Lúù 24
24
Zízɛ̀ e wɛ̀lɛ̀ ga kɛ̀lɛ̀
(Máfìù 28.1-10; Máà 16.1-8; Zɔ̃̀ɔ̃́ 20.1-10)
1Lúó bèĩzɛ̀ lɛ́ e lɔ́ɔ́ yía, loàa o sòló, o ló nyɔ́nɔ́ gĩĩ yiè zɛ̀ lɛ́ waà pɛ̀ kɛɛ ká ɓɔ́àa mɔ̀. 2O ɓɔ́à e kília lé‐kèlè, lɛ́ e kɛ gɛ̀lɛ̀ káa gɛ̃̀. À gìni‐gíníì e kɛá, à ɓoò e kɛá bṹa lé. 3Lɛ̀ e kɛ kília, o ló à yí. Kɛɛ òó gbaa ko Dàa‐mì Zízɛ̀ bílí gɛ̃̀ à yí. 4O dɔɔ̀ e kɛá yi, tó wɔ̃́ lɛ́ à kɛɛ̀ e kɛáa, òó à yí ma. Nɔ́ zá lea, gɔ̃à pèèlɛ lɛ́ o mɛ́ síì e kɛá sɔ lɛ́ à nyìɛ è ɓɔ kpó‐kpó ɓoa yía káa, o ɓɔ o dɔ o sɔ́nɔ́. 5Loàa o kɛ túópìà nyɔ́ɔ̀ɔ. Wa mɔ́ɔ̀ gbini ɓo tã́ã̀. Gɔ̃àa wáà mɛ́ĩ́ ɓò o lɛ̀ɛ kélɛ̀, “Mɛ́ e kɛ lɛ́ kà lɛ̀ nàà mia gaàa zɛ̀ bà mi lɛ́ lɛ ɓéèea naà ká ɓe? 6Ka zò è vùò wɔ̃́ lɛ́ a gèe ka lɛ̀ɛ lɛ̀ lɛ́ e kɛ Gálàlíìa káa ká. Ye lɛ́ e kélɛ̀, 7‘Lɛ Mi Gbe mɔ̀, kɛ ó à nɔ kɛ‐wɔ̃̀ yɔɔ kɛ‐mìà lɛ̀ɛ. Ɛ́ɛ̃́ lɛ à mɔ̀ kɛ ó pá nélè ká kɔ́lɔ́sì mɔ̀, ɛ̃́ɛ̃́ kɛ é wɛ̀lɛ̀ ga kɛ̀lɛ̀ à lɛ̀‐kpɛ̀iì yààka lùò ká.’ ”
8Lɛ̀ e kɛ kília, loàa zò e vùò à wéè e kília ká. 9O gó gbaa ɓɔ́à e kília mɔ̀, o ló, o wɔ̃́ e kília séĩ́ gèe tòà‐píé‐mìà vũ̀ doó wɛ́lɛ́ doó, ɛ̃́ɛ̃́ mia yé o tóa séĩ́ o lɛ̀ɛ. 10Loà o kília, o lɛ́ o kélɛ̀, Melé lɛ́ è go Mádɛ̀lɛ̀‐pɛlɛía, wà Zòánà, e bɛ̀i Melé lɛ́ e kɛ Zĩ́ĩ̀ lòóò káa nì káa. Loà o kéa wà loà yé o kɛ o sɔ́nɔ́ píéa, wà ye nì o wɔ̃́ e kéa gèe àpɔ́sɔ̀lɔ̀ vɔ̀ɔ lɛ̀ɛ. 11Kɛɛ wɔ̃́ nì lɛ́ loàa wa gèea, e kɛ àpɔ́sɔ̀lɔ̀ vɔ̀ɔ lɛ̀ɛ wɔ̃́ yí gíniìa zɛ̀ ká. Òó gbaa o wéè gɛ̃̀ wánà ká. 12Kɛɛ Pílɛ̀ e wɛ̀lɛ̀ bàlà ká, áà lò bɔ́àa mɔ̀. E yɔ̀ɔ́ tã́ã̀, e sɔ púlúa dòló gɛ̃̀ yi. Lɛ̀ e kɛ kília, e yɛ́ e zí, áà lò e píé kɛ́ì, áà lò e zò gɔ̃̀á sí wɔ̃́ lɛ́ à kɛɛ̀ e kɛáa mɔ́ɔ̀ wɔ̃̀ mɔ̀.
O kɛ lópìà Ìméyà
(Máà 16.12-13)
13Lúó e kília téé‐tèè káa, o pèèlɛɛ o kɛ lópìà pɛ́lɛ nyɔ̀nɔ́ lɛ́ ò si Ìméyàa yí. Gò Zùlúsàlɛ̀ é ló yia, lɛ vɔ̀ lèĩ máà sálápèèlɛ ká. 14O kɛ wɔ̃́ séĩ́ lɛ́ à kɛɛ̀ e kɛáa gèepìà o kíe nì lɛ̀ɛ. 15Lɛ̀ o kɛ wɔ̃́ɔ gèepìà, wáà yí nààa, Zízɛ̀ dìè e nyɔ̀ɔ o ká, wà ye nì wáà lò. 16O à gɛ̃̀, kɛɛ pɛ dò a kɛ, tó òó à dɔ. 17Zízɛ̀ a gèe o lɛ̀ɛ, “Mɛ́ kà wɔ̃̀ gèe lɛ́ kà m̀á ka gbĩĩ́, káà lòá ɓɛ?”
O dɔɔ̀ e kɛá yi dĩĩ le, tó wáà o wɛlɛ kpɔ̀ yéĩ̀zɛ̀. 18O doó‐mì yé ò si Kílíópàa, e à wɛ̃́ĩ́‐lɔ̀ɔ kɛ kélɛ̀, “I doó lɛ́ i míá o Zùlúsàlɛ̀ɛ dò ká, lɛ́ ìí wɔ̃́ lɛ́ à kɛɛ̀ lɛ yí táa yía dɔɔ?”
19Zízɛ̀ a gèe o lɛ̀ɛ, “Mɛɛ wɔ̃̀ lɛ́ à kɛɛ̀ lɛ?”
Wa gèe à lɛ̀ɛ, “Wɔ̃́ lɛ́ e kɛ Zízɛ̀ lɛ́ è go Názàlɛ̀ɛ káa lɛ. Gɔ̃́ e kília e kɛ dɔ̀‐Wálà‐lé‐là‐mì ká. Wálà ɛ̃́ɛ̃́ mia séĩ́ o gɔ̃́ e kília dɔ gɔ̃ kpànazɛ̀ kpó‐kpó ká e lé‐wè ɛ̃́ɛ̃́ à zì kɛ‐wɔ̃̀ mɔ̀. 20Ko zì sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ ko wũ‐là‐mìà o à nɔ, kɛ ó mɛ̀ĩ́‐sà káá à wĩĩ́. Ɛ́ɛ̃́ wa pá nélè ká kɔ́lɔ́sì mɔ̀. 21Kɛɛ ko zò e kɛ à mɔ̀, kɛ é kɛ mi lɛ́ è lo Éézɛ̀lɛ̀‐mìà ɓoò wɔ̃́ yía ká. É kã́ wɔ̃́ e kília séĩ́ mɔ̀ɔ, wɔ̃́ e kília kɛ́ wa ɓoa, pɛ́nɛɛ lɛ́ e à lɛ̀‐kpɛ̀iì yààka lùò káa. 22Loà lɛ́ o ko bàa dò wa kɛ ko lé e pa. O sòló làapíé, o ló ɓɔ́àa mɔ̀. 23Kɛɛ òó gbaa à bílí gɛ̃̀. O yɛ́ o zí, o nu wáà gèè kélɛ̀ o Wálà là vɔ‐mìà gɛ̃̀ mɛ̀ĩ̀ zɛɛ̀ kpàáà yí, wáà gèè loàa lɛ̀ɛ kélɛ̀ lɛ ɓéèe. 24Ko dò bɛ̃̀ɛ̃ o ló zeĩ́ ɓɔ́à e kília mɔ̀. O pɛ séĩ́ gɛ̃̀ e kɛɛ̀ɛ zɛ̀ ká lɛ̀ zí loàa wa gèeáa lɛ́ ɓe. Kɛɛ òó gbaa à dìè gɛ̃̀.”
25Lɛ̀ e kɛ kília, Zízɛ̀ a gèe o lɛ̀ɛ, “Mia lɛ́ ka wũ‐kèlè yí lɛ gágà e ké ɓɛ. Kàá wɔ̃́ séĩ́ lɛ́ dɔ̀‐Wálà‐lé‐là‐mìàa wa gèea gɛ̃̀ wánà ká pɛ́lɛ̀. 26Ḿ gɔ̃̀, e kɛ Kɛ́lɛ̀ì mɔ̀ kɛɛ é wàa e kéa ɓèlè, kɛ é kɛ e zì lɛ̀ lɛ́ lɛ̀ è fɔ̀nɔ yía mɔ̀?” 27Lɛ̀ e kɛ kília, Zízɛ̀ e wɔ̃́ lɛ́ à gbɛ̃̀ɛ̃̀ lɛ à mɔ̀, lɛ́ à bɛ̃̀ɛ̃ɛ̃̀ lɛ Wálà là kíía séĩ́ yía a yí ɓo o lɛ̀ɛ. E gbɛ̃̀ Móózè wà dɔ̀‐Wálà‐lé‐là‐mìà séĩ́ wà kíía là.
28O ɓɔ pɛ́lɛ nyɔ̀nɔ́ lɛ́ o kɛ lópìà yia ká kɔ̀ɛ́. Zízɛ̀ a kɛ lɛ̀ pɛ lɛ́ lɛ dɔpìà o mɔ̀ líé. 29Kɛɛ wa kṹ tã́ã̀, wáà gèè, “Kɔ̀à ɓi nì kɔ̀à tó zèe. Nyɛ́ŋɛ̀ĩpíé aà kɛ ɓɔ̀ɔ, ɛ̃́ɛ̃́ bĩ́ lɛ nupìà míì.” Lɛ̀ e kɛ kília, wà ye nì o ló, kɛ ó kɛ yí. 30Wà ye nì o yà téɓò mɔ̀. E belè sí, e Wálà zúo ɓo. Lɛ̀ e kɛ kília, e belèa kpú yɛ́, a nɔ o lɛ̀ɛ. 31O nyìɛ lé ɓoò e kɛá, ɛ̃́ɛ̃́ o à dɔ gbaa. Kɛɛ o kɔ̃́ gbaa à ká o nyìɛ là. 32Wa gèe o kíe nì lɛ̀ɛ, “Lɛ̀ ko kɛ zi là, tó áà wɔ̃́ gèè, ɛ̃́ɛ̃́ áà Wálà kiia yí ɓò ko lɛ̀ɛ, ḿ gɔ̃̀, e kɛ lɛ̀ pɛ lɛ́ tíé lɛ kṹpìà ko zò píé?”
33Lɛ̀ e kɛ nɔ́ kília, o wɛ̀lɛ̀ gbaa, wáà lò o mɛ̀ĩ́ Zùlúsàlɛ̀. O ló tòà‐píé‐mìà vũ̀ doó wɛ́lɛ́ doóa, é dàá mia yé o tóa bàa, o gɛ̃̀ɛ̃̀ o páà e kɛá o kíe mɔ̀ yi. 34O kɛ à gèepìà kélɛ̀, “Ko Dàa‐mì wɛ̀lɛɛ̀ lɛ ga kɛ̀lɛ̀ wánà kpó‐kpó ká. E ɓíé Sáímɔ̀ là.”
35O pèèlɛɛ o wɔ̃́ lɛ́ e kɛ zuúa, yí ɓo o lɛ̀ɛ. O zi lɛ́ o ko Dàa‐mi dɔ à ká lɛ̀ lɛ́ e belè yɛ́ɛ káa wɔ̃̀ gèe o lɛ̀ɛ.
Zízɛ̀ e e dìè zɔ̃̀ɔ̃̀ là tòà‐píé‐mìàa lɛ̀ɛ
(Máfìù 28.16-20; Máà 16.14-18; Zɔ̃̀ɔ̃́ 20.19-23; Àpɔ́sɔ̀lɔ̀ 1.6-8)
36Lɛ̀ o kɛ wɔ̃́ e kília gèepìà o lɛ̀ɛ, nɔ́ zá lea, ko Dàa‐mì dìè‐tĩ́ e dɔ o fĩ̀ã̀ yi.
37O kɛ túópìà, o zò áà mɛ̀. Ƃii wa gɛ̃̀ ɓɔ̀ɔ kélɛ̀ mi gɛ̀ɛ̀ lɛ́ ò à gɛ̃̀ɛ. 38Kɛɛ a gèe o lɛ̀ɛ, “Mɛ́ e kɛ lɛ́ ka zò è mɛ̀ ka mɔ̀ ɓe? Mɛ́ e kɛ lɛ́ wɛ̃́ĩ́‐lɔ̀ɔ sùua è nu ka wũ yí ɓɛ? 39Kà lɛ̀ gɛ̃̀ m kɛ̀lɛ̀ ɛ̃́ɛ̃́ m gã̀ mɔ̀, ká à gɛ̃̀ wánà ká kélɛ̀ m dìè lɛ. Kà ka kɔ̀ bĩ́ m mɔ̀, káà lo à gɛ̃̀ɛ̃̀. Ƃii mi gɛ̀ɛ̀ wɛ́lɛ́ wà à nɔ̀ɛ wá à mɔ̀, lɛ̀ zí kà à gɛ̃̀á m mɔ̀ɔ lɛ́ ɓe.”
40Lɛ̀ a gèe kília, e e kɛ̀lɛɛ̀ wà e gã̀ zɔ̃̀ɔ̃̀ o lɛ̀ɛ. 41O paà e kɛá géli wà wɔ̃́ kpàlézɛ̀ gɛ̃̀ɛ̃ɛ̃̀ ká, tó áà kɛ̀, tó òó wɔ̃́ è kɛ̀ɛ gɛ̃̀ nɛ́ tĩã́ wánà ká. Lɛ̀ e kɛ kília, Zízɛ̀ a gèe o lɛ̀ɛ kélɛ̀, “Ƃèlè‐pɛ̀ dò lɛ ka kɛ̀lɛ̀ lɛ̀ɛ mɔ̀?” 42Lɛ̀ e kɛ kília, o kpã̀ã́ kpuú kpàaàa zɛ̀ doó nɔ à lɛ̀ɛ. 43E à sí, a ɓèlè o nyìɛ mɔ̀.
44Lɛ̀ e kɛ kília, a gèe o lɛ̀ɛ kélɛ̀, “Wɔ̃́ nì lɛ́ ma gèe ka lɛ̀ɛ lɛ̀ m kɛ tĩã́ ka píéa káa, lɛ́ e ké ɓɛ. Wɔ̃́ séĩ́ lɛ́ à gbɛ̃̀ɛ̃̀ lɛ m mɔ̀, lɛ́ à bɛ̃̀ɛ̃ɛ̃̀ lɛ Móózè là Lɔ́ɔ̀, ɛ̃́ɛ̃́ kii lɛ́ dɔ̀‐Wálà‐lé‐là‐mìà wa bɛ̃̀ɛ̃, e bɛ̀i Tã́‐kiia yí, lɛ à mɔ̀ é kɛ.”
45Lɛ̀ e kɛ kília, e o wũ‐kèlè yí kɛ sɛ̀, kɛ ó Wálà kiia yí ma. 46A gèe o lɛ̀ɛ, “Wɔ̃́ lɛ́ à bɛ̃̀ɛ̃ɛ̃̀ lɛɛ, gɛ̃̀ e ké. Lɛ Kɛ́lɛ̀ì mɔ̀ é wàa ɓèlè, ɛ̃́ɛ̃́ kɛ é wɛ̀lɛ̀ ga kɛ̀lɛ̀ à lɛ̀‐kpɛ̀iì yààka lùò ká. 47Ɛ́ɛ̃́ lɛ à mɔ̀ kɛ ó wɔ̃́ gèe à tɔ́ yí sɛ́lɛ́ séĩ́ yí‐mìà lɛ̀ɛ. Wɔ̃́ e kília lɛ́ e kélɛ̀, sɔ̃̀ɔ̃ yɔɔ mɛ́‐vɔ̀ɔ wɔ̃̀, ɛ̃́ɛ̃́ kɛ‐wɔ̃̀ yɔɔ ɓò mia wũ mɔ̀ wɔ̃̀ɔ. Óò lo à zi gbɛ̃̀ɛ̃̀ Zùlúsàlɛ̀ zèe. 48Ka lɛ́ ka kélá vɔ̀ ká wɔ̃́ e kília mɔ́ɔ̀ wɔ̃̀ mɔ̀ɔ. 49Tó m dìè bɛ̃̀ɛ̃, máà pɛ lɛ́ m Dàa aà e wè dɔ à káa, vɔ̀ ka là. Kɛɛ lɛ ka mɔ̀ ká tó pɛ́lɛ e kéa yí, é tóá kíli yíkɛ̀ gáàa lɛ́ è go lɛ̀ía, é nu ka là.”
Wálà e Zízɛ̀ sí, e ló à ká lɛ̀í
(Máà 16.19-20; Àpɔ́sɔ̀lɔ̀ 1.9-11)
50Lɛ̀ e kɛ kília, e gó o ká sɛ́lɛ́ e kília yí, e ló o ká vɔ̀ kélɛ̀ Bɛ́fénì. À lɛ̀ mɔ̀ lɛ́ e e kɔ̀ sí lɛ̀í yi, áà lúà kpɔ̀ o mɔ̀ɔ. 51Lɛ̀ e kɛ lúà kpɔ́pìà o mɔ̀ɔ, e e yí ɓo o mɔ̀. 52Lɛ̀ e kɛ kília, o yɛ́ gbaa o zí, wáà lò Zùlúsàlɛ̀ géli kpó‐kpó ká. 53Lɛ̀ o nua o lúó sí, o kɛ à píé Wálà‐kàa wì Wálà zúo ɓopìà.
હાલમાં પસંદ કરેલ:
Lúù 24: MNT
Highlight
શેર કરો
નકલ કરો
Want to have your highlights saved across all your devices? Sign up or sign in
Mann New Testament © Bible Society in Liberia, 1978.
