Matiu 27
27
NA SOPENA 27.
1Me na malaha, ra varese hi na lotu me ra varie hi ra tajua tevali sura vei metei Iesu: 2tehajiria, tetulia, telavia ta me Pailet na varese.
3Tau Jutas na taha lavia ta mera, morenia tetami suria tau, mositapuna jomia, motalavi liliu ra sule taha voe na havulatolu ta me ra varese hi na lotu me ra varie, 4moaso, Inau avei vasoosoo, suria arahu ta meamiu na tajua tahonae. Maa hire teaso, Natuha mosapilamamu; mosipilamu. 5Tau moputuhera sule taha voe tasivo me na pea hi na lotu; tau molaho, mositapuna sahe jule. 6Tau ra varese hi na lotu telavi ra sule taha voe, teaso, Mosatataholo tijurira me na vonae hi na sule hi na lotu, suria movo-lina jaena tajua motea. 7Tau tevali, tevoli na uma motea hi na mane naano, sura japovi ra tariesao tauae. 8Suri a tejuri na uma nee, Na uma hi na jae, naanoi reji. 9Me na rani hina na leo hi Jeremaia na provet motaraae, moaso mine, Telavi ra mane taha voe na havulatolu, na volina tajua tevolia, na valura uluo hi Israel tevolia; 10telavira na volina uma motea, pala Iehova mopiseau.
11Iesu moturi toho me na paho na varese: tau na varese motuhae, moaso, Iniho Na Moli hi ra Ju, e mojoa? Tau Iesu moaso ta mea, Io. 12Tau ra varese hi na lotu me ra varie tevetia tau, mosatami. 13Tau Pailet moaso ta mea, Osaroho ra sanu ra tari tevetiveti suriho? 14Maa mosatami mea, mosaaso na leo motea: na varese mouloulo tohova suria. 15Me na rani hi na hanihani tapu, na vue na varese morunei natajua motea hi ra tajua taha toho me na pea hi na hajihajiri, molavia ta mera, ive hira temejeia moruneia. 16Me na rani neeno te tajua oso tahajia itea motoho me na pea hi na hajihajiri, tejuria Parapas. 17Ratajuatenumaihuhurahitau, Pailet moaso ta mera, Otomejeau airuneiisei ta meamiu? Airunei Parapas, e airunei Iesu tejuria Na Kristo? 18Suria mopinisira telavia ta mea sura lolora tehahara nie. 19Mosihe toho me na sihesihena varese, tupuna mosulara tajua ta mea, moaso, Oijuri na tajua taha tataholo nee teitoho: suria inau amama-hanu na havui me na navuriorio suria. 20Ra varese hi na lotu me ra varie tevaraira tajua motahonae tituhatuha Parapas, tivei mete Iesu. 21Maa na varese motami, moaso ta mera, Ive hirarua otomejeau airuneia ta meamiu? Teaso, Parapas. 22Pailet moaso ta mera, Aive nasava ta me lesu, tejuria Na Kristo? Hire vunuvunu teaso, Motahonae imate me na hau palatusi. 23Moaso, Surasava? move na sanu oso sava? Maa teulo tahajia, teaso, Motahonae imate me na hau palatusi. 24Suria, Pailet morenira tesarohoe, maa vahatea tijuijuli tahajia, molava pei, morasi na havena me na pahora tajua, moaso, Na mate se na tajua tataholo naano mosapilau; mosipilamiu. 25Hire vunuvunu tetami, teaso, Na sena mate mosipilamamu, mosipilara matumamu. 26Tau morunei Parapas ta mera: maa momarasi Iesu tau, morahu ta mera sura vei rneteia me na hau palatusi.
27Tau ra tajua hi na jumu hi na va-rese telavi Iesu me na lolona pea, telavi huhurera tuara vunuvunu. 28Tau terirituhe ra visivisina, teriri na visivisi taha hara ta mea. 29Tau teviri na suni hi na hajiraitivi, tejuria ta na rena, tejura tiho me na matuana havena; tau tetie pau me na pahona, teuru suria, teaso, Iniho, Na Moli hi ra Ju! 30Tau telotovia, telavituhe na tihona, telosa rena. 31Tau teuru suria tau, teriri-tuhe na visivisi taha hara, tetariri na sivisivisina ta mea, tetulia sura vei meteia me na hau palatusi.
32Tau telaho ture na vanua, tepasua na tajua hi Sairine motea, na hisena Saimon: tevea movano valuira sura lavi na hau palatusi hina. 33Tau tenumaitau me na vanua motea tejuria Kolkota, natuha pala loeja, Na vonae hi na molohina tajua, 34terahu ta mea na mana uain, na pei hi na talahasuna sanu motoho ae: mooomi tapusia tau, movotoa na oomia. 35Tevei meteia me na hau palatusi tau, tetuha ra visivisina ta me ra tuara, tevuna ilailahi tapusira isei ilavira: 36tau tesihesihe toho, teleleo nie neeno. 37Tevosa vili na hia me na vosana, na aso hira suria moulia ae, moulia, IANO IESU NA MOLI HI RA JU. 38Tau tevei meteira tajua taha papaliho morua valuia me na hau palatusi, motea me na matuana havena, motea me na marauna. 39Ra tajua taha laho teuru suria, tepule ra rera, 40teaso, Iniho na tajua taha hurejovi na pea hi na lotu, tau otasaria me na pohi motolu, oisitapumu veho oimauri: va iniho omatu i Atua, oivorosumai me na hau palatusi. 41Palahi mono ra varese hi na lotu me ra tajua hi na uli pepe me ra varie teuru suria, teaso, 42Movei mauri ra tajua nonoho; mosatapuna vei mauri nie. Inie Na Moli hi Israel; motahonae ivorosumai me na hau palatusi naanoi, tau tirohoroho mea. 43Inie tomorohoroho me Atua; va imejeia motahonae ihorohoroe me na sena mate naanoi: suria moaso mine, Inau Matu i Atua. 44Palahi mono ra tajua taha papaliho morua taha mate yaluia me na hau palatusi teraaso ta mea.
45Majuri me na rani hi na maso moturi vuati me na rani hi na maso morio taleha, mopohipohitupu, me na ulu vunuvunu. 46Tau me na rani hi na maso morio taleha Iesu mohajili tohova, moaso, Uai, Uai, lama sapaktanai? natuha me na loeja ia, Atua hiu, Atua hiu, surasava ojuriau tau? 47Na valura tajua taha turi toho neeno, terohoe tau, teaso, Na tajua naa moore Elaija. 48Tau vilevileahi motea hira morovorovo toho, molavi na sanu motea, movea mososomi na vinekar, mojuria ta na uluna tiho, morahu ta mea, suria ioomia. 49Na valura tajua nonoho teaso, Toho; tau tipinisi Elaija inumai sura veimauri nie, e mojoa. 50Vahatea maa Iesu mohajili tohova, tau momate. 51Tau na lopori horo hi na matana pea hi na lotu momajejeri ta me na sopena morua, momajejeri majuri me na uluna mosivo me na vuna; na tano momahijihiji; ra malo temavija; 52ra vonae hi ra taha mate tetavavaha toho; na epera tajua tahonae ra tari taha mate mine tetamaraha; 53temalua me ra vonae hi ra taha mate me na tahuna sena tamaraha, tevano me na vanua tapu, ra tajua ra tari terenira. 54Tau na varese hi ra tajua hi na jumu na tarivahatea me ra tajua valuia, teleleo Iesu, teroho na mui tau, tereni ra sanu naa tau, teine tohova, teaso, Motaharahu iano Matu i Atua. 55Ra hajae ra tari mono tetoho neeno, teleleo nie neeva jua, telaho tahu i Iesu majuri me Kalili, temata inie: 56Mere Maktalin, me Mere tina i Jemes me Joses, me tinara matu i Sepeti morua, tetetoho mera. 57Me na ravi na varese hi Arimatia motea, na hisena Josev, iniemonomositea hi ra uluo hi Iesu, monumai: 58na tajua naano movano me Pailet, motuhatuha na epe i Iesu. Tau Pailet movaraira tirahu ta mea. 59Tau Josev molavi na epena, moluihoroe me na ruru taha voevoe, 60mojuria me na sipilana vonae havui hi ra taha mate, movosa papaia mine me na malo: tau mohurehurena sule tahajia me na matana vonae hi ra taha mate, tau molaho. 61Mere Maktalin motoho ae, Mere motatea mono, terasihe toho taroroi me na vonae hi ra taha mate.
62Me na malaha hina, inie na pohi tahu na pohi hi na vei vavanao na hanihani tapu, ra varese hi na lotu me ra Varisi tenumai huhurahi me Pailet, 63teaso, Varese, amamaninima na tajua taha jihajiha neeno, momauri reji, moaso, Me na pohi tolu aitamaraha pa. 64Motahonae oivaraira titirihoro na vonae hi ra taha mate me na pohi tolu suria, suriara uluo hina tisanumai tipalihoe, tau tiaso ta me ra tajua, tiaso, Motamaraha me na mate: tau na vaharuana sanu oso ioso jivi hi na majihana. 65Pailet moaso ta mera, Ra tajua taha mata me amiu: otovano, ototirihoro susuhia. 66Tau tevano, tetirihoro na vonae hi ra taha mate, teliho na sule, ra tajua taha mata tetetoho valuira.
હાલમાં પસંદ કરેલ:
Matiu 27: TLM9109
Highlight
શેર કરો
નકલ કરો
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
