YOHANES 16
16
Ganya Kaboka Unululum Aboka Lebok Yuba
1”Ban nidyaʾ wenyalasin ara, ugunda solom ganya boboka lobmunuk aboka lelesin. 2Ugunuk Imik Neyung ek sam abaʾ ara, yaklemnasak. Dara, onoʾ hnon, sik unulusija nim edya dara, Imik Neyung amba nunda pe giboka unulumab senelemeija salek era, yanamla. 3Ban unuwanasakaʾ ara, sikda neyung beb nab elgom ulusakaʾ adya, ugunuk eimik unulumnasak. 4Eimik ubnamla sum era, al orowek nekesukaʾ ara, seiniwanalum aboka, ban lebsin. Men salek era, nara ugunuk neikaʾ ulumoubaʾ anasa, ban yuba neknenggusisa.
Geisinya Bedya Eimik Welemnamla Wa Yuba
5Nara wen na sokok bilom aboka bokol yeilinyoknya bek binimna. Bok, ugun gangganek ab ben hnonja, Anda hekmok balalam do aboka heibnenggunulum. 6Bok, ban nenyek ugunuk seleb lebsin adya, ugunja ganya engewoka soloma dabsil. 7Anasa, ban nidyaʾ nadya ugunuk, na imik heik binimna, ugunsamba perob dosulul amnaʾ ara, dib lebsin. Nak banaʾ orok dara, arasinya bera ugunuk yanggunumsoʾ anasa, nak binya dara, wera alda ugunuk bokol yanasin. 8Wera, Geisinya ben yalya dara, soko nim edya malya unaʾ ek hnon, pe unaʾ ak hnon, yana lelesinaʾ ak hnon, sikja seinilimakaʾ anyek, nenegom aboka, okoka neknesil. 9Nak dib senenggulunyakaʾ anasa, malya unaʾ ak meknewoka seinilimak. 10Ugunda eimik nak eibnenggununulumaʾ ak sam, nadyaʾ neyung bek binimnaʾ anasa, perobaʾ nenenaʾ ak meknewoka seinilimak. 11Sokok an dubnya bek seleb yana lelewoka igin yakaʾ alsamba seleb ulumlaʾ anasa, yana lelesinaʾ ak meknewoka seinilimak.
12Nara yok-yok yuba nauba ugunuk lebnesisinya bok, wenyek dara, ugunuk hyak igin ubnesuso. 13Bok, Imik Neyung jong ganya unaʾ ugunuk lebnesil Geisinya benyek yalya dara, alja dib yuba nidyaʾ ella danalum aboka neknesil. Alja ok yok seiniwoka ganya doboka lebnenggunulabok, alja seleb kemlyaʾ anyek, ugunuk neknesil. Nera yokaʾ-yokaʾ eimik unuwanalanya nenyek neklemnesil. 14Alja nak ab doboka, ugunuk neklemnesil adya, nadya si imik nenewanenel. 15Yokaʾ-yokaʾ nidyaʾ Imik Neyung aljinya ulumlaʾ ara, narinya nek ulumla. Ban anasa, Geisinya bedya nak ab doboka, ugunuk neklemnesilaʾ ak wenyasin,” hyok.
Ganya Okna Unaʾ Men Dangoka Ollamaknaʾ Ara Eimik Dangalamla Yuba
16”Ugunja nak eibnenggununulum salek era, mek anam ubnamlakanya, onoʾ saaboka eibnenulum salek era, mek anam ubnamla,” hyok. 17Yesus adya ban wenhyokaʾ seleb kemek dara, alak diriga ban nang edya sik moumen, ”Ugunja nak henga eibnenggununulum salek era, mek anam ubnamlakanya, onoʾ nak eibnenulum salek era mek anam ubnamla, helnya nera, hek damok nenesa lelemla do? Hnon, nadya neyung bek binimna anasa, alanya nera, hek damok emba lemla do? 18Mek anam ubnamla alamlaʾ anasa, hekaʾ ak lelemla do? Alja lelelanya nera nunda elgom ulumab bar,” aboka leldalamek. 19Yesus adya alja yuba doro diriga ban nang edya alak heibnobaʾ senemekaʾ eiyisuk dara, sikenek, ”Eibnenggununulum salek era anam ubnamlakanya, eibnenulum salek era mek anam ulumla, ananya nenesa leboka, damok eboka heiboka gangabdangdo balalum de? 20Nara ugunuk dib lebsin, Ugunda engewoka bonggeliklimnelum bok, soko ak dara, eiya hlaboka glolomnamla. Ugunuk sugunaʾ ganya bolomnulum bok, ugunja sugunaʾ ganya era eimik ei-ei ganya danamla. 21Gela hnon me bomna gel gera, beibnamla salek me juka gweklamla dara igin ululabok, seleb beibna dara, wera me ara seleb sokok an beibna senewoka, oka gwekemnaʾ ara hiliklamla. 22Wen an lebnanya nera, ugunuk neik so danamla. Wen ganya engelelum bok, nara ugunuk onoʾ eibdeibya sum era, ei-ei ganya bolomnulum. Dara, ugunja ei-ei ganya ara yok nim edya ugunja ganya ek ab salyaʾ lolowoka dobnenggunusak,” hyok.
23”Ban sum enyek, ugunja yokaʾ-yokaʾ nak molowanggununulum bok, ugunja nadya si sibuka Neyung bek nunda anyek elegeisilom aboka molowanalumnya nera nidyaʾ eleganasilaʾ ara dib lebsin. 24Ugunda wenera, nadya si sibuka yokaʾ-yokaʾ Neyung bek elegeisilom aboka molonggululum. Wenyok molowolulum. Dara, ugunuk eleganesilikanya, hyak ei-ei ganya bolomnulum,” hyok.
25”Wen ugunuk wenyalasinya nera okoka poboka, gak ara an aboka lenggulusin bok, eimik yanamla sum era, nadyaʾ neyung bek ban men lelesinya loboka, poboka laga lebnesin. 26Ban lebna sum era, ugumbeyok nadya si sibuka molowanalum. Nababya nadyaʾ neyung bek ugunsamba molowanamnaʾ ara wenyanggulumna. 27Ugunda nak alda Imik Neyung ak ab yeilimok senewoka, wanaʾ nauba ulunulumaʾ anasa, Imik Neyung adya ugunuk hnon wanaʾ ulusilekanya, alja yokaʾ-yokaʾ ugunuk eleganasil. 28Nara Imik Neyung bek abaʾ ara sokok yeilimsa. Dara, onoʾ wen saaboka sokok loboka Neyung bek binimna,” hyok.
29Dara, alja yuba doro diriga ban nang edya Yesus ak, ”Wenelesilimnya o, yokaʾ-yokaʾ nidyaʾ ara bob nenewoka lenaʾ loboka, wera poboka lelam. 30Anda yokaʾ-yokaʾ nidyaʾ ella ululamakanya, yok nim edya anak yokaʾ-yokaʾ amba leboka salyaʾ heibnenggununggeseng, ara wen ella ulenjab. Anasa, nunja dara, anda Imik Neyung ak ab yeililumaʾ ara, ban adya dib senelenjab,” hyek. 31Dara Yesus adya sikenek, ”Wera, ugunda dib senelum de? 32Ugun doluwoka bokgoknesak salek ara, eimik yanamla, hnonda al wen seleb yal. Ugunda ugunja e pik bokgokoka bindowanalumukanya, nara nabeyok lo bininulum bok, nabeyok unggulumnamna, nadyaʾ neyung beb neikaʾ alablaboka ulumnanam. 33Nadya ban orowek men ugunuk nidyaʾ laga lelesinaʾ ara, ugunda nablaboka seleb hnonok dangoka, perob ok ulululum aboka lelesin. Ugunda sokok an anam ulumun salek, yokaʾ-yokaʾ damok oka kwelemnesil bok, sokok an yokaʾ-yokaʾ damok ara, nadya seleb yu gom nenewasaʾ anasa, ugunja ganya siklewoka kaboka ulululum,” hyok.
હાલમાં પસંદ કરેલ:
YOHANES 16: LAINLC
Highlight
શેર કરો
નકલ કરો
Want to have your highlights saved across all your devices? Sign up or sign in
@ LAI 2000
