela livbandre vathu avbo nya livbandre magumi nya vathu nya gululame. U na mbembisa lidhoropa latshavbo khu kotani nya gukenelele livbandre basi, gani?” Pfhumu Nungungulu a di hakha, khuye: “Kha nyi na mbembisa lidhoropa nya guya mana umo magumana na livbandre vathu nya gululame.”
29Abrahama a di engedza a ganela gambe, khuye: “Ahati wa guya mana basi magumana?”
Pfhumu a di hakha, khuye: “Kha nyi na li mbembisa khu kotani nya avo nya magumana.”
30Abrahama a di engedza a ganela gambe, khuye: “Pfhumu yangu, u nga gorogi nya gu engedza gambe gu lomba; ahati ga guya manega basi magumararu vathu nya gululame?”
Pfhumu a di hakha, khuye: “Kha nyi na li mbembisa nya guya mana avo nya magumararu vathu.”
31Abrahama a di ganela nyaluphye, khuye: “Nyi na tiya nyi ganela ni Pfhumu yangu. Ahati wa guya mana basi magumavili vathu nya gululame?”
Pfhumu a di hakha, khuye: “Kha nyi na mbembisa lidhoropa khu kotani nya avo nya magumavili.”
32Abrahama a di ganela gambe, khuye: “Pfhumu yangu, u na nyi divalela, nyi na ganela gambe gumogo basi: Ahati wa guya mana likhumi vathu nya gululame?”
Pfhumu a di hakha, khuye: “Kha nyi na mbembisa lidhoropa khu kotani nya avo nya likhumi.”
33 Pfhumu Nungungulu na vbedzide gu ganela ni Abrahama, a di hongola. Abrahama a di bwelela wulanga waye.
હાલમાં પસંદ કરેલ:
Genesi 18: BGE2014
Highlight
શેર કરો
નકલ કરો
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.