Jon 13
13
SOPENA 13.
1Mine na Hanihani hina Salehauli, Iesu mopinisi na rani imalua molaho ture na ulu mosahe me Tata; maa momeje ra uluo hina me na ulu, momejeira me na tahuna.
2Na hanihani hina ravi mosori (na Tamate mojuri na ninima me na loloi Jutas Iskariot matui Saimon sura mahui nie.)
3Iesu mopinisi Tata morahu ra sanu vunuvunu me ra havena, momaraha me Atua, molaho me Atua.
4Momaraha me na hanihani hina ravi; mojuri na visivisina; motalihe na ruru mosimosi mea.
5Tau mojeje na pei me na rova, movaere na rasi ra era uluo hina, momosira hina ruru mosimosi motalihea mea.
6Monumai tau me Saimon Piter; Piter moaso mea, Moli, oirasi ra eu?
7Iesu moaso liliu, moaso mea, Na sanu aivea oisapi-nisia naanoi; maa taupa oipinisia.
8Piter nioaso mea, Oitena rasi ra eu. Iesu moaso liliu mea, Va asarasiho oisapilau.
9Saimon Piter moaso mea, Oisarasi ra eu hasa maa ra haveu na reu mono.
10Iesu moaso mea, Isei mololosso mosarasi ra ena hasa maa movoe vunuvunu: otovoe, maa sa amiu vunuvunu.
11Suria mopinisi isei momahui nie: suria moaso, Sa amiu vunuvunu otovoe.
12Tau morasi ra era tau, motapuna riria, mosihe toho, moaso mera, Otopinisi na sanu aivea me amiu?
13Otojuriau Varese me Moli: otoaso tataholo: suria motaharahu.
14Va inau na Moli na Varese arasi ra emiu mine; amiu mono otosirasi ra era tuamiu.
15Arahu me amiu na pisahi sura otovei palahi aivea me amiu.
16Motaharahu, aaso me amiu, Na tajua tahavarao mosasale jivi na varese hina: na varisula mosasale jivi na tahasulae.
17Va otopinisi na sanu naa otoejieji va otovea.
18Asaaso suri amiu vunuvunu: apinisira isei alavira; maa sura na pepe tapu motaraae, Inie isei mohani valuiau motilau hina hutu hina ena.
19Naano avarai amiu mine imalua, sura me na rani imalua, otorohoroho inau inie.
20Motaharahu aaso me amiu, Isei molavi na tajua asulae molaviau: isei molaviau molavi na tahasulau.
21Ihisa Iesu moaso paletuha momamahanu me na talumena, movetiveti, moaso, Motaharahu, aaso me amiu, motea himiu momahui nau.
22Natuha ra uluo hina tetapura renira, tesapinisi moaso suri isei.
23Motea hira uluo hina isei Iesu momejeia, moveserahi me na vusoi Iesu.
24Suria Saimon Piter mosuhunaho nie sura motuhae moaso suri isei.
25Inie isie moveserahi me na vusoi Iesu moaso mea, Moli, inie isei?
26Iesu moaso liliu, Inie na tajua arahu na sopena pret mea tau avuia. Tau movui na sopena morahu nie ta me Jutas Iskariot, na matui Saimon.
27Tau na sopena pret, Setan moruhusahe mea. Natuha Iesu moaso mea, Na sanu oivea, oisivea vahatea.
28Saite tajua me na pilipili mopinisi sura sava moaso na sanu naa mea.
29Maa valura teninima, suria Jutas mopala na taha hina sule, Iesu moaso mea, Oivoli ra sanu tomejeira sura hanira, e morahu taiti me ra tajua tipa. 30Inie isei molavi na sopena pret molaho vahatea; mopohi.
31Suria, tau moruhusivo, Iesu moaso, Naano na Matui tajua mojehejehe me Atua molavi na jehejehe suria.
32Va Atua molavi na jehejehe suria, Atua motapuna jehejeheia, vahatea movea mojehejehe.
33Paule taiti, atohotoho taiti reji valui amiu. Ototiroau pa: palahi aaso me ra Ju, Veae alaho otosapinisa numai; suria avarai amiu.
34Na Leo Hauhaua tahahavui arahu me amiu, Otosimejemejeamiu: palahi ameje amiu otosimejemeje amiu.
35Suria ra sanu naa ra tajua vunuvunu tepinisi amiu ra uluo hiu, va otomejemeje amiu.
36Saimon Piter moaso mea, Moli, oilaho veae? Iesu moaso liliu, Veae ailaho oisapinisi na laho tahuu naanoi, maa oilaho tahuu taupa.
37Piter moaso mea, Moli, sura sava asapinisi na laho tahumu naanoi? Ajuri na seu mauri suriho.
38Iesu moaso liliu mea, Oijuri na semu mauri suriau? Motaharahu, aaso meho, Na toa lamane mosatararau mine oiiriau vahatolu.
હાલમાં પસંદ કરેલ:
Jon 13: TLM9109
Highlight
શેર કરો
નકલ કરો
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
