Matius 2
2
It ap husagal inileken wolok wogoukha wene
1At Yesus iti, o propinsi Yudea etoma o ukul etaga Betlehem itaklageikhe. Itaklageikhe eta higit o etoma ap kok etagapogot Herodes iti welageikhe. Werekma, it ap inobagasiak husagal penakhe lagoukha meke aperek o mulikin dagei agarekma eloma mot-mot nen o Yerusalem wagoukha. 2Wagoukhasik, it nen, men isukha,
“Akhuni Yahudi meke inoe kok Etagapogot itaklagasik werek etnaga, o koma itaklagasik werek. Nit o mulikin dagei agarekma eloma werekma, ap kok iti itaklagama iluk, husagal ageikhe winam agama nen, at iti ninetaiken at oba hakotdiluk hogorasuogoluk husagal iti nineleken nen wolok hinok wagani ago,” iluk isukha. 3Isukhama, at kok Herodes etnogo asuk holhikhesik, at men akhuni o Yerusalem welagoukha meke emenogo men, inakmaken motok lageikhe. 4Inakmaken motok lageikhesik nen, at ap kok Herodes etnogo nen, it ap Allah iteerek inougi koktek emenogo inom, Allah ane holal waganek iteerek meke inom, opakimo natogorlogo 'bisasikhesik nen,
“At Kristus iti, hit nen, o koma itaklasigin iluk apekhe lagap,” iluk hinok waganhikhe. 5Hinok waganhikhemo, it nen,
“O Betlehem propinsi Yudea elomaat o. Eloma itaklasigin, iluk, it ap Allah ane yogeisekhe lagoukha meke ageikhe nen ekhe dogolik,
6 #
Mikha 5:2
Hit akhuni o Yudea etoma o ukul Betlehem
welagathep meke yirani! O ukul ebelake
yoma etaga kok werek korlegat he, o
Betlehem yi anek etaga dek, hemurlugat
negen, iluk usak dek. An na'buri Israel meke
ap kok meke apma dogogun iti, o ukul hit
werekma yoma hinakerlekla nenat
itaklasigin o,
iluk holak waganogo 'bisukhama werek o,” isukha. 7Isukhama, at Herodes etnogo nen, it ap inobagasiak husagal penakhe lagoukha meke inileken wolok wagoukha meke emenogo nen waisasikhesik nen limago yogeisekhe dogolik, men yogeisasikhe,
“Meranem husagal iti dukhi aga? Hutukhogon yoknitni,” iluk hinok inoba yabokane waganhikhe. 8Hinok waganhikhemo it nen,
“Itithogon,” iluk yogokhukhama, at nen he,
“Halok he, hit nen o Betlehem etoma lani o. Lalok nen, elege itaklagasik werek iti hanorogon heratno. Nen, arat herakhep halok he, yabokane an netaiken at oba hakotdiluk hogorasi lak nen yoknisitno,” iluk yogeisasikhe. 9Yogeisasikhemo inasuk holiluk nen, husagal o mo dagei agarekma etoma winam ageikhemo inileken hasukha meke etnogo alep laga korlek, oporlik inileken nen wolok lagoukha. Inileken nen wolok lagoukha, husagal etnogo elege itaklageikhesik werekma upu baga mot-mot lageikhesik nen, arat hut asi lageikhe. 10Itithogon huk ageikhemo it emenogo husagal etnogo inileken hasukhasik, inakla arleken motok agoukha. 11Inakla arleken motok agoukhasik uma ukisukha meke, elege etnogo agosa Maria agamo werekma inileken halok, initibagal yukukhogon hogorakhukha. Hogorakhe dogolik, oko kok hano meke emas inom, kemenyan kami obasi hakene iti inom, o imur apusu inom, hiselogo wogokhukha. 12Wogokhukhasik noge isinem at Allah nen,
“Hit yabokane hinapuke Herodes oba lagup o,” iluk husupi negen yogeisasikhemo ina'bi halok, holak nekalokmake nen inaila lagoukha.
Yesus itago wolok lo o Mesir lagoukha wene
13It ap husagal inileken nen wolok wagoukha meke emenogo arat lagoukhama, hibako Yusuf noge isinem malaikat Allah nen pogot oba la'i ageikhesik, a'bi baga men yogokhikhe,
“Yusuf. Hat he, elege itago iti agosa ipisagat wogosik, o Mesir etoma lo lan o. Lalok nen, etomaat dogono. Etoma werekma an nen yokhikhi halogat wetno. At ap kok Herodes etnogo nen elege itago iti wasigiluk hagariogo o,” iluk yogokhikhemo a'bi hasikhe. 14A'bi halok iluk ageikhesik nen, hibakoneat elege itago etnogo agosa ipisak wogosik o Mesir lageikhe. 15#Hosea 11:1Lageikhesik, o etoma motok welageikhe. Werek korlek, at ap kok Herodes etnogo ebe watlageikhemo nen wageikhe. Iti hagakhikhe iti, it ap Allah ane yogeisekhe lagoukha meke ageikhe nen,
“An na'but o Mesir etoma nen wisuagaluk
waisigin o,”
iluk Allah nen isikhemo holal waganogo 'bisikhe iti tak-tagat hagatlasuagaluk hagakhikhe iti o.
O Betlehem yekerugi 'bugurlagat meke inakhukha wene
16Ap kok Herodes etnogo nen it ap wene warisasikhe meke etnogo,
“Wisugun a? Dek a,” iluk, therisik welageikhe welageikhe, inebe degat nen,
“Nukhetdanha higi,” iluk akla aga apik dageisikhe. Akla aga apik dageisikhesik nen,
“Yekerugi 'bugurlagat meke o Betlehem etoma meke inom, o yoarlemake etoma meke inom, hurli ap husagal inileken nen wolok wageikhasik,
Iti hurli baga hogo, iluk hutukhogon yoknekha hurli nen, umur 2 tahun meke inom, yabokane itaklarik wageikha meke inom, elege tha'bokhogonat motok inatno,” iluk, agarumi la'isasikhe. 17Itithogon hagatlageikhe iti, at Yeremia Allah ane yogeisekhe lageikhe meke nen ekhe dogolik,
18 #
Yeremia 31:15
“O Rama nen deku makhunem ninasuk holhik,
inane naik-waik isinem ninasuk holhik,
hagakho.
At he Rahel eagei inebe dek nen inuak de kogat
aga dogolik,
Netaiken thebelusak dek. Na'it. De ago motok
dogogin,”
iluk isikhemo holal waganogo 'bisikhe meke iti tak-tagat hagatlasuagaluk hagakhukha iti.
Yesus itago wolok o Nazaret wageikhe wene
19At ap kok Herodes etnogo arat watlageikhemo, malaikat Allah nen la'i ageikhemo wageikhesik, Yusuf o Mesir etoma dogolik noge isinem hibako a'bi baga men yogokhikhe,
20“Yusuf. Hiluk asin o. Melatluk, elege itago iti agosa ipisak wogosik o akhuni Israel meke werekma lan o. Elege itago iti wasuogoluk hagakhe lageikha etnogo, ebe arat watlaga o,” iluk yogokhikhe. 21Yogokhikhemo, Yusuf nen elege itago etnogo agosa ipisak wogosik, akhuni Israel meke werekma wageikhe. 22Wageikhemo it akhuni nen,
“O Yudea etoma yabokane ap kok etaga Arkelaus iti opase Herodes obolukmo meldegama werek o,” iluk isukhama, Yusuf asuk holhikhesik nen, o etoma lausak ayuk ageikhesik werekma, at Allah nen,
“O propinsi Yudea etoma lagun o,” iluk, a'bi baga husupi yogokhikhemo, o Galilea etomaat wageikhe. 23Wageikhesik nen, o ukul etaga Nazaret iti uki ageikhesik, etomaat huk ageikhe. Itithogon hagakhikhe iti, it ap Allah ane yogeisekhe lagoukha meke nen ekhe dogolik,
“At ap etnogo ai Nazaret meke ugun o,”
iluk isukha tak-tagat hagatlageikhe iti o.
હાલમાં પસંદ કરેલ:
Matius 2: LAIDNT
Highlight
શેર કરો
નકલ કરો
Want to have your highlights saved across all your devices? Sign up or sign in
