MATIUS 9
9
Yesus, japow ipic ajaworomtewef
(Mrk. 2:1-12; Luk. 5:17-26)
1Yesus ci asawuefen. Aram e poman aojirefen. Poman aojiref masirin, e akota aotayapefen. 2Owam japow ipic tepen emcom Yesus atowocenfesen. Yesusam e ow a basicimnak aporefen. Ar masirin, atakam e japow ipic aotawefen. “Ata Jak faka. Dor e odosa akokoromosomtamamin.” Inim aeefen. 3E wun Allah Jirmec mamememtam ow masirin, bi binip aceceremfesen. “Awamec ipic Allah awcawor arawen. Inimas ar pwicak atakam awut atawma.” Inim aefesen. 4Yususam e ow bi binip aceceremfesas amsom arawen. Ar masirin, “Car ucim bi binip pwicak aceceremamokom? 5E ton atakam, ucim atakamaramnew? ‘Dor e odosa akokoromosomtamamin,’ inim atakam aranew? ‘Basitey. Oram bajarey,’ inim atakam aranew? 6E Asmat Anakat Ajaworemef Ipic, bare awames capinmi ow dosa bakokoromosomtam fakas aomomamar araman. Dor eras car aporomtamamin.” Inim aeefen. Aramat ipic masirin, atakam e japow ipic aotawefen. “Basitey! E otopen batewey! Oram cema!” Inim aeefen. 7Bare, e japow ipic asitemefen. Aram e acem ajisosefen. 8E ow arkeam inimas aporfes, aram omar aefesen. Allah, inim fakas awut, asmat ow atetamef aporfesen. Inimas ar Allah asicimfesen.
Yesus, Matius, a mamkawi jirmec ajirimef
(Mrk. 2:13-17; Luk. 5:27-32)
9Barewen. Yesus e asan aewjisosef. Ajaref ara, aramat ipic, Matius, e pemerintah uang batawanimtam cem aman emapef aporef. Yesus masirin, “Mamkawican,” inim aeef. Bare, e Matius asitef. Aram aramat ipic ajamkawief.
10Yesus e Matius cem aman, amos memen aemapef. Pemerintah uang batawanimtam kerja ow arkeam, dosa ow arkeam, aenawfes. Ar e Yesusam, e amamkawi owam, amos akac aanfes. 11Parisi owam eras aporfes. Ar masirin, jonow e Yesus mamkawi ow atowfes. “E caguru, e pemerintah uang batawanimtam kerja owam, e dosa owam, amos akac aanmes. Ucim inimaram?” Inim aefes. 12Yesusam inim atakam jen ajief. “Dam akat ow, dokter janim manim opok aemcemes. E dam pwicak ow nat, dokter janim aanimcemes. 13Alkitab atakam, ‘Dor, ow, kawey ow serow bajiom, jak aseremomamin. Do nat, ow pok dor bacatitam, jak baseremom opok.’ Inim aema. Bare. Caram baysosey, wunam e atakam, bi binip baceceremey. Dor tarowat ow bayte bapenaw opok. Dor fasi ow bayte aapenawof.” Yesus inim aeef.
Ow e amos pok bamase jonow atowfes
(Mrk. 2:18-22; Luk. 5:33-39)
14Jofay ara masirin, Yohanes mamkawi ow, Yesus aenawomfes. “Daram, e Parisi owam, bar arke amos pok amasecomom. E omamkawi ow nat, e join join amos pok aatamanmes. Ucim inimaram?” Inim aefes. 15Yesus masirin, “Ay petew ipic, e ajowow cowkon aemapmesnew, e ajowow jak pwicak open? Bare, ar jak pwicak opok. Asep jofay nat, ow, e ay petew ipic, e ajowow wasec aemtewcemes. E ajowow masirin, amos pok amasecemes.
16Ow, ay picin, tarey baju ton bakakamimapomporji opok. Ar ay picin, tarey baju ton akamimapomces, wunam e baju bwi acicikimces, e ay picin, e baju akekemtawcema. E jof terey masirin, awutnakut aotereycema. 17Owam ay anggur bwi, tarey picin bwi ese aman bowapomporji opok. Ow ay anggur bwi, tarey picin bwi ese aman aowapomces, e picin ese atereycema. E anggur bwiam aokoyameskurumcema. E picin eseam ananasiamescema. E nat, ow ay anggur bwi, ay picin ese aman aowapomcemes. Inimas ara, e bwiam, e eseam, akat aeapawarmes.” Yesus inim aeef.
Yesus cepes jamnuk ajaworomtawef
(Mrk. 5:21-43; Luk. 8:40-56)
18Yesus inim atakam e ow aotawef ara, sembahyang cem kepala ipicam aenawef. Ar aramat ipic bipu bi fop aneyjiapef. “Dopores damir jepen adamirafma. O nat, dey. E oban e cowoc dam ton batatiwey. Ar masirin, aojaworsitcema.” Inim aeef. 19Yesus masirin, asitef. Aram, e amamkawi owam, e ipic akac aamjarfes.
20Cowoc cowokam, cen es tahun dua belas ajiwar batayu opok aememef. E cowoc e Yesus bak amerjamkawiemef. Ar aramat ipic baju bip ban akurumef. 21E cowoc bi binip aceceremef. “Dor e aramat ipic baju akurumcey cowok, dam akat aememcimin.” Inim aeef. 22Yesusam asamanam ajiwomef. Ar e cowoc aporef. “Ata. Jak faka. Or asicimamenem. Inimas dam akat aememamem.” Inim aeef. Bare, e cowoc dam akat asarimememef.
23Bare. Yesus e kepala ipic cem afiwemef. Ar suling bam ow aporef. Aram ow jisuwam awut aporef. 24Aramat ipic masirin, “Car baysosey. E cowoc jiwi damir opok. Ar isi pwitamesor.” Inim aeef. E ow nat, Yesus uc aomocfes. 25Yesusam e ow arke e cem aman awarimisimef. Awarimisimef masirin, ar e cowoc jiwi kamar afiwemef. Aram e jiwi ban acapimomef. E jiwi masirin, asitef. 26E capinmi ow takas inim atakam jen ajifes.
Yesus jipic jamnuk manmok ateremtamef
27Bare. Yesus erasan aewjisosef. Ajaref ara, manmok kapi ipic jamnuk, aramat ipic fa asatamfes. Aram atakam awut atawa aefes. “Daud urpisa! Saw akat oworporcarowey!” Inim aea aefes. 28Bare, aramat ipic cem afiwef. E manmok kapi ipic jamnukam, e aramat ipic aenawomfes. Yesusam atakam e ow aotawef. “Dor e camanmok bateremtam fakas emcom. Car inim atakam basicim open?” Inim aeef. E ipic jamnuk masirin, “Tuhan. Dar inim atakam asicimamom,” inim aefes. 29Bare, Yesus ban e ow manmok atewapomef. “Car inim atakam asicimamokom. Inimas e camanmok atereyma.” Inim aeef. 30Bare, e jipic jamnuk, manmok atereyfes. Yesusam jirmec fak e ow ajirimef. “Car eras atakam kawey ow botaw arapok.” Inim aeef. 31E ow nat, ajisosfes, wunam ar Yesus atakam, e capinmi asanin asanin ow aotawfes.
Yesus okor ipic jak aman dat aotewerisimef
32E ow ajisosfes ara, wun ow, okor ipic, Yesuspu atowocenfes. Okor dat e ipic jak aman aemapawirien. Inimas e ipic okor aememawirien. 33Yesus e dat e ipic jak aman aotewerisimef. E ipic masirin, atakam afasimef. E ow arkeam junum awut aefes. “Dar a Israel capinmi inimas basam bat opokut.” Inim aefes. 34E Parisi owam atakam atawfes, “E dat kepala ipic e fakas ewamec ipic atetamama. Inimas e ipic dat aotewerisimama.” Inim aefes.
Yesus ow sawes akat aoworporef
35Bare. Yesus e kota takasam e samat takasam, ajitjaref. Ar e asanin asanin sembahyang cem aman atakam amememtama aeef. Ar e Allah Pemerintah Atakam Akat, acacapioma aeef. Aram ow cīncīn damasam, cīncīn dam kumitasam, ajaworomtawa aeef.
36E ow arke, manmok batiw ipic opok domba, inim cimin aemapfes. Aram ajurusemfes dombaam, apacayosfes dombaam, inim cimin aemapfes. Yesusam inimas aporef. Inimas ar e ow sawes akat aoworporef. 37Aramat ipic masirin, atakam e amamkawi ow aotawef. “E cesa pok eke piwi, bare awutut ara. E bakokomtaw ow nat, arke opok. 38Caram janim e cesa pok aramat ipic mamanimey. Ar ow e acesa pok eke bakokomtaw jirmec bajirimcow.” Inim aeef.
હાલમાં પસંદ કરેલ:
MATIUS 9: LAICNS
Highlight
શેર કરો
નકલ કરો
Want to have your highlights saved across all your devices? Sign up or sign in
LAI 1985
