YOHANES 6
6
Yesus Ara Nimi Gong Gwaneng Debelegosuk Yuba
(Mat. 14:13-21; Mrk. 6:30-44; Luk. 9:10-17)
1Ban unumokaʾ seleb dara, Yesus ara onoʾ saaboka Galilea mek ara neik mek bok, Tiberias aboka si silimek mek gwanek sam eer bilimok. 2Yesus adya yokaʾ-yokaʾ lok soʾ beknaʾ nauba unuwoka nimi hwelesukaʾ anyek, eiyiboka nimi nauba dirigoka dobdongoro balamek. 3Dara, mok soko meinik sam alja yuba doboka diriga ban nang eblaboka welewoka bukumek. 4Wera ban salek era, Yahudi nang welenaʾ orok roti gwaneng den salek perob sum oka dangamok.
5Ban sum enyek ara sekoka gokgobok sam nidyaʾ keeb ganagok dara, nimi nauba alak sam yalamekaʾ eiyimok. Dara Pilipus bek, ”Ban nimi gong danara denaʾ denok aboka, nunda har sam denaʾ dekel binimab do?” aboka heibok. (6Yesus ban Pilipus bek wenhyokaʾ ara, gwaneng dekoka ununaʾ ara Yesus orowek ella ulumok bok anasa, Pilipus benyek sene hekaʾ hublul do? aboka lebok.) 7Dara, Pilipus bedya, ”Roti gwaneng ara walaʾ linbadya rupiah wa weboka deknaʾ ara, ban nimi gong danera mekaʾ dijaʾ anaba ellaʾ gigiwolulaʾ gomaʾ,” aboka lebok. 8Wera dara, onoʾ yok yuba doboka Yesus ak diriga balamoknya Simon Petrus alja wes Andreas bedya, 9”Anyagan me hnon roti gwanenga lambadya, hadyaʾ penya bomla bok, wera ban nimi gong mandebnaʾ adya, nidyaʾ gigiwolulaʾ gomaʾ,” aboka lebok.
10Dara, Yesus adya alja yuba doboka diriga ban nang ek, ”Ban nimi nauba buknok aboka orugolulum,” hyok. Dara, anyagan ara holaʾ nauba ulumokaʾ adya, nimi nidyaʾ holaʾ dubuk bukumek bok, nengmab ok einimek ara denga salyaʾ yubaʾ linbadya nang bukumek. 11Nimi nidyaʾ bukumekaʾ seleb dara, Yesus ara roti gwaneng doboka, Imik Neyung molowoka, nimi nidyaʾ bukumek nang ak soboka bokoka elekdo yibilisuk. Anasonya neikik, hadyaʾ anaba alja unu denaʾ nauba senemekaʾ sunuwoka elegesuk. 12Seleb pe debgogomek dara, Yesus adya alja diriga ban nang ek, ”Ban nidyaʾ siknaʾ ara mekaʾ me anaba salyaʾ bobogeijik aboka, neikaʾ ak pe mamagolulum,” hyok. 13Dara sikda, nimi nauba lambadya roti gwaneng deregoka dara, boklomeknya nera serrem obadya mamagol bindiwoka deknemek.
14Nimi nauba Yesus adya unumok anyek, hyak lokso unumok eiyimek dara, ”Lok so beknaʾ ununumnaʾ lebnelanya sokok an yanamla, youmaʾ wenyalamekaʾ ara wera alan,” hyek. 15Wenyaboka, sikda nimi gong dara, Yesus ak dukaʾ lolowoka sikja senenggom dubnya sekiyiwanobaʾ aboka yanamakaʾ eiyimok dara, Yesus ara anyagan loboka albeyok gokoka meinik sam bilimok.
Yesus Ara Mek Dub Pik Yan Ingibgiga Yalamok Yuba
(Mat. 14:22-33; Mrk. 6:45-52)
16Ban sum enyek sin dangoka inilyabok dara, Yesus yuba doboka diriga ban nang era, Galilea mek gemek yingginiboka, 17mek eklaʾ bunaʾ ak bukumek. Dara, sikda Kapernaum heik binobaʾ aboka garal balamek. Ban salek era seleb inimok bok, Yesus ara sik dam ak berra yanggumok. 18Dara balamek bok, senenggom kaboʾ doroklomok bok adya, mek yaknaʾ neboka eillilimok. 19Sikda hyak mok mek hnoumunga onoʾ pukgiga balamek jok, saaboka keemek enyek, Yesus ara mek dub pik yan inibgiga mek ekla bunaʾ berem yalamokaʾ eiyimek. Dara, sikda hyak ganya loka dasuk. 20Bok, Yesus ara sikenek, ”Nera na anasa, ugunda lok ganya bonggom mem,” hyok. 21Dara, alja yuba doboka diriga ban nang edya perob aboka Yesus ak mek ekla bunaʾ ak yalom aboka unul yabek sab-sab, sikja mek ekla bunaʾ era seleb mek gemek lanal bilimok.
Nimi Yesus Ak Elemek Yuba
22Ampum so maboka gwelegok dara, or anyagan anam ulumek nim ara, mek ekla bunaʾ ara hnonok ulumok bok, Yesus ara buknenggumookanya, alja yuba doboka diriga ban nang ok bukoka seleb bilimekaʾ eiyimek. 23Bok, onoʾ yok mek ekla bunaʾ hnon Tiberias heikek ab yeiniboka Yesus gwanenga soboka Imik Neyung ak molomok enyek demek oulyang berem mal yalamek. 24Dara nera, Yesus ab alja yuba doboka diriga ban nang ab, anyagan unaʾ eibnenggumek dara, nimi nauba ara mek ekla bunaʾ bukoka, Yesus ak ebgiga Kapernaum heikek bilimek.
Yesus Ara Embeng Unaʾ Gwaneng Ulumla Yuba
25Dara sikda nimi gong dara, eer bindiwoka Yesus ara mek gemek ok an ulumokaʾ eiyimek dara alak, ”Neklesilimnya o, anda hek sum ek anyagan yeilimom do?” aboka heibek. 26Yesus adya sikenek, ”Nara ugunuk dib lebsin, ugunda nak elenulumnya nenera, nadya yokaʾ-yokaʾ lok soʾ ak unulamnaʾ anyek eiyiboka dib senelumaʾ adya gomaʾ. Ugunda gwaneng deregoka pe demab senelumukanya, nak ebgiga yalanulum. 27Anasa wera, ugunda blolomla songa lelemla gwaneng emba yeiriwoka wenggom mem. Nimi nonga ganya embengaʾ nenelesil gwaneng enesa, yeiriwoka welelulum. Ban gwaneng era nimi dibaʾ me adya eleganesil. Alja neyung bedya pe unulamna aboka alak beknaʾ beiyimok anasa, alja ugunuk eleganesil,” hyok.
28Dara sikja Yesus ak, ”Wera Imik Neyung adya senelelanya nenyek webnobaʾ aboka, hekaʾ ak unuwanamab do?” hyek. 29Dara, Yesus adya sikenek ara, ”Imik Neyung adya ugunuk unuwaneseng senelamlaʾ ara, alja bokol yeilimoknya bek dib senewoka doloseng senelamla,” hyok. 30Dara sikja, ”Wera neyung o, nunda anak dib senewagenobaʾ aboka, hek lok soʾ unaʾ nu hogung ek unuwanalam do? 31#Kel. 16:4, 15; Mzm. 78:24Nunja neyung yabo Kanaan heik balamek sum era, mok dum-dumaʾ gwanenga delemek, Nera Imik Neyung adya imik heikek ab, gwaneng eleklesuk aboka, momnya dobek sok, delemek,” hyek.
32Dara Yesus adya sikenek, ”Nara ugunuk dib lebsin, Musa bedya imik heikek ab gwaneng eleganggusuk. Bok, nadyaʾ neyung bedya embengaʾ un gwaneng dibaʾ imik heikek ab eleklesil. 33Imik Neyung adya eleklesil gwaneng dibaʾ ara, imik heik ab yeiniboka soko nim ek embengaʾ unaʾ eleklesilnya bera alan,” hyok. 34Dara, sikja Yesus ak, ”Neyung o, ban roti gwaneng era, nuk sobaʾ eleklesilom,” hyek.
35Yesus adya sikenek, ”Na nong anyek nim embengaʾ ul eleksin gwaneng era alan. Heknedya nak yanamla dara, alda gwaneng oka sobaʾ unggulumnamla. Onoʾ heknedya nak dib senewanenel dara, alda mek ok unggulumnamla. 36Bok, nara ugunuk seleb wenyasisa sok, ugunda nak okoka nong eillilinulumaʾ anababya, ugunda nak dib senenggulunulum. 37Nidyaʾ Imik Neyung adya eleklenel nim era nak yanamak dara, bindowoululum aboka wekdo boboganggunusin. 38Anasa, nara Imik Neyung heik ab yinggilimsaʾ ara, nadya ganya doboka yokaʾ-yokaʾ unulununaʾ aboka yanggumsa bok, na bokol yeilinyoknya unuwosulul senelamlaʾ anyek, unulununaʾ aboka yeilimsa. 39Na imik heikek ab bokol yeilinyoknya bedya dara, nak seinilenela ara, alja nak eleklenelnya nera, ben hnonok sirik anababya weininggoka denganaʾ ara mem. Anasa, alda nidyaʾ gobdo sidyaʾ daknamla sum era, embengaʾ bukiyiwosulul, senelenel. 40Anasa wera, nadyaʾ neyung bedya alja orowek senelamlaʾ ara, nak heng eiyiboka dib senelemak nimi nidyaʾ ara, dib ulmoubnaʾ ganya dobnamak senelamla. Dara, sidyaʾ daknamla sum era, nara sikenek embengaʾ bukoka sekiyiwanesin,” hyok.
41”Nara imik heikek ab yinggilimsa embengaʾ unaʾ gwaneng era nara alan,” hyok. Anasa, sikda Yahudi nang alak wab einimek. 42Dara sikja, ”Al nong ara Yesus, aljaʾ neyung bera Yusuf. Aljaʾ genonga neyung ara nunda seleb ella ulumab bok, hekasa nara imik heikek ab yeilimsa alamla do?” alamek. 43Anasa, Yesus adya sikenek, ”Ugunda nak waboka lenenggom mem. 44Nimi ben hnonok anaba nak bokol yeilinyoknya bedya, glinaʾ orok dara, nak yanggunumso bok, sidyaʾ daknamla sum era, nak yanalanya bera embengaʾ bukoka sekiyiwanamna. 45#Yes. 54:13Ununumnaʾ lelemek nang bukuk ara, sikda nimi nidyaʾ ara, Imik Neyung adya eimik wenewanesil, aboka momnya domek. Anasa, heknedya Imik Neyung bek pe keboka, alak ab dolomla dara, alda nak or yanenel. 46Ban wenyhenya nera, nim adya hnon Imik Neyung ara laga eiyirob ak lebnenggubna. Alja bokol yeilimoknya be hnonok seleb neyung bera heng adya okoka eibok. 47Nara ugunuk dib lebsin, dib senewoka dololenya bera, seleb dib ulmoubnaʾ ganya, alja ganya lomok ulumla,” hyok.
48”Nara nim embengaʾ unaʾ eleklesin gwaneng era alan. 49Ugunja neyung yab holaʾ seknenggulumok sokok, Kanaan heikek Mesir ab balamek sum enyek, mok dum-dumaʾ gwaneng delemek bok, somogomek. 50Bok, wen lelemnaʾ ara, imik heikek ab yinggilimok gwaneng enyek, delemeija nim era, somoganggunumak. 51Imik heikek ab embengaʾ unaʾ gwaneng yinggyukaʾ ara, na nong ulumna. Anasa, heknedya ban gwanenga delenya bera, hyak sob-sobaʾ or ulmoublumnamla. Ban gwaneng era nadya nong ek lemna. Nadya nong ek, ban soko nim emba, nim embengaʾ ulunokaʾ aboka, eleganamnaʾ ak lemna,” hyok.
52Yahudi nang era, Yesus adya ban wenyalamok yuba kemek dara, sik moumen yu ganya boboka nauba wabdangoka lelemekja, ”Ban benera alja nong soub enyek nuk denokaʾ aboka hekaʾ huboka eleganesil do?” alamek. 53Wenyek Yesus adya sikenek ara, ”Ugunuk hyak dib lebsin, ugunda Imik Neyung adya bokol yeilimoknya bedya aljaʾ nong soub ab, alja eneng eb, denggulumnulum dara, embengaʾ unaʾ ugunjaʾ nong lomok sam unggulumnesil. 54Heknedya nadya nong soub ab, nadya eneng eb, delenya bera, embengaʾ unaʾ seleb ulumlakanya, sidyaʾ daknamla sum era alak nadya bukoka sekiyiwanamna. 55Nadya nong soub ara, hyak gwaneng nong dibaʾ ulumla, nadya eneng era, den mek dibaʾ ulumla. 56Heknedya nadya nong soub eb, nadya eneng eb, delemlya dara, alda nadyaʾ nong lomok sam ulumnamlakanya, nababya alja nong lomok ulumnamna,” hyok.
57”Nadyaʾ neyung be embengaʾ ululanya bedya nak bokol yeilinyok dara, nababya al adya ok ulumna. Anasonya neikik, heknedya nadya nong ak delenya bera, nadya nong adya ok ulumnamla. 58Dara, imik heikek ab uboka sokok yinggilimok gwaneng ban e. Ban gwaneng ara ugunja neyung yab edya Kanaan heikek balamek sum delemek gwaneng anaso gomaʾ. Sikda seleb demek dara, nidyaʾ somogek bok, heknedya ban lemna gwaneng denelanya bera, alda hyak dibaʾ ulmoublumnamla,” hyok. 59Yesus adya ban nidyaʾ lebokaʾ ara, Kapernaum heikek Yahudi nim edya yuba don ek ab yuba lelesuk sum enyek lebok.
Yesus Ak Ab Nauba Lo Bilimek Yuba
60Yesus adya, ban yuba nauba neklesuk sum enyek, alja lelemok yuba dobdongoro balamek nang era, ”Ban lelesil yub enera hyak gasa nong anasa, heknedya keboka dobnamsoʾ ak lelemla do?” wenyalamek. 61Yesus ara, alak yuba doro diriga ban nang era waldalamekaʾ ara ganya lomok eiyisuukanya, alja dara, ”Ban yub enedya ugunja ganya dangawom-dangawom aldalalum de? 62Wera nimi dibaʾ me nera onsok saaboka youmaʾ ulumsaʾ ak welewanyaʾ eibmun bok dara, hekaʾ hubnalum do? 63Embengaʾ ulmoubnaʾ dibaʾ ara Imik Neyung Geisinya adya eleklesil. Nimi nonga migib ara nera salyaʾ nong anasa, nadya ugunuk lelesin yub era, ganya ak anasa, sikda embengaʾ ulumak. 64Bok ugun gangganek an, nimi hnon dib senenggululum,” hyok. Ban wenhyokaʾ ara, hek nang dib senewanggunumakaʾ hnon, al nong ak obnelum aboka yuba dil binimoknya benyek hnon, orowek ella ulumokaʾ anasa, lebok. 65Onoʾ Yesus adya moruwoka, ”Nimi ben hnonok sirik anababya, nadyaʾ neyung bedya unuwolulaʾ aboka aranggululenya bera, nak sam yanggunumla, amsaʾ ara, hnon dib senenggululumaʾ anasa lemsa,” hyok.
66Ban wenhyok sum enyek moruwoka, alja lelemok yuba doro diriga ban nang nauba ara, losaaboka alak diriga banggulumek. 67Dara, Yesus adya alja obadya diriga ban nang ek, ”Ugumbabya hnon binimab senelelum de?” husuk. 68#Mat. 16:16; Mrk. 8:29; Luk. 9:20Dara, Simon Petrus bedya Yesus ak, ”Neyung o, nunda heknya ak binisibya do? Embengaʾ ulmoubnaʾ yub ara anak danyek ulumla. 69Anak danyek, Imik Neyung adya geisaʾ ak bokol yeilinjoknya ululamaʾ ara, nunda dib senewoka ella ulunjab,” hyok. 70Danyek, Yesus sikenek, ”Wei, ugunda obadya nang enera, nadya sekiyisisaʾ an anano? Bok, ugun gangganek ara, ben hnon bisaʾ me ulumla,” hyok. 71Ban wenhyoknya nera, Simon Iskariot bedya me Yudas bera, obadya nang ulumekjok, al hnonok yuba dil binimoknya benesa lemok.
હાલમાં પસંદ કરેલ:
YOHANES 6: LAINLC
Highlight
શેર કરો
નકલ કરો
Want to have your highlights saved across all your devices? Sign up or sign in
@ LAI 2000
