YOHANES 14
14
Yesus Adya E Solosil Yuba
1”Ugunda ganya mounduk-mounduk anggom. Imik Neyung ak dib senewomunukanya, onoʾ nak hnon dib senewonululum. 2Nadyaʾ neyung bedyaʾ heikek ara, e nauba ulumla. Anaso unggulumso dara, ugunuk wenyhenggunusisinya. Ugunsamba e sobnesinaʾ anasa, binimna. 3Dara, nara biniboka ugunsamba e seleb sobgogoweisinya dara, na ulumnaʾ ak sam ugumba ulululumaʾ aboka, nara saaboka el yeisinyekanya, na ulumnaʾ ak bo binisin. 4Na binimna pik era ugunda ella ululum,” hyok.
5Thomas bedya saaboka, ”Wenelesilimnya o, an binilamaʾ ak ara, nunda elgom ulumabaʾ anasa, hekaʾ huboka pik era ella danasibya do?” hyok. 6Yesus alak, ”Nak dara, pik ab, dib yub ab, embengaʾ unaʾ ab, ulumna. Nim ara nak pik orok dara, Neyung bek yangguneseng. 7Ugunda nak ella ulunusom dara, wera, Neyung bek ella ulumnesom. Dara wera, ugunda alak ella ululumukanya, alak seleb eiyilum,” hyok.
8Pilipus bedya, ”Wenelesilimnya o, ban Neyung bera nuk aaweisilom. Dara, anadya seleb senewanob bar,” hyok. 9Yesus adya alak, ”Pilipus o, nara ugunub sobaʾ neikaʾ ulumab bok anasa, anda nak anam elgom ulunelem de? Heknedya nak eibnelya dara, wera Neyung bek seleb eiyiledya. Anasa, hekasa Neyung bek aaweisilom alalam do? 10Nara Neyung bedya ganya lomok ulumnakanya, Neyung bera nadyaʾ ganya lomok ulunelaʾ ara dib senenggulunulum de? Nidyaʾ ugunuk lelesinaʾ ara nadya ok salyaʾ lenggulunabok, Neyung bedya nadya ganya ak sekoka, alja wa welemla. 11Nara Neyung bedya ganya ak ulumnakanya, Neyung bera nadyaʾ ganya ak ulunel wenyalamnaʾ ara, dib senewolulum. Orokaʾ anababya, nadya welemna wa nenyek sunuwoka dib senewolulum,” hyok.
12”Heknedya nak dib senewanenel dara, nadya welemsa wa nera, alba unuru welemnamla. Dara, nara Neyung bek binimnaʾ anasa, alda nauba so welemnamla asinaʾ ara, dib lemna. 13Neyung bek, me adya imik nenewolulaʾ aboka, ugunja or hekaʾ ok do nadya si sibuka mololonumun dara, unulumnesin. 14Ugunda yokaʾ-yokaʾ nidyaʾ nadya si sibuka mololonumun dara, unulumnesin,” hyok.
15”Ugunda nak wanaʾ ulunumun dara, nadya oruklesin yub ek sunuwoka unulumnulum,” hyok.
Yesus Ara Arasinya Bokol Yanasin Hyok Yuba
16”Nadyaʾ neyung bek molowanya dara, ugunuk yok arasinya eleganesil. Ugunublaboka sobaʾ ulululumaʾ aboka, ban aralemnesilnya bera dib yub ulumla Geisinya ek eleganesil. 17Soko adya, alak eilinggulumlakanya, elgom ulumlaʾ anasa, alak dobnenggunumso. Bok, alda ugunublaboka ululumukanya, onoʾ ugunja ganya lomok ulumnesilaʾ anasa, ugunja alak ella ululum. 18Nara ugunuk okna mabo geknebaʾ lobinggunusin. Onoʾ nara ugunuk samal yanasin. 19Mek anam binimnaʾ anasa, soko adya nak eibnenggununel bok, ugunda nak eillilimnenulum. Nab embengaʾ ulumnaʾ anasa, ugumbabya embengaʾ ulumnulum. 20Ban sum enyek, nara Neyung bedyaʾ nong lomok uboka, ugunda nadyaʾ nong lomok uboka, nara ugun lomok ulumnesinaʾ ara, ban sum enyek ella danalum,” hyok.
21”Heknedya nadya oruklesin yub ek salawoka unululanya bera, nak wanaʾ ulunelnya bera alan. Dara, nak wanaʾ ulunelnya bek, nadyaʾ neyung bedya alak wanaʾ ulumnamlakanya, nababya alak wanaʾ uboka nadya nong alak aawanamna,” hyok.
22Dara, Yudas Iskariot gom, yok Yudas bedya Yesus ak, ”Wenelesilimnya o, hekasa an nong ak dara, nuk aawanesilimjok, sokok ak dara, hekasa aawanggunulam do?” aboka heibok. 23Yesus adya dara, ”Ben hnon nak wanaʾ ulunelya dara, alda nadya neklesin yuba sunuwoka ulumnamla. Dara, nadyaʾ neyung bedya alak wanaʾ ulumnamlakanya, Neyung beb, nab alak yeinima dara, alab neikaʾ ulumnamab. 24Nak wanaʾ unggulunelnya bera, nadya neklesin yuba sunuwoka unggulumla. Nadya neklesinaʾ kelum yub era, narinya gom, na bokol yeilinyoknya bedya yub ek neklesin,” hyok.
25”Ban nidyaʾ ara, nab neikaʾ umab salek ok lebsin bok, 26arasinya bera, Neyung bedya nadya si pik uboka bokol yanasil Geisinya edya, yokaʾ-yokaʾ nidyaʾ ugunuk neklemnesilikanya, nara ugunuk lesisa yuba nidyaʾ bekellilimnesil. 27Ganya daboka unaʾ ara ugunuk lobonggo binisin. Narinya nenyek ugunuk elegoka lo binisin. Sokok anyeb eleklesilnya nenesoʾ ak eleganggunusin. Anasa, ugunda mounduk-mounduk aboka lok ganya bonggom,” hyok.
28”Nara binyekanya, onoʾ ugunuk saaboka yanasin amnaʾ ara, seleb kelum. Dara, nak wanaʾ ulunesom dara, nara meknya Neyung bera senenggomnya anasa, nara Neyung bek bininanya nenyek, ugunda eiya dabnesuso. 29Unuwalya sum era, ugunda dib senewolulumaʾ aboka, anam unuwanggublabok, ugunuk orowek lebsin. 30Sokok an dubnya bera, yanggan sum oka dalaʾ anasa, nara ugunublaboka nauba sabdanggunumab. Alda nablabokonya gomaʾ. 31Bok, sokok an ara, Neyung bek wanaʾ ulumnakanya, Neyung bedya orugunyoknya nok unulamnaʾ ara, ella danaseng. Anasa wera, nunda anyaganyebaʾ ara binimab,” hyok.
હાલમાં પસંદ કરેલ:
YOHANES 14: LAINLC
Highlight
શેર કરો
નકલ કરો
Want to have your highlights saved across all your devices? Sign up or sign in
@ LAI 2000
