MATIUS 4
4
Iblis, Yesus dosa bwem acajijimtawporef
(Mrk. 1:12-13; Luk. 4:1-13)
1E Roh masirin, e Yesus, cem opok asan ajisomosefen. Ar Iblis e aramat ipic dosa bwem bacajijimtawpor erasan ajisomosefen. 2Isi empat puluh ajiwar, e Yesus amos pok amaseemawirien. Ar masirin, amosto aememefen. 3E dosa bwem bacajijimtawpor ipicam, Yesus aenawomefen. “Or Allah atiwnew, awamses ek, amos baworom, jirmec ajirimey.” Inim aeefen. 4Yesus masirin, “E Alkitab atakam, ‘Asmat ow tetakay mememas, ar amos pok memen cowok arapok. Ar e Allah atakam takas ji baekurumces.’ ” Inim aeefen. 5E Iblis masirin, e aramat ipic, e Akat Kota ajisomosefen. Aram aramat ipic e Allah cem e opnakut onew pwinew atomettewapomefen. 6E Iblis masirin, “Or Allah atiwnew, or a cenes juneyey. Bare, e Alkitab atakam:
‘Allah, amalaikat, or manmok batiwem, jirmec ajirimcema. E malaikat masirin, ban or atowomcemenes. E obwey, ek bapomotasin.’
E Alkitab inim aema.” Iblis inim aeefen. 7Yesus masirin, “E Alkitab atakamam, ‘E Tuhan, or Allah ara. Oram aramat ipic bwempor arapok,’ inim aema.” Yesus inim aeefen.
8E Iblisam e aramat ipic opnakut sikon cowok atowotometefen. Ar e capinmiin capinmiin takas, e aramat ipic asarimporomtamefen. Aram e capinmi takas arakatnakutas, e aramat ipic aporomtamefen. 9Aram atakam Yesus aotawefen. “Or e dobipu bi fop aneyjiapcem, wunam dor asicimcenem, bare dor eras takas or atetamcimin.” Inim aeefen. 10E Yesus masirin, atakam Iblis aotawefen. “Iblis. Oram cey! E Alkitab atakam, ‘E Tuhan, or Allah ara. Oram aramat ipic mamsicimey. Ar cowok kerja mamemtamey.’ Inim aema.” Yesus inim aeefen.
11Bare, e Iblis, e Yesus bakan ajiosefen. Malaikat masirin, aenawfesen. Ar pok Yesus afafaytamfesen.
Yesus, Galilea capinmi ajisosef
(Mrk. 1:14-15; Luk. 4:14-15)
12Barewen. Yesus, ow e Yohanes penjara cem aman ajiwtewapomfesas, atakam jen ajiefen. Ar masirin, Galilea capinmi ajisosefen. 13Aram kota Nasaret bemapawar opoken. E nat, ar jopir kota juwas Kapernaum aemapefen. Er e Sebulon capinmiam, e Naftali capinmiam, arawen. 14Er a Allah atakam botaw ipic juwas Yesaya e atawef atakam jipu arawen:
15“E Sebulon capinmiam, e Naftali capinmiam, e jopir sotop ara. Er e Yordan jo poman ara. Er e Galilea capinmi ara.
Bare, e Galilea capinmi e Yahudi opok ow acapinmi ara.
16E jiwic aman aemapmes ow, sereas awutnakut aporcemes.
E ow e damiras capinmi aemapmes. Er jiwic asan ara. E nat, e sereas e owpu asereytepcema.”
Yesaya inim aeefen. 17E jofay ajiwar, Yesus atakam aotawawiri: “E Onam Op Pemerintah aenawcow jofay, bare sotopnakap asisienawma. Inimas car e dosaas takas bak bapayemtotorey.” Inim aeawiri.
Yesus jim bapi cescuw ow a mamkawi jirmec ajirimef
(Mrk. 1:16-20; Luk. 5:1-11)
18Barewen. Yesus e bwi juwas Galilea e jopir ajarefen. Aram jipic jamnuk aporefen. E arepwecin arewec arawen. E wun ipic juwas Simon arawen. (Aramat ipic wun juwas Petrus arawen.) Arewec masirin, juwas Andreas arawen. Ar jim bapi cescuw ow arawen. Inimas aram jim apifesen. 19Yesusam atakam e ow aotawefen. “Deyo. Mamkawicano. Dor, car, asmat ow, enam inim bapitaw, amememtamcimin.” Inim aeefen. 20Aramat owam e ajim bakan asarimjifes cowok arawen. Aram Yesus ajamkawifesen.
21Yesusam aojarefen. Ar wun ipic jamnuk aoporefen. Eram arepwecin arewec arawen. Er Yakobusam, arewec Yohanesam, arawen. Er Sebedeus atiperes arawen. Aram, aricipic Sebedeusam, e ajim jof bakekem, ci aman aemapfesen. Yesusam e ipic jamnuk ajateefen. 22E ow masirin, e aciam, e aricipicam, bakan asarimjiosfesen. Aram Yesus ajamkawifesen.
Yesus acacapiomef. Aram dam ow ajaworomtawef
(Luk. 6:17-19)
23Barewen. Aramat ipic e Galilea capinmi asanin asanin ajitjarefen. Ar sembahyang cem arke aman, atakam amememtama aeefen. Ar, e Allah Pemerintah Atakam Akat, acacapioma aeefen. Aram ow cīncīn damasam, cīncīn dam kumitasam, ajaworomtawa aeefen. 24Aramat ipic e Siria capinmi takas an afufuosefen. Owam, e asan pwicak ow takas, e aramat ipicpu atowocenfesen. Er e cīncīn damas epcom owam, e cīncīn asesakas epcom owam, e dat e ajak aman aemaptotorfes owam, e jis apia ajimpes owam, e japow owam, inim arawen. Aramat ipic masirin, e ow ajaworomtawa aeefen. 25Ow arkeam e aramat ipic fa asoromfesen. Er e Galilea capinmiam, e kota Dekapolisam, e kota Yerusalemam, e Yudea capinmiam, e Yordan poman capinmiam, inim ewenawfes ow arawen.
હાલમાં પસંદ કરેલ:
MATIUS 4: LAICNS
Highlight
શેર કરો
નકલ કરો
Want to have your highlights saved across all your devices? Sign up or sign in
LAI 1985
