YAHYA 16
16
1Samenana ede d̄i ngoa b̄a Nahu d̄i nggomid̄oho b̄ab̄aina nggomid̄oho murtamu. 2Nggomid̄oho d̄i kalosa d̄i ade uma-uma sambeakai. Ro d̄imamai wakatuna b̄a one dou ma hade nggomid̄oho d̄imakacaina siad̄oho patu ro to'a d̄i Ruma Hatalla. 3Siad̄oho karawina ede d̄i nggomid̄oho b̄ara siad̄oho watipu patana Ama ro Nahu. 4Pala ake Nahu d̄imanggahina ede d̄i nggomid̄oho, loakud̄u nandad̄isi ede peasi, nggomid̄oho kawarapu b̄a one Nahu wa'ura ngoaku d̄i nggomid̄oho.”
D̄ikarawi b̄a Roh Allah
”Lampa rawi ake wati ngoa b̄a Nahu d̄i nggomid̄oho aipu saramba wa'una, b̄ara nahu mbuipu sama-samaku lab̄o nggomid̄oho. 5Pala ake Nahu d̄imalao d̄i Sia ma ranggadu Nahu; ro wati kone sab̄ua dou d̄i ade weki nggomid̄oho masod̄i tab̄eku laokai Nahu. 6Ake mala nggomid̄oho madarura ade, b̄ara nggahi ndede Nahu d̄i nggomid̄oho. 7Pala Nahu manggahi ma podana d̄i nggomid̄oho: Nancewi tahopu d̄iru'u b̄a nggomid̄oho, nggara laosi Nahu; b̄ara nggara Nahu watisi laoku, Mabantumu ede wati d̄imamai d̄i nggomid̄oho. Pala laosi Nahu, Nahu d̄imanggadu Sia d̄i nggomid̄oho. 8Nggara namaisi Sia, Sia d̄imakatadana d̄i dunia aona ma poda mab̄oha dosa, d̄i au ramapoda, ro rad̄i hukuma Allah. 9Sia d̄imanggahina b̄a one watisi imbi d̄i Nahu eded̄u dosa; 10b̄a one Nahu poda, b̄ara Nahu lao d̄i Ama ro nggomid̄oho wati d̄ima'eda Nahu wali; 11ro b̄a one Ruma Hatalla wa'ura tampu'una hukumna, b̄ara makuasakai dunia ake wa'ura d̄ihukum.
12Mboto walipu d̄i ne'e nggahi b̄a Nahu d̄i nggomid̄oho, pala wakatu ake nggomid̄oho watipu sanggo tarima. 13Pala nggara Roh ede namaisi, eded̄u Sia ma katadana lampa rawi ma poda mab̄oha Ruma Hatalla, nggomid̄oho d̄id̄ende b̄a Sia d̄i patakaimu sara'a lampa rawi ma poda. Sia wati d̄imanuntu ra nggahi rad̄i weki ndai-Na, pala d̄imanuntu ra nggahi au raringa-Na, ro Sia d̄imangoana d̄i nggomid̄oho auku d̄imandad̄i d̄i ainaina makento. 14Sia d̄imakad̄ese ra kantasana Nahu, b̄ara au rakarongga-Na d̄i nggomid̄oho, ratarima-Na rad̄i Nahu. 15Sara'ana ma wara d̄i Ama eded̄u ntau Nahu. B̄ara ndedena Nahu nggahi-Ku b̄a one au rakarongga b̄a Roh d̄i nggomid̄oho, ratarima-Na rad̄i Nahu.”
Susakai ro sana ade
16”D̄isamporo walimpa nggomid̄oho wati d̄ima'eda Nahu wali, ro d̄i samporo walimpa nggomid̄oho d̄ima'eda Nahu.”
17Pila-pila anamori Ruma Isa tampu'ura sod̄i sab̄ua lab̄o sab̄uana, ”Auku aona Sia nggahi ndedekaina d̄i ndaita: ’D̄isamporo walimpa nggomid̄oho wati d̄ima'eda Nahu wali, ro wali rau d̄i samporo walimpa nggomid̄oho d̄ima'eda Nahu’? Au rauku aona lab̄o: ’Nahu malao d̄i Ama’?” 18Siad̄oho sod̄i ntuwuna, ”Auku aona, ’samporo’? ndai wati loata ka'ao Sia nuntu ra nggahi-Na mab̄oha auku!”
19Ruma Isa nab̄adeku siad̄oho mane'e sod̄i d̄i Sia. Ndad̄i nggahi Sia, ”Wa'ura nggahi b̄a Nahu akana, ’D̄isamporo walimpa, nggomid̄oho wati edamu nahu wali, ro d̄i samporo wali nggomid̄oho d̄ima'eda Nahu wali.’ Sab̄ua edero d̄i ngangokai b̄a nggomid̄oho?
20Imbipu, nggomid̄oho d̄imanangi ro d̄imad̄uru d̄ala, pala dunia d̄imaneo ade. Nggomid̄oho d̄imasusa ade, pala susamu ede d̄imarungka ndad̄i neo ade. 21Nggarasi sab̄ua dou siwe mane'empara nggana, sia nasusaku, b̄ara wa'ura raka wakatuna sia susa ra ncokina. Pala wa'usi losa anana, dou siwe ede nanefaku susa ra ncokina b̄ara neo adena b̄a sab̄ua ana keana wa'ura wara d̄i dunia. 22Ndede rauja lab̄o nggomid̄oho: Ake nggomid̄oho masusa ade, pala Nahu d̄ima'eda angi lab̄o nggomid̄oho wali, ndad̄i ademu d̄imasana; ro wati kone sab̄ua dou maloana weha neo ade ede d̄i ade nggomid̄oho.
23D̄i'ainaina ede, nggomid̄oho wati d̄imasod̄i au-au wali d̄i Nahu. Imbipu: Au-au raraho b̄a nggomid̄oho d̄i Ama kai ngara Nahu, ede d̄i mbei b̄a Ama d̄i nggomid̄oho. 24Sampe wakatu ake nggomid̄oho watipu rahomu au-au kai ngara Nahu. Rahopu, ndad̄i nggomid̄oho d̄imatarimana, loakud̄u mpuruna neo ademu.”
Ngolukai d̄i dunia
25”Sara'ana ake nggahi b̄a Nahu d̄i nggomid̄oho kai conto ra ibara. Pala d̄imamai wakatuna, Nahu wati d̄imakani conto ra ibara wali, pala kai ngoa ntiri d̄i nggomid̄oho mab̄oha Ama. 26Wakatu ede nggomid̄oho d̄imaraho d̄i Ama kai ngara Nahu; d̄i b̄ademu, Nahu wati d̄imaraho d̄i Ama d̄i ru'u b̄a nggomid̄oho, 27b̄ara ndai Ama mameci ra ca'u nggomid̄oho. Sia mameci ra ca'u nggomid̄oho b̄ara nggomid̄oho mameci ra ca'uku Nahu, ro imbimu b̄a one Nahu ma ramai ta Ruma Hatalla. 28Poda Nahu ma mai rad̄i Ama, ro wa'ura maiku d̄i ade dunia. Pala ake Nahu tu'u wi'iku dunia d̄i lao mbaliku aka Ama.”
29Edempara anamori Ruma Isa manggahi d̄i Sia, ”Ake Ruma kai ngoa ntiri ro watira kani kai conto ra ibara, 30ro madad̄oho b̄adeta b̄a one Ruma mab̄ade sara'ana. Wati paraluna kone sab̄ua dou masod̄i au-au d̄i Ruma. B̄ara ndedena madad̄oho imbi Ruma ma ramai ta Ruma Hatalla.”
31Cambe b̄a Ruma Isa d̄i siad̄oho, ”Ndad̄i sab̄ua ma'imbiku nggomid̄oho ake? 32Kawarapu! Wakatuna d̄imamai, mala wa'ura mai, nggomid̄oho d̄i kambari mbura rero. Nggomid̄oho d̄imadula aka uma cua ndaimu ro d̄imatu'u wi'i Nahu kese. Pala Nahu wati keseku b̄ara Ama mawara sama lab̄o-Ku. 33Sara'ana ake nggahi b̄a Nahu loakud̄u nggomid̄oho rakamu taho ra ntai b̄ara sab̄uamu lab̄o Nahu. D̄i dunia nggomid̄oho d̄imasusa ra ncoki. Pala kalembopu ademu! Nahu mawa'ura kakoana dunia!”
હાલમાં પસંદ કરેલ:
YAHYA 16: LAIBHP
Highlight
શેર કરો
નકલ કરો
Want to have your highlights saved across all your devices? Sign up or sign in
@LAI 2001
