PAMUNGKAAN 10
10
Pomparan ni angka anak ni si Noak
1On ma pomparan ni angka anak ni si Noak, i ma si Sem, si Ham dohot si Jafet. Dung salpu aek na oto i, adong ma angka anak ni halahi na tolu.
2Angka on ma anak ni si Jafet: Si Gomer, si Magog, si Madai, si Jawan, si Tubal, si Mesek dohot si Tiras. Halahi ma na gabe ompu di angka bangso na nigoaran mangihutkon goar ni halahi. 3Pomparan ni si Gomer ma bangso Arkenas, bangso Rifat dohot bangso Togarma. 4Pomparan ni si Jawan ma bangso Elisa, Spanyol, Siprus dohot Rodes. 5Halahi ma na gabe ompu ni angka bangso na maringanan di topi ni laut dohot di angka pulo-pulo. Pomparan ni si Jafet ma sudena i jana marsiingani tanona be do halahi marguru tu marga ni halahi. Jana adong be do hatana.
6Angka anak ni si Ham i, i ma si Kus, Mesir, Libia dohot Kanaan i ma na gabe ompu ni angka bangso na nigoar mangihutkon goar ni halahi. 7Pomparan ni si Kus ma angka bangso Seba, Hawila, Sabta, Raema dohot Sabtekha. Pomparan ni si Raema ma bangso Seba dohot Dedan. 8Adong do anak ni si Kus na margoar si Nimrod, i ma na gabe raja parjolo na gabe ulubalang na barani di tano on. 9Hara ni pangurupi ni Tuhan gabe parburu godang ma ia, jana hara ni i ma umbaen na somal didok halak, “Sai dipatumbuk Tuhan ma ho gabe parburu godang songon si Nimrod.” 10Anggo di mulana lalu do tu Babel, Ereh dohot tu Akad kuasonia. Di Babilonia do na tolu i. 11Kehe ma ia sian luat i tu Asur, dipajongjong ia ma kota Ninive, Rehobot-Ir, Kalah, 12dohot Resen, i ma na di holang-kolang ni Ninive dohot kota Kalah na godang i.
13Pomparan ni si Mesir ma bangso Lidia, Anamim, Lehabim, Naftuhim, 14Petrusim, Kaslukhim, dohot Kaftorim. Angka i ma ompu ni bangso Pilistin.
15Angka anak ni si Kanaan, i ma si Sidon siangkaan dohot si Het, i ma ompu ni angka bangso na nigoaran mangihutkon goar ni halahi. 16Laing di Kanaan muse do ompu ni halak Jebusi, halak Amori dohot halak Gergasi, 17halak Hewi, halak Arki, halak Sini, 18halak Awardi, halak Semari dohot halak Hamati. Marserak do lalu tu na dao angka marga ni bangso Kanaan, 19jabat do, mangararati batas ni Kanaan mamungka sian Sidon lopus tu sabola Selatan donok tu Gerar, di lambung ni Gasa, dohot tu sabola Habincaran marayak Sodom, Gomora, Admah dohot Zeboim; di lambung ni Lasa. 20I ma pomparan ni si Ham, na maringanan di tanona be do mangihutkon marga ni halahi. Adong be do hata ni halahi.
21Si Sem, angkang ni si Jafet ma ompu ni sude bangso Ibrani. 22Angka anak ni si Sem i ma si Elam, si Asur, si Arpaksad, si Lot dohot si Aram. Halahi ma ompu ni angka bangso na nigoaran mangihutkon goar ni halahi. 23Pomparan ni si Aram ma angka halak Us, Hul, Geter dohot Mas. 24Si Arpaksad ma amang ni si Selah. Jana si Selah ma amang ni si Eber. 25Dua anak ni si Eber; sada ma i na margoar si Peleg, harana di hatihania ma tarbagi-bagi angka bangso na di tano on; na paduahon i ma na margoar si Joktan. 26Pomparan ni si Joktan ma angka bangso Almodad, Selep, Hasar-Mawet dohot Jerah, 27Hadoram, Usal, Dikla, 28Obal, Abimael, Seba, 29Ofir, Hawila dohot Jobab. Pomparan ni Joktan ma i sude. 30Tano inganan ni halahi mulai sian Mesa lalu tu Sefar, i ma luat na mardolok-dolok di sabola Habincaran. 31I ma pomparan ni si Sem, na maringanan di tano na be do i mangihutkon marga ni halahi be. Adong be do hata ni halahi.
32I ma angka pomparan ni si Noak mangihutkon partubuna be. Dung salpu aek na oto i, sude bangso na di tano on pomparan ni angka anak ni si Noak noma.
હાલમાં પસંદ કરેલ:
PAMUNGKAAN 10: LAIAKB
Highlight
શેર કરો
નકલ કરો
Want to have your highlights saved across all your devices? Sign up or sign in
Indonesian Bible Society