MATIUS 12
12
Kakina hal᷊i u l᷊ou ngu Sabati
(Mrk. 2:23-28; Luk. 6:1-5)
1 #
Ul. 23:25
Pia su silou ngu Sabati, su tempong I Yesus nusumahe su anseru gandung, manga tumatuhu-E nanita nanipo wua nge, bou e'e nikangi sire watu u seng nahutung. 2Suapang nikawua ngu tau Farisi, i sire nangul᷊i si Yesus, “Tuhunge te manga tumatuhu-U nul᷊umawang atorang u agama ngi kite nukoa ko nilarang su l᷊ou ngu Sabati.”
3 #
1Sam. 21:1-6
I Yesus nusumimbahi, “I kumu mang mborong tanubasa bou hal᷊i ko nikoa i Daud su tempo ngi sie dingang u taumatange nahutung? 4#Im. 24:9I Sie nusumu su Wal᷊e-Ngu Mawu; boe e'e nukumang boroti ko l᷊inau nisumba su Mawu Ruata. Boko mutuhu atorang u agama ngi kite, i sie dingang u l᷊ai taumatange, ta wotonge kumang boroti e'e – kitangu manga imam botonge. 5#Bil. 28:9-10Arako i kumu mang mborong tanubasa su l᷊al᷊ungu Torati Musa himoneu sintinia l᷊ou ngu Sabati manga imam ko kapuhal᷊ie su Wal᷊e-Ngu Mawu, nul᷊umawang atorang u l᷊ou ngu Sabati, Kateho mang tanipunsal᷊a? 6Putuhung ko apang Daku niul᷊i i'i; si i mborong pia ko nangilebe l᷊abo bou Wal᷊e-Ngu Mawu. 7#Hos. 6:6; Mat. 9:13Su l᷊al᷊ungu Buki Susi kawawohe: Daku i kao, ko pukakindaghi wal᷊inge we binatang sasumba. Kiko i kumu tinga-tingari makahingang wisara e'e, nal᷊ahe i kumu tamupunsal᷊a ngu taumata ko takoae sal᷊ange. 8Watu u Ahusu Taumata mangawasa l᷊ou ngu Sabati.”
Taumata l᷊imange simbuka ko pepa
(Mrk. 3:1-6; Luk. 6:6-11)
9I Yesus nanintang u tampa e'e, bou e'e nakoa sarang wal᷊e pukakal᷊iomanengang. 10Su se'e pia tau l᷊imange simbuka ko pepa. Pirang katau taumata ko mundea sal᷊a-Ngi Yesus, nukina si Sie, “Apa wotonge mupakaul᷊engu taumata su l᷊ou ngu Sabati?”
11 #
Luk. 14:5
I Yesus nusumimbahi, “Kiko pia singkatau bou tal᷊oara i kumu pia domba nge simbau, bou e'e su l᷊ou ngu Sabati domba e'e nanawo su l᷊ohange ko mal᷊al᷊ung; apa tataghuang u domba e'e tamusasahawu mangaung domba nge bou l᷊al᷊ungu l᷊ohang e e'e? 12Taumata nangilembo mahariga bou domba! Boko kere'e, takoae sal᷊ange mutul᷊ungu taumata su l᷊ou ngu Sabati.” 13Bou e'e I Yesus nangul᷊i su tau l᷊imange ko pepa e'e, “Ul᷊uhite l᷊imangu.”
Tau e'e nangul᷊uhi l᷊imange, dang l᷊imange e'e natoghasi kere l᷊imange simbuka. 14Arawe i sire tau Farisi nanintangu wal᷊e pukakal᷊iomanengang e'e, bou e'e nusingkanaung mamate si Yesus.
Raroi ko nipile ngu Mawu Ruata
15I Yesus matitong i sire tau Farisi pia naung i sire ko dal᷊ai si Sie. I Sie natamai bou tampa e'e dang maul᷊i taumata nutumuhu si Sie. Bou e'e i Sie nupakaul᷊engu kaul᷊i u masasaki. 16Kateho i Sie nangul᷊i si sire kumbahang muwawukengu hal᷊i i Sie e'e su taumata kowal᷊inge. 17Ual᷊ingu e'e nariadai apang ko nihabaru Mawu Ruata bou mohongi Nabi Yesaya.
18 #
Yes. 42:1-4
“Ii raroi-Ku ko daku nipile,
Taumata ko Daku i Kukindaghi dingang ko nutatahino su naung-Ku.
Roh-Ku sarung Daku i onggo si Sie,
Kal᷊aadili-Ku sarung i habar-E su kaul᷊i u kawanua.
19I Sie sarung ta murarendehi arako muheang,
arako mamohang su manga ral᷊eng ko l᷊abo.
20Kiaeng ko nawae sarung ta ibareng-E
sol᷊o ko kate l᷊ido e henange sarung ta ipateng-E.
I Sie sarung manahusu sarang kal᷊aadili kareakeng;
21Kaul᷊iu kawanua muharapi si Sie.”
I Yesus dingang u Be'elzebul
(Mrk. 3:20-30; Luk. 11:14-23)
22Bou e'e pia singkatau ko wuta mborong l᷊ai bobo, nikasukangu roh ko dal᷊ai niwawa sarang koa I Yesus. I Yesus nupakaul᷊e ngu tau e'e sarang i sie nakapudidato dingang u nakawua. 23Kaul᷊iu taumata naherang dingang u nangul᷊i, “Botonge mariadi i Sie i'i Ahusi Daud ko nipudiandi e'e?”
24 #
Mat. 9:34, 10:25 Suapang tau Farisi nakaringihi e'e, i sire nusumimbahi, “Taumata i'i makauseri roh ko dal᷊ai ual᷊ingu Be'elzebul pangaha u roh ko dal᷊ai nunggile kawasa si Sie.”
25I Yesus matitong naung u tau Farisi e'e. Kute i Sie nangul᷊i si sire: “Boko simbau negara mapahia pirang kamonang ko kapurarokae, negara e'e tamataeri. Dang soa simbau arako singgetang mutalei l᷊au musudu simbau dingang u ko wal᷊inge sarung maghoghahi. 26Kere'e l᷊ai su kararatuangu setang; boko komol᷊ang simbau manguseri komol᷊ang ko wal᷊inge, kute kararatuangu setang napahia dang sarung maghoghahi. 27I kumu mangul᷊i Ia manguseri roh ko dal᷊ai ual᷊ingu kawasangu Be'elzebul. Boko kere'e dingang u kawasangi sai manga ringangu manguseri roh ko dal᷊ai. Manga ringangu sisane nupakal᷊ahe i kumu nunsal᷊a! 28Arawe Ia manguseri roh ko dal᷊ai bou kawasangu Roku Mawu Ruata. Dang e'e mangal᷊enge Mawu seng manita nuparenta su tal᷊oara i kumu.
29Kirapa taumata makasu su wal᷊e ngu taumata ko matoghasi guna ngu mamal᷊aho rarotonge, boko i sie tamuhapusi horo taumata ko matoghasi e'e? Mbuhue i sie botonge makapamal᷊aho rarotonge.
30 #
Mrk. 9:40
Taumata ko ta manimbuka si Sia, seng nal᷊ahe mundoka si Sia. Dang taumata ko tamusumbala si Sia, nal᷊ahe sarung munggoghahi hal᷊i-Ku! 31Ual᷊ingu e'e, katitongte, boko taumata mubardosa dingang mangul᷊i u l᷊ahinakang,#12:31: mangul᷊i u l᷊ahinakang: arako mangul᷊i u l᷊ahinakang su saruang u Mawu Ruata. i sie mang mborong kaonggol᷊angu ampunge! Arawe boko i sai muhinakang Roh u Mawu Ruata, i sie seng takaampungang! 32#Luk. 12:10Boko taumata mudidato ngu haghi-haghi mundoka Ahusu Taumata, i sie mborong kaonggol᷊angu ampunge, arawe boko i sie muhinakang Roh u Mawu Ruata, i sie seng ta kaampungang, maning su orasi i'i e kere'e l᷊ai su l᷊ou panginsuenge!”
Kau dingang u Wuange
(Luk. 6:43-45)
33 #
Mat. 7:20; Luk. 6:44 “Tadeau makahombang wuange ko mapia, kaunge mambeng matuwo. Boko kaunge ta matuwo, wuange l᷊ai ko dal᷊ai. Tatuwongu kau mapia arako dal᷊ai i kakiral᷊a bou wuange. 34#Mat. 3:7, 15:18, 23:33; Luk. 3:7, 6:45I kumu taumata ko dal᷊ai, kirapa i kumu makaul᷊i manga hal᷊i ko mapia boko i kumu ko dal᷊ai? Apang ko i ul᷊i u mohong, e'e suwuwang bou l᷊al᷊ungu naung! 35Taumata ko mapia mupasuwangu didato bou hal᷊i ko mapia, watu u i sie napene u ko mapia. Arawe taumata ko dal᷊ai, mupasuwang u didato bou hal᷊i ko dal᷊ai, watu u i sie napene u ko dal᷊ai.
36Putinaungte; su L᷊ou Kiamati, singkatau-singkatau mambeng sadia sumimbahi suapang didato ngu ko takoae mangal᷊enge. 37Watu u didato ngu sisane sarung mamonesi, i kau nunsal᷊a arako ta.”
Tau Farisi nundo si Yesus pukoa tatia ko makal᷊aherang
(Mrk. 8:11-12; Luk. 11:29-32)
38 #
Mat. 16:1; Mrk. 8:11; Luk. 11:16 Bou e'e pirang katau meteru agama dingang u tau Farisi nangul᷊i, “Tuang i kami mo mutuhung si Tuang mukoa tatia ko makal᷊aherang.”
39 #
Mat. 16:4; Mrk. 8:12 “Wal᷊inge gampang kadal᷊aie dingang u kadurhaka ngu taumata orasi i'i!” nisimbah I Yesus. “I kumu mundo Ia pukoa tatia ko makal᷊aherang? I kumu ta ionggol᷊ang u tatia ko makal᷊aherang, sul᷊ikuru tatia ko makal᷊aherang i Nabi Yunus. 40#Yun. 1:17I Yunus nutatahang tilu l᷊ou tilu huwi su l᷊al᷊ung tiang u kina ko l᷊abo. Kere'e l᷊ai Ahusu Taumata sarung mutatahang tilu l᷊ou tilu huwi su l᷊al᷊ung u tana. 41#Yun. 3:5Su L᷊ou Kiamati kawanua ngu Ninewe sarung muwangung dingang u taumata su orasi i'i dang mangantang si sire. Watu u taumatang u Ninewe seng nutobati bou dosa ngi sire, su tempo ngi Yunus nunasi si sire. Arawe su si'i su orasi i'i mborong pia ko nangilebe l᷊abo boi Yunus! 42#1Raj. 10:1-10; 2Taw. 9:1-12Su L᷊ou Kiamati, Ratu bou soa su simbukangu Timuhi sarung muwangung dingang u taumata su orasi i'i dang mangantang si sire. Watu u mundea tadeau sarang makaringihi tintiro ngi Salomo ko pande e'e, Ratu rimal᷊eng kere'e karaunge bou pondol᷊u dunia. Arawe si'i su orasi i'i pia ko nangilebe l᷊abo boi Salomo!”
Pusasul᷊engu roh ko dal᷊ai
(Luk. 11:24-26)
43“Boko roh ko dal᷊ai manintangu singkatau, roh e'e rumal᷊eng mul᷊iku apang tampa ko mamara, mundea tampa pangindul᷊enge, kateho i sie mang tanakarea. 44Ual᷊ingu e'e, i sie nangul᷊i, ia sau musul᷊e sarang wal᷊e ko daku nitintang. Su tempo ngi sie nasongo su se'e, wal᷊e e'e seng takoae taunge, mabursi dang mal᷊aatori. 45Bou e'e i sie tamai numbawa si sire pitu roh ko wal᷊inge ko mborong nangilebe dal᷊aie boi sie. Bou e'e i sire nusumu su taumata e'e, dang natana su se'e. Panginsuenge taumata e'e nakoa nangilebe kadal᷊aie bou horo. E'e l᷊ai sarung mariadi su taumata ko dal᷊ai su orasi i'i.”
Mama-Ngi Yesus dingang u ana u singkatau-Nge
(Mrk. 3:31-35; Luk. 8:19-21)
46Su tempo ngi Yesus mborong kapudidatonge dingang u taumata maul᷊i, nasongo i mama-Nge dingang u manga ana u singkatau-Nge. I sire kararisi su l᷊ikure apiru kapundeae si Sie tadeau makapudidato dingang-E. 47Singkatau bou taumata ko maul᷊i e'e nangul᷊i si Yesus, “Tuang, i mama dingang u ana u singkatau ngi Tuang pai su l᷊ikure. I sire mo mudidato dingang I Tuang.”#12:47: Su l᷊al᷊ung u pirambau wohe horo takoae ayeti kapaupul᷊opitunge.
48Bou e'e I Yesus nusumimbahi, “Ko i sai imama-Ku? I sai l᷊ai ana u singkatau-Ku?” 49I Sie nanibo su manga tumatuhu-E dingang nangul᷊i, “Ii i mama-Ku dang ana u singkatau-Ku. 50Taumata ko mukoa kao i Yamang-Ku su sorga, i sie e'e ana u singkatau-Ku koese, ana u singkatau-Ku kowawine, dang i mama-Ku.”
હાલમાં પસંદ કરેલ:
MATIUS 12: LAISXN
Highlight
શેર કરો
નકલ કરો
Want to have your highlights saved across all your devices? Sign up or sign in
2014 Indonesian Bible Society (Lembaga Alkitab Indonesia)
