Halloo 8
8
Aalliyee Aachi Tahoo
1Yeeri Noohin, biinna tookkii markabooch beeti cooxinaꞌon, gijjeenaꞌo bulloshinoo gabiye. Yeeriyoo showooch taheeꞌi beeti aachi toommooch yongoon yongiihe. Aacoo shappii shappii hammiye. 2Showee dechi ducheexi aachi xuuphoonaa shimaajji kelloona hichehe; amiyo shimaayoochee dihoon qajjiye. 3Aacoo showee toommoochee qemi qemona koonnii hammiye; balli aache qemoyee gubb aaco shappitone. 4Markabo shabaattinnee agenee aaraa shabaattinnee qemooba, Araraati guudinaꞌoochee ikkoo toommooch kotehe. 5Aacoo aashirinnee agenooch beddaahaa shappii beehe; aashirinnee agenee ikkinnee qemooba, guudinaꞌo toommo bekkehe.
6Noohi aabbe qemoyee gubb, ebi bi shuuneti markabee mallee kelloon qechiꞌi, 7kurecheen kichii daachiihe. Biyoo kechaa hammahan. Aaco showee toommoochee tahimmi wottoon, okk hach guuddaa yoobbaa beehan. 8Noohi aaco showee toommoochee shappito gaata bi beeggemmoyich, uggeen daachiihe. 9Tunebaani aaco showee toommo bulliich gejjeꞌi bi beetoyich, ugge bi baatoon bi kotiyemmi xaaꞌoon muccahan; bi hilla wottaꞌa, Nooh waan markabooch waahan. Noohi bi kishoon yaggii uggeen yechiꞌi, maac markabooch giijjiye. 10Aroyee gubb wotta shabaatte qemon yagiichii, uggeen wochinnoon kichii daachiihe. 11Uggeyoo womikka Nooh waan wottaꞌa waahan. Biyoo zayitee michi waajji nolloon bi gashoona shaaccaꞌaaniye bi waato. Noohiyoo aaco showee toommoochee shappito bi tunoon ariihe. 12Wotta Noohi shabaatte qemon yagiꞌi, uggeen wochinnoon kichii daachiihe. Ebiyooba ugge wottaa waataaneene.
13Noohi shiijjeti shiritte ballaa ikke natooba, ikkinnee agenee ikkinnee qemooba, aaco showee toommo bulliichee tahiye. Noohiyoo markabee guufoon gaxxiye; showee shokkoon beeggiye. 14Guttinnee agenee hiyaa shabaattinnee qemooba, showoo shuuqqitone.
15Arooba Yeeri Noohich ishichiꞌi gettiye: 16“Ne mecheenaa ne bushiishoonon, boonoshi mecheenaꞌonoo yeshiree markaboochee keye. 17Neenna tookkii markabooch beeti, meenon taheti kashechinaꞌo bullin, eboshiyoo gijjeenaꞌonaa cooxinaꞌonon, yoobbereenaꞌon, showee toommona yuummiibeeti halleenaꞌo bulloshin, showee toommooch boonoshi shiijje shiijjeremmoyich, neenna tookki maach kichibe” iye.
18Ebich Noohi bi mecheen, bi bushiishoonaa boonoshi mecheenaꞌonon yechiꞌi, markaboochee kechiye. 19Showee toommona shaꞌee beetinaꞌo bulli, eboshiyoo gijjeenaꞌonaa cooxinaꞌona, yuummere halleenaꞌo, yoobbereenaꞌo bulloshiyoo, boonoshi shaahi shaahoona dabbeeꞌi markaboochee kechiyeete.
Noohi Deejjoon Doono Yeerich Deejjoo
20 Noohi bi kechitoyee gubb, Doono Yeerich deejjee gudoon shuunehe; xalle gijjeenaꞌonaa xalle kafeenaꞌo bullinoochee daammiye; guurii, ebi are deejjee gudoochaa michiꞌi, Doono Yeerich deejjiye. 21Doono Yeeriyoo ebi deejjee cinnoona emiriye. Biyoo bi mulloona ishichiye: “Bi bushittinoochee tiijjiꞌi ashi mullee gaboo gondo bi tunetoyich, showoon ashi naboona wochinnoon ufaache; wotta ebi and ta tuniitoommon, kashechi halleenaꞌo bullin wochinnoon aalliyaache.
22“Showee beemmi yemeeno bulliich,
shookki yarimmoonaa qecci yarimmoona,
aqqoonaa gaamoona,
qaawoonaa yooyona,
areddoonaa xumoona, kuxeyaachemmone” iye.
હાલમાં પસંદ કરેલ:
Halloo 8: KBRC
Highlight
શેર કરો
નકલ કરો
Want to have your highlights saved across all your devices? Sign up or sign in
SIM International, 2020.