PAMUNGKAAN 14
14
Diurupi si Abram si Lot
1Marporang ma opat halak raja, i ma si Amrafel sian Babilonia, si Ariok sian Elasar, si Kedorlaomer sian Elam dohot si Tidal sian Goyim, 2mangalo lima raja na asing, i ma si Bera sian Sodom, si Birsia sian Gomora, si Sinab sian Adma, si Semeber sian Zeboim dohot raja sian Bela (sanga Zoar). 3Saroha ma raja na lima i mambaen hadomuan jana dipasada halahi ma tentara ni halahi di Rura Sidim, na margoar Laut Mate saonnari. 4Madung dua bolas taon honokna ditoru ni kuaso ni Raja Kedorlaomer halahi, tapi di taon patolu-bolaskon berontak ma halahi mangalosa. 5Di taon paopat-bolaskon ro ma si Kedorlaomer rap dohot angka donganna mardongan angka soridadu ni halahi jana ditaluhon halahi ma halak Refaim di Asterot Karnaim, halak Zusim di Ham, halak Emim di Siawe Kiryataim, 6dohot halak Hori di tano pardolohan Edom, lopus dikojar halahi lalu tu El-Paran na di topi ni parhorsihan. 7Dung i mulak ma angka na mangkojar i jana mangulahi ma halahi tu Kades (na margoar En Mispat di hatiha i), ditaluhon halahi ma sude tano Amalek bope halak Amori na mangingani Hasason Tamar pe ditaluhon halahi ma.
8Dung i angka raja na sian Sodom pe dohot Gomora, Adma, Zeboim dohot Bela diatur halahi ma soridadu ni halahi di Rura Sidim lalu marporang mangalo 9angka raja na sian Elam, Goyim, Babilonia dohot Elasar; gabe lima raja maralohon opat. 10Na gohan do di rura i sumur aspal, jana di na marlojongi angka raja ni Sodom dohot Gomora paluahon dirina sian parporangan i, dojup ma halahi madabu tu bagasan ni angka sumur i. Anggo raja na tolu halak nari malua do halahi jana maporus tu dolok. 11Dirampas raja siopat halak na monang, i ma sasude na adong di Sodom dohot Gomora dohot bohalna, lalu kehe ma halahi. 12Di Sodom do maringanan si Lot anak ni anggi ni si Abram, jadi gabe dohot ma ia dioban musu i dohot sude sinadongannia.
13Tapi adong ma sahalak na luncat jana dipaboa ia ma sude na masa i tu si Abram, halak Ibrani i. Donok tu harangan paribadatan nampuna ni si Mamre, halak Amori i do inganan ni si Abram. Dongan ni si Abram do si Mamre dohot kahangginia si Eskol dohot si Aner. 14Dung tarboto tu si Abram na dung tartangkup anak ni angginia i, dipalagut ia ma sude jolma na adong di bandarnia i, i ma angka na malo marporang 318 halak bahatna, dikojar halahi ma raja si opat halak i lopus tu Dan. 15Dibagi-bagi si Abram ma disi halaknia i piga-piga rombongan; diporangi halahi ma musu i borngin-borngin jana ditaluhon halahi ma musu i. Dikojar ia dope halahi lalu tu Hobah di Utara ni Damaskus. 16Laing dapot si Abram dope barang na nirampas ni musu i. Dioban ia muse ma si Lot dohot sude sinadongannia songon i muse angka dadaboru bope angka na tartangkup na asing i.
Dipasupasu si Melkisedek si Abram
17Di na mulak si Abram dung ditaluhon ia Raja Kedorlaomer dohot angka raja na asing i, ruar ma raja Sodom sian luatnia laho mangalo-alo si Abram di Rura Siawe (na nigoaran muse Rura Raja). 18Ro ma si Melkisedek raja ni Salem, malim ni Debata Na Gumincat i muse do ia, maroban roti dohot anggur di si Abram, 19dipasupasu ia ma si Abram jana ning ia ma, “Sai dipasupasu Debata Na Gumincat i ma si Abram! 20Tarpuji ma Debata Na Gumincat i na dung mangalehen hamonangan tu ho maradopkon angka musumu.” Dung i dipasahat si Abram ma tu si Melkisedek saparsampulu sian sude barang na nirampas i na niobannia mulak.
21Didok raja ni Sodom ma tu si Abram, “Buat ma di ho barang na nirampas i, tapi anggo halakku mulak ma tu au.”
22Dialusi si Abram ma, “Husumpahon ma di jolo ni Debata Na Gumincat i, na manompa langit dohot tano, 23na so buatonku sanga aha sian nampunamu, hum sabonang pe sanga sada tali ni solop pe nada. Jadi nanggo tardok ho tu au, ‘Hara ni au do da umbaen na maradong si Abram.’ 24Nada pola ra au mambuat bagi aha anggo na giot di au sandiri. Hum na nipake ni angka halakki ma na ra au manjagit. Tapi anggo donganki, i ma si Aner, si Eskol dohot si Mamre, padiar ma antong dibuat halahi bagian ni halahi.”
હાલમાં પસંદ કરેલ:
PAMUNGKAAN 14: LAIAKB
Highlight
શેર કરો
નકલ કરો
Want to have your highlights saved across all your devices? Sign up or sign in
Indonesian Bible Society