Jon 4
4
SOPENA 4.
1Na Moli mopinisi ra Varisi terohoe molavi mopaptais ra uluo hina ra tari jivi Jon
2Iesu mosapaptais maa ra varisula hina tepaptaisira.
3Ihisa moroho na sanu naa mojuri Jutia, motalaho me Kalili.
4Sura lahoae mosilaho ruhujere me Sameria.
5Natuha momalua me na vanuai Sameria na hisena Suka, motaroroi me na motina tano Jekop morahu me na matuna Josev.
6Na moru-papa pile Jekop monie natuha, Iesu suria molaho ejahi mosihe tasivo taroroi me na moru-papa. Vahatea momaso maso vuati.
7Na hajai hi Sameria momalua sura tohi na pei: Iesu moaso mea, Oirahu na pei ta meau.
8Suria ra uluo hina telaho me na vanua sura volivoli na hara visiho.
9Na hajai hi Sameria moaso mea, Sura sava iniho na Ju oituhau na pei, inau na hajai hi Sameria? (Ra Ju tesatuatua me ra tajua hi Sameria.)
10Iesu moasoliliu, moaso mea, Va oipinisi na rahuvuso hi Atua, va oipinisia isei motuhaho, Oirahu na pei ta meau, oituhae mine me morahu ta meho na pei hina mauri.
11Na hajai moaso mea, Pilam tamali mojoa, Varese, na moru-papa mosivo jua. Oilavi na pei tahamauri veae?
12Oipinisi jivi na tamaja Jekop isei morahu meja na moru-papa, moomia, ra matuna, ra pilana pullok mono?
13Iesu moaso liliu, Hire vunuvunu teoo na pei naa tetamarorou:
14Maa tea mooo na pei arahu ta mea, mosatamarorou; maa na pei arahu ta mea mojumajuma me na lolona, mojumajuma me na mauri tuitui.
15Na hajai moaso mea, Varese, oirahu na pei naa ta meau sura asamarorou asanumai sura tohia.
16Iesu moaso mea, Oilaho oiore tupumu, oitanumai.
17Na hajai moaso liliu, Na tupuu mojoa. Iesu moaso mea, Oiaso taharahu na tupumu mojoa.
18Mine ra tupumu molima; na tajua oitoho mea naanoi mosatupumu; ihisa oiaso paleeno, oiaso taharahu.
19Na hajai moaso rriea, Varese, aninima iniho na provet.
20Ra tamaja telotu mine me na vuti naa: otoaso ra tajua tesilotu me Jerusalem.
21Iesu moaso mea, Hajai, oirohoroho meau, na rani imalua pa ihisa otosalotu me Tata me na vuti naa, e me Jerusalem.
22Amiu ra tanoho hi Sameria otolotu me itea otosapinisia; tolotu me motea topinisia, suria na jolo imalua me ra Ju.
23Na rani imalua, monie naanoi, ihisa ra tahalotu taharahu telotu pa me Tata hi ra talumera me na taharahu mono.
24Atua na Talume: hire telotu mea tesilotu mea hi ra talumera me na taharahu
25Na hajai moaso mea, Apinisi na Mesaias momalua pa, na hisena Kristo; me na rani momalua movaraija ra sanu vunuvunu.
26Iesu moaso mea, Inau isei moaso meho, inau inie.
27Naanoi ra uluo hina temalua, teuloulo suria molalaa me na hajai; maa saitea hire motuhae Oitiro na sava? e sura sava oilalaa mea?
28Na hajai mojuri-toho na tamali, molaho me na vanuana, moaso me ra tajua,
29Otonumai, otoreni na tajua movaraiau ra sanu vunu-vunu aivera: inie na Kristo?
30Tau tejuri na vanuara temalua mea.
31Naanoi ra uluo hina tetuhae, Varese, oihani hamu?
32Maa moaso mera, Ahani na hanihani otosapinisia.
33Suria ra uluo hina teaso, Na tajua motea morahu na hana ta mea?
34Iesu moaso mera, Na hau na vei ra sanu inie isei mosulau momejeira, na vei sori vunuvunu na pilana varao.
35Otoaso, Na hapatia movate tetohoreji mine na ari oni? maa aaso me amiu, Otoriosahe, otoreni na vonana, vahatea movoe sura ari oni.
36Na tajua tahavilehuhure molavi na volina, movile-huhure suri na mauri tuitui, sura ra tajua tahalavo me ra tajua tahavilehuhure teejieji vahatea.
37Na aso tahavaivai moaso, Motea molavo, motatea movilehuhurea.
38Asula amiu sura vilehuhure veae otosavarao: valura tajua tevarao mine maa otolavi ra sanu tahonai hina.
39Ra tajua ra tari hi Sameria hi na vanua natuha terohoroho mea suria teroho na loena hajai isei movetiveti, Movaraiau ra sanu vunuvunu aivera ihlotu uena mine.
40Suria ihisa ra tajua hi Sameria temalua mea tetuhae motoho valuira: Motohoae na rani morua.
41Ra tanoho ra tari maa terohoroho suria na loena.
42Teaso me na hajai, Naanoi torohoroho, sa suria toroho na leomu, maa suria toroho Iesu, topinisi tahaalua raija rahu inie na Kristo, na Tahajolo hi na ulu.
43Tau na rani morua, molaho, movano me Kalili.
44Iesu moaso, Tejore na provet me na sivanuana.
45Ihisa momalua me Kalili, ra tajua hi Kalili telavia, suria tereni mine ra sanu movera me Jerusalem me na Hanihani Tahajia: suria hire mono tevano me na Hanihani.
46Iesu momalua vahatea maa me Kena hi Kalili veae moali na pei mo-uain. Na varese monieae, na matuna morojo me Kaperneum.
47Ihisa moroho Iesu momajuri me Jutia momimai me Kalili, movano mea motuhae mosumai, movei na matuna mohauhaua; suria vahatea momate.
48Natuha Iesu moaso mea, Vai amiu otosareni ra matamata me ra sanu uloulo otosarohoroho pa.
49Na varese moaso mea, Moli, oisumai mine na matuu momate.
50Iesu moaso mea, Oimule, matumu lamane momauri. Na tajua mprohoroho me na leo hi Iesu, momule.
51Tomolaho reji me na rio, ra pilana tahavarao tepasuae, tevaraia, Matumu lamane momauri.
52Natuha motuhara, Movaere na mauri hauhaua me na hisa? Teaso mea, Me na novi, na matana maso motea, na jaeluluvahi mojuria.
53Suria na tamana mopinisi na matana maso mopalahi ihisa Iesu moaso mea, Na matumu lamane momauri. Inie morohoroho mea me ra uluo hina peana mono.
54Naa na vaharuana sanu uloulo Iesu movea tau mo juri Jutia monumai me Kalili.
હાલમાં પસંદ કરેલ:
Jon 4: TLM9109
Highlight
શેર કરો
નકલ કરો
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
