Jon 7
7
SOPENA 7.
1Tau ra sanu naa Iesu molaholaho me Kalili; mosa-laholaho me Jutia suria ra Ju temeje na veimeteia.
2Me na rani natuha ra Ju tehanihani tohotohotaiti na Hanihani hira Peapea.
3Ra tuahana suria teaso mea, Oilaho, oivano me Jutia sura ra uluo himu mono tereni ra varao uloulo oivera.
4Saite tajua movei punu na sanu momeje ra tajua ra tari tepinisia. Va oivei ra sanu naa oitapumu piseho me na ulu.
5Suria ra tuahana tesarohoroho mea.
6Tau Iesu moaso mera, Na rani hiu isamalua tohoreji; na rani himiu naanoi tuitui.
7Na ulu mosapinisi na votoa amiu; maa moyotoa nau suria avetiveti ra pilara sanu oso.
8Amiu otosahe me na Hanihani; asasahe tohoreji me na Hanihani suria na rani hiu isamalua tohoreji.
9Tau movaraira ra sanu naa, tomotoho me Kalili.
10Tau ra tuahana tesaheae, mosahe mono me na Hani-hani, mosalaho majaraha, maa molaho punu.
11Natuha ra Ju tetiroe me na Hanihani, teaso, Inie veae?
12Ra tanoho tepuruhutu tahajia suria: valura teaso, Inie na tajua tahonai; valura teaso, Aue, motuli pele ra tajua.
13Maa ra tajua teaso tamautu suria teine ra Ju.
14Me na vuati hina Hanihani Iesu moruhusahe me na pea hina lotu hira Ju, mopisera.
15Ra Ju teuloulo, teaso, Paleve na tajua naa molavi na sena lolorani maa saitea mopipisea?
16Iesu moaso liliu mera, Ra sanu apisera tesapilau maa pile na tahasulau.
17Va te tajua movei na sanu Atua momejeia mopinisi pa va na pisahi hiu mopile Atua e va aaso me na seu hauhaua.
18Te tajua isei moaso me na sena hauhaua motiro na sena hale; maa te tajua isei motiro na hale hina tahasulae inie motaharahu, saite sanu oso me na lolona.
19Moses morahu ta me amiu na Leo Hauhaua, maa saite himiu movei na Leo Hauhaua? Sura sava otolaho sura veimeteau?
20Ra tanoho teaso liliu, Na talume oso tomotoho me na lolomu: isei molaholaho sura veimeteiho?
21Iesu moaso liliu mera, Aivei na varao motea, otouloulo tohoreji.
22Suria Moses morahu ta me amiu na pahi-tali (Moses mosavaere nie maa ra tamaja) me amiu otopahitali na tajua me na sapat.
23Va tepahitali na tajua me na sapat sura na Leo Hauhaua hi Moses mosamote, motoma otopuri nau suria aivei te tajua momauri hauhaua vunuvunu me sapat?
24Ototena sooi tipa; otosi-ilailahi tataholo. 25Natuha valura tajua hi Jerusalem teaso, Inie na tajua isei temeje na veimeteia?
26Maa, roroho, molalaa hauhaua, teaso tipa mea. Ra varese tepinisi inie na Kristo?
27Maa topinisi veae na tajua naa momalua: maa ihisa Kristo momalua, saite tajua mopinisi momalua veae.
28Natuha Iesu moaso pati me na pea hina lotu hira Ju, ihisa mopipisera, moaso, Otopinisiau, otopinisi amalua veae mono; asamalua me na seu hauhaua, maa inie mosulau motaharahu, otosapinisia.
29Maa apinisia: suria amajuri mea, mosulau.
30Natuha temeje na lavia, maa saite tajua motielia suria na rani hina mosamalua tohoreji.
31Maa ra tajua ra tari terohoroho mea. Teaso, Ihisa Kristo momalua movei pa ra matamata uloulo jivira na tajua naa movera?
32Ra Varisi teroho ra tajua tepuruhutu ra sanu naa suria; ra Varisi me ra varese-prist tesulara tahamata sura lavia.
33Natuha Iesu moaso mera, Atohotoho sivo taiti me amiu, tau alaho me na tahasulau.
34Ototiroau pa, otosapasuau: veae aitoho otosapinisa maluaae.
35Natuha ra Ju tetapura aso, Molaho veae, tosapinisa pasuae? Molaho me ra lolopohitupu isei tetoho teatea, mopipisera?
36Na leo sava moaso, Ototiroau pa, otosapasuau; oto-sapinisa vano veae aitoho?
37Me na tahuna rani, na rani tahajia hina Hanihani, Iesu moturitoho, moaso pati, moaso, Va te tajua momarorou, monumai meau, mooo.
38Isei morohoroho meau, pala na pepe tapu moaso, me na lolona na peiroro tahamauri mororo.
39Maa moaso na sanu naa suri na Talume isei hire terohoroho mea telavia; suria na Talume mosamalua reji, suria Iesu mosasahe tohoreji.
40Suria valura tajua, ihisa teroho na aso naa, teaso, Motaharahu naano na Provet.
41Valura teaso, Naano na Kristo na tavu hi Tevit, momalua majiha me Kalili?
42Na Pepe Tapu moaso, Kristo na tavu hi Tevit, momalua me Petlehem na vanuai Tevit?
43Suria teaso jijiji suria.
44Valura temeje na lavia; maa saite tajua motielia.
45Natuha ra tahamata teliliu me ra varese-prist me ra Varisi; teaso mera, Sura sava otosalavia?
46Ra tahamata teaso, Saite tajua molalaa pala tajua naa.
47Natuha ra Varisi teaso liliu mera, Tejiha amiu mono?
48Valura varese hija e valura Varisi terohoroho mea?
49Maa ra tanaho naa tesapinisi na Leo Hauhaua terorira.
50Nikotimus moaso mera (inie isei monumai me Iesu me na pohi, inie motea hira)
51Na pilaja Leo Hauhaua moilailahi te tajua mine morohoe, e mopinisi movei sava?
52Teaso liliu, teaso mea, Iniho na tanoho hi Kalili? Oitiroe, oipasu saite provet momaraha me Kalili,
53Hire vunuvunu telaho me ra sipeara.
હાલમાં પસંદ કરેલ:
Jon 7: TLM9109
Highlight
શેર કરો
નકલ કરો
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
